I viazadôrs che dai 24 di Mai indenant a son passâts pe stazion di Bordèu / Bordeaux a àn vût sot dai voi i prins manifescj di une campagne par promovi la lenghe ocitane e sensibilizâ la citadinance sul so ûs. La iniziative e interessarà pai prossims sîs mês 52 stazions des regjons aministrativis de Ocitanie e de Gnove Aquitanie. Dongje dai placâts, si previôt ancje une campagne su la Rêt che e varès di rivâ a tocjâ almancul 800 mil personis e il lanç di un sît Internet di pueste (jemejettealoc.com). Daûr di chestis azions al è l’Ufici Public pe Lenghe Ocitane (ÒPLO) che lis à presentadis intant di une conference stampe che si à tignude ai 26 di Mai. Ta chê ocasion si à fat ancje savê che dentri de fin dal an i avîs sui trens des liniis Tolosa / Toulouse - Aush / Auch e Pòrt Bou / Port-Bou - Salsas / Salses a saran dâts fûr in forme bilengâl, par francês e par ocitan.
12/06/21
Irlande: fonts pes produzions audiovisivis par gaelic e scots
Il segretari di stât pe Irlande dal Nord, Brandon Lewis al à comunicât che il guvier britanic al metarà doi milions di sterlinis par finanziâ i fonts pes produzions audiovisivis in lenghe gaeliche irlandese e te varietât scots dal Ulster. Si trate di risorsis impleadis par produsi cines, programs televisîfs e radiofonics, ma ancje contignûts digjitâi, interatîfs e didatics ta chestis lenghis. I bêçs a van a cuvierzi dôs anualitâts finanziariis a cjaval jenfri 2020 e 2022.
Paîs Basc: la Navare e vûl i documents di identitât bilengâi
Il guvier de Navare al à domandât a chel spagnûl che i documents uficiâi tant che cjarte di identitât e patente a puedin jessi fats in forme bilengâl, o sei par basc e par castilian. Intal 2012 al jere stât il Parlament locâl a fâ indenant une domande similâr ma cence sucès. Dut câs cumò si stime che la composizion diferente dal guvier di Madrid e puarti a di un risultât diviers. La Navare e je la uniche tra lis Comunitâts autonomis cuntune lenghe couficiâl a no vê la pussibilitât pai citadins di otignî documents uficiâi bilengâi. In dì di vuê, par podê vê i documents ancje par euskara, i citadins de Navare a scugnin lâ a domandâju te Comunitât Autonome Basche.
Paîs Catalans: inmò in cressi i cines sottitulâts par catalan
Il guvier de Catalogne al à rignuvît ancje pal 2021 l’acuardi cu la Movistar+ par incressi i titui sottitulâts o dopleâts par catalan su la sô plateforme di distribuzion. Di cuant che e je tacade la colaborazion, intal 2014, a son stâts sottitulâts par catalan 1.788 cines e 2.171 episodis di 22 seriis televisivis. Dal 2017 incà, invezit, l’acuardi al cjape dentri ancje lis dopleaduris cul risultât di meti a disposizion dai utents de plateforme 126 cines dopleâts par catalan. Intal 2021 a saran sottituladis 300 gnovis pontadis di seriis televisivis e altris 280 cines, che a passaran cussì i 2 mil titui disponibii. La Movistar+ e à plui di un milion e 100 abonâts tra Catalogne, Paîs Valenzian e Baleârs. Daûr di un studi fat de stesse compagnie, al ven fûr che la iniziative e jude a cressi l’interès dai abonâts e à miorâ la sô imagjin publiche.
Font: Generalitat de Catalunya, 25/05/21
Irlande: mobilitazion a Stormont pe leç linguistiche
Ai 25 di Mai si à tignude denant dal palaç dal Parlament de Irlande dal Nord, a Stormont, une manifestazion par domandâ une leç organiche pe lenghe irlandese. Al centri de iniziative un schermi gjigant là che a son stâts proietâts i messaçs indreçâts ai deputâts di setante personis rapresentativis dal moviment pe lenghe. I acuardis di pâs pe Irlande dal Nord dal 2006 (Saint Andrews Agreement) a previodevin in maniere esplicite che il guvier britanic e chel nordirlandês a fasessin buine une leç pal gaelic irlandês. Dopo agns di inativitât, intal Zenâr dal 2020 i partîts nordirlandês a vevin aderît a di un pat di legjislature (New Decade, New Approach) che al previodeve di imbastî dentri di sîs mês une normative pal irlandês. La manifestazion e je stade clamade adun a cinccent dîs di chel pat par riclamâ i parlamentârs al impegn che si vevin cjapât. Ae iniziative a àn partecipât delegâts di ducj i partîts rapresentâts inte Assemblee nordirlandese (Sinn Féin, SDLP, Alliance Party, People Before Profit) fûr che chei unioniscj.
Scozie: incuintris publics pal gnûf plan pal gaelic
Vie pal mês di Jugn la agjenzie pe lenghe gaeliche scozese Bòrd na Gàidhlig e davuelzarà cinc incuintris sul teritori par tirâ sù propuestis, valutazions e coments sul stampon dal gnûf Plan nazionâl pe lenghe gaeliche che al varà di saltâ fûr intal 2023. I apontaments a saran dedicâts a temis specifics, ven a dî al ûs dal gaelic intes isulis ocidentâls e tes areis rurâls là che al è ancjemò lenghe vive, intes areis urbanis e tes grandis citâts, inte Rêt e tai canâi sociâi, framieç dai zovins e tra chei che a fevelin dome par inglês ma a vuelin svicinâsi a cheste lenghe. Par vie de pandemie l’acès a chescj incuintris al sarà limitât ma, chel istès, si podarà contribuî cun materiâi mandâts vie pueste eletroniche o, se e sarà avonde domande, ancje cun altris iniziativis publichis. Cheste fase di scolte e di confront, si zonte aes valutazions za racueltis cuntun cuestionari in rêt che al jere stât lançât ai 10 di Dicembar dal an passât e a di un prin confront cu lis comunitâts locâls davuelt intal 2020.
Paîs Basc: mobilitazion in difese dai dirits linguistics
La sentence dal tribunâl superiôr di justizie dal Paîs Basc (TSJPV) che e judiche discriminatori il criteri linguistic doprât intun concors public par selezionâ il personâl de polizie locâl di Irun, e à fat saltâ sù i moviments sociâi che a lavorin pe lenghe basche (unîts intal coordenament Euskalgintzaren Kontseilua) che ai 22 di Mai a àn manifestât fûr dal tribunâl di Bilbo / Bilbao. No si trate di un câs isolât – a àn dite – ma di une strategjie là che il podê judiziari al è daûr a decidi la politiche linguistiche par mieç di reinterpretazions de leç. Un tant – a zontin – al va a colpî ancjemò plui a fonts i dirits linguistics dai citadins parcè che un trop di judiçs al decît cui che al à di fevelâ par basc e cui no. Par Kontseilua, par fâi cuintri a cheste menace, si à di imbastî une aleance strategjiche tra fuarcis sociâls, politichis, sindacâls e aministrazions publichis che e permeti di blindâ il cuadri normatîf de lenghe basche e impedî che la magjistrature e puedi decidi la politiche linguistiche interpretantlu come che i va miôr.
Stât francês: mobilitazions dopo de sentence su la de leç Molac
Ai 24 di Mai, cu la publicazion su la gazete uficiâl de Republiche francese, e je jentrade in vore la prime leç organiche su la valorizazion e la promozion des cussì clamadis “lenghis regjonâls”, plui cognossude come “leç Molac”. Si trate però di une version divierse di chê fate buine ai 8 di Avrîl, a grande maiorance, de Assemblee francese. Cun di fat, a front dal ricors di un trop di deputâts de maiorance (saborâts, par ce che si dîs, dal ministri pe educazion Jean-Michel Blanquer), ai 21 di Mai la cort costituzionâl e à judicât contraris ae Costituzion i articui 4 e 9 de leç, o sei chel che al varès permetût di puartâ il model a imersion tes lenghis minorizadis dentri dal sisteme scolastic public e chel che al garantive l’ûs dai segns diacritics tipics di chestis lenghis intai documents di stât civîl. Dopo de sentence, si varès vude la pussibilitât di tornâ a puartâ la leç in aule par justâ i articui contestâts ma il president de Republiche francese, Emmanuel Macron, cundut des declarazions publichis là che al marcave la ricjece rapresentade de pluralitât linguistiche, al à pesseât a firmâ la leç sierant cussì la strade par une sô revision. Il prin ministri francês Jean Castex, invezit, al à dât la incarghe a doi deputâts di studiâ a fonts l’impat de sentence sul insegnament des lenghis minorizadis ancje se, a so parê, la decision dai judiçs costituzionâi no met in pericul l’insegnament imersîf in vore tai istitûts privâts o parificâts e, al contrari, e conferme lis novitâts de leç Molac che a rindin plui sigûr il lôr finanziament. Chel istès, la sentence e à jevât une fuarte indignazion framieç des comunitâts minorizadis là che, in plui des reazions duris rivadis di rapresentants dal mont politic, culturâl, educatîf e associatîf, miârs di personis si son dadis adun in place ai 29 di Mai in disinis di localitâts de Alsazie, de Bretagne, de Corsiche, de Ocitanie, dal Paîs Basc e de Catalogne dal Nord par difindi il dirit a vivi ad in plen tes lôr lenghis.
Galizie: Parlament pe normalizazion linguistiche te sanitât
Il Parlament galizian al à fate buine, ducj dacuardi, une iniziative dal BNG par sburtâ l’esecutîf a normalizâ la presince dal galizian intes struturis sanitariis e a garantî che dute la documentazion pai pazients e sedi disponibile ancje te lenghe proprie. L’at aprovât de Cjamare dai deputâts al previôt po che il guvier si impegni par meti a disposizion dal personâl che al lavore ta chestis struturis dai percors formatîfs par fâur cognossi i dirits linguistics dai pazients e par garantîur lis competencis linguistichis necessariis.
Paîs Basc: plan par promovi l’euskara tal mont digjitâl
Ai 21 di Mai il guvier de Comunitât Autonome Basche al à presentât un plan che al met adun 10 racomandazions e 24 propuestis di intervent par promovi l’euskara intal mont digjitâl. Lis racomandazions, che a van a cuvierzi la dade 2021 – 2024, a previodin che si sburti l’ûs de lenghe proprie tai mieçs di comunicazion digjitâi e la produzion di contignûts par basc, massime chei di intratigniment pai zovins e chei didatics. Si racomande po di promovi lis aplicazions par dispositîfs mobii e il disvilup di tecnologjiis dal lengaç par euskara, di garantî la presince di cheste lenghe tes plateformis plui dopradis, di dâi visibilitât al basc e ai imprescj digjitâi ta cheste lenghe, di tignî controlât il setôr par rigjavâ dâts precîs sul ûs dal euskara tal mont digjitâl.
Paîs Basc: tal 2022 plateforme OTT cu lis produzions baschis
Vie pal 2022 la radiotelevision publiche basche EiTB e inviarà une plateforme digjitâl OTT, come a dî une sorte di Netflix basc. La gnove e je stade anticipade ai 19 di Mai dal diretôr gjenerâl de emitente, Andoni Aldekoa. La intenzion e je di meti sù une sorte di barcon viert sul Paîs Basc che nol proponi dome lis produzions di EiTB ma ducj i contignûts audiovisîfs produsûts in Euskal Herria, curts e luncmetraçs, documentaris, seriis televisivis, spetacui e v.i. La plateforme no varà dome contignûts par euskara, ma une des sôs finalitâts primariis e sarà propite chê di dâi spazi e promovi la lenghe basche.