Europe: pas di Madrid pal ûs des lenghis couficiâls a Bruxelles

Il guvier spagnûl al à fat indenant une domande formâl al Parlament european par che si ricognossi la pussibilitât di doprâ il basc, il catalan e il galizian intant des riunions plenariis de istituzion. L’esecutîf di Madrid si è impegnât a cuvierzi dutis lis spesis che cheste iniziative e compuartarès e si à declarât disponibil a discuti daurman i detais pratics par che la domande si concretizi. Chest pas al jere tra chei concuardâts inte taule di dialic jenfri il guvier spagnûl e chel catalan.

Font: VilaWeb, 16/09/22

Europe: nuie fonts pal progjet IndyLan pes lenghis minorizadis

IndyLan – la aplicazion nassude cun chê di fâ cognossi lis lenghis minorizadis e lis comunitâts che lis fevelin – no sarà plui finanziade. Il progjet, disvilupât inte suaze de universitât Heriot-Watt di Edimburc, al veve di fat podût disvilupâsi in gracie dai fonts europeans dal program Erasmus+ che, cu la sierade progressive dai canâi economics leâts ae partignince ae UE, cumò no son plui disponibii. In plui di meti a disposizion elements lessicâi, fraseologjics, gramaticâi e di comprension auditive par tacâ a imparâ basc, cornic, gaelic, galizian, sami e scots, chest imprest al ufrìs ancje acès a informazions culturâls che a permetin di cognossi plui a fonts ancje i popui che a fevelin chestis lenghis. Cence fonts la aplicazion no podarà incressi i siei contignûts e nancje zontâ altris lenghis minorizadis europeanis. I siei ideadôrs a àn cussì decidût di meti a disposizion in forme libare il codiç dal program di maniere che altris comunitâts a puedin fâle lôr e impleâle par fâ cognossi la proprie lenghe e la proprie culture.

Font: Neofalantes, 18/08/22

Galizie: libris, par A Mesa la Xunta e favorìs il castilian

La organizazion A Mesa pola Normalización Lingüistica e denuncie che i bants publicâts chest an dal esecutîf de Galizie (Xunta) par judâ a comprâ lis novitâts editoriâls e par miorâ lis colezions des bibliotechis locâls a penalizin la lenghe proprie. L’an passât a jerin stâts assegnâts 100 mil euros par comprâ libris gnûfs par galizian e 200 mil par miorâ il patrimoni librari des bibliotechis e, ta chest secont câs, almancul il 25% dai acuiscj al veve di jessi di publicazions in lenghe proprie. Chest an la cifre e je cressude e no di pôc cun 200 mil euros par cjoli libris gnûfs par galizian e 550 mil par miorâ lis colezions des bibliotechis. Dut câs, par chest secont bant, al è sparît il vincul di comprâ almancul il 25% dai libris par galego e al è stât fissât invezit l’oblic di comprâ almancul il 50% des publicazions par castilian. La eliminazion di ogni garanzie pe lenghe proprie e je stade motivade dal esecutîf galizian cul fat che i bants a son finanziâts cun fonts europeans (NextGenerationEU) che a previodaressin vincui linguistics che no lassin spazi di manovre ai guviers locâi.

Font: A Mesa, 04/07/22

Stât spagnûl: no al ûs des lenghis couficiâls in Parlament

I vôts dal PSOE a son stâts decisîfs, in zonte a chei de diestre spagnoliste (PP, Ciudadanos e Vox), par boçâ la propueste di riforme dal regolament de Cjamare dai deputâts spagnole che e varès permetût di doprâ lis lenghis ricognossudis come couficiâls intes Comunitâts autonomis intes riunions plenariis de Assemblee, ta chês des comissions e te trascrizion dai lavôrs parlamentârs. A dimostrazion pratiche che intal Parlament spagnûl nol esist spazi che pal castilian, i deputâts espression des nazionalitâts minorizadis che a àn provât a intervignî in aule te lôr lenghe proprie a son stâts cidinâts pôc dopo vê cjapade la peraule.  

Font: EiTB, 21/06/22

Galizie: in cressi lis denunciis par dirits linguistics violâts

In Galizie, il numar di segnalazions par violazion dai dirits linguistics presentadis alì dal difensôr civic (Valedor do Pobo) al è cuasi triplicât rispiet al an passât passant des 96 dal 2020 aes 261 dal 2021. Al è ce che al salte fûr de informative che la difensore civiche Dolores Fernández Galiño e à consegnât ai 20 di Jugn al president dal Parlament de Galizie, Miguel Ángel Santalices. Des denunciis ricevudis, 36 a son stadis ziradis al difensôr civic statâl par vie che a fasevin riferiment ae esclusion dal galizian dai servizis statâi in Galizie. Pôc mancul dal 90% des segnalazions si riferìs ae aministrazion galiziane, ma no mancjin denunciis par violazions dai dirits linguistics fats di aministrazions locâls, agjenziis publichis e universitâts. Par chel che al rivuarde i servizis gjestîts de Comunitât autonome, cuasi une segnalazion su cuatri e interesse la sanitât.  

Font: Nòs Diario, 21/06/22

Galizie: lis propuestis di Fala Ceibe pal galego dal Bierzo

Intant dal incuintri “Medra a lingua”, che si à tignût a Coruña, il coletîf Fala Ceibe al à presentât lis rivendicazions che a rivin des tieris di lenghe galiziane che si cjatin di fûr de Comunitât autonome de Galizie, o sei Bierzo, Eonavia e alte Seabra / Sanabria. La prime si riferìs propite ae maniere di definî la lôr lenghe, domandant che si dopri la espression galego estremeiro e no galego exterior. Si domande po di infuartî i riclams al galizian estremeiro te leç di normalizazion linguistiche de Galizie e che lis istituzions autonomichis a difindin lis comunitâts che lu fevelin des menacis che si cjatin a subî. Par chel che al rivuarde il Bierzo, in particolâr, si invide lis autoritâts de Galizie a sburtâ par che il protocol sul insegnament al sedi metût in vore in dutis lis scuelis dal teritori, ma ancje par infuartî la atenzion par cheste aree te radiotelevision publiche, tes politichis culturâls e ta chês turistichis.  

Font: Consello da Cultura Gallega, 16/06/22

Stât spagnûl: azion a pro des lenghis uficiâls in Parlament

Il grup parlamentâr di Unidas Podemos, intune cui principâi partîts nazionalitaris bascs, catalans e galizians (EH Bildu, PNV, ERC, Junts, CUP, PDeCat, Más País, Compromís, BNG), a àn presentât inte Cjamare dai deputâts di Madrid une propueste di riforme dal regolament dal Parlament che e permeti, ancje par mieç di un sisteme di traduzion simultanie, di intervignî intant dai lavôrs de session plenarie tune des lenghis ricognossudis come couficiâls a nivel teritoriâl. La propueste e previôt ancje la pussibilitât di presentâ tescj scrits inta chestis lenghis e di garantî il lôr ûs par iniziativis inmaneadis dentri dal Parlament. In dì di vuê, l’ûs di basc, catalan e galizian al è permetût, in forme parziâl, dome intant dai lavôr dal Senât. La aprovazion de propueste, che e viôt contrariis lis diestris spagnolistis (PP, Ciudadanos e Vox), e dipendarà massime dal vôt dai socialiscj che, fin cumò, nol è che si vedin mostrâts masse cjalts sul teme.

Font: Galicia Confidencial, 25/05/22

Galizie: in place par rivendicâ il dirit a vivi ad in plen par galego

In ocasion de Zornade de culture galiziane, ai 17 di Mai, diviers centenârs di personis a àn sfidât il burlaç che al à colpît S. Jacum di Galizie (Santiago de Compostela) par domandâ un avignî gnûf pe lenghe proprie. In plui di tancj citadins comuns, tra i manifestants che a àn sfilât pes stradis de capitâl de Galizie in rispueste al apel de plateforme civiche Queremos Galego a jerin ancje i rapresentants principâi dai partîts nazionalitaris e progressiscj che, in dì di vuê, si cjatin ae oposizion. Di ducj al è rivât l’inviât al guvier dal PP – di pôc passât intes mans di Alfonso Rueda – a derogâ la cussì clamade leç sul plurilinguisim che e je daûr a pidimentâ l’insegnament dal e par galizian.

Font: EFE, 17/05/22

Galizie: iniziative pal ûs normâl dal galego te polizie locâl

Il diretîf de Federazion Galiziane dai Comuns e des Provinciis (FeGaMP) al à fat buine une declarazion istituzionâl là che si cjape posizion a pro dal ûs dal galego tant che lenghe juridiche e aministrative. Tal document si va, in particolâr, a segnalâ la dibisugne di normalizâ l’ûs de lenghe proprie pal personâl de polizie locâl.

Font: Consello da Cultura Galega, 12/05/22

Galizie: campagne par promovi la lenghe proprie su la Rêt

Promovi la leture par galego e slargjâ il so ûs su la Rêt. Al è il dopli obietîf de iniziative «Subscríbete ao galego» imbastide de Associazion dai Mieçs di Comunicazion par Galizian (AMeGa) intune cu la societât Dinahosting e la fondazion PuntoGal. In buine sostance, a ducj chei che vie pal mês di Mai si abonin ai media digjitâi par galizian (Nós Diario, Radiofusión, Tempos Novos, Praza, Luzes, O Sil, Revista Mazarelos, Nós TV, O Barbanza, Código Cero) ur ven dade la pussibilitât di doprâ par un an un domini .gal e un spazi web che i dedi acet cence spindi un franc.

Font: Código Cero, 06/05/22

Galizie: ai 17 di Mai di gnûf in place pe lenghe

La plateforme sociâl Queremos Galego, che e met adun centenârs di sogjets impegnâts pe lenghe galiziane, e à presentât i detais de manifestazion che e organizarà ai 17 di Mai, in ocasion dal Día das Letras Galegas, a Sant Jacum di Galizie (Santiago de Compostela). Il sproc de iniziative di chest an al sarà «En galego agora e sempre. Por un novo futuro para a lingua galega» (Par galizian cumò e simpri; Par un avignî gnûf pe lenghe galiziane). Il puartevôs de plateforme, Marcos Maceira, al à invidât i citadins a partecipâ in maniere massive tun moment clâf pal avignî de lenghe, là che il 24% dai fruts sot dai 15 agns nol è bon di fevelâ par galego – il dât piês di simpri – ma ancje là che, cu la mobilitazion e l’impegn di tancj di lôr, si à rivât a otignî risultâts impuartants tant che la incressite di contignûts in lenghe proprie su lis plateformis audiovisivis e il ricognossiment dal dirit a vê rispuestis par galizian intai rapuarts cu la agjenzie des jentradis.

Font: Galicia Confidencial, 28/04/22

Galizie: manifestazion pal dirit ae autodeterminazion

Uns dôs mil personis a àn partecipât ai 24 di Avrîl a Sant Jacum di Galizie (Santiago de Compostela) ae manifestazion “Somos unha nación” clamade adun de plateforme Vía Galega par rivendicâ il dirit ae autodeterminazion e ricuardâ la cussì clamade “Revolución Galega” dal 1846. Vía Galega e je un coordenament sociâl in difese dai dirits nazionâi de Galizie che al ten adun passe sessante entitâts dal ambit culturâl, educatîf, sociâl, teritoriâl e sportîf. Intal at finâl de manifestazion a son stâts presentâts ancje un pôcs di dâts su la situazion economiche e sociâl de Galizie che a puartin i membris de plateforme a sburtâ par «rompi la dipendence coloniâl» cul stât spagnûl e par meti fin ae robarie des materiis primis, des risorsis naturâls e energjetichis produsudis in Galizie e gjoldudis inaltrò. La sovranitât, a zontin, e covente par indotâsi di un sisteme economic e fiscâl che al vedi al centri il benstâ de int che e vîf in Galizie ma ancje par fâi cuintri ae spagnolizazion simpri plui marcade che e menace la lenghe e la culture proprie di cheste tiere.

Font: Via Galega, 24/04/22

Galizie: azion par favorî i prodots culturâi par galego pai fruts

Ai 22 di Avrîl il Parlament de Galizie al à fate buine ae unanimitât une propueste no di leç là che si domande al esecutîf di sburtâ la creazion di prodots culturâi par galego pai minôrs e di imbastî campagnis par stiçâ i fruts e i fantats a disfrutâ de culture galiziane. L’intindiment al è chel di contribuî ae normalizazion de lenghe, di judâ la industrie culturâl locâl e di recuperâ il disvantaç cuantitatîf des produzions culturâls par galizian indreçadis ai plui zovins.

Font: Europa Press, 22/04/22

Galizie: agjenzie tributarie obleade a garantî l’ûs dal galego

La organizazion galiziane A Mesa pola Normalización Lingüistica e à batiât di “storiche” la sentence dade fûr ai 4 di Avrîl dal tribunâl superiôr di justizie de Galizie che e à anulât ducj i ats de agjenzie tributarie emetûts par castilian dopo che un citadin galizian al veve manifestât in maniere esplicite la volontât che i contats cun lui a fossin mantignûts inte sô lenghe proprie. La sentence, otignude ancje in gracie dal lavôr dai servizis juridics di A Mesa, e dîs a clâr che la agjenzie tributarie no pues sghindâ la sielte linguistiche manifestade dal contribuent e e conferme il dirit de popolazion galiziane a sielzi ce lenghe doprâ. Fintremai che la agjenzie no produsarà i ats par galizian, i proviodiments che a rivuardin il citadin che le à puartade in tribunâl no àn nissun valôr. «Cul esercizi dai dirits – al à comentât cun sodisfazion il contribuent galizian che al à tignût bot pai cuatri agns di durade de cause – si pues infuartî il status di normalitât pe nestre lenghe».

Font: Nòs Diario, 08/04/22

Galizie: cuasi 500 lis denunciis rivadis ae Liña do Galego

Ai 29 di Març la organizazion galiziane A Mesa pola Normalización Lingüistica e à presentât il rapuart su lis segnalazions racueltis vie pal 2021 cu la Liña do Galego, il servizi creât par cjapâ sù lis denunciis pe violazion dai dirits linguistics. Lis comunicazions rivadis l’an passât vie pueste eletroniche, par telefon o cu la aplicazion di pueste a son stadis 601. Di chestis 488 a jerin denunciis. La plui part si riferissin al compuartament des aministrazions publichis, là che i citadins a son plui cussients dai lôr dirits e duncje a son mancul disponibii a acetâ che a sedin violâts. No mancjin però lis segnalazions che a rivuardin lis grandis aziendis privadis (de Ikea a Google, di Endesa a Naturgy) che dispès no ufrissin servizis par galizian e in diviers câs a doprin i toponims locâi in forme castilianizade. A Mesa e à ricuardât ancje cemût che, in gracie di chestis segnalazions, si vedi rivât a dreçâ diviersis situazions. La Liña do Galego e mostre duncje di jessi un imprest simpri plui util e che al ven tignût di riferiment par monitorâ la tutele dai dirits ancje di istituzions internazionâls tant che il Consei de Europe.

Font: A Mesa, 29/03/22

Galizie: .gal sore nuie pes impresis di “Abertos ao Galego”

PuntoGal e la organizazion A Mesa pola Normalización Lingüística a àn concuardât une promozion che e ufrìs aes ativitâts economichis che a partecipin al progjet “Abertos ao Galego” e che ancjemò no àn un domini internet .gal di otignîlu cence vê di paiâ. E sarà la organizazion pai dirits linguistics a contatâ chestis realtâts intes prossimis setemanis par proponiur cheste pussibilitât. “Abertos ao Galego” al è un progjet inviât intal 2008 di A Mesa par promovi l’ûs dal galizian intal setôr economic e par dâi visibilitât aes impresis che a implein la lenghe proprie te lôr ativitât.

Font: Codigo Cero, 17/03/22

Stât spagnûl: plui basc, catalan e galizian su Netflix

Netflix e slargjarà vie pal an la presince des lenghis couficiâls dal stât spagnûl intal so catalic. La plateforme, di fat, e incressarà in maniere progressive cun 70 titui gnûfs i cines e lis seriis disponibii ancje par basc, catalan e galizian. In dut, di chi ae fin dal an, si fevele di 600 oris di peliculis e seriis internazionâls sottituladis – 200 par ognidune des trê lenghis – e di 60 oris – 20 parom – di contignûts par fruts e fameis dopleâts par euskara, català e galego. Netflix e à ancje fat savê che il numar di titui disponibii tes lenghis couficiâls al larà a cressi in maniere continuative tai prossims agns e che si podarà viodiju in ducj i 190 stâts là che la plateforme e je presinte. La iniziative e je leade sei al test de gnove leç sul audiovisîf che il guvier spagnûl al è daûr a imbastî, sei ae mobilitazion di associazions e citadins sul teritori. Il coordenament basc Pantailak Euskaraz – nassût propit par sburtâ la presince de lenghe basche tal setôr audiovisîf – al à judicât la gnove juste come un prin pas, domandant di fâ di plui. La presince des lenghis couficiâls intal catalic dai abonâts e je passade dal 0,05 al 0,5% – a àn spiegât – che al vûl dî che al è ancjemò une vore pôc.

Font: Generalitat de Catalunya, 15/03/22; La Voz de Galicia, 15/03/22; EiTB, 15/03/22

Galizie: pas indaûr de lenghe tra i zovins e tes citâts

Daûr dal ultin scandai di Sondaxe, in Galizie la lenghe primarie di espression e je il galizian pal 22,5% dai intervistâts, il castilian pal 20,9%, plui il castilian dal galizian pal 20%, plui il galizian che il castilian pal 15,9% e lis dôs lenghis sù par jù te stesse maniere pal 17,8%. Sul puest di vore la situazion dal galizian e va in piês cun plui di un tierç dal campion che al dopre dome o cuasi il castilian. Il sondaç al mostre une presince ancjemò massive dal galizian intai paîs sot dai 5 mil abitants, là che doi tierçs de int e fevele dome o in prevalence in lenghe proprie, a front di un 24% tes citâts. Lis areis là che il galizian al è ancjemò la prime lenghe par plui dal 70% de popolazion a son l’Ourense e la Barbanza. Par chel che al rivuarde invezit la fasse di etât, l’ûs cuotidian dal galizian al è maioritari parsore dal 65 agns intant che nol rive nancje al 25% sot dai 30 agns. Di fat, daûr di une tindince che si à za viodude tai ultins agns, la lenghe proprie e piert teren massime tai centris urbans plui grancj e framieç dai zovins. Sul plan eletorâl, la dimension linguistiche e pues ufrî cualchi sorprese. La lenghe proprie, cemût che si pues imagjinâ, e je maioritarie framieç di cui che al vote pai moviments nazionalitaris (tant che il BNG) ma e je ancje chê plui doprade dal 40% dai eletôrs dal PP; il castilian al parone tra i votants dai partîts de diestre spagnoliste (Ciudadanos e Vox) ma ancje tra i progressiscj di En Común, intant che tra i eletôrs socialiscj lis dôs lenghis a son dopradis in percentuâls similârs.

Font: La Voz de Galicia, 05/03/22

Galizie: il setôr audiovisîf al reclame un leç par garantî il galego

Te facoltât di siencis de comunicazion de universitât di Sant Jacum di Galizie (USC) e je stade presentade la Iniciativa polo audiovisual en galego cun chê di rivendicâ il rispiet dai dirits de lenghe galiziane dentri de gnove leç gjenerâl su la comunicazion audiovisive che il guvier spagnûl al è daûr a imbastî. In particolâr, dongje dal domandâ il rispiet de diversitât linguistiche dal stât spagnûl, si propon di specificâ lis cuotis di programazion di contignûts produsûts in Galizie e par galego intes televisions e tes plateformis in linie. La iniziative e nas de colaborazion tra A Mesa pola Normalización Lingüística cul grup di studi sui audiovisîfs de universitât e cun diviersis organizazions di categorie o sindacâls dal setôr.

Font: Nòs Diario, 03/02/22

Galizie: te USC un cuart des oris di docence a son par galego

Daûr dal ultin studi sui ûs linguistics de universitât di Sant Jacum di Galizie (USC) al ven fûr che tal an academic 2021 – 2022 lis oris di insegnament par galizian a son il 23,40% dal totâl. La percentuâl e cres invezit intai masters là che si rive al 33,75%. La situazion dut câs e cambie avonde daûr de facoltât e dal cors di lauree. La situazion miôr e je chê de lauree par mestris di educazion infantîl e primarie, disponibile al 100% par galego. La facoltât cun plui oris di insegnament par galizian e je chê di siencis de comunicazion, là che si è sul 96%. Il studi al mostre ancje une tindince divierse intal ûs de lenghe proprie a seconde de categorie professionâl cui assegniscj di ricercje – prin scjalin de cariere academiche – che a doprin il galizian par cuasi il 44% des lôr oris di docence.

Font: USC, 02/02/22