Il guvier irlandês al à autorizât la nassite di un gnûf canâl televisîf par gaelic irlandês dut dedicât ai fruts inte suaze dal servizi radiotelevisîf public TG4. Par inviâlu a son stâts metûts 3 milions e 300 mil euros cjapâts dentri tai 7 milions e 300 mil euros di aument che il guvier al à decidût di meti par sostignî la radiotelevision publiche in lenghe irlandese. Si trate, par altri, dal aument anuâl plui alt assegnât fin cumò ae cjadene dedicade al gaelic.
Font: Gov.ie, 29/09/22
Su la fonde dai risultâts di une consultazion popolâr, vie pal Astât, il Consei comunâl di Béal Feirste / Belfast al à semplificât la normative sul ûs de segnaletiche stradâl bilengâl in citât. Cu la gnove normative – sostignude di Sinn Féin, Alliance Party, SDLP, People Before Profit e Verts, e contrastade dai partîts unioniscj – al è cetant plui sempliç domandâ e otignî che al non di une vie i si zonti ancje la version par irlandês. Dopo de modifiche de leç, a son za uns 500 lis domandis rivadis al comun par vê la segnaletiche bilengâl. La cuantitât di domandis e je une vore plui alte di ce che la aministrazion si spietave e duncje i citadins a son stâts invidâts a vê un tic di pazience par permeti al comun di gjestî dutis lis proceduris dal câs.
Font: Belfast Live, 21/09/22
La autoritât pe educazion nordirlandese, par mieç dal so plan operatîf 2022 – 2024, e larà a dopleâ il numar des scuelis secondariis che a àn l’irlandês di lenghe veicolâr. A vuê, intes sîs conteis irlandesis sot aministrazion britaniche, i centris educatîfs di chest gjenar a son dome doi: un a Dún Geimhin / Dungiven e un a Béal Feirste / Belfast. Il plan al previôt la nassite di altris dôs scuelis imersivis, une te aree setentrionâl de citât di Béal Feirste / Belfast e une altre te regjon di Tír Eoghain / Tyrone e Fear Manach / Fermanagh. Il numar di fameis che a vuelin iscrivi i fîs tes scuelis a imersion al va dilunc a cressi e ancjemò in Jugn il dirigjent dal istitût za atîf a Béal Feirste / Belfast al veve fat savê di vê nûfcent students iscrits, masse rispiet ai spazis disponibii te sô struture.
Font: Belfast Media, 02/09/22
Il Consei comunâl di Béal Feirste / Belfast al à comunicât i risultâts di une consultazion publiche su lis propuestis fatis indenant par mendâ la normative sul ûs de segnaletiche stradâl bilengâl in citât. La idee di fonde e je chê di rindi plui semplicis lis proceduris par zontâ al non de vie par inglês ancje chel par irlandês. Cu la gnove normative – sostignude di Sinn Féin, Alliance Party, SDLP, People Before Profit e Verts, e contrastade dai partîts unioniscj – al bastarès un resident o un conseîr comunâl par imbastî une consultazion tra i citadins che a vivin inte vie che si volarès meti il non bilengâl e uns 15% di favorevui par zontâ ancje il non par irlandês. Chestis propuestis a son stadis puartadis al esam dai citadins che te consultazion publiche che si è tignude tai mês stâts si son declarâts a pro de semplificazion normative tune misure di sù par jù il 60% dai partecipants.
Font: Belfast Live, 28/07/22
I doi ministris de Republiche di Irlande cun deleghe su la lenghe gaeliche e su lis comunitâts che le fevelin a àn fat savê che Údarás na Gaeltachta – la agjenzie di stât responsabile pal svilup economic des areis gaelichis – e ricevarà un finanziament di 3 milions e 169 mil euros, intant che Foras na Gaeilge – la organizazion publiche che i sta daûr ae promozion dal irlandês – a ‘ndi cjaparà 494 mil par disvilupâ lis ativitâts di planificazion linguistiche par chest 2022. La gnove e je stade comunicade in ocasion de scree dal gnûf servizi di promozion e di normalizazion de lenghe gaeliche de citât di Dún Garbhán / Dungarvan. Si trate dal setim plan linguistic che si invie in areis urbanis che si cjatin fûr dal Gaeltacht.
Font: Gov.ie, 14/07/22
La agjenzie pe promozion de lenghe gaeliche irlandese Foras na Gaeilge e à lançât une campagne par sburtâ lis comunitâts che si cjatin fûr dal Gaeltacht – lis areis là che il gaelic al è ancjemò doprât inte vite cuotidiane – a impegnâsi a promovi la lenghe proprie tal lôr teritori. L'intindiment al è chel di incressi il numar dai Gaelphobal, o sei di rêts tra sogjets diviers che a nivel locâl a disvilupin dai plans par promovi e infuartî l'ûs sociâl dal irlandês e a ufrissin servizis ae citadinance par sostignî chescj progjets di disvilup linguistic. Foras na Gaeilge e je daûr a invistî passe 4 milions di euros par poiâ lis politichis linguistichis in vot areis là che chest percors al è za in vore , sei te Republiche di Irlande che te Irlande dal Nord. Altris vincj areis a àn za tacât a movi i prins pas ta cheste direzion e a varessin di jessi cjapadis dentri tal progjet a pene che a varan fat bogns i lôr plans di disvilup linguistic.
Font: RTÉ, 20/06/22
Il comissari pe lenghe gaeliche irlandese, Rónán Ó Domhnall, al à presentât il so rapuart anuâl che al cjape dentri ancje lis segnalazions dai citadins su la violazion dai dirits linguistics. Segnalazions che, vie pal 2021, a son cressudis dal 20% rispiet al an prime. Un dai elements plui pençs pandûts dal document si riferìs ae mancjance di servizis disponibii par gaelic par chel che al rivuarde la gjestion de pandemie: dai servizis diagnostics fintremai al sisteme in linie par prenotâ lis vacinis, lis autoritâts statâls irlandesis no àn proviodût nissun servizi in lenghe proprie. Chel altri pont critic si riferìs ae dibisugne urgjente di integrâ e infuartî la normative su la lenghe irlandese fate buine tal 2021. Pe associazion pai dirits linguistics Conradh na Gaeilge, che si mostre cetant preocupade pai contignûts dal rapuart, par cambiâ cheste situazion si à ancje di rindi plui cussients i citadins dai lôr dirits e sburtâju a rivendicâju viodût che, vuê come vuê, si à une sorte di assuefazion ae mancjance di servizis par irlandês.
Font: CnaG, 15/06/22
Ai 25 di Mai la propueste di leç su identitât e lenghe de Irlande dal Nord e à tacât il so percors legjislatîf intal Parlament dal Ream Unît. Si stime che, par che e deventi leç, a coventaran almancul sîs mês. La norme e varès di fissâ i spazis di tutele e di promozion de lenghe gaeliche irlandese intes sîs conteis de Irlande dal Nord sot aministrazion britaniche. Pai sogjets che di agns si batin pai dirits linguistics si trate di un prin pas indenant ancje se il test al previôt mancul garanziis e mancul pussibilitâts di ce che si domandave e di ce che al jere stât prometût ancjemò cui acuardis di pâs pe Irlande dal Nord. Dopo agns di imobilisim, l’esecutîf britanic si à decidût a intervignî sei pal gnûf bloc des istituzions nordirlandesis – causât dai unioniscj dal DUP – che al impedìs ogni azion normative pe lenghe a nivel locâl, sei pal cressi de mobilitazion popolâr a pro dal irlandês che ai 21 di Mai si à concretizade ancje tune manifestazion di 20 mil personis a Béal Feirste / Belfast, la plui grande mai viodude in Irlande dal Nord su chest teme.
La riunion dal Parlament nordirlandês (Stormont) che si à tignude ai 13 di Mai e je stade la prime là che si à vût in intervent dut par gaelic irlandês. A fâlu e je stade la deputade dal Sinn Féin, Aisling Reilly. Il so intervent al è stât voltât sul moment in gracie dal gnûf servizi di interpretariât garantît de Assemblee sei pal irlandês che pe varietât di scots fevelât inte Irlande dal Nord. Si trate di un pas indenant pai dirits linguistics e pe avualiance, e à declarât la parlamentâr republicane invidant i coleghis ancje di chei altris partîts a zovâsi di cheste pussibilitât. Dut câs e à ancje riclamât la atenzion su la impuartance e la dibisugne di une leç organiche pal irlandês che, cundut che e je stade prometude zaromai di agns, ancjemò e mancje. A chest proposit, juste cualchi zornade prime, intant dal discors de regjine al Parlament di Londre, si à vude la sigurazion che la leç su la lenghe irlandese e sarès stade fate buine in curt. La declarazion e je stade cjapade cun cetante cautele dai ativiscj pe lenghe che al è di agns che a sintin prometi, ancje cun ats uficiâi, chest proviodiment cence che si rivi però a passâ des peraulis ai fats.
Al è un risultât storic chel des elezions pal Parlament de Irlande dal Nord che si son tignudis ai 5 di Mai. Cun di fat, pe prime volte di cuant che si àn istituzions autonomis pes sîs conteis irlandesis sot aministrazion britaniche, un partît nazionalist irlandês al è prin par vôts e deputâts elets. Cul 29% des preferencis, in cressi dal 1,1% rispiet aes elezions stadis, il Sinn Féin al à vût elets 27 parlamentârs. Il DUP, invezit, al è restât prin tra i partîts unioniscj, ma al à pierdût cuasi il 7% dai consens sbrissant jù al 21,3% e a 25 elets (3 in mancul di chei che al veve). Daûr si son plaçâts, cul 13,5% dai vôts (+4,5%) e 17 deputâts (+9), l’Alliance Party – partît che no si ricognòs ni come unionist e nancje come nazionalist – e, cul 11,2% dai consens (-2,9%) e 9 elets (-1), i unioniscj dal UUP. A completâ il cuadri dal elets a son 8 deputâts dal SDLP (nazionaliscj moderâts), 1 de Traditional Unionist Voice, 1 di People Before Profit (çampe radicâl) e 2 indipendents.
E je jentrade in vore tal mês di Març la gnove normative dade fûr dal ministeri pes financis de Irlande dal Nord che e garantìs la pussibilitât di vê versions bilengâls o ancje dome par gaelic dai certificâts di nassite, di muart, di matrimoni e di union civîl che, fin cumò, si podevin vê dome par inglês. Il prin certificât par irlandês al è stât fat a Béal Feirste / Belfast denant dal stes ministri pes financis, Conor Murphy, e di une delegazion de Conradh na Gaeilge, la organizazion pe lenghe irlandese che e à sostignût la iniziative. E je une azion inclusive pe lenghe e par cui che le fevele dopo agnorums di esclusion o margjinalizazion, al è stât il coment dai rapresentants de Conradh na Gaeilge. Si trate di un prin pas, ma significatîf, in direzion di un percors di regjistrazion dai dâts anagrafics che si puedi fâ dut di plante fûr ancje par gaelic.
Un scandai davuelt di Ireland Thinks – The Good Information Project al à palesât che al 65% de popolazion irlandese i plasarès che plui int e dopràs la lenghe proprie te vite di ogni dì. Cheste “simpatie” e à però di fâ i conts cuntune realtât là che a pene il 4% de popolazion al à une buine competence dal gaelic irlandês e lu dopre plui di une volte par setemane, il 13% al à un bon nivel di cognossince de lenghe ma le dopre plui da râr e il 52% al dîs di cognossi alc ma no avonde par rivâ, par esempli, a seguî un program televisîf o radiofonic dut par irlandês. Su chest front, di fat, dome il 5% dal campion intervistât al declare di seguî ogni dì programs radiotelevisîfs par gaelic. La competence linguistiche, dut câs, e cambie daûr de fasse di etât e la buine gnove e je che il nivel di fluence plui alt, o sei il 27%, si lu cjate framieç dai zovins jenfri 18 e 24 agns. Cheste fasse di etât e je ancje chê che pal 75% e stime che la lenghe e sedi fondamentâl o impuartante pe identitât nazionâl a front di un 53% di chei di mieze etât. Lis prospetivis pe lenghe a somein duncje miorâ cu lis gjenerazions plui zovinis. Sul front des misuris par incressi la presince dal irlandês te societât, il 29% dal campion al è dacuardi cul obietîf declarât dal guvier di reclutâ dentri dal 2030 almancul un funzionari public ogni cinc in stât di paronâ il gaelic, intant che pal 14% chest al è ancjemò masse pôc e pal 39% al è masse.
I esperts nomenâts dal dipartiment des comunitâts dal guvier de Irlande dal Nord a àn presentât lis lôr racomandazions par une strategjie pe lenghe irlandese. Il document al sarà cumò viert al esam e aes propuestis dai puartadôrs di interès. I esperts a invidin a fâ buine une leç pe lenghe ma a proponin ancje une rie di misuris di podê disvilupâ daurman. Sul lunc periodi – a disin – si à di proponisi come obietîf che pal 2042 a sedin almancul mieç milion i irlandês dal Nord che a cognossin la lenghe proprie; in dì di vuê a son plui o mancul 185 mil chei che a àn cualchi competence linguistiche par irlandês (il 21% de comunitât nazionaliste – catoliche, il 2% di chê unioniste – protestante). Par lâ ta cheste direzion, le educazion e à un pês centrâl: in dì di vuê 7 mil arlêfs – o sei il 2% de popolazion scolastiche – a frecuentin classis cul irlandês veicolâr; pai esperts cheste percentuâl e varès di rivâ al 10% tai prossims vincj agns. I fruts a varessin di fat di vê il dirit di studiâ par irlandês des scuelis de infanzie fintremai ae educazion superiôr e chest al domande ancje di cressi i percors di formazion pal personâl educatîf. I esperts a disin po che si à di cressi il numar di funzionaris publics in stât di doprâ la lenghe e che dutis lis struturis publichis a àn di jessi indotadis di tabelis e segnaletiche bilengâl. Une altre azion necessarie e je chê di incressi la cognossince de lenghe e i ategjaments positîfs tai siei confronts dentri de comunitât unioniste.
Il paîs di Béal Átha nGhaorthaidh / Ballingeary, te contee di Corcaigh / Cork, al podarès dâi acet al prin museu de isule dut dedicât ae lenghe irlandese e ae rinassince gaeliche. A ospitâlu al varès di jessi l’edifici là che tal 1904 si vevin tignûts i prins cors par formâ insegnants di gaelic irlandês. Par li a jerin passâts ancje un biel pôcs dai animadôrs de rinassince nazionâl e de lote pe indipendence de Irlande. Daûr de iniziative al è un comitât locâl che, in gracie di une donazion, al à za comprât il sît e al à za fat prontâ un studi di fatibilitât che al previôt un invistiment di 400 mil euros par puartâ insom il progjet. Cumò si à inviade la fase di ricercje des risorsis ma i organizadôrs a somein otimiscj su la pussibilitât di rivâ a meti sù il museu.
L’eurodeputât Seán Kelly al à fat indenant un emendament par irlandês sul stampon de opinion su la protezion dal multilateralisim imbastît dal comitât parlamentâr sul cumierç internazionâl. Si trate dal prin intervent legjislatîf di un organisim dal Parlament european scrit par gaelic. Un tant al è stât pussibil in gracie dal plen ricognossiment dal irlandês tant che lenghe di lavôr de Union Europeane. Prime il gaelic si podeve doprâlu dome par intervents orâi tes sessions plenariis de aule ma, cul status gnûf, al pues jessi doprât ancje tes comissions parlamentârs e tai lavôrs legjislatîfs.
Dal 2015 a vuê a son plui di 300 i ats di vandalisim fats cuintri de segnaletiche bilengâl par gaelic e inglês in Irlande dal Nord cuntun dam complessîf di cuasi 40 mil sterlinis. A voltis i responsabii a cuvierzin lis scritis o i nons par irlandês cu la vernîs, altris voltis a brusin o a tirin jù di plante fûr lis tabelis. Doi tierçs di chestis azions si centrin dal distret dal Mid Ulster là che la segnaletiche bilengâl e je plui frecuente. A preocupâ al è massime il fat che chescj ats vandalics a son daûr a cressi simpri di plui e si è passâts dai cinc episodis dal 2015 ai cent dal an passât. Lis organizazions pai dirits linguistics a invidin lis autoritâts a no cjapâ sot gjambe chestis azions e a perseguîlis come delits di odi cuintri di cui che al fevele par gaelic o si ricognòs te identitât irlandese.
A son une cincuantine i grups impegnâts pe lenghe irlandese che a àn sotscrit un apel public par domandâ al guvier britanic che al puarti in Parlament cence altris ritarts une leç su la promozion dal gaelic irlandês tes sîs conteis dal Ulster che a fasin part dal Ream Unît e par vê un incuintri urgjent su chest teme cui rapresentants dal esecutîf. In Jugn il segretari di stât pe Irlande dal Nord, Brandon Lewis, al veve sigurât che se lis istituzions nordirlandesis no vessin fate buine la normative dentri di Setembar, lu varès fat il Parlament di Londre vie pal mês di Otubar. Otubar al è passât, Novembar al è cuasi insom, lis sessions di lavôr in program a Westminster prime de fin dal an a son a pene une grampe e la leç sul gaelic no je stade inmò calendarizade. Un delegât dal esecutîf britanic al à sigurât che chest timp al ven doprât par meti jù un test che al minimizi il risi di emendaments e di un slungjâsi dai lavôrs de aule. Pe organizazion Conradh na Gaeilge però chest rimant continuât al è daûr a causâ une erosion de fiducie tal guvier di Londre, tant plui che lis istituzions britanichis si vevin impegnadis in maniere clare pe normative sul irlandês ancjemò tal 2006 cui acuardis di Sant Andree (Saint Andrews Agreement). I dirits rimandâts – a àn zontât – a son dirits dineâts.
Par iniziative de Bunscoill Ghaelgagh de isule di Man, dôs artistis a àn realizât une serie di cartulinis trilengâls pai fruts, adatadis ancje in formât di placât e dedicadis a siet temis diviers, o sei mangjâ, timp, emozions, animâi, colôrs, vistîts e splaze. Lis figuris a son compagnadis dai nons par manx, gaelic scozês e irlandês, ven a dî lis trê lenghis che a fasin part de famee gaeliche. Nassude di un viaç di studi in Irlande dal Nord fat dai fruts de Bunscoill Ghaelgagh intal 2019, cheste iniziative – ancje se piçule – e à un valôr simbolic impuartant. Lis cartulinis, di fat, a saran dopradis dai fruts de scuele a imersion de isule di Man par metisi in contat cun chei des scuelis gaelichis de Scozie e de Irlande par cognossisi miôr e infuartî i leams tra lis lôr lenghis.
Il prin ministri irlandês, Micheál Martin, al à presentât une gnove iniziative (Gradaim Gnó na hÉireann) che si propon di incressi la visibilitât e l’ûs de lenghe gaeliche tal mont des ativitâts imprenditoriâls. Si trate di un premi anuâl assegnât aes realtâts economichis che si fasin notâ pal ûs dal irlandês sei tai servizis e te comunicazion cui utents e cui clients, sei te etichetadure, tes tabelis e tal materiâl promozionâl. A coordenâ il progjet e je la organizazion Glór na nGael che si ocupe de planificazion e de promozion linguistiche tes impresis, intes fameis e tes comunitâts locâls. Lis realtâts selezionadis a ricevaran une targhe che e pant il lôr impegn a pro de lenghe e che a podaran esponi dentri o fûr des lôr ativitâts tant che certificazion di cualitât, deventant ancje un element di atrat pai clients.
E cres la pression sul guvier britanic par che al rispieti i siei impegns e al fasi buine une leç pe valorizazion de lenghe gaeliche irlandese. Ancjemò in Jugn il segretari di stât pe Irlande dal Nord, Brandon Lewis, al veve declarât che se lis istituzions nordirlandesis no vessin fate buine dentri dal Astât une normative su la promozion de diversitât culturâl che e cjapàs dentri ancje la leç sul gaelic, i varès pensât il guvier di Londre vie pal mês di Otubar. Il “no” ae leç dal DUP al à blocât sei ogni pussibilitât di fâ bon il proviodiment, sei il funzionament stes dal guvier locâl. Par chest la prime ministre vicjarie de Irlande dal Nord, Michelle O’Neill, espression de aree republicane (Sinn Féin), e à fat savê che si spietin une azion legjislative dal esecutîf britanic tal zîr di pocjis zornadis, viodût che si veve dât la fin di Otubar come tiermin par intervignî. La zornade dopo un grup interpartitic formât di parlamentârs britanics elets in Irlande dal Nord, in Scozie e in Gales (SDLP, Alliance Party, SNP, Plaid Cymru) al à inviât une iniziative unitarie par domandâ al Parlament di Londre di fâ buine daurman une leç par tutelâ e promovi l’irlandês. Cun lôr a jerin ancje i rapresentants de organizazion pe lenghe Conradh na Gaelige che a àn riclamât il guvier di Londre al so dovê ricuardant che, in chest moment, i partîts a pro de leç a rapresentin la maiorance dai deputâts sei tal Parlament britanic che ta chel nordirlandês.
