Corsiche: e monte la tension sul teme dai presonîrs

E torne a montâ la tension in Corsiche dopo de decision di refudâ a Pierre Alessandri il regjim di semilibertât. Dopo dal sassinament dal militant indipendentist Yvan Colonna vie pal mês di Març di chest an la mobilitazion popolâr e i scuintris di place che a vevin segnât la isule par setemanis a vevin puartât il guvier francês a impegnâsi par vierzi un procès di discussion tra il stât e la Corsiche che al frontàs lis problematichis jevadis de societât isolane sul plan sociâl, economic e culturâl, cuntune atenzion particolâr pe evoluzion istituzionâl in direzion di un Statût di autonomie. Tra i temis centrâi al jere ancje chel dai presonîrs politics, cuntune atenzion particolâr massime par Alessandri e Alain Ferrandi (acusâts cun Colonna di formâ il comant che al veve copât il prefet Erignac). In Avrîl i doi a jerin stâts trasferîts su la isule, te preson di U Borgu / Borgo, e cumò si spietave, dopo di 23 agns di preson e su la fonde di ce che e previôt la stesse legjislazion francese, che a podessin passâ a di une cundizion di semilibertât. Savude la gnove, cul plen acuardi di ducj i partîts, la Assemblee corse e à decidût la sierade anticipade de sô session di lavôr e e à invidât il guvier francês a fâ la sô part. Il refût di concedi la semilibertât a Alessandri, di fat, e met a risi il procès di negoziazion inviât a Parîs. L’element paradossâl – a disin i rapresentants des istituzions corsis – al è che la reson doprade par justificâ la sô permanence in preson e je che cu la semilibertât si varès metût a risi l’ordin public cuant che invezit, cemût che si à za viodût intai mês stâts, al è propite il fat di tignîlu in preson che al riscje di discjadenâ disordins e violencis.

Font: Alta Frequenza, 29/09/22

Paîs Catalans: catalan in comun, scuintri viert cul prefet

Il comun di Elna / Elne, che si cjate te Catalogne dal Nord sot aministrazion francese, al è daûr a studiâ un ricors di puartâ denant de cort costituzionâl dopo che il prefet al à denunciât la mende al regolament dal consei comunâl che e garantìs il dirit di intervignî par catalan in aule. Une strade che, par altri, e je stade po inviade ancje di une cuindisine di altris comuns de Catalogne dal Nord, ancje lôr menaçâts dal rapresentant dal guvier francês par che a tornin indaûr su la decision. Pe aministrazion comunâl di Elna / Elne il compuartament dal prefet al è schizofrenic dal moment che, di une bande, al è copresident dal ufici public pe lenghe catalane che si propon di promovi la lenghe e, di chê altre, al perseguìs cui che le valorize e le dopre. Par dî che l’ûs dal catalan tun organisim public al menace lis fondis de Republiche francese, par altri, il prefet al è lât a pescjâ fûr fintremai un edit reâl dal 1539 che al imponeve l’ûs esclusîf dal francês: riferiment che, pe aministrazion comunâl, al à ducj i elements par jessi declarât incostituzionâl.

Font: VilaWeb, 26/09/22

Paîs Basc: vierziduris a Parîs su la scuele imersive par basc

Ai 14 di Setembar i delegâts dal ufici publiche dal euskara e cuatri dai sîs parlamentârs elets intal dipartiment che al cjape dentri il Paîs Basc dal Nord sot aministrazion francese si son cjatâts cui colaboradôrs dal ministri francês pe educazion, Pap Ndiaye. Intant de riunion si à frontât il teme dal insegnament imersîf che si cjate a fâ i conts cuntun cuadri legjislatîf pôc clâr e cuntun numar di puescj pal insegnament masse limitât. I rapresentants ministeriâi si son impegnâts a semplificâ il mecanisim pe vierzidure di gnovis sezions in lenghe basche tes scuelis publichis dant in man la gjestion al stes ufici pe lenghe basche. Plui ingredeade la cuistion de pussibilitât pai students che a àn studiât par euskara di frontâ i esams finâi des secondariis e chei di amission ae universitât inte lenghe che a àn studiât. Pe prime categorie e je une disponibilitât de bande dal ministeri a dâ une rispueste clare in timps avonde curts, pe seconde invezit e je rivade la promesse di vierzi une linie di dialic specifiche. Ta chest an scolastic a son in dut 370 i students bascs che a varan di frontâ chescj esams.

Font: Naiz:, 14/09/22

Ocitanie: gnove campagne pal ocitan inte tv publiche

Il Collectiu Occitan, coordenament di organizazions che a rivendichin la presince dal ocitan dentri de television publiche, si darà adun ai 7 di Otubar a Tolosa / Toulouse par tornâ a lançâ la campagne “Volèm l’occitan a la television regionala”. In dì di vuê, la television publiche francese e propon juste 17 oris di emissions par ocitan ad an. Il coletîf al domande invezit di vê dai spazis cuotidians e cheste sô rivendicazion e à za cjatât la poie di 618 comuns e 3 dipartiments che a àn votât des mozions che a van ta cheste direzion. Dal moment che il guvier francês al à in ments di imbastî une riforme dal setôr dal audiovisîf, il Collectiu Occitan al stime che al sedi il moment par sburtâ cun fuarce il teme cun gnovis mobilitazions.

Font: Jornalet, 14/09/22

Paîs Basc: zornade di lote tal Nord pai presonîrs politics

Uns 1.700 personis a àn partecipât in maniere ative ae zornade di lote no violente inmaneade sabide ai 23 di Lui dai coletîfs Bake Bidea e Artisans de la paix intal Paîs Basc dal Nord sot aministrazion francese (Ipar Euskal Herria) par domandâ al guvier di Parîs di meti fin ae politiche carcerarie punitive cuintri dai presonîrs bascs. A stiçâ inmò di plui la proteste e je stade la boçadure de bande de avocadure di stât de domande di libertât condizionâl fate indenant di Jakes Esnal e Ion Kepa Parot, impresonâts aromai di 32 agns e che za di timp a varessin vût dirit a misuris cautelârs alternativis.

Corsiche: prin confront a Parîs sul procès di autonomie

Joibe ai 21 di Lui si è tignude a Parîs la prime riunion dal comitât strategjic sul avignî de Corsiche cu la partecipazion dal ministri francês pal interni, Gérald Darmanin, e di une delegazion insulâr vuidade dal president dal esecutîf cors, Gilles Simeoni. Di ce che al è stât riferît si à vude une discussion di cuasi cuatri oris, cence tabù, là che si à fissât un sisteme di lavôr e i temis di frontâ. Ae fin, i rapresentants cors si son mostrâts avonde sodisfats ma, viodûts i precedents, la prudence e reste alte. La prossime riunion si tignarà ai 16 di Setembar e e varà al centri il teme dal model economic e sociâl. Tai incuintris seguitîfs a son stâts fissâts altris argoments di confront: la lote cuintri de speculazion finanziarie e imobiliâr, la fiscalitât, la transizion energjetiche e ambientâl, la educazion e la formazion, la salût, lis infrastruturis, la insularitât e i rapuarts cu la Europe, lenghe, culture e identitât. In ducj i apontaments e sarà presinte la cuistion istituzionâl, o sei il nivel di autonomie de isule tal gjestî chestis tematichis. Une volte sierât il cicli di incuintris, il materiâl jessût al sarà presentât al president de Republiche che al decidarà cemût frontâlu e se e coventarà une modifiche costituzionâl. Il ministri Darmanin al à metût daurman su la taule dôs liniis rossis, o sei chê de partignince de Corsiche ae Republiche francese e chê de creazion di “citadins cun plui dirits di altris”.

Font: CorseNetInfos, 21/07/22

Stât francês: la ONU e riclame Parîs sul rispiet dai dirits

Intune letare indreçade al guvier francês, il consei dai dirits dal om de ONU al à criticât la decision dal consei costituzionâl che l’an passât al à boçât diviersis disposizions de cussì clamade leç Molac su lis lenghis minoritariis. In particolâr si conteste la decision di censurâ l’insegnament imersîf, discriminant lis lenghis locâls no dome in confront al francês ma fintremai dal inglês. Si domande duncje al esecutîf di Parîs di intervignî daurman par garantî almancul il model a imersion intal sisteme scolastic privât e parificât. Si conteste ancje la boçadure de pussibilitât di doprâ segnâi diacritics e grafemis tipics des lenghis minorizadis e che no si cjatin inte grafie dal francês. Cun chestis decisions, a disin i rapresentants dal organisim de ONU, la France e va cuintri “de dignitât, de libertât, de avualiance e de no discriminazion” des personis che a fevelin une lenghe o a partegnin a di une comunitât minorizade. La censure de leç Molac e ven calcolade une menace al rispiet dal pat internazionâl sui dirits civîi e politics, de convenzion internazionâl sui dirits dai fruts, e dal pat internazionâl sui dirits economics, sociâi e culturâi.

Font: CorseNetInfos, 05/07/22

Paîs Catalans: pas indenant pal catalan tes scuelis dal Nord

Il catalan si slargjarà in maniere progressive intai centris educatîfs de Catalogne dal Nord, sot aministrazion francese, e tal zîr di un pâr di agns ducj i fruts che a volaran a podaran imparâlu. Al è ce che al previôt l'acuardi sotscrit ai 22 di Jugn a Perpinyà / Perpignan dai rapresentants dal ministeri pe educazion francês, de regjon aministrative de Ocitanie e dal dipartiment dai Pireneus Orientâi. A promovi e a verificâ la metude in vore dal acuardi al è stât incjariât l'ufici public de lenghe catalane (OPCL). A chest acuardi di suaze i vignarà daûr une convenzion che e larà a fissâ i detais pratics de iniziative e che si à sigurât che e sarà firmade in curt.  

Font: VilaWeb, 22/06/22

Stât francês: al cres il numar dai deputâts nazionalitaris

I risultâts dal secont turni des elezions legjislativis francesis che si à tignût ai 19 di Jugn al à permetût di incressi la presince di deputâts espression di moviments politics nazionalitariis. Inte Assemblee francese a son stâts confermâts ducj e cuatri i parlamentârs in scjadince che si presentavin sot de aleance Régions et Peuples Solidaires (R&PS) o sei Jean-Félix Acquaviva e Michel Castellani di Femu a Corsica, Paul-André Colombani dal Partitu di a Nazione Corsa, e ancje Paul Molac che te legjislature stade al jere stât elet intes filis dal partît dal president francês Macron ma che cheste volte al à sielzût di presentâsi come candidât autonomist breton. Al è po di zontâ che, par un pêl, i nazionaliscj cors no àn otignût cuatri circoscrizions su cuatri: te cuarte, di fat, la candidature nazionaliste e à pierdût juste par 800 vôts. Plui in gjenerâl, framieç des filis che Parîs e etichete come “regjonaliscj”, i elets a son stâts in dut dîs. Chei altris sîs a rivin di fat dai teritoris che il stât francês al à in altris continents, un inte Guiane, doi in Martiniche e trê te cussì clamade Polinesie francese, là che trê elets su trê a partegnin al moviment indipendentist.  

Font: RPS, 20/06/22

Paîs Basc: esams par basc, ispetorât di Baiona ocupât par 4 dîs

Ai 18 di Jugn, dopo cuatri dîs di ocupazion de sede dal ispetorât academic di Baiona / Bayonne, i membris dal coletîf Azterketak Euskaraz, i professôrs de rêt des scuelis imersivis baschis Seaska e i gjenitôrs dai students, a àn bandonât l'edifici. La azion e jere stade decidude par sburtâ lis istituzions statâls francesis a garantî a 250 students des superiôrs a imersion baschis, che tra i 30 di Jugn e il prin di Lui a son clamâts a fâ i esams di fin cors, di podêlu fâ par euskara, cemût che al jere fint al 2018 prime che ae vuide dal ministeri pe educazion al rivàs Jean-Michel Blanquer. Dut câs di Parîs no je rivade nissune rispueste direte, si àn vût invezit dai scuintris tra manifestants e polizie che no à però rivât a slontanâju dal edifici. A fâur meti fin ae ocupazion e je stade la disponibilitât de Coletivitât aministrative dal Paîs Basc di davuelzi i esams par basc, ancje se dome in forme simboliche, e la sô poie par lâ indenant inte bataie pal dirit a davuelzi i esams in lenghe proprie. Tes zornadis seguitivis ancje diviers parlamentârs si son fats indenant e a àn domandât une audizion urgjente cul ministri pe educazion Pap Ndiaye che, almancul par cumò, al à vût miôr no intervignî sul teme.  

Font: France Bleu, 18/06/22; Le Monde, 18/06/22; Sud Ouest, 19/06/22; MediaBask, 23/06/22

Paîs Basc: refudât il ricors di Seaska cuintri dal guvier francês

Il tribunâl aministratîf di Pau al à refudât di esaminâ il ricors presentât di Seaska – la federazion des scuelis a imersion dal Paîs Basc dal Nord – cuintri dal ministeri pe educazion francês par no vê rispietât l’acuardi che al permeteve di davuelzi i esams scolastics par euskara. La convenzion e jere stade sotscrite dal ministeri ancjemò tal 2019 cul ufici public pe lenghe basche e cu la stesse Seaska ma fin cumò la direzion scolastiche teritoriâl che e dipent dal ministeri si à simpri refudade di metile in vore. La magjistrature no je jentrade tal mert de cuistion ma si à limitade a segnalâ un fal formâl inte procedure. Dut câs, pe direzion di Seaska, si tratarès dome di une scuse par no jentrâ tun teme politic une vore imberdeât. Par chest la federazion des ikastolas e je cumò daûr a inmaneâ pes prossimis setemanis une rispueste politiche. Par intant i students des scuelis imersivis baschis che sul finâl di Jugn a àn di frontâ i esams di acès ae universitât no san ancjemò se a podaran fâlu par francês e par euskara, o dome te lenghe dal stât.

Font: EiTB, 01/06/22

Stât francês: 93 candidâts de rêt R&PS intes legjislativis

Ai 12 e ai 19 di Jugn la Republiche francese e je interessade des elezions legjislativis che a decidaran la composizion dal Parlament. In corse a son ancje disinis di candidât espression dai moviments politics rapresentatîfs des comunitâts minorizadis cjapadis dentri dai confins statâi. La plui part si le cjate tes filis de rêt Régions et Peuples Solidaires (R&PS) che ta chestis elezions e presente 93 candidâts che a rivin di Alsazie e Lorene, Bretagne, Corsiche, Francje Contee, Ocitanie, Paîs Basc setentrionâl e Paîs Catalans. Rispiet aes legjislativis stadis la coalizion nazionalitarie e à rivât a proponi un 8% in plui di candidâts. I contignûts de lôr propueste si ju cjate tal “Manifest par une Republiche Federâl”. Inte Assemblee in scjadince a jerin cuatri i parlamentârs espression di cheste aleance, trê cors (Jean-Félix Acquaviva, Michel Castellani e Paul-André Colombani) e un breton (Paul Molac).

Font: R&PS, 31/05/22

Corsiche: autonomie e presonîrs, di Parîs nissune buine gnove

Si varà di spietâ dopo des elezions legjislativis francesis pe prime riunion tra i rapresentants des istituzions corsis e di chês francesis par discuti dal avignî de isule, a partî de domande di autoguvier che zaromai di agns e ven fate indenant dal esecutîf e de Assemblee corse. La vierzidure di un procès di discussion tra il stât centrâl e lis istituzions corsis e jere stade prometude dal ministri pal interni francês, Gérald Darmanin, ancjemò in Març intant de sô visite su la isule tal doman des manifestazions massivis e dai scuintris che a vevin inflamât la Corsiche dopo de agression mortâl al militant indipendentist Yvan Colonna. Sul imprin si veve prometût la partence dal confront istituzionâl subite dopo des elezions presidenziâls; cumò invezit si lu à rimandât a dopo des legjislativis, par altri cence fissâ nissune date precise. La gnove e à tornât a jevâ il marum su la isule là che e cres la pôre che a Parîs si vedi chê di lâ indenant a rimandâ cu la sperance di inflapî la mobilitazion dai cors.

Stât francês: pas indenant pe formazion dai insegnants

L’istitût superiôr des lenghis de Republiche francese (ISLRF) e la rêt dai istitûts superiôrs dal insegnament e de educazion (INSPE) a àn sotscrit une convenzion cuadri pe formazion dai insegnants des scuelis a imersion là che si doprin lenghis minorizadis. L’acuardi al rivuarde lis lenghis di sîs comunitâts minorizadis cjapadis dentri tal stât francês o sei il basc (rêt des scuelis imersivis Seaska), il breton (Diwan), il catalan (Bressola), il cors (Scola Corsa), l’ocitan (Calandreta) e il todesc de Alsazie (ABCM-Zweisprachigkeit). La convenzion e rapresente un pas indenant impuartant pe formazion dal personâl che al dopre chestis lenghis intes scuelis a imersion.

Font: Jornalet, 23/05/22

Corsiche: gnovis condanis pes “gnots blu”

Chê cuintri de speculazion edilizie e dai tentatîfs di cimentificâ lis cuestis de isule e jere une des bataiis plui sintudis dal Front di Liberazion Nazionâl Cors dut câs, ancje dopo che il moviment al à metût fin ae sô lote armade, al è cui che al à continuât a lâ ta chê stesse direzion. Lis gnots cuant che i militants cors a fasevin saltâ par aiar lis vilis e lis secondis cjasis in costruzion ad ôr des splazis a jerin stadis batiadis “gnots blu”. Une di chestis gnots si le è vude ancje tal Març dal 2019 e, cundut che il Front nol è plui atîf di agns, si le à tratade come un at teroristic. Par chei fats, ai 20 di Avrîl, il tribunâl suprem di Parîs al à condanât a sîs agns di preson doi oms calcolâts i responsabii di vê sdrumât cul esplosîf diviersis secondis cjasis. Altris cuatri personis, tignudis par compliçs dai doi, a son stadis condanadis a penis di cinc agns a doi mês di preson. Lis condanis a rivin intun moment là che in Corsiche e je ancjemò alte la tension pal sassinament in preson dal militant indipendentist Yvan Colonna.

Font: Corse Net Infos, 20/04/22

Paîs Basc: esams par euskara, gnove azion di Seaska

I responsabii di Seaska, la federazion des scuelis imersivis baschis dal Paîs Basc dal Nord sot aministrazion francese (Ipar Euskal Herria), si son cjatâts cul dirigjent dal distret scolastic di Bordeaux par domandâi di ricognossi il dirit dai arlêfs che a studiin par euskara di davuelzi la prove finâl des secondariis di prin grât e l’esam di acès ae universitât par basc. La domande e je stade boçade e cumò la organizazion e je daûr a studiâ la pussibilitât di puartâ la cuistion al esam dai tribunâi. L’an passât, di fat, il ministri pe educazion francese al veve firmât un decret che al ricognosseve chest dirit. Un dirit che però al reste inmò letare muarte.

Font: EiTB, 13/04/22

Corsiche: Ferrandi e Alessandri di gnûf su la isule

Ai 11 di Avrîl Pierre Alessandri e Alain Ferrandi, acusâts cun Yvan Colonna di vê partecipât intal 1998 al atentât mortâl cuintri dal prefet francês Claude Erignac, a son tornâts in Corsiche. Dopo de agression che i à costât la vite al lôr compagn e des protestis sclopadis su la isule, il guvier di Parîs al veve decidût di gjavâur dal regjim di DPS (détenu particulièrement signalé), o sei chel di massime sigurece, e si veve impegnât a trasferîju in curt in Corsiche. I doi si cjatin cumò te preson di Borgu. Alessandri e Ferrandi a vevin madressût di plui di dîs agns il dirit a saltâ fûr dal regjim di DPS e a jessi trasferîts intune preson corse, ma al à coventât il sassinament di Colonna par che si ur ricognossessin i dirits garantîts de leç. La gnove e à cjatât il bon acet di ducj i rapresentants des istituzions e dal mont nazionalitari cors. Cumò però – a disin – si à di garantîur ancje chei altris beneficis previodûts de leç, a partî dal regjim di semilibertât. Su la cuistion e je intervignude in maniere dure ancje la Leghe pai Dirits dal Om (LDH) ricuardant cemût che lis istituzions francesis a ledin ancjemò dilunc a dineâur i dirits previodûts de leç a altris presonîrs politics cors e bascs che, in cualchi câs, a àn za scontât plui di 30 agns in preson.

Font: Corse Net Infos, 11/04/22

Ocitanie: nuie citadinance francese par vie di un “ò”

Inte Belgjiche, là che a son a stâ, no àn vût nissun fastidi a regjistrâle in anagrafe cul non che a vevin sielzût par jê, o sei Lilòia. Si trate di un non ocitan, che i siei gjenitôrs a àn sielzût tant che omaç ae tiere dal pari. La marie, di fat, e je une citadine belgjiche ma il pari al è un citadin francês di divignince ocitane bearnese. Cuant che il pari si à presentât al consolât di France par segnalâ la nassite de fie e inviâ il ricognossiment, dongje di chê belgjiche, ancje de citadinance francese si à cjatât denant dal refût de anagrafe di regjistrâ il non cu la sô grafie corete, o sei cul acent grâf sul “o”. La reson e je une circolâr dal ministeri de justizie di Parîs dal 2014 che e permet di doprâ te onomastiche dome lis letaris che a fasin part dal alfabet francês. Il pari al à duncje decidût di no regjistrâ la fie cuntun non diviers di chel che a àn sielzût par jê. Par intant duncje la frute no varà la citadinance francese. Pal pari nol è il câs che e vedi la citadinance di un stât che no le ricognòs par chel che e je e che nol rispiete la sô identitât.

Font: Jornalet, 05/04/22

Corsiche: si domande la couficialitât dal cors

Ai 30 di Març, fûr de prefeture di Aiacciu / Ajaccio, si à tignût un presidi di proteste inmaneât dal coletîf Parlemu Corsu. La iniziative si proponeve di ricuardâ che il “probleme” cors – tornât di prepotence tes ultimis setemanis inte agjende des istituzions francesis – no si pues risolvi dome cun intervents di nature economiche e aministrative, parcè che al nas prin di dut di resons storichis e politichis. Par chest – al dîs il coletîf – no si pues superâlu cence frontâ la cuistion de lenghe par mieç di un sisteme di couficialitât. La proteste di Parlemu Corsu e rive dopo che il president francês Emanuel Macron al veve viert su ciertis rivendicazions corsis ma al veve marcât che la uniche lenghe de Republiche e je e e restarà il francês. Ancje par chest i manifestants a àn picjât su la jentrade de prefeture un cartel cu la scrite “Imbasciata di Francia” come a dî che, se a Parîs no acetin che su la isule il cors al vedi la stesse dignitât dal francês, al vûl dî che la Corsiche no pues restâ dentri dal stât francês.

Font: CorseNetInfos, 30/03/22

Corsiche: il Coletîf 9 di Març al va indenant cu la mobilitazion

La mobilitazion in Corsiche e larà indenant, a partî di une gnove manifestazion di place fissade pai 3 di Avrîl a Aiacciu / Ajaccio (che e à tornât a puartâ par strade miârs di personis). La decision e je stade cjapade dal Coletîf nassût ai 9 di Març dopo de agression a Yvan Colonna par meti adun i moviments zovanîi, politics e sociâi leâts ae galassie nazionalitarie. Lis rivendicazions che a puartin indenant cu la lôr azion a restin lis stessis concuardadis sul imprin, ven a dî: veretât e justizie par Yvan Colonna, libertât pai presonîrs politics e ricognossiment dal popul cors. Lis promessis fatis indenant intant de visite su la isule dal ministri pal interni francês, Gérald Dermanin, no son stadis avonde par fermâju dal lâ indenant. Cheste volte però si àn vudis posizions diviersis dentri dal coletîf. Cun di fat, Femu a Corsica – il partît di maiorance relative che al vuide lis istituzions isolanis – al varès vût miôr evitâ la place in spiete di viodi cemût che a van i incuintris istituzionâi prometûts par chest mês di Avrîl dal guvier francês. Dut câs i scuintris tra zovins e fuarcis di polizie che a vevin segnât lis primis setemanis de proteste si son srarîts (dopo di diviers dîs di calme a son tornâts a scomençâ fûr des casermis dai reparts speciâi tignûts di responsabii di vê cjantât la “Marsiliese” juste cuant che a jerin daûr a davuelzisi i funerâi di Yvan Colonna).