Stât francês: 93 candidâts de rêt R&PS intes legjislativis

Ai 12 e ai 19 di Jugn la Republiche francese e je interessade des elezions legjislativis che a decidaran la composizion dal Parlament. In corse a son ancje disinis di candidât espression dai moviments politics rapresentatîfs des comunitâts minorizadis cjapadis dentri dai confins statâi. La plui part si le cjate tes filis de rêt Régions et Peuples Solidaires (R&PS) che ta chestis elezions e presente 93 candidâts che a rivin di Alsazie e Lorene, Bretagne, Corsiche, Francje Contee, Ocitanie, Paîs Basc setentrionâl e Paîs Catalans. Rispiet aes legjislativis stadis la coalizion nazionalitarie e à rivât a proponi un 8% in plui di candidâts. I contignûts de lôr propueste si ju cjate tal “Manifest par une Republiche Federâl”. Inte Assemblee in scjadince a jerin cuatri i parlamentârs espression di cheste aleance, trê cors (Jean-Félix Acquaviva, Michel Castellani e Paul-André Colombani) e un breton (Paul Molac).

Font: R&PS, 31/05/22

Stât francês: pas indenant pe formazion dai insegnants

L’istitût superiôr des lenghis de Republiche francese (ISLRF) e la rêt dai istitûts superiôrs dal insegnament e de educazion (INSPE) a àn sotscrit une convenzion cuadri pe formazion dai insegnants des scuelis a imersion là che si doprin lenghis minorizadis. L’acuardi al rivuarde lis lenghis di sîs comunitâts minorizadis cjapadis dentri tal stât francês o sei il basc (rêt des scuelis imersivis Seaska), il breton (Diwan), il catalan (Bressola), il cors (Scola Corsa), l’ocitan (Calandreta) e il todesc de Alsazie (ABCM-Zweisprachigkeit). La convenzion e rapresente un pas indenant impuartant pe formazion dal personâl che al dopre chestis lenghis intes scuelis a imersion.

Font: Jornalet, 23/05/22

Alsazie: passe 150 mil citadins a vuelin une regjon autonome

A son 170 mil i citadins che a àn partecipât ae consultazion popolâr inmaneade de Coletivitât europeane de Alsazie su la propueste di gjavâ fûr chest teritori de regjon aministrative Grand-Est. Cualchi an indaûr, intant de presidence di François Hollande, si veve puartât indenant une riorganizazion dal sisteme teritoriâl dal stât francês che e veve metût sù regjons aministrativis plui grandis che, in diviers câs, a metevin adun teritoris cun storiis e identitâts ancje une vore diferentis. Al jere propit ce che i veve capitât ae Alsazie. Pal 92,4% dai citadins che a àn partecipât al vôt la Alsazie e à di tornâ une regjon par so cont. Par trop che al sedi indicatîf de volontât popolâr, il vôt nol è vincolant pal guvier centrâl che al è l’unic a podê decidi se riviodi la organizazion aministrative in vore o lassâle cussì cemût che e je.

Font: Agence Bretagne Presse, 22/02/22

Stât francês: il ministeri al autorize la imersion linguistiche

Ai 16 di Dicembar il ministeri francês pe educazion al à publicât une circolâr là che si declare che l’insegnament des lenghis minorizadis nol va cuintri de sentence de cort costituzionâl che, cul boçâ l’articul de cussì clamade leç Molac (leç organiche su la valorizazion e la promozion des lenghis minorizadis) che al permeteve il model a imersion dentri dal sisteme scolastic public, e meteve a risi la continuazion di chest model di insegnament. Il test al fisse obietîfs, cundizions e limits dal model a imersion. Il ministeri si impegne a sostignî la promozion e la difese des lenghis minorizadis inte scuele pûr che, ae fin dal percors educatîf, i students a dimostrin il stes nivel di cognossince de lenghe francese e di chê minorizade. Il timp dedicât a ogni lenghe al podarà cambiâ daûr des necessitâts o dal progjet educatîf di ogni istitût. Ta cheste suaze, il model imersîf al devente duncje une strategjie pussibile parcè che al permet chest risultât e si adate a chest implant organizatîf. Une altre cundizion fissade e je che il model a imersion al sedi opzionâl e che i gjenitôrs a dedin un consens informât pe iscrizion dai lôr fîs ai istitûts che lu ufrissin. La circolâr e autorize ancje a tignî une part dai esams finâi inte lenghe minorizade, ancje se no specifiche par cualis materiis. La gnove e je stade cjapade cun sodisfazion des organizazions impegnadis pes lenghis minorizadis che ta chescj mês a jerin stadis protagonistis di cetantis mobilitazions cuintri dal atac puartât al insegnament imersîf ancje se a stimin che, in ogni câs, la uniche strade par meti in sigurece chest risultât e sedi chê di une riforme costituzionâl.

Font: VilaWeb, 16/12/21; EiTB, 16/12/21

Stât francês: Castex al promet di difindi il model imersîf

Ai 15 di Setembar il prin ministri francês Jean Castex, intune cul ministri pe educazion Jean-Michel Blanquer e cui deputâts Yannick Kerlogot e Christophe Euzet (autôrs di un rapuart sul insegnament des lenghis minorizadis), si à cjatât in videoconference cui rapresentants dai diviers uficis publics pes lenghis minorizadis e des rêts scolastichis di insegnament imersîf. L’incuintri al veve propit chê di fâ il pont su chest sisteme di insegnament dopo che la cort costituzionâl francese lu à declarât contrari ae Costituzion republicane. Pal prin ministri l’insegnament imersîf al è necessari pes lenghis minorizadis e si à impegnât a dâ fûr in curt une circolâr là che si fissin i elements par garantî la sô continuazion. Al à ancje fat savê che si metarà sù un organisim di conciertazion interministeriâl permanent su lis lenghis minorizadis dipendent in maniere direte dal so ufici par frontâ cun regolaritât chest teme. I impegns di Castex a àn cuietât un tic la clime ma, prime di declarâsi sodisfats, i rapresentants des rêts scolastichis a imersion a spietin di viodi i contignûts de circolâr. No sin disponibii – a disin – a fâ nissun pas indaûr rispiet al sisteme di insegnament doprât inta chescj agns.

Font: France3 Bretagne, 15/09/21; Le Telegramme, 15/09/21; VilaWeb, 16/09/21

Stât francês: rûl atîf di RPS tes elezions dal 2022

La aleance Régions et Peuples Solidaires, che e met adun i principâi moviments autonomiscj e nazionalitaris dal stât francês, e à fat savê che e parteciparà in maniere ative aes elezions presidenziâls e legjislativis dal 2022. Cundut che la plateforme programatiche e sarà definide chest Autun, a son za stadis anticipadis un pocjis des liniis di azions principâls. Par esempli si puartarà al centri des presidenziâls il teme de revision costituzionâl par mendâ chês parts che a inibissin il rispiet de diversitât linguistiche. Cun di plui si vûl riviodi i confins des regjons aministrativis che, cussì cemût che a son in dì di vuê, no garantissin la integritât teritoriâl di Alsazie, Bretagne, Catalogne Nord, Ocitanie, Paîs Basc setentrionâl e Savoie. Un altri pont su la taule al è chel dal dialic politic jenfri guvier centrâl e istituzions corsis par assegnâ ae isule un vêr statût di autonomie.

Font: Fédération RPS, 01/09/21

Stât francês: presentât il rapuart Kerlogot - Euzet

Ai 21 di Lui i deputâts Yannick Kerlogot e Christophe Euzet (ducj i doi leâts al partît di guvier LREM) a àn consegnât al prin ministri francês Jean Castex il rapuart sul insegnament des lenghis minorizadis. I doi a vevin vût la incarghe di fâ il pont su la situazion dopo de sentence de cort costituzionâl su la cussì clamade leç Molac che e met in pericul chest model di insegnament ancje tes struturis là che al è za in vore di agns. In dì di vuê l’insegnament imersîf al interesse uns 15 mil students e al ven doprât in diviers istitûts parificâts alsazians, bascs, bretons, catalans e ocitans, e in forme sperimentâl ancje in scuelis publichis de Corsiche, dal Paîs Basc e de Catalogne dal Nord. Pai doi deputâts, par evitâ che la sentence e riscji di blocâ chestis realtâts, la soluzion plui pratiche e sarès di tornâ a scrivi lis convenzions tra stât centrâl e coletivitâts teritoriâls e i contrats associatîfs cu lis scuelis che a ufrissin chest servizi in maniere di specificâ che l’insegnament des lenghis minorizadis al è fat su domande dai gjenitôrs o sei in forme dal dut volontarie e che nol va a pidimentâ l’aprendiment dal francês che al reste un dai obietîfs centrâi de educazion. Chest percors al podarès jessi infuartît di une circolâr ministeriâl e di une leç di pueste che a van inte stesse direzion. Kerlogot e Euzet a sconsein invezit la strade de revision costituzionâl, cul articul 2 – chel che al dîs che la lenghe de Republiche e je il francês – che al ven doprât simpri come jeve par fâi cuintri aes lenghis altris feveladis intal stât francês. Il rapuart e lis sôs propuestis a son stâts però judicâts deludents di diviers rapresentants des comunitâts minorizadis e ativiscj pe lenghe che i viodin daûr, ancjemò une volte, la man dal ministri pe educazion Jean-Michel Blanquer che ta chescj agns al à vût un pês centrâl intes iniziativis normativis par pidimentâ lis lenghis minorizadis.

Font: France 3, 21/07/21; Mediabask, 29/07/21

Stât francês: presidents des regjons pal insegnament imersîf

I presidents des regjons dal stât francês a àn scrit al president de Republiche, Emmanuel Macron, par rivendicâ la promozion dal insegnament imersîf intes lenghis minorizadis (alsazian, basc, breton, catalan, cors e ocitan). Si trate di un pas istituzionâl che i ven daûr aes manifestazions di place dai 29 di Mai cuintri de sentence de cort costituzionâl che e veve boçât l’articul de cussì clamade leç Molac (leç organiche su la valorizazion e la promozion des lenghis minorizadis) che al permeteve di puartâ il model a imersion dentri dal sisteme scolastic public. Te letare, in plui di ricuardâ la ricjece rapresentade des lenghis minorizadis ancje par chei che no lis fevelin, si domande a Macron un incuintri par frontâ il teme dal lôr insegnament imersîf dentri de scuele publiche e par sigurâ che, cu la partence dal prossim an scolastic, no si vedin pas indaûr intai percors educatîfs bilengâi o imersîfs za in vore.

Font: VilaWeb, 03/06/21