Irlande: simpri plui fruts a studiin par irlandês tes primariis

Daûr dai dâts dal ministeri pe educazion de Republiche di Irlande, il numar dai students che a frecuentin lis scuelis primariis cul gaelic irlandês come prime lenghe a son passâts dal 6,4% dal 2000 al 8,1% dal an passât. Tal an scolastic 2018/2019 a son stâts plui di 45 mil i fruts che a àn studiât intes 247 scuelis primariis di lenghe gaeliche (gaelscoileanna). Si trate di istitûts che, te plui part dai câs, si cjatin fûr des areis là che l’irlandês al è ancjemò doprât in maniere significative (Gaeltacht). La percentuâl plui alte si le à te citât di Gaillimh / Galway, là che un frut su cuatri al frecuente lis scuelis gaelichis. Si trate di numars che a varessin di cressi ancjemò di plui tai prossims agns ancje in gracie dai gnûfs regolaments ministeriâi che a previodin che une scuele e vedi di jessi par gaelic se e ven fate sù tune aree là che no si àn altris istitûts di cheste fate e ancje tal câs che, tune stesse aree, si previodi di fâ sù plui di une scuele. Magari cussì no, cheste incressite progressive dal insegnament par gaelic e fâs fature a confermâsi ancje tes secondariis par vie che i istitûts che a ufrissin la pussibilitât di studiâ par irlandês a son a pene une cincuantine (frecuentâts di pôc plui di 13 mil students).

Font: The Irish Times, 19/09/19

Paîs Catalans: Parîs al suspint il concors par docents di catalan

Cun chest an che al ven, dopo di 27 agns, i concors publics pe abilitazion dal insegnament dal e par catalan intal stât francês a saran suspindûts. La gnove e je rivade drete dal ministeri pe educazion di Parîs che le à justificade cul fat che i professôrs cumò in servizi a son avonde pes dibisugnis dal teritori. In dì di vuê a son 55 i docents des superiôrs abilitâts al insegnament dal e par catalan ma la domande e je in cressite e a son almancul une disine i istitûts secondaris de Catalogne dal Nord (dipartiment dai Pireneus orientâi) che no ‘nd àn in servizi nancje un. Cun di plui, se sprolungjade tal timp, la decision e jeve plui di une preocupazion pal avignî dal insegnament dal catalan e e rapresente un disincentîf par cui che al vûl cjapâ cheste strade professionâl e al è cumò impegnât intal procès di formazion.

Font: Mediabask, 18/09/19

Crimee: intes scuelis al torne l’insegnament dal ucrain

Lis autoritâts russis a àn fat savê che cu la partence dal gnûf an scolastic intes scuelis di Sevastopol – la citât principâl de Crimee – si varà la pussibilitât di studiâ ancje l’ucrain. Inte penisule, che e je stade anetude de Federazion Russe tal 2014, la plui part de popolazion e je di lenghe russe ma si à une minorance impuartante che e à di prime lenghe l’ucrain. Dome a Sevastopol si stime che almancul il 13% dai passe 440 mil abitants al sedi ucrain. L’insegnament de lenghe al è però opzionâl e al à duncje di jessi domandât dai gjenitôrs cuant che a van a iscrivi i fîs a scuele. Intes scuelis de Crimee e jere za la pussibilitât di studiâ il tatar, lenghe de comunitât native de penisule ma che in dì di vuê e rapresente dome une minorance de popolazion locâl. E je daûr a jessi stazade ancje la introduzion, simpri in forme facoltative, dal insegnament dal armen e dal azer.

Font: RT, 17/09/19

Paîs Basc: sot atac l’euskara te aministrazion publiche

Il Parlament de Navare al à boçât cui vôts di PSN, Geroa Bai, EH Bildu, Podemos e Izquierda - Ezkerra une mozion fate indenant de diestre spagnoliste e regjonaliste (Navarra Suma) che a domandave al esecutîf di blocâ ducj i plans linguistics de aministrazion stade che e previodevin une presince plui fuarte de lenghe basche te aministrazion publiche. Il gnûf guvier a vuide socialiste al à però fat savê che, cu la gnove legjislature, i plans precedents a varan di jessi sostituîts cuntune altre planificazion ancje se nol à sclarît se chest al puartarà a fâ dai pas indaûr inte presince dal euskara. La ofensive des diestris cuintri de lenghe basche e cjape dentri però ancje il comun di Iruñea / Pamplona dulà che cu lis ultimis elezions a son tornadis al guvier. La gnove aministrazion e à inviât une consultazion popolâr in rêt che e rapresente il prin pas par une revision dai plans comunâi di politiche linguistiche che e puarti a di une riduzion marcade de presince dal euskara tes comunicazions interistituzionâls, te aministrazion comunâl e tai avîs pai citadins.

Font: Noticias de Navarra, 16/09/19; Naiz:, 19/09/19

Jersey: une vore flap il plan dal guvier pal jèrriais

L’esecutîf di Jèrri / Jersey, teritori che al gjolt di un statût autonom rispiet al Ream Unît, al à dât fûr lis liniis di indreçament pal ûs dal jèrriais, la varietât francese normade fevelade su la isule. Il document al interven su la promozion de lenghe proprie in siet areis specifichis, o sei segnaletiche, materiâi a stampe, sît internet, rêts di comunicazion sociâl, modulistiche, iniziativis publichis e materiâi istituzionâi. Lis azions previodudis a son però une vore debulis e a àn lassât malapaiâts chei che a speravin intun salt indenant inte promozion de lenghe proprie. Il non e il simbul dal guvier e des sôs dipendencis a saran bilengâi e a vignaran doprâts in maniere progressive in ducj i materiâi e su la tabelonistiche istituzionâl. Par chel che al rivuarde il sît internet, lis rêts sociâls, lis esposizions, i documents e i comunicâts uficiâi, il jèrriais al sarà doprât dome in cualchi câs limitât, o sei cuant che l’argoment frontât al à a ce fâ in maniere direte cu la lenghe o cu la culture de isule. L’esecutîf al à invezit decidût che la segnaletiche stradâl e la cartelonistiche e restarà dome par inglês par vie che – cussì a àn motivât – e “podarès distrai i automobiliscj”!

Font: Jersey’s Government, 16/09/19; ITV Report, 18/09/19

Paîs Basc: efiets positîfs di Euskaraldia sul ûs dal basc

La prime edizion di Euskaraldia, che si veve davuelte tra i 23 di Novembar e i 3 di Dicembar dal an passât, e à puartât cambiaments significatîfs intal mût di fâ dai siei partecipants. Cun di fat, daûr di une ricercje fate suntun campion dal 8% des passe 225 mil personis che a vevin aderît ae iniziative, al ven fûr che, a front di un 66,5% che al doprave la lenghe basche in maniere cuotidiane prime di Euskaraldia, intant de iniziative la percentuâl e jere lade sù al 86% e, a trê mês de sô fin, e restave parsore dal 72%. I cambis di abitudin plui significatîfs si ju à vûts intes areis dal Paîs Basc là che la lenghe e je plui debule. La seconde edizion de manifestazion e je in program intal Autun di chest an che al ven.

Font: Noticias de Gipuzkoa, 16/09/19

Irlande: a Belfast Est e cres la presince dal irlandês

Une biblioteche cun plui o mancul 2 mil libris par irlandês e je stade screade tal centri culturâl “Skainos” a Béal Feirste / Belfast Est. La gnove no je di pôc cont se si calcole che cheste e je la aree de citât a maiorance unioniste là che la lenghe gaeliche e je stade contrastade a fuart inte suaze dal conflit cu la comunitât republicane nordirlandese. Al è duncje significatîf che ae scree a vedin partecipât sei rapresentants politics de comunitât republicane, a partî dal sindic John Finucane dal Sinn Féin, sei di chê unioniste cun conseîrs dal UUP e dal PUP. Il centri culturâl al lavore par fâ capî che cheste lenghe e je patrimoni di dute la comunitât, di là des divisions tra unioniscj e republicans, e uns siet agns indaûr al à tacât a ufrî cors di irlandês. Sul imprin la iniziative e tirave dongje sì e no uns vincj personis, l’an passât invezit i iscrits a jerin 270, a dimostrazion de incressite di interès pal irlandês ancje framieç de part unioniste de popolazion.

Font: BBC, 16/09/19

Paîs Basc: in 50 mil cuintri dal procès ae solidarietât

Ai 16 di Setembar, a Madrid, al è scomençât il procès (sumario 11/13) cuintri di 47 citadins bascs sot acuse pe lôr ativitât in difese dai dirits dai presonîrs politics e dai esiliâts bascs. La publiche acuse e à domandât cuintri di lôr condanis par un totâl di 601 agns di preson. Par manifestâ la lôr solidarietât ai acusâts e par protestâ cuintri di un procediment judiziari considerât fûr dal timp – viodût che ETA no esist plui e che al è di agns che tal Paîs Basc al è in vore un percors di superament pacific dal conflit – sabide ai 14 di Setembar sù par jù 50 mil personis a àn manifestât pes stradis di Bilbo / Bilbao. La partecipazion ae iniziative e je lade plui innà des previsions plui positivis. In place a jerin rapresentants de grande maiorance dal panorame sindacâl basc (ELA, LAB, CCOO), di une part significative dal mont politic (a partî di EH Bildu e Elkarrekin Podemos) e de sene culturâl e sociâl dal Paîs Basc. Ae manifestazion e à partecipât ancje une delegazion de ANC e de plateforme solidarie di Madrid.

Font: Naiz:, 14/09/19

Cossovo: minorancis penalizadis des gnovis regulis eletorâls

La comission eletorâl centrâl dal Cossovo e à dât fûr une circolâr là che si previôt che tes prossimis elezions parlamentârs in program ai 6 di Otubar a podedin votâ dome i citadins che a presentin un document identificatîf emetût des autoritâts cossovanis. La decision e à jevât lis protestis une vore duris dai rapresentants politics e istituzionâi des comunitâts serbis e montenegrinis dal Cossovo che le judichin contrarie ae stesse suaze normative statâl. Se e fos metude in vore, cheste circolâr e impedirès di votâ a cetancj membris des dôs minorancis che, cundut che a son iscrits intes listis eletorâls, a doprin cjartis di identitât dadis fûr des autoritâts serbis. Pal cjâf dal ufici pal Cossovo dal guvier serp, Marko Djurić, se no interven la comunitât internazionâl par comedâ la situazion lis prossimis elezions cossovanis a pierdaran ogni legjitimitât. I citadins a son clamâts a votâ in maniere anticipade pal gnûf Parlament dopo des dimissions dal prin ministri Ramush Hardinaj, sot acuse par crimins di vuere.

Font: Balkan Insight, 12/09/19

Asturiis: insegnants di asturian simpri plui precarizâts

E va dilunc a cressi la precarizazion dai insegnants di lenghe asturiane. A denunciâlu, in ocasion de partence dal gnûf an scolastic, al è il sindacât di categorie SUATEA. La grande maiorance dai professôrs di asturian a lavorin come interinâi e, tal 85% dai câs, a son impleâts dome a mieze zornade. Cheste ultime percentuâl, in particolâr, e va in piês an dopo an: tal 2016 e jere dal 69%, tal 2017 dal 72% e l’an passât dal 82%. Cheste situazion, al ricuarde il sindacât, no dipent di une diminuzion de domande ma dal fat che la aministrazion scolastiche e met prime i criteris di nature economiche rispiet ae cualitât de educazion e al dirit dai students di sielzi la lenghe che a àn miôr.

Font: InfoAsturies, 11/09/19

Udmurtie: militant muart par protestâ cuintri de repression

Ai 10 di Setembar, il professôr e ativist udmurt Albert Razin al è muart intal ospedâl di Izhevsk cualchi ore dopo che si veve dât fûc fûr dal palaç dal consei di stât de regjon autonome de Udmurtie, inte Federazion Russe. L’at estrem di proteste al è stât motivât cu la volontât di riclamâ la atenzion su lis politichis di snazionalizazion metudis in vore des autoritâts russis cuintri de comunitât udmurte e in particolâr cui atacs cuintri de lenghe di cheste popolazion ugrofiniche. Razin al jere stât un dai inteletuâi che plui si vevin spindûts cuintri de leç fate buine dal Parlament rus l’an passât che e puartave di curicolâr a opzionâl l’insegnament des lenghis propriis intes republichis e tes regjons autonomis cuntune popolazion native no russofone.

Font: TASS, 10/09/19; RFE/RL, 10/09/19