Cravuazie: minorance serbe inmò vitime di intolerance

Ai 13 di Avrîl il Consei Nazionâl Serp al à presentât il rapuart anuâl che al met adun i episodis di violence fisiche, intolerance, menacis, ofesis, discors di odi e revisionisim storic indreçâts cuintri de minorance serbe de Cravuazie. I câs denunciâts vie pal 2020 a son stâts 214 a front dai 400 dal 2019 e dai 381 dal 2018. Il dât al è però falsât dal fat che, par vie de pandemie, cetantis ativitâts no jerin pussibilis e duncje si à vude ancje une strente su lis ocasions – tant che lis partidis di balon – là che i atacs cuintri de comunitât serbe a jerin frecuents. Il president dal Consei, Milorad Pupovač, al à segnalât cemût che, cundut che la legjislazion cravuate e calcoli di reât i discors di odi, inte plui part dai câs cuant che a son indreçâts ai serps no ven metude in vore. Chel istès, al à zontât, si viodin ancje segnâi di riconciliazion tra lis dôs comunitâts, massime sul plan istituzionâl. Par esempli, a ocupâ la incarghe di prin ministri vicjari al è Boris Milosevič dal Partît Indipendent Democratic Serp (SDSS).

Font: Balkan Insight, 13/04/21

Cravuazie: deputâts des minorancis dentri dal gnûf guvier

Ai 23 di Lui il Parlament cravuat al à votât la fiducie al gnûf guvier vuidât di Andrej Plenković che cul so partît – la Union Democratiche Cravuate (HDZ) – al veve otignût la maiorance relative tes elezions politichis dai 5 di Lui. Par rivâ a otignî la poie di almancul 76 dai 151 deputâts de assemblee, Plenković – che al partive dai 66 elets otignûts de HDZ – al à sielzût di no sbelançâ il guvier a diestre aleantsi cul Moviment Patriotic (DPMS) di Miroslav Škoro – che i varès puartât 16 parlamentârs – ma di meti adun une coalizion moderade che si poiàs sui vôts di dôs piçulis formazions di aree liberâl (il Partît dal Popul Cravuat e i Riformiscj) e sui vôt deputâts des minorancis (serps, ongjarês, rom, talians, albanês, cecs e slovacs), che a deventin cussì decisîfs pe tignude dal guvier. Cheste situazion e varès duncje di favorî politichis plui atentis ai dirits linguistics e nazionâi di chestis comunitâts. Il Partît Democratic Indipendent Serp (SDSS), che cui siei 3 elets al devente une des fuarcis plui impuartantis di cheste coalizion, al contribuìs al guvier cuntun dai cuatri vicepresidents che al à ancje la deleghe su dirits umans e des minorancis.

Font: Balkan Insight, 23/07/20

Cravuazie: cul cressi de diestre serps plui debui

Tes elezions politichis cravuatis dai 5 di Lui, la Union Democratiche Cravuate (HDZ) e à infuartît la sô posizion cun passe il 37% des preferencis e 66 elets, cinc in plui di chei otignûts intal 2016. Chel istès la formazion di centri diestre no à avonde parlamentârs par guviernâ di bessole. Il so president, Andrej Plenković, al varà duncje di cirî dai aleâts par formâ un guvier di coalizion. Par tirâ dongje i dîs deputâts che i mancjin par otignî la maiorance in Parlament la soluzion plui pratiche e sarès chê di une aleance cul gnûf Moviment Patriotic (DPMS) vuidât di Miroslav Škoro – che al à concuistât cuasi l’11% dai consens e 16 parlamentârs – che e puartarès però inmò plui a diestre il baricentri dal guvier. Plui dificil un acuardi cu la liste Most (il puint) – ancje chê di diestre – che, in plui di no vê funzionât inte legjislature stade, i puartarès dome 8 deputâts (rispiet ai 13 des elezions dal 2016). E à pierdût cetant teren invezit la coalizion de centri çampe vuidade dal Partît Sociâl Democratic (SDP) che e je colade di 54 a 41 parlamentârs. Sul front progressist si à invezit di segnalâ il risultât dal gnûf moviment ecologjist Možemo! che aes sôs primis politichis al à sfiliât il 7% dai vôts e otignût 7 deputâts. I risultâts eletorâi no ufrissin masse pês ai 8 deputâts des minorancis: 3 pal Partît Democratic Indipendent Serp (SDSS) e un parom pe Union Democratiche dai Ongjarês di Cravuazie (HMDK) e pai rapresentants di rom, talians, albanês e cecoslovacs. Al è po di dî che, tal câs di aleance tra HDZ e Moviment Patriotic, al è dificil di previodi un miorament dai rapuarts cu lis comunitâts minorizadis e massime cun chê serbe.

Font: Euronews, 07/07/20

Cravuazie: a van indenant i atacs cuintri des minorancis

Ai 17 di Avrîl la Cjase pai Dirits Umans di Zagabrie e à publicât il so rapuart anuâl là che si segnale cemût che no calin i episodis di intolerance tai confronts des minorancis che a vivin in Cravuazie. Pe plui part si trate di discors di odi pandûts su lis rêts sociâls, su cierts mieçs di comunicazion e te suaze dal confront politic, ma ancje di menacis e fintremai di agressions fisichis. La comunitât plui colpide e reste chê serbe, che cui siei passe 180 mil membris e je la plui grande minorance nazionâl dal paîs e che si cjate ancjemò a paiâ un presit alt pes feridis lassadis de vuere jenfri Serbie e Cravuazie. I discors di odi a son favorîts ancje di un sisteme educatîf e mediatic che di chei fats al da une vision unilaterâl e di stamp nazionalistic. Dilunc vie dal 2019 a son stâts segnalâts almancul cuatri grues episodis di agressions xenofobichis di grup cuintri membris de minorance serbe o citadins serps che a jerin in visite in Cravuazie.

Font: Balkan Insight, 17/04/20

Cravuazie: gnovis agressions cuintri de minorance serbe

No si fermin in Cravuazie lis agressions e i atacs cuintri di membris de comunitât serbe che, cun passe 180 mil personis, e je la plui grande minorance nazionâl dal paîs. Tor de metât di Avost nazionaliscj cravuats a àn fate iruzion in doi bars là che a trasmetevin une partide de Stele Rosse di Belgrât e a àn ferît cinc personis, dutis membris de minorance. Si trate dome dai ultins episodis di une rie di violencis che, tal Jugn di chest an, a àn viodût ancje la muart di Radoje Petkovič, vicepresident dal Consei de Minorance Nazionâl Serbe di Kastav, par vie des feridis patidis intant de agression de bande di un veteran di vuere cravuat. Dongje di tornâ a denunciâ cheste situazion, il president dal Consei Nazionâl Serp, Boris Milosevič, al à invidât lis istituzions cravuatis a no minimizâ chestis vicendis o cirî di fâlis passâ par violencis causadis di ultras di societâts sportivis.

Font: Balkan Insight, 22/08/19

UE: e cres la rapresentance de EFA tal Parlament european

A son diviers i candidâts di moviments rapresentatîfs des comunitâts minorizadis che a son stâts elets intal Parlament european in ocasion des votazions che si son tignudis intai diviers stâts membris de UE tra i 23 e i 26 di Mai. La vicende che dal sigûr e à fat plui scjas e je stade la elezion di trê dai rapresentants plui significatîfs dal indipendentisim catalan, o sei Oriol Junqueras, che si cjate di plui di un an in regjim di preson preventive, Carles Puigdemont e Toni Comín, che si cjatin in esili inte Belgjiche. Il prin al è stât elet cuntune liste che e meteve adun la çampe nazionalitarie basche, catalane e galiziane e che e à puartât ancje ae elezion di Diana Riba (simpri di ERC) e di Pernardo Barrena (EH Bildu). Puigdemont e Comín si presentavin invezit cu la liste Lliures per Europa. Intal stât spagnûl a son stâts elets al Parlament european ancje Izaskun Bilbao dal PNV e Ernest Urtasun di ICV.

Cravuazie: inmò menacis cuintri de comunitât serbe

A van dilunc in Cravuazie i atacs e i ats di menace cuintri de minorance serbe e dai siei rapresentants. In diviersis citâts cravuatis di fat a son stâts sbregâts vie i manifescj metûts fûr dal Partît Indipendent Democratic Serp (SDSS) pes elezions europeanis dai 26 di Mai intant che a Split nazionaliscj cravuats a àn jemplât i manifescj cun scritis di menace e cun sprocs ustaša (moviment fassist responsabil dal sassinament di plui di 80 mil tra serps, rom, ebreus e antifassiscj intant de seconde vuere mondiâl). Milorad Pupovač, referent dal Partît Indipendent Democratic Serp, al à invidât i siei conazionâi a no fâsi spaurî e a rispuindi a chestis menacis cuntune fuarte partecipazion al vôt. Intes elezions europeanis la comunitât serbe de Cravuazie e je rapresentade ancje di un secont moviment politic, o sei la Aleance Democratiche dai Serps. Chê serbe, cun passe 180 mil membris, e je la plui grande minorance nazionâl presinte in Cravuazie. Te stesse zornade des elezions pal Parlament european, in Cravuazie si vote ancje par rignuvî i Conseis des minorancis nazionâls che a rapresentin i interès des cutuardis comunitâts ricognossudis. Ta chestis elezions i iscrits a votâ a son in dut 255 mil.

Font: Balkan Insight, 03/05/19

Cravuazie: referendum cuintri dai dirits politics des minorancis

Ativiscj catolics e nazionaliscj cravuats a àn inviât la cussì clamade iniziative “La int e decît” che si propon di tirâ sù lis 374 mil firmis che a coventin par inviâ un referendum par scancelâ la ratifiche dal tratât di Istanbul e par riformâ la leç eletorâl in maniere di ridusi i dirits politics ricognossûts de Costituzion aes minorancis nazionâls. In particolâr, la iniziative si propon di sbassâ di 8 a 6 il numar di puescj garantîts in Parlament pai rapresentants des minorancis nazionâls ricognossudis e di dineâur il dirit di vôt par cuistions centrâls tant che la fiducie al guvier o lis leçs di belanç. Ancje in câs che il numar di firmis cjapadis sù al sedi avonde par imbastî un referendum al è cuasi sigûr che la cort costituzionâl lu boçarà par vie che al tocje la ratifiche di un tratât internazionâl. Chel istès la iniziative e mostre il cressi de intolerance in Cravuazie pes minorancis nazionâls e pal slargjament dai dirits sociâi.

Font: Il Piccolo, 29/05/18

Cravuazie: in cressi lis manifestazions di odi cuintri dai serps

Ai 21 di Mai il Consei Nazionâl Serp, che al rapresente la comunitât serbe de Cravuazie, al à dât fûr il so rapuart anuâl su la situazion che si cjate a vivi la minorance. Daûr dai dâts publicâts, vie pal 2017 i câs di incidents leâts ae intolerance etniche, di discors publics violents, di menacis o di agressions cuintri di membris de comunitât serbe a son stâts 393, a front dai 331 segnalâts intal 2016 e dai 189 dal 2015. La realtât però e riscje di jessi ancjemò piês dal moment che plui di cualchidun nol denuncie i abûs patîts par pôre di consecuencis inmò plui penzis. A favorî cheste clime no son dome i ambients politics plui nazionaliscj, ma ancje i mieçs di comunicazion. Il guvier di centri diestre cumò in cjarie (HDZ) nol sburte la intolerance cuintri dai serps ma nol fâs nancje masse par fâi cuintri. Il cuadri al ven confermât ancje dal rapuart dât fûr de comission dal Consei de Europe su razisim e intolerance che al segnale une incressite de agressivitât cuintri de minorance serbe, dai rom e dai omosessuâi.

Font: Balkan Insight, 21/05/18

Europe: passe 1,2 milions di firmis par “Minority Safepack”

Minority Safepack, la iniziative citadine inviade de FUEN (Union Federâl des Nazionalitâts Europeanis) par incressi lis misuris di tutele des personis che a partegnin a minorancis linguistichis e nazionâls e par infuartî la diversitât linguistiche e culturâl dentri de Union Europeane, e je stade un sucès. Cun di fat, par che la Comission Europeane e cjapi in man une iniziative citadine e covente la poie di almancul un milion di personis ator pe Union e ai 3 di Avrîl, date che e finive la racuelte des firmis, chês cjapadis sù a son stadis passe un milion e 215 mil. I stâts là che il quorum di firmis che si vevisi proponûts di cjapâ sù par Minority Safepack al è stât superât a son undis: Ongjarie (là che lis firmis racueltis a son stadis plui di mieç milion!), Romanie, Slovachie, Bulgarie, Cravuazie, Slovenie, Lituanie, Letonie, Danimarcje, Spagne e Italie. Ta chest ultin stât l’obietîf al jere stât fissât a 55 mil firmis e a ‘nd è stadis tiradis sù plui di 60 mil, pe plui part in Sud Tirôl, Val di Aoste e Friûl. I stâts a àn cumò trê mês par convalidâ lis firmis e la Comission Europeane a ‘nd à altris trê par presentâsi denant dal Parlament par riferî su la iniziative. Dopo dal agrât a ducj i citadins e aes organizazions che a àn poiât la iniziative, il president de FUEN, Loránt Vincze, al à celebrât la nassite di chel che al à clamât un vêr moviment european pai dirits des comunitâts minorizadis.

Font: FUEN, 04-05/04/18

Cravuazie: inmò menacis cuintri de minorance serbe

A van dilunc in Cravuazie i ats di menace cuintri de minorance serbe e dai siei rapresentants. Par protestâ cuintri de ipotesi di tirâ vie une targhe logade a Jasenovac che e ripuarte un sproc ustaša, i membris dal Partît Natîf Cravuat di Diestre (A-HSP) no àn cjatât nuie di miôr di inmaneâ une manifestazion a Zagabrie denant de sede dal setemanâl de minorance serbe Novosti dulà che a son stadis brusadis copiis dal gjornâl. Intant de iniziative si à ancje dite che se la targhe e sarà gjavade a paiâ lis consecuencis a saran il referent de comunitât serbe de Cravuazie, Milorad Pupovač, e il prin ministri cravuat Andrej Plenković. La vicende e à jevât lis protestis dal ministri pai forescj de Serbie, ma par Plenković nol è masse di preocupâsi par vie che lis menacis a rivin di un partît che al à un pês une vore margjinâl.

Font: Balkan Insight, 04/09/17

Cravuazie: minorance serbe ostracizade dai media

Il Consei Nazionâl Serp, organisim di riferiment de comunitât serbe de Cravuazie, al à presentât a Zagabrie une ricercje su la maniere che i cinc cuotidians cravuats plui impuartants a frontin i temis e lis gnovis che a àn a ce viodi cun cheste e cun altris minorancis che a vivin dentri dai confins di stât. Su la fonde de analisi di 1.500 articui, il dât principâl al è che si tint a fevelâ pôc des minorancis e, cuant che si lu fâs, intes gnovis sui serps a fevelâ no son mai i membris di cheste comunitât, ma dome i cravuats. Cun di plui, la presince de minorance e ven presentade dispès come une menace permanente cuintri de Cravuazie. In diviers articui si dopre un lengaç violent cuintri dai serps, e ancje cuant che no si lu fâs in maniere direte si palese une atmosfere che e stice la asse cuintri di cheste comunitât. Intal 1991, prime de vuere, la comunitât serbe de Cravuazie e jere formade di 581 mil personis, in dì di vuê dome di 186 mil.

Font: Balkan Insight, 07/07/17

Cravuazie: in cressi la intolerance cuintri de minorance serbe

Ai 7 di Març il Consei Nazionâl Serp, che al rapresente la comunitât serbe de Cravuazie, al à dât fûr il so rapuart anuâl su la situazion che si cjate a vivi la minorance. Daûr dai dâts publicâts, vie pal 2016 i câs di incidents leâts ae intolerance etniche, discors publics violents, menacis o agressions cuintri di membris de comunitât serbe a son stâts 331, a front dai 189 segnalâts intal 2015 e dai 82 dal 2014. Plui in detai, rispiet al an prime i câs di agressions fisichis a son passâts di 9 a 16, intant che lis menacis a son passadis si 20 a 62. A favorî cheste clime no son dome i ambients politics plui nazionaliscj, ma ancje i mieçs di comunicazion, cun diviers câs di discors di odi etnic dâts fûr fintremai de radiotelevision di stât (HRT). La realtât e riscje però di jessi inmò piês dal moment che plui di cualchidun nol denuncie i abûs patîts par pôre di vê consecuencis ancjemò plui penzis. Il cuadri al ven confermât ancje dal rapuart su la Cravuazie dal Dipartiment di Stât dai Stâts Unîts che al marche la discriminazion sociâl e i episodis di violence cuintri des minorancis, a partî di serps e rom.

Font: Balkan Insight, 07/03/17

Cravuazie: tes politichis 11 elets par minorancis e autonomiscj

Intes elezions politichis che si son tignudis ai 11 di Setembar in Cravuazie, la Union Democratiche Cravuate (HDZ) e je stade la fuarce politiche plui votade e la sô coalizion e à otignût plui dal 36% des preferencis e 61 elets. Cun dute probabilitât duncje al sarà il so president, Andrej Plenković, a cjapâ in man la incarghe di prin ministri.

Cravuazie: serps in spiete des decisions dal gnûf guvier

La comunitât serbe de Cravuazie e je inmò in spiete di cognossi la politiche che il gnûf guvier jessût des elezions che si son tignudis in Novembar al metarà in vore tai siei confronts. Dopo di un prin moment là che al someave che si varès metude su une coalizion progressiste vuidade dal Partît Sociâl Democratic, si à invezit cjatât un acuardi tra la HDZ (Union Democratiche Cravuate) e la liste Most. Il president de HDZ, Tomislav Karamarko, e chel di Most, Bozo Petrov, si son impegnâts a miorâ lis relazions cu la Serbie, ma chest nol significhe in automatic che si vignarà incuintri aes dibisugnis de minorance serbe che e vîf in Cravuazie. Cun di fat, rapresentants de coalizion a àn za fat intindi che, siben che lu previodi la leç, inte citât di Vukovar tabelis publichis e segnaletiche stradâl a restaran dome par cravuat ancje se la popolazion serbe e je un tierç dal totâl. Si à però di dî che tai ultins agns, cuant che la diestre nazionaliste e je stade al podê, e je stade une vore mancul ative tal atacâ i dirits des minorancis di cuant che e je stade ae oposizion. Pai rapresentants de gnove maiorance i problemis si comedaran, ma a fasin ancje intindi che i volarà timp parcè che lis feridis lassadis de vuere cu la Serbie a son inmò masse resintis.

Font: Balkan Insight, 06/01/16

Cravuazie: minorancis e regjonaliscj cul front progressist

Lis elezions politichis che si son tignudis sul imprin di Novembar in Cravuazie no àn produsût une maiorance clare in stât di guviernâ il stât. La HDZ (Union Democratiche Cravuate), cui siei 59 parlamentârs, e je stade la plui votade ma no somee in stât di cjatâ aleâts par formâ un guvier. Most, la tierce liste plui votade, si è viodude boçâ la propueste di un guvier di “unitât nazionâl” e, fûr di cheste opzion, e refude cualsisei acuardi. La aleance vuidade dal partît sociâl democratic, che e à otignût 56 elets, e je duncje impegnade a cirî di meti adun une coalizion di guvier. Par fâlu e à però di rivâ a cjatâ la poie di almancul altris 20 parlamentârs. Par cumò la disponibilitât par meti sù un gnûf guvier progressist e je rivade dai vot deputâts espression des minorancis nazionâls dal paîs, dai trê elets de formazion regjonaliste Dieta Democratica Istriana, di trê deputâts dai partîts dal sindic di Zagabrie Milan Bandic e dal ex ministri pe economie Radimir Cacic, e ancje di un parlamentâr espuls di Most. Une poie esterne e podarès invezit rivâ dal partît conservadôr Aleance Democratiche Cravuate de Slavonie e de Baranja (HDSSB).

Font: Balkan Insight, 16/11/15

Cravuazie: vie lis tabelis par serp di Vukovar

Il consei comunâl di Vukovar al à decidût che lis scritis par serp (alfabet cirilic) a saran gjavadis des tabelis istituzionâls e de segnaletiche stradâl de citât e che par otignî documents par serp dai uficis comunâi si varà di paiâ une soretasse. La decision e je stade fate buine cul vôt dai conseîrs de Union Democratiche Cravuate (HDZ) e e à cjatât la poie dai nazionaliscj cravuats e dai grups di veterans. La leç statâl su lis minorancis e previôt l’ûs couficiâl de lenghe minoritarie te segnaletiche e tai rapuarts cu la aministrazion publiche cuant che i membris de comunitât minoritarie a son almancul un tierç de popolazion totâl e, daûr dal ultin censiment, a Vukovar il 34,8% de popolazion al è serp. La decision, in plui de oposizion socialdemocratiche de citât, des organizazions antifassistis e dai rapresentants de minorance serbe, e à jevât ancje lis protestis uficiâls dal guvier di Belgrât.

Font: Balkan Insight, 18/08/15

Cravuazie: europarlamentâr e fevele di parâ vie i serps

“A àn di preâ il Signôr che no netìn il nestri curtîl di cjase, se di no une vore di serps ‘cravuats’ a varessin di scjampâ in Serbie”. Chestis peraulis de eurodeputade cravuate Ruza Tomasić, rapresentante di prin plan de diestre nazionaliste, a àn fat saltâ sù il prin ministri serp Aleksandar Vučić che al à marcât il pês negatîf che declarazions di cheste fate a àn tai rapuarts tra i doi stâts. Dut câs ancje la garante pai dirits de Cravuazie, Lora Vidović, e je intervignude par condanâ il compuartament de europarlamentâr acusade di sparniçâ intolerance ator pal paîs. La Tomasić, che intal 2013 e jere za stade protagoniste di une vicende similâr, e à refudât di tornâ su lis sôs peraulis, ma e à dite che a jerin indreçadis dome a chei membris de comunitât serbe che a saressin stâts responsabii di crimins di vuere ma a son stâts amnistiâts ae fin dal conflit.

Font: Balkan Insight, 07/05/15

Cravuazie: cuint rapuart sul rispiet de Cjarte europeane

Il comitât dai ministris dal Consei de Europe al à dât fûr il so cuint rapuart su la metude in vore de Cjarte europeane des lenghis regjonâls o minoritariis in Cravuazie. Intal document si presee il sfuarç des autoritâts cravuatis intal slargjâ lis tutelis garantidis de Cjarte ancje aes minorancis todescjis, slovenis e rom. Judizi positîf ancje pe adozion di un gnûf plan di azion par infuartî i dirits des minorancis nazionâls, cundut che nol cuvierç ducj i cjamps di intervent previodûts de Cjarte europeane. Un altri pas indenant al è chel dal lanç di programs televisîfs dedicâts aes comunitâts minorizadis, ancje se si sburte lis autoritâts a garantî une programazion plui slargjade e plui regolâr par dutis lis minorancis ricognossudis. Si invide a fâ di plui ancje pe presince des lenghis minorizadis inte scuele, là che si domande di dedicâ altris sfuarçs pe educazion al rispiet des identitâts altris che si àn intal paîs. Il rapuart al invide la Cravuazie a cjapâ misuris par garantî ai membris des minorancis il dirit di rapuartâsi cu lis autoritâts inte lôr lenghe proprie e par che chestis stessis autoritâts a rispietin lis lenghis minorizadis inte toponomastiche e inte segnaletiche. Su chest ultin pont, di fat, si vevin vûts scuintris e incidents massime pal ûs dal cirilic intai segnâi e intes tabelis metudis fûr tes localitâts là che la comunitât serpe e rapresente plui di un tierç de popolazion.

Font: CoE, 16/04/15

Balcans: discriminazions etnichis denunciadis di AI

Daûr dal ultin rapuart di Amnesty International sui Balcans i atacs e lis menacis ai dirits umans a restin ancjemò tancj, des agressions e des discriminazions cuintri dai omosessuâi fintremai ai atacs ae libertât di stampe, cence dismenteâ la situazion dificile di diviersis minorancis linguistichis e nazionâls. Tal câs de Romanie, par esempli, si va dilunc a segnalâ lis discriminazions cuintri dai rom, ancje cun câs di dislozaments sfuarçâts. Rom e minorancis serbis a son lis comunitâts plui discriminadis in Cravuazie. In Macedonie, in plui de situazion dificile dai rom, si cjale cun pôre al cressi des violencis tra la comunitât macedone e la minorance albanese. Violencis e tensions etnichis a restin po di cjase ancje in Cossovo, massime intes areis dal Nord là che e vîf une gruesse minorance serbe.

Font: Balkan Insight, 25/02/15