Ream Unît: politichis, stradis contrariis par Scozie e Ingletiere

Tes elezions politichis anticipadis che si son tignudis intal Ream Unît ai 12 di Dicembar i Conservadôrs vuidâts di Boris Johnson a àn otignût la maiorance assolude intal Parlament di Londre cun 365 deputâts su 650 e cun 66 elets in plui di chei che a vevin. Chest risultât, calcolât dal prin ministri britanic tant che un mandât esplicit par puartâ insom daurman e aes sôs cundizions il procès di jessude dal Ream Unît de UE, al palese però une divergjence totâl tra la volontât dai eletôrs inglês e di chei scozês.

Cun di fat, 48 dai 59 deputâts elets in Scozie a partegnin al SNP – il Partît Nazionâl Scozês – , moviment progressist e europeist che al à otignût 13 parlamentârs in plui di chei che al veve te legjislature stade. In Scozie i Conservadôrs a pierdin 7 dai 13 deputâts che a vevin e i Laburiscj 6 su 7; dome i Liberâi Democratics, ancje lôr europeiscj convints, a confermin i 4 elets che a vevin. Intant de campagne eletorâl, i nazionalitaris scozês a vevin batût su la volontât di un secont referendum su la indipendence e i Conservadôrs a vevin domandât il vôt par dî di no a cheste pussibilitât. La prime ministre scozese Nicola Sturgeon e à cussì declarât che, se e je vere che no ducj chei che a àn votât SNP a son indipendentiscj, e je ancje vere che denant di un risultât cussì clâr no si pues dineâi ai scozês il dirit di decidi dal lôr avignî. Za in setemane il guvier di Londre al ricevarà la domande formâl par trasferî al Parlament scozês il podê par imbastî un secont referendum su la indipendence. E se Boris Johnson al à za sierât la puarte a cheste strade, la prime ministre scozese e però à sclarît che no si trate di domandâi alc a Westminster ma di afermâ un dirit democratic dal popul scozês. Il risi al è duncje che si ledi a di une soluzion unilaterâl che e podarès trasformâ la Scozie tune seconde Catalogne.

Ancje in Irlande dal Nord lis fuarcis unionistis a pierdin teren. Cun di fat, ancje se il DUP (Democratic Unionist Party) al reste il partît plui votât, i siei elets a van jù di 10 a 8. I republicans dal Sinn Féin a confermin i lôr 7 parlamentârs, intant che i nazionaliscj moderâts dal SDLP (Social Democratic and Labour Party), che te legjislature stade no vevin nancje un deputât a Londre, a otegnin 2 elets e i progressiscj aconfessionâi di Alliance a concuistin un elet. In dut, duncje, il front europeist e progressist al pues contâ su dîs rapresentants.

Par finî, in Gales, cundut di un passaç di sîs parlamentârs dai Laburiscj ai Conservadôrs, il Labour al reste il partît plui votât cun 22 elets e la cressite dai Tories si ferme a 14 deputâts. I nazionalitaris dal Plaid Cymru a confermin i 4 parlamentârs che za a vevin.

Font: BBC, 13/12/19; The Guardian, 13/12/19;