Cechie: riclam dal Consei de Europe sul romani a scuele

La Cjarte europeane des lenghis regjonâls o minoritariis e je operative te Republiche Ceche dal 2007 incà. Tal moment de sô ratifiche a son stadis segnaladis come lenghis di tutelâ cravuat de Moravie, polac, romani, slovac e todesc. Intal so ultin rapuart sul rispiet de Cjarte, il Consei de Europe al à segnalât cemût che te documentazion prontade dal guvier di Praghe al sedi sparît ogni riferiment ae lenghe slovache. L’organisim european al domande ancje aes istituzions cechis di sbassâ il soiâr dal 10% de popolazion che al parten a di une minorance come criteri par meti fûr segnaletiche bilengâl. Il dât plui critic però al è chel che si riferìs ae presince dal romani a scuele. Cun di fat, se la lenghe de comunitât rom e cjate une cierte atenzion te universitât e je invezit dal dut insuficiente tes scuelis primariis e secondariis e assente te scuele de infanzie. Tra i elements positîfs si àn invezit la ufierte dal insegnament de lenghe todescje in diviersis scuelis de aree storiche di presince di cheste comunitât e lis iniziativis par promovi il cravuat de Moravie.

Font: Romea.cz, 25/09/20

UE: e cres la rapresentance de EFA tal Parlament european

A son diviers i candidâts di moviments rapresentatîfs des comunitâts minorizadis che a son stâts elets intal Parlament european in ocasion des votazions che si son tignudis intai diviers stâts membris de UE tra i 23 e i 26 di Mai. La vicende che dal sigûr e à fat plui scjas e je stade la elezion di trê dai rapresentants plui significatîfs dal indipendentisim catalan, o sei Oriol Junqueras, che si cjate di plui di un an in regjim di preson preventive, Carles Puigdemont e Toni Comín, che si cjatin in esili inte Belgjiche. Il prin al è stât elet cuntune liste che e meteve adun la çampe nazionalitarie basche, catalane e galiziane e che e à puartât ancje ae elezion di Diana Riba (simpri di ERC) e di Pernardo Barrena (EH Bildu). Puigdemont e Comín si presentavin invezit cu la liste Lliures per Europa. Intal stât spagnûl a son stâts elets al Parlament european ancje Izaskun Bilbao dal PNV e Ernest Urtasun di ICV.

Europe: passe 1,2 milions di firmis par “Minority Safepack”

Minority Safepack, la iniziative citadine inviade de FUEN (Union Federâl des Nazionalitâts Europeanis) par incressi lis misuris di tutele des personis che a partegnin a minorancis linguistichis e nazionâls e par infuartî la diversitât linguistiche e culturâl dentri de Union Europeane, e je stade un sucès. Cun di fat, par che la Comission Europeane e cjapi in man une iniziative citadine e covente la poie di almancul un milion di personis ator pe Union e ai 3 di Avrîl, date che e finive la racuelte des firmis, chês cjapadis sù a son stadis passe un milion e 215 mil. I stâts là che il quorum di firmis che si vevisi proponûts di cjapâ sù par Minority Safepack al è stât superât a son undis: Ongjarie (là che lis firmis racueltis a son stadis plui di mieç milion!), Romanie, Slovachie, Bulgarie, Cravuazie, Slovenie, Lituanie, Letonie, Danimarcje, Spagne e Italie. Ta chest ultin stât l’obietîf al jere stât fissât a 55 mil firmis e a ‘nd è stadis tiradis sù plui di 60 mil, pe plui part in Sud Tirôl, Val di Aoste e Friûl. I stâts a àn cumò trê mês par convalidâ lis firmis e la Comission Europeane a ‘nd à altris trê par presentâsi denant dal Parlament par riferî su la iniziative. Dopo dal agrât a ducj i citadins e aes organizazions che a àn poiât la iniziative, il president de FUEN, Loránt Vincze, al à celebrât la nassite di chel che al à clamât un vêr moviment european pai dirits des comunitâts minorizadis.

Font: FUEN, 04-05/04/18

Slovachie: scuelis ongjaresis a risi cu la riforme de istruzion

La riforme scolastiche in discussion in Slovachie e menace di colpî ancje lis scuelis magjaris che si cjatin massime inte aree meridionâl dal paîs, là che e vîf une significative minorance di lenghe ongjarese. I rapresentants dal partît di riferiment de comunitât (MKP – Partît de Comunitât Magjare) a àn segnalât che se la leç no sarà blocade o emendade si riscje di ricjatâsi cence plui scuelis publichis cul ongjarês tant che lenghe di insegnament, ma a àn ancje dite che no àn la fuarce par sburtâ il Parlament slovac a cambiâ direzion. Su la cuistion al è intervignût il president dal comitât pai afârs forescj dal Parlament di Budapest, Zsolt Németh, che al à dite a clâr che par mantignî buinis relazions jenfri Ongjarie e Slovachie al covente che lis scuelis de minorance no vegnin tocjadis.

Font: Politics.hu, 27/11/15

Slovachie: elets doi eurodeputâts de minorance ongjarese

In Slovachie, là che i plui votâts a son stâts ancjemò une volte i socialdemocratics dal SMER cul 24% des preferencis e 4 rapresentants intal Parlament european, a son stâts elets ancje doi rapresentants de minorance ongjarese. Ancje intal 2009 la comunitât magjare de Slovachie e veve elet doi deputâts a Strasburc, ma cheste volte i elets a rivin di doi partîts diviers, ven a dî il Partît de Coalizion Ongjarese (MKP / SMK: Magyar Közösség Pártja / Strana maďarskej koalície), che al à otignût il 6,5% dai vôts, e il moviment Most-Híd che al à cjapât il 5,8% des preferencis. In Slovachie, compagn che inte Republiche ceche e in Ongjarie, e vîf ancje une gruesse comunitât rom che dut câs, ancje cuant che e si propon cun partîts di stamp etnic, no rive a vê risultâts eletorâi significatîfs.

Font: elections2014.eu

Slovachie: Budapest e domande di mantignî lis scuelis magjaris

Il guvier ongjarês, par bocje dal ministri Zoltan Balog, al à domandât a chel slovac di no sierâ lis scuelis de minorance magjare inte suaze de riforme scolastiche che e previôt une riduzion dai istitûts scolastics là che a son iscrits mancul fruts. Balog al à ancje sigurât che la Ongjarie e fasarà compagn cu lis scuelis là che si studie par slovac. Il ministri pe istruzion de Slovachie, Dušan Čaplovič, al à spiegât che la responsabilitât pe gjestion des scuelis e je comunâl, ma al à ancje dite che il guvier al intint mantignî l’insegnament in dutis lis lenghis minoritariis dal paîs par garantî a ducj i citadins lis stessis oportunitâts di gjoldi di une istruzion di cualitât.

Font: Politics.hu, 27/03/14

Slovachie: prin candidât ongjarês pes presidenziâls

Al prin turni des elezions presidenziâls che si è tignût in Slovachie ai 15 di Març, tra i cutuardis candidâts ae presidence de Republiche pe prime volte si ‘nt veve un espression de minorance ongjarese che e vîf massime intes provinciis meridionâls dal stât. Gyula Bardos al è di fat il president de societât culturâl dai ongjarês Csemadok e un dai membris dal diretîf dal MKP, o sei il Partît de Coalizion Ongjarese. Pûr cence nissune sperance di vinci, Bardos al à spiegât che al à sielzût di candidâsi par mostrâ che i membris des minorancis no son citadins di seconde categorie e che a puedin vê un pês impuartant inte cressite de comunitât. Cence dismenteâ, al à zontât, che pe prime volte un candidât president al met al centri de sô campagne il teme dai dirits umans e dal rispiet des minorancis.

Font: Finugor, 14/03/14

Ongjarie: celebrazions pe zornade dai slovacs

Ai 7 di Lui e je stade celebrade a Palhaza la Zornade dai slovacs de Ongjarie. Ae manifestazion a àn partecipât ancje doi ministris dal guvier magjâr par manifestâ la volontât di amistât tra lis dôs comunitâts. Une amicizie, si à dite, che si palese ancje intal plen rispiet de identitât nazionâl de minorance che tai ultins dîs agns e je cressude dal 70% e che in dì di vuê e conte plui o mancul 30 mil membris. Pai rapresentants dal esecutîf ongjarês chest rispiet al è stât infuartît cu la gnove leç che e permet a dutis lis 13 minorancis nazionâls ricognossudis di vê dai rapresentants garantîts intal Parlament. Intant des celebrazions e je stade po ricuardade ancje la impuartance de colaborazion tra i doi stâts pal rispiet de minorance slovache in Ongjarie e di chê ongjarese in Slovachie. Teme che al è stât po frontât ai 9 di Lui a Budapest dai doi prins ministris Viktor Orban e Robert Fico.

Font: Finugor, 07/07/13

Slovachie: dimissions dal comissari pes minorancis

Il comissari dal guvier slovac pes minorancis nazionâls, László Nagy, espression de comunitât ongjarese e elet intes filis dal partît di oposizion Most-Híd, al à decidût di dimetisi de sô incarghe. Daûr di cheste sielte e je la decision de maiorance parlamentâr di boçâ l’emendament sul ûs des lenghis des minorancis nazionâls che al previodeve che la segnaletiche bilengâl e fos presinte ancje intes stazions feroviariis dai paîs là che almancul il 15% de popolazion al parten a di une minorance ricognossude. Par Nagy l’emendament al rapresentave un pont di fonde par capî la vierzidure de maiorance di guvier intai confronts des comunitâts minorizadis de Slovachie.

Font: Finugor, 11/06/13

Europe centrâl: mobilitazion des minorancis ongjaresis

Lis problematichis che a tocjin lis comunitâts ongjaresis presintis in diviers stâts europeans a son stadis al centri di un incuintri tra il comissari pes minorancis nazionâls de OSCE, Knut Vollebaek, e la segretarie di stât vicjarie ongjarese, Zsuzsanna Repas. Par chel che al rivuarde la Romanie, une des cuistions plui cjaldis e reste chê dal ûs dal ongjarês inte facoltât di medisine de universitât di Marosvásárhely / Târgu Mureş. Pe Serbie, invezit, la atenzion si è centrade su la riduzion dal nivel di autonomie de Voivodine e dal Consei Nazionâl dai Ongjarês di cheste provincie. In Ucraine si cjale massime ae metude in vore de gnove leç su lis lenghis. I emendaments su la leç sui dirits des minorancis e su chê pe citadinance, intune cul declassament de universitât di Komárom / Komárno, a son invezit i temis che a preocupin di plui pe comunitât ongjarese de Slovachie.

Slovachie: sît internet par superâ i stereotips sui ongjarês

I membris de minorance ongjarese in Slovachie a son plui o mancul 458 mil, o sei il 8,5% dal totâl, ma chel istès intal paîs a son une vore fuarts i stereotips cuintri dai ongjarês. Un tant al dipent ancje de distance, a tacâ di chê linguistiche, che si à jenfri maiorance e minorance. Par chest un dai istitûts di riferiment de comunitât magjare in Slovachie al à decidût di meti in rêt un sît internet dut par slovac che al ponte a superâ cheste distance. Intal sît si àn studis e ricercjis che a spieghin un pôcs dai aspiets principâi che a caraterizin la comunitât ongjarese, ma ancje articui che a fevelin di culture, sport, gastronomie e di tancj altris argoments che a contin de vite de minorance. Une sezion e je dute dedicade a domandis e rispuestis par cognossi miôr i ongjarês. Il non dal sît – Mad’ari – al fâs riferiment ae maniere che i slovacs a clamin i ongjarês.

Font: Finugor, 28/09/12

Europe centrâl: a cressin lis violencis cuintri dai rom

Intune riunion de OSCE sui dirits umans che si è tignude ta chestis zornadis a Varsavie, i rapresentants dal Centri european pai dirits dai rom (ERRC) a àn denunciât la incressite de violence cuintri dai rom in diviers paîs de Europe centrâl e a àn invidât i guviers di chescj stâts a protezi lis comunitâts rom di chescj atacs e a cjapâ une posizion ferme cuintri di ogni violence di stamp raziâl. Tra i stâts là che i atacs cuintri dai rom a àn cjapât la plee plui violente si àn Ongjarie, Republiche Ceche, Slovachie e Bulgarie. Intal ultin an, dome inte Republiche Ceche, a son stâts segnalâts almancul 22 episodis di atacs violents che, in sîs câs, a àn causât la muart di membris de comunitât rom. L’aument dal nivel di violence al ven fûr benon di episodis come chei capitâts inte prime metât dal an in Slovachie, là che un poliziot fûr servizi al à copât doi rom e a ‘nd à ferîts altris trê, o in Bulgarie, là che la sede di un partît rom e je stade fiscade di un atentât che al à causât ancje la muart di une des personis che si cjatavin intal edifici.

Font: ERRC, 27/09/12

Ongjarie: plui atenzion pes minorancis ongjaresis

Comunitâts di lenghe ongjarese a vivin in diviers stâts de Europe centrâl. Lis plui gruessis a son chês che si cjatin in Romanie e in Slovachie, ancje se intai ultins dîs agns la lôr consistence si è sbassade in maniere avonde significative. In Romanie si è passâts di passe un milion e mieç di personis a un milion e 200 mil, intant che in Slovachie di mieç milion si è passâts a 458 mil. Il guvier ongjarês al à mostrât une cirte preocupazion pe situazion e al à fat savê che al vûl intervignî par invertî cheste tindince. Par chest il prin ministri magjâr, Viktor Orban, si è cjatât intes primis setemanis di Lui cui delegâts dai partîts che in Romanie a rapresentin la comunitât ongjarese, ven a dî la UDMR (Union Democratiche Magjare in Romanie) – che intes ultimis elezions aministrativis e à cjapât cuasi 470 mil vôts, o sei il 5,45% su scjale statâl – il Partît Popolâr dai Ongjarês de Transilvanie (EMNP) e il Partît Civic Ongjarês (MPP). Intes ultimis aministrativis, cundut de poie massive dal guvier di Budapest, chescj doi grups di diestre no vevin rivât a passâ l’un par cent des preferencis.

Slovachie: la minorance ongjarese e piert teren

Daûr dai dâts racuelts cul censiment dal 2011 i citadins slovacs di lenghe ongjarese a saressin plui o mancul 458 mil suntune popolazion totâl di 5 milions e 400 mil personis, o sei il 8,5%. Intal censiment di dîs agns prime la minorance ongjarese e rapresentave invezit il 9,7%. Cundut di cheste diminuzion significative, i ongjarês a restin ancjemò maioritaris intes provinciis di Dunaszerdahely / Dunajská Streda, là che a rapresentin il 75% de popolazion, e di Komárom / Komárno, là che a son sù par jù il 64% dal totâl. Simpri daûr dai dâts dal censiment i membris de minorance inte capitâl Bratislava a passin i 14 mil, intant che a Kosice – la seconde citât de Slovachie – a saressin cuasi 6 mil e 400.

Font: Politics.hu, 04/07/12

Slovachie: violencis razistis, gnove condane de Cort europeane

Ai 12 di Jugn la Cort europeane pai dirits umans e à condanât lis autoritâts slovachis par no vê perseguît i responsabii di une agression di stamp razist puartade indenant intal Fevrâr dal 2002 cuintri di un grup di rom e par no vê proviodût a nissun gjenar di risarciment pes vitimis. Nol è tant che l’organisim judiziari european al veve condanât la Slovachie pal compuartament de sô magjistrature intal câs di une fantate de minorance ongjarese pacade di doi estremiscj di diestre par vie de sô partignince etniche.

Font: ERRC, 12/06/12

Slovachie: proteste pal tibiament dai ongjarês

Ancjemò tal Astât dal 2006 une fantate de minorance ongjarese che e vîf in Slovachie e je stade pacade di doi estremiscj di diestre propit par vie de sô partignince etniche. Pôc plui tart però e je stade acusade di false testemoneance de bande de magjistrature slovache. Il câs al è rivât denant de Cort europeane pai dirits umans che intal Novembar dal 2011 al à dât reson ae zovine e domandât lis scusis dal guvier slovac. Lis scusis des autoritâts slovachis a son rivadis, ma chel istès la inchieste par false testemoneance e va indenant. Par chest il segretariât di stât pes comunitâts ongjarês intal forest al è intervignût su la cuistion domandant la fin di chê che e ven stimade une persecuzion cuintri di une vitime e al à invidât la magjistrature slovache a ocupâsi invezit dai siei agressôrs.

Font: Finugor, 31/05/12

Slovachie: apel par finîle cu la propagande cuintri dai rom

Il Centri european pai dirits dai rom (ERRC), adun cuntune disine di organizazions impegnadis cuintri des discriminazions, al à indreçât un apel a ducj i partîts de Slovachie par che le finissin di doprâ intai lôr materiâi eletorâi declarazions e stereotips che a piturin i rom in maniere negative. Intune realtât come chê slovache là che i rom a vivin situazions pesantis di disasi e di discriminazion e là che si àn vût ancje agressions di stamp raziâl, chest materiâl al zove dome a esasperâ la clime. I manifescj dal Partît Nazionâl Slovac, par esempli, in plui di sburtâ sui prejudizis cuintri dai rom a batin ancje sui “coscj” che i rom a rapresentaressin pe societât. Inte realtât – a spieghin lis ONG impegnadis pai dirits umans – si calcole che la inclusion dai rom inte societât slovache e permetarès di incressi il prodot interni sporc dal paîs tra il siet e l’undis par cent. Ancje par chest, duncje, la propagande cuintri dai rom e pues zovâ a cjapâ cualchi vôt in plui, ma e je un dam grues par dute la societât.

Font: ERRC, 15/02/12

Slovachie: sentence cuintri des “classis speciâls” pai rom

Pe prime volte un tribunâl de Slovachie al à condanât tant che discriminatorie la creazion di “classis speciâls” pai fruts rom. Al centri de vicende judiziarie a son i fats capitâts inte scuele primarie dal paîs di Šarišske Michaľany là che i frutins rom a jerin metûts in classis separadis di chês dai frutins slovacs. I dirigjents de scuele a àn motivât cheste separazion cul fat che cussì si podeve adatâ l’insegnament aes esigjencis specifichis dai fruts rom, ma ancje par vie che une part dai gjenitôrs a vevin menaçât di spostâ i lôr fîs tal câs che si vessin vudis classis mistis. Pes organizazions impegnadis pai dirits umans cheste sentence e je une vore impuartante parcè che e vierç la strade par impedî ogni politiche segregazioniste. Amnesty International e à domandât ancje un intervent dal guvier parcè che, se e je vere che la leç su la educazion e proibìs discriminazion e segregazion nol da definizions specifichis di chestis dôs pratichis e cussì e lasse a ogni scuele la pussibilitât di interpretâ la norme in mût diviers. Lis ONG impegnadis pai dirits umans a spieghin che i problemis principâi che a segnin lis comunitâts rom no son leadis ae lôr nazionalitât, ma ae puaretât e par chest dutis lis istituzions e la societât slovache a varessin di lavorâ par superâ chescj problemis e impegnâsi pe integrazion dai rom, propit a tacâ des scuelis.

Font: Roma Daily News, 23/01/12

Slovachie: ongjarês decisîfs pal gnûf guvier

Intes elezions dai 12 di Jugn cuasi il 35% dai slovacs al à dât il so vôt al partît socialdemocratic Smer che al à otignût 62 dai 150 puescj dal Parlament di Bratislava. Une vore divierse, invezit, la situazion par chei altris doi partîts che inte legjislature stade a formavin la coalizion di guvier. Cun di fat, il Moviment par une Slovachie Democratiche (HZDS) nol à rivât a passâ il soiâr dal 5% che al permet di jessi rapresentâts in Parlament e i ultranazionaliscj dal SNS (Partît Nazionâl Slovac) lu àn passât par un friç e a àn vût dome 9 elets: masse pôc par rivâ a meti adun une maiorance parlamentâr. I trê partîts di centri diestre rapresentâts in Parlament – la Union Cristiane e Democratiche Slovache (SDKÚ) cun 28 elets, Libertât e Solidarietât (SaS) cun 22, e il Moviment Democratic Cristian (KDH) cun 15 – a vevin za fat savê ae vilie des elezions che no si saressin aleâts cul Smer. La clâf dal gnûf guvier slovac e je cussì intes mans dal moviment Most – Híd nassût l’an passât di une division dentri dal SMK – MKP, il Partît de Coalizion Ongjarese. Cun di fat, se il SMK – MKP, cul 4,33% des preferencis, al è restât fûr dal Parlament, Most – Híd al à cjapât il 8,12% dai vôts e 14 parlamentârs. Most – Híd, che al vûl dî “puint” par slovac e par ongjarês, si propon di meti adun lis dôs comunitâts inte prospetive di un paîs multietnic, multiculturâl e multilinguistic. Il gnûf partît de minorance ongjarese al à, duncje, i numars par decidi cui che al à di guviernâ la Slovachie e al à sielzût di formâ une coalizion di guvier alternative cui partîts di centri diestre. I risultâts eletorâi a àn mandât in bestie la dirigjence dal Partît Nazionâl Slovac che, a bote cjalde, e à declarât che si trate di “une brute sconfite pe Slovachie” che cumò e sarà guviernade di “ongjarês e omosessuâi”.

Font: Rozhlas, 16-17/06/10; The Slovak Spectator, 13-15/06/10; Món Divers, 14/06/10

Slovachie: il MKP al domande di cambiâ la leç linguistiche

Il Partît de Coalizion Magjare (MKP, Magyar Koalicio Partja), moviment di riferiment de comunitât ongjarese de Slovachie, al domande di modificâ la leç linguistiche statâl e chê di protezion des minorancis linguistichis su la fonde dai indreçaments de Cjarte europeane pes lenghis regjonâls o minoritariis. Cun di fat, pal MKP, lis ultimis modifichis fatis buinis dal parlament slovac su la leç linguistiche statâl a laressin a limitâ l'ûs dal ongjarês e di chês altris lenghis minoritariis feveladis intal paîs.

Font: MKP, 19/01/10