25/10/19

Paîs Catalans: mobilitazion continue cuintri des condanis

No si fermin in Catalogne lis protestis e lis mobilitazions cuintri de sentence dal tribunâl suprem spagnûl che e à condanât nûf dai dirigjents dal indipendentisim catalan a penis tra i 9 e i 13 agns di preson. La proteste si à inviade te dì stesse che e je stade dade fûr la sentence, ai 14 di Otubar, cu la ocupazion dal aeropuart di El Prat, fûr di Barcelone, de bande di miârs di personis che a vevin aderît ae azion imbastide dal Tsunami Democratic. La rispueste de polizie statâl e di chê locâl e veve causât passe 130 ferîts.
La zornade centrâl de mobilitazion e je stade però chê dai 18 di Otubar cuntun siopar gjenerâl che al à blocât mieze Catalogne e cuntune manifestazion che e à puartât a Barcelone uns 700 mil personis, cetantis di lôr rivadis in citâts cu lis cinc Marxes per la Llibertat partidis doi dîs prime di Tarragona, Tàrrega, Berga, Vic e Girona. Manifestazions si son dut câs davueltis sei tai dîs prime che ta chei dopo a Barcelone e in altris citâts catalanis, in plui di cualchi câs compagnadis di blocs de viabilitât e di altris azions di resistence passive. Se la grande part des mobilitazions e je stade no violente, dai 14 di Otubar indenant, massime a Barcelone e vie pe gnot, cualchi centenâr di zovins al à tirât sù baricadis e si à scuintrât cun violence cu la polizie: polizie che in plui di cualchi câs e je stade protagoniste di azions di violence injustificade cuintri dai manifestants (ancje cul ûs di proiets di gome proibîts in Catalogne) e fintremai cuintri di rapresentants de stampe. In nancje une setemane si à contât passe tresinte ferîts e disinis di arestâts. Lis manifestazions cuintri de sentence a àn interessât ancje altris lûcs ator pai Paîs Catalans e pal stât spagnûl. Iniziativis di proteste une vore partecipadis, e che in cualchi câs a àn puartât ancje a scuintris cu la polizie, si àn vudis intal Paîs Basc e fintremai a Madrid. Sul plan istituzionâl, a Madrid si continue a frontâ la cuistion come se e fos un probleme di ordin public e no politic, a Barcelone i dirigjents dai partîts indipendentiscj a restin dividûts sul cemût procedi e a Bruxelles si va dilunc a fâ fente che si trati di une vicende interne spagnole.
Font: VilaWeb, 12/10/19; Ara, 12/10/19; Naiz:, 12/10/19

Nessun commento: