Europe: pas di Madrid pal ûs des lenghis couficiâls a Bruxelles

Il guvier spagnûl al à fat indenant une domande formâl al Parlament european par che si ricognossi la pussibilitât di doprâ il basc, il catalan e il galizian intant des riunions plenariis de istituzion. L’esecutîf di Madrid si è impegnât a cuvierzi dutis lis spesis che cheste iniziative e compuartarès e si à declarât disponibil a discuti daurman i detais pratics par che la domande si concretizi. Chest pas al jere tra chei concuardâts inte taule di dialic jenfri il guvier spagnûl e chel catalan.

Font: VilaWeb, 16/09/22

Aragon: no di Madrid al aragonês come classe di insegnament

Il tentatîf dal esecutîf dal Aragon di otignî une classe di concors pal insegnament dal aragonês si à cjatât denant dal “no” dal ministeri spagnûl pe educazion. La motivazion dade par chest dinei e je che nol è avonde che si trati di une lenghe minorizade ricognossude e tutelade ma, par otignî il ricognossiment di une categorie di insegnament specifiche, al covente che cheste lenghe e sedi ricognossude ancje come couficiâl. Intal câs dal Aragon chest al oblearès a mudâ il Statût di autonomie, cuntun percors lunc e par nuie sempliç. A cambiâ la linie dal guvier di Madrid no à coventade nancje la sigurazion che la Comunitât dal Aragon e varès cuviert jê ducj i coscj pai insegnants ricognossûts. In dì di vuê l’aragonês – che si stime che al sedi cjacarât o almancul cognossût dal 3% de popolazion de Comunitât – al è za presint come materie di insegnament a scuele ma i 21 professôrs che lu insegnin (tra scuele de infanzie, primariis e secondariis) si cjatin intune posizion lavorative precarie che ju sburte a cirîsi une ocupazion plui garantide.

Font: Heraldo, 14/09/22

ONU: violâts i dirits politics dai indipendentiscj catalans

Ai 31 di Avost il Comitât pai dirits umans de ONU al à dât fûr une sentence là che si dîs che il stât spagnûl «al à violât i dirits politics di ex membris dal guvier e dal Parlament de Catalogne» cuant che al à suspindût des lôr funzions publichis i dirigjents indipendentiscj acusâts intal procès che al puartarà po, tal 2019, ae lôr condane par vie dal referendum su la indipendence de Catalogne che si veve tignût il prin di Otubar dal 2017. A indreçâsi al Comitât a jerin stâts il vicepresident dal guvier catalan di in chê volte, Oriol Junqueras, e i membris dal esecutîf Raül Romeva, Josep Rull e Jordi Turull. L’organisim de ONU ur à dât reson sul fat che la decision di suspindiju des lôr funzions prime de sentence di condane e leve cuintri dal Pat internazionâl sui dirits civîi e politics. Il Comitât al condane ancje il fat che a fossin stâts acusâts di “ribelion” – reât che al previôt un riviel violent – cundut che i dirigjents indipendentiscj a vessin simpri invidât i citadins a mantignî compuartaments pacifics.

Font: Naiz:, 31/08/22

Paîs Catalans: al cres il catalan tes provis di acès ae universitât

Uns 97,2% dai students a àn sielzût il catalan come lenghe veicolâr pes provis di acès ae universitât che si son tignudis in Catalogne, a front di un 2,8% che al à optât pal castilian. Une cifre in cressi rispiet al an passât cuant che a sielzi la lenghe dal stât al jere stât uns 5% dai fantats. I students a vevin di fâ la lôr sielte par mieç di un formulari anonim, imponût par vie judiziarie, là che a vevin di specificâ se a volevin rispuindi aes domandis dal esam par catalan, par castilian o par ocitan aranês. La rapresentante dal guvier catalan pes universitâts, Gemma Geis, e à declarât che l'intervent de magjistrature spagnole al à pidimentât la organizazion des provis ma si à mostrade cetant sodisfate pe sielte cuasi totâl dai fantats a pro dal catalan.

Font: VilaWeb, 22/06/22

Stât spagnûl: no al ûs des lenghis couficiâls in Parlament

I vôts dal PSOE a son stâts decisîfs, in zonte a chei de diestre spagnoliste (PP, Ciudadanos e Vox), par boçâ la propueste di riforme dal regolament de Cjamare dai deputâts spagnole che e varès permetût di doprâ lis lenghis ricognossudis come couficiâls intes Comunitâts autonomis intes riunions plenariis de Assemblee, ta chês des comissions e te trascrizion dai lavôrs parlamentârs. A dimostrazion pratiche che intal Parlament spagnûl nol esist spazi che pal castilian, i deputâts espression des nazionalitâts minorizadis che a àn provât a intervignî in aule te lôr lenghe proprie a son stâts cidinâts pôc dopo vê cjapade la peraule.  

Font: EiTB, 21/06/22

Galizie: in cressi lis denunciis par dirits linguistics violâts

In Galizie, il numar di segnalazions par violazion dai dirits linguistics presentadis alì dal difensôr civic (Valedor do Pobo) al è cuasi triplicât rispiet al an passât passant des 96 dal 2020 aes 261 dal 2021. Al è ce che al salte fûr de informative che la difensore civiche Dolores Fernández Galiño e à consegnât ai 20 di Jugn al president dal Parlament de Galizie, Miguel Ángel Santalices. Des denunciis ricevudis, 36 a son stadis ziradis al difensôr civic statâl par vie che a fasevin riferiment ae esclusion dal galizian dai servizis statâi in Galizie. Pôc mancul dal 90% des segnalazions si riferìs ae aministrazion galiziane, ma no mancjin denunciis par violazions dai dirits linguistics fats di aministrazions locâls, agjenziis publichis e universitâts. Par chel che al rivuarde i servizis gjestîts de Comunitât autonome, cuasi une segnalazion su cuatri e interesse la sanitât.  

Font: Nòs Diario, 21/06/22

Stât spagnûl: azion a pro des lenghis uficiâls in Parlament

Il grup parlamentâr di Unidas Podemos, intune cui principâi partîts nazionalitaris bascs, catalans e galizians (EH Bildu, PNV, ERC, Junts, CUP, PDeCat, Más País, Compromís, BNG), a àn presentât inte Cjamare dai deputâts di Madrid une propueste di riforme dal regolament dal Parlament che e permeti, ancje par mieç di un sisteme di traduzion simultanie, di intervignî intant dai lavôrs de session plenarie tune des lenghis ricognossudis come couficiâls a nivel teritoriâl. La propueste e previôt ancje la pussibilitât di presentâ tescj scrits inta chestis lenghis e di garantî il lôr ûs par iniziativis inmaneadis dentri dal Parlament. In dì di vuê, l’ûs di basc, catalan e galizian al è permetût, in forme parziâl, dome intant dai lavôr dal Senât. La aprovazion de propueste, che e viôt contrariis lis diestris spagnolistis (PP, Ciudadanos e Vox), e dipendarà massime dal vôt dai socialiscj che, fin cumò, nol è che si vedin mostrâts masse cjalts sul teme.

Font: Galicia Confidencial, 25/05/22

Paîs Catalans: il TSJC al vûl subite il 25% di castilian a scuele

Il tribunâl superiôr di justizie de Catalogne (TSJC) al à ordenât al guvier catalan (Generalitat) di meti in vore daurman la sentence che e impon un 25% di insegnament par castilian in dutis lis scuelis dal principât. Al esecutîf i vegnin dâts cuindis dîs di timp par dâ fûr ai istitûts scolastics lis istruzions par aplicâ la decision dal tribunâl e i si specifiche che si à di previodi, dongje des oris di lenghe e leterature spagnole, almancul une altre materie dute par castilian. La gnove iniziative dal tribunâl e diven de acetazion de domande di esecuzion sfuarçade de sentence fate indenant de cussì clamade “Assemblee par une Scuele Bilengâl”, o sei une associazion spagnoliste che si bat cuintri dal insegnament imersîf dal catalan. I magjistrâts no àn calcolât suficient l’impegn dal guvier par mendâ la leç di politiche linguistiche. Al è di dî che, dopo dal gnûf intervent dal tribunâl, Junts per Catalunya si à dissociade dal dut dal acuardi par modificâ la leç, lassant ERC – uniche tra lis fuarcis indipendentistis – a sostignîle intune cun socialiscj e ECP. Intal câs che ERC e ledi indenant par cheste strade si riscje duncje une gnove crisi di guvier. A cressin intant lis critichis che a rivin dal associazionisim civic catalan pe maniere che l’esecutîf al à frontât la cuistion, judicade masse flape e cence une vere volontât di difindi fint insom il model scolastic imersîf.

Font: VilaWeb, 09-12/05/22

Paîs Catalans: inviade la cuintriofensive al “Catalangate”

A partî di une investigazion di Citizen Lab, ai 18 di Avrîl il setemanâl The New Yorker al à publicât une inchieste titulade “Cemût che lis democraziis a spiin i lôr citadins” là che al ufrive elements une vore detaiâts sul spionaç par mieç dal programs Pegasus e Candiru di almancul une sessantine di rapresentants dal indipendentisim catalan, tra di lôr il president in cjarie (Pere Aragonès) e trê ex presidents dal guvier catalan (Carles Puigdemont, Quim Torra e Artur Mas), parlamentârs, eurodeputâts, dirigjents politics e dal associazionisim sociâl, imprenditôrs, gjornaliscj ma ancje familiârs e fintremai i lôr avocats. Tra i nons, ancje doi dirigjents dal moviment de çampe indipendentiste basche EH Bildu (Arnaldo Otegi e Jon Iñarritu). Il scandul – batiât Catalangate – al è daûr a menaçâ la tignude dal guvier di Madrid, che al stâ sù cu la poie fondamentâl dai partîts indipendentiscj catalans e bascs.

Paîs Catalans: protestis a un an dal impresonament di Hasel

Ai 15 di Fevrâr dal 2021 il musicist catalan Pablo Hasel al vignive impresonât par vie dai contignûts di une serie di cjançons e di tescj che al veve scrit. La sô condane e il so arest a vevin discjadenât protestis dentri e fûr dai Paîs Catalans, pontant la atenzion par un pôc sul teme de libertât di espression intal stât spagnûl. Lis protestis, in plui di un câs, si vevin sieradis cun scuintris cu lis fuarcis di polizie causant diviers ferîts, ancje seris, tra i manifestants e l’arest di almancul une cincuantine di personis: cuatri di lôr a son ancjemò in preson, altris a son in spiete di procès che, cun dute probabilitât, si fasaran dome tal 2023. A distance di un an, cundut dai impegns cjapâts ta chei dîs soredut des fuarcis progressistis, la riforme dal codiç penâl par chel che al rivuarde i cussì clamâts “delits di opinion” no à mot nancje un pas e la domande di indult par Pablo Hasel e je restade dome une promesse. La normative in vore par limitâ la libertât di espression e l’ûs che indi fâs la magjistrature spagnole a son stâts doprâts une vore ta chescj agns massime par cidinâ la oposizion politiche e culturâl de part indipendentiste e antagoniste des nazionalitâts minorizadis che a vivin dentri dal ream di Spagne. Ai 19 di Fevrâr, in ocasion dal inovâl dal impresonament di Pablo Hasel, centenârs di personis a àn dât vite a gnovis manifestazions di proteste in diviersis localitâts catalanis.

Font: VilaWeb, 13 e 14/02/22

Paîs Basc: apel a rispuindi ai atacs judiziaris cuintri dal basc

Ai 5 di Fevrâr centenârs di personis a àn partecipât ae manifestazion clamade adun a Laudio / Llodio di Euskalgintzaren Kontseilua – coordenament che al ten adun lis organizazions plui impuartantis impegnadis pe lenghe basche – par denunciâ la esistence di une strategjie judiziarie cuintri dal euskara. Il pont di partence al è leât a di une sentence che e oblee la aministrazion comunâl di chê citadine alavese a cjapâ a vore une funzionarie che no à lis competencis linguistichis, e tal specific il nivel di cognossince dal basc, domandadis pe sô posizion. Tra lis altris, la sentence e justificave la funzionarie pal fat che la lenghe basche e sarès une vore dificile di imparâ. Magari cussì no – al à spiegât il segretari gjenerâl di Kontseilua, Paul Bilbao – no je la prime volte che i judiçs a cjapin decisions no daûr di criteris juridics, ma su la fonde di prejudizis o di competencis che no àn, sedino di nature linguistiche, pedagogjiche (come tal câs de imersion linguistiche catalane) o altri. Massime tai ultins agns tancj magjistrâts a àn cirût di doprâ lis lôr sentencis par cambiâ la normative linguistiche in vore e par limitâ ancjemò di plui i dirits linguistics dai citadins. Di chi un apel a organizazions pe lenghe, agjents sindacâi, politics e sociâi, istituzions e citadins par dâsi adun e fâi cuintri a cheste strategjie judiziarie di atac ae lenghe e a cui che le dopre.

Font: EiTB, 05/02/22

Paîs Catalans: lis fameis a jentrin te bataie pe scuele di Canet

Ai 4 di Fevrâr lis fameis de scuele “Turó del Drac” di Canet de Mar, là che il tribunâl superiôr di justizie de Catalogne al à imponût un 25% di insegnament par castilian, a àn presentât ae cort une istance par partecipâ ae cause come part coinvolte. L’intindiment al è chel di pandi la volontât maioritarie des fameis di mantignî il sisteme a imersion par catalan in vore te scuele e di domandâ la sospension des misuris che a imponin il castilian intun cuart des oris di lezion. Si trate de prime volte che lis fameis di une scuele a fasin un pas dal gjenar e un tant al diven dal fat che nissun, ni tal dipartiment de educazion e tant mancul la magjistrature, i à permetût di difindi la lôr posizion in mert al cambi di model educatîf imponût ai lôr fîs. Il coletîf dai gjenitôrs al conteste l’ûs politic che al è stât fat dai lôr fruts e nol acete la imposizion di misuris decidudis cence tignî in nissun cont criteris pedagogjics, sociâi e linguistics.

Font: VilaWeb, 04/01/22

Galizie: il setôr audiovisîf al reclame un leç par garantî il galego

Te facoltât di siencis de comunicazion de universitât di Sant Jacum di Galizie (USC) e je stade presentade la Iniciativa polo audiovisual en galego cun chê di rivendicâ il rispiet dai dirits de lenghe galiziane dentri de gnove leç gjenerâl su la comunicazion audiovisive che il guvier spagnûl al è daûr a imbastî. In particolâr, dongje dal domandâ il rispiet de diversitât linguistiche dal stât spagnûl, si propon di specificâ lis cuotis di programazion di contignûts produsûts in Galizie e par galego intes televisions e tes plateformis in linie. La iniziative e nas de colaborazion tra A Mesa pola Normalización Lingüística cul grup di studi sui audiovisîfs de universitât e cun diviersis organizazions di categorie o sindacâls dal setôr.

Font: Nòs Diario, 03/02/22

Paîs Catalans: pat cuintri dai atacs al sisteme educatîf catalan

Il sisteme educatîf de Catalogne si fonde sul principi de no discriminazion linguistiche dai arlêfs, sul dirit - dovê dai students di completâ il lôr percors scolastic cuntune buine competence scrite e orâl di catalan e castilian, e sul dirit di jessi istruîts par catalan. Fin cumò, chescj trê principis a àn permetût al sisteme educatîf catalan di garantî une coesion sociâl che in dì di vuê e je menaçade dal intervent de magjistrature spagnole. Par chest il guvier catalan (Generalitat de Catalunya) al à fat bon un acuardi che si propon di difindi di ogni sorte di atac judiziari e politic il personâl che al lavore tal sisteme scolastic de Catalogne. Il pat al previôt ancje di intervignî sul plan politic, aministratîf e penâl cuintri di chei sogjets che a vessin di atacâ personis e coletîfs impegnâts inte difese de lenghe catalane.

Font: Generalitat de Catalunya, 04/01/22

Paîs Catalans: il suprem al impon il 25% di castilian a scuele

Cundut che nol è jentrât intal mert de cuistion limitantsi a sostignî che no jerin i elements par un ricors, il tribunâl suprem spagnûl al à confermât la sentence de cort superiôr di justizie de Catalogne che e impon un 25% di lezions par castilian intal sisteme scolastic catalan alterant cussì in maniere significative il model imersîf in vore te Comunitât. Dut al jere partît intal 2015 cuant che il ministeri pe educazion spagnûl – in chê volte tes mans dal PP – al veve fat ricors cuintri de leç catalane pe educazion. Intal 2020 la magjistrature i veve dât reson in prin grât causant un cuintriricors dal esecutîf catalan.

Galizie: contribûts dineâts di Madrid par vê doprât il galizian

A Mesa pola Normalización Lingüística e à fat savê che e denunciarà al Consei de Europe il guvier spagnûl par vê violât in plui di une ocasion i dirits ricognossûts cu la Cjarte europeane des lenghis regjonâls o minoritariis. L’episodi plui resint si riferìs al dinei di un contribût al comun di Cambados de bande dal ministeri de transizion ecologjiche par vie che la documentazion e jere stade prontade par galizian. L’ûs de lenghe proprie tai rapuarts cul guvier centrâl al è garantît ancje de Cjarte europeane e, fint in chel, nol veve vût fastidis cun chei altris ministeris. Pe organizazion galiziane il compuartament dal ministeri de transizion ecologjiche, in plui di pandi dispresi pe lenghe proprie de Galizie, al rapresente un tentatîf di ricat intai confronts di ducj chei ents che a pensin di esercitâ il lôr dirit di doprâ il galizian. A Mesa e domande ancje al esecutîf de Galizie (Xunta) di cjapâ une posizion fuarte cuintri dal compuartament dal ministeri.

Font: Nòs Diario, 30/09/21

Paîs Basc: la Audiencia Nacional e siere doi media bascs

A son zaromai dîs agns che ETA e à bandonât in maniere definitive la lote armade e pûr, chel istès, cierts aparâts dal stât spagnûl a van indenant cu la repression cemût che a fasevin cuant che a podevin justificâ lis lôr azions come part de “lote cuintri dal terorisim”. La Audiencia Nacional spagnole – la cort che e puarte indenant il lavôr dal tribunâl speciâl di ete franchiste – e à decretât di sierâ daurman la riviste “Kalera Info” e il sît “Kalera Kalera” che il moviment de çampe indipendentiste Sortu al dediche ai militants bascs impresonâts, aes bataiis legâls che ju interessin e, plui in gjenerâl, ae politiche carcerarie. La decision e je motivade cuntune ipotesi di reât di “esaltazion dal terorisim”, doprade plui voltis propit par atacâ lis iniziativis di solidarietât e informazion dedicadis ai presonîrs politics. Par Sortu la decision dal tribunâl spagnûl no rapresente dome une agression cuintri des ativitâts di un partît politic legâl e cuintri dal dirit di informazion ma ancje un atac al lavôr par costruî une clime di convivence dopo des feridis lassadis dal conflit che al à colpît a dilunc il Paîs Basc. No je la prime volte che la magjistrature spagnole e siere dai mieçs di comunicazion bascs: i câs plui cognossûts a son chei che a àn tocjât i cuotidians “Egunkaria” e “Egin”.

Font: Naiz:, 22/09/21

Stât spagnûl: si cîr di slargjâ l’ûs des lenghis propriis in Senât

Il PSOE al à dât la sô poie al esam inte comission pal regolament dal Senât spagnûl di une propueste par mendâ il regolament in maniere di podê doprâ in ducj i lavôrs de aule e des comissions ancje il basc, il catalan e il galizian. Une pussibilitât che, in dì di vuê, e je permetude dome par dibati lis mozions in assemblee plenarie. Il vôt dai socialiscj al jere decisîf par permeti ae propueste di jessi esaminade. La iniziative e veve za la poie di ducj i partîts espression des nazionalitâts minorizadis e di chei de çampe plurâl. Cuintri de propueste a àn cjapât posizion invezit ducj i partîts di diestre – PP, Ciudadanos e Vox – che a contindin che tes istituzions dal stât si à di fevelâ dome par castilian e no in lenghis che a declarin di “no capî”.

Font: El Diario, 22/09/21

Stât spagnûl: leç sul audiovisîf, lenghis couficiâls penalizadis

Il guvier spagnûl al à in buine sostance escludût lis lenghis couficiâls – o sei basc, catalan e galizian – dal progjet par une leç gjenerâl su la comunicazion audiovisive che e varès di meti ordin intal marcjât des plateformis digjitâls che a ufrissin contignûts audiovisîfs tant che Netflix, Amazon Prime e HBO. Daûr des primis indiscrezions al ven fûr che il test al previôt che il 30% des oparis dal catalic ufiert di chestis plateformis a vedin di jessi di produzion europeane e che la metât di chestis ultimis (o sei il 15% dal totâl) a vedin di jessi produzions par castilian o in altris lenghis dal stât spagnûl. Cundut che si à un riferiment ancje aes lenghis couficiâls, la mancjance di mecanisims specifics di tutele e puartarès cun dute probabilitât a lassâ fûr chestis lenghis a vantaç dal castilian. Il stes al vâl ancje pe part de propueste di leç che e previôt che i servizis di comunicazion audiovisive cun jentradis di passe 50 milions di euros a vedin di invistî un 5% dai lôr vuadagns par oparis di produtôrs indipendents europeans e che almancul il 70% di cheste percentuâl e ledi a chei che a doprin il castilian o lis lenghis uficiâls des Comunitâts autonomis. Intal stampon de leç, duncje, il guvier spagnûl nol à recepît lis propuestis rivadis des Comunitâts autonomis cun lenghe proprie e nol à tignût cont nancje des mobilitazions che a van indenant a cressi par domandâ, in primis a Netflix, di garantî su la sô plateforme digjitâl e tal so catalic ancje basc, catalan e galizian.

Font: Naiz:, 20/09/21; Galicia Confidencial, 23/09/21

Paîs Catalans: repression ancje su membris dal guvier catalan

L’indult parziâl concedût dal guvier spagnûl ai dirigjents politics catalans condanâts pal referendum dal prin di Otubar dal 2017 nol à puartât ae fin de repression judiziarie metude in at cuintri dal indipendentisim catalan che, al contrari, e colpìs ancje diviers dai membris dal guvier catalan in cjarie. Roger Torrent – che tal esecutîf si ocupe di economie – al è sot inchieste cun altris trê di lôr par disubidience par vie des ativitâts davueltis cul ufici di presidence dal Parlament catalan inte legjislature stade. La delegade pe culture, Natàlia Garriga, e je investigade cuntune trentine di altris personis pai preparatîfs dal referendum dal prin di Otubar. Cundut de assoluzion in prin grât, Tània Verge – delegade pes politichis di gjenar – e je colpide dal un ricors presentât de publiche acuse. La repression judiziarie e interesse ancje il delegât pe educazion, Josep González Cambray, che al è te vincjine di indagâts intal cussì clamât câs Volhov e par chest al è stât ancje arestât de polizie. La repression, dut câs, no tocje dome i membris dal atuâl guvier catalan. Pai fats leâts al referendum su la indipendence, si stime che a sedin almancul 3 mil lis personis arestadis, indagadis o sot procès.

Font: VilaWeb, 06/08/21