La
organizazion Plataforma per la Llengua e à inviât la campagne “Som
10 milions, som una llengua” che si
propon di fâi cuintri ai tentatîfs di fruçonament de unitât
linguistiche catalane dispès metûts in at des stessis istituzions
publichis. Il catalan al è fevelât di plui o mancul dîs milions di
personis in cinc comunitâts autonomis diviersis dentri dal stât
spagnûl (principât di Catalogne, isulis Baleârs, Paîs Valenzian e
cualchi aree dal Aragon e di Murcia), ma ancje in Andorra, intal
dipartiment francês dai Pireneus orientâi (Catalogne dal Nord) e te
citât sarde dal Alguer / Alghero.
In diviers câs lis aministrazions
locâls, massime cuant che a son stadis guviernadis des diestris, a
àn cirût di pidimentâ l’ûs dal catalan ancje cul dâi un non
diferent: il câs plui impuartant al è chel de Comunitât Valenziane
là che pe lenghe proprie si dopre simpri la denominazion di
valenzian. Cundut di diviersis sentencis – a partî di chê dal
tribunâl costituzionâl spagnûl dal 1997 che e certifiche la
ecuivalence jenfri catalan e valenzian – a van daûr a cressi i
portâi e i documents dal guvier spagnûl e di altris istituzions
statâls che a tratin catalan e valenzian come dôs lenghis
diviersis, un compuartament che al è stât ricjapât po ancje di
sogjets privâts tant che bancjis o cjadenis de grande distribuzion.
I efiets a son negatîfs sei sul plan sociâl che su chel economic.
Al pues sucedi cussì che la certificazion linguistiche sul nivel di
cognossince dal catalan no vegni tignude par buine cuant che si cîr
lavôr intune Comunitât divierse de proprie o pûr che il stes cine
o la stesse serie televisive a vegnin dopleâts par catalan dôs o
fintremai trê voltis parcè che lis televisions publichis de
Catalogne, dal Paîs Valenzian e des Baleârs no condividin i
materiâi. Dut chest al influìs ancje su la percezion de int al pont
che intal principât di Catalogne dome il 44,5% de popolazion al
pense che catalan, valenzian e maiorchin a sedin la stesse lenghe. La
campagne si propon di sburtâ lis istituzions locâls a evitâ ogni
azion divisive e di sensibilizâ la int dai Paîs Catalans su la
unitarietât de lenghe par disore des varietâts locâls.
Font:
PFLL,
30/10/19
Nessun commento:
Posta un commento