12/05/09

Paîs Catalans: miârs in place pai dirits linguistics

Internazionalitari 05 2008


Ai 9 di Mai miârs di personis si son dadis dongje te capitâl des isulis Baleârs par manifestâ a pro de lenghe catalane e par marcâ la sô funzion di imprest primari pe integrazion di cui che al rive di inaltrò. La manifestazion e je stade inmaneade de “Obra Cultural Balear” tant che rispueste ai atacs dal PP cuintri de politiche linguistiche dal guvier des isulis, in particolâr intal setôr de sanitât. I partecipants – che pai organizadôrs a jerin 15 mil – a àn formât dôs cjadenis umanis jenfri place di Spagne e il Parlament. Tra di lôr a jerin ancje tancj imigrâts che a àn mostrât di tignî il catalan di lenghe de convivence e de integrazion sociâl. Intant de manifestazion i rapresentants de “Obra Cultural Balear” a àn let un document là che si rivendiche “il dirit a cognossi il catalan, parcè che dome cu la cognossince si à la pussibilitât di sielzi”.

Te stesse zornade une altre manifestazion si è davuelte a València cu la partecipazion di uns 30 mil personis intal inovâl de sconfite di Almansa: date cetant impuartante inte storie dai Paîs Catalans. La iniziative e je stade inmaneade de organizazion “Acció Cultural del País Valencià” che, chest an, e à sielzût tant che teme de rivendicazion il dirit di podê viodi lis televisions de Catalogne ancje intal Paîs Valenzian che al ven dineât dal guvier spagnolist valenzian.

Font: Diario de Mallorca, 10/05/09; Diari de Balears; 05-10/05/09; Vilaweb, 10/05/09


Paîs Catalans: prin pas pal referendum su la autodeterminazion

Internazionalitari 05 2008


E je stade presentade intal Parlament catalan la domande par inviâ la racuelte di firmis pe iniziative di leç popolâr su la organizazion di un referendum su la autodeterminazion de Catalogne. Cumò i spiete ae Assemblee di decidi se ameti o no la domande. Dome se il Parlament catalan al disarà di sì, i promotôrs a podaran tacâ a tirâ sù lis 50 mil firmis che a coventin pe iniziative di leç popolâr. A sburtâ chest progjet a son i grups Deumil.cat e Catalunya Estat Lliure. I promotôrs a sperin che la lôr iniziative e cjati la poie almancul di chei partîts che a ricognossin il dirit di autodeterminazion, tant che CDC, UDC, ERC, ICV e EuiA. Un dai obietîfs di cheste azion al è chel di rivâ a fâ discuti di autodeterminazion intal Parlament catalan.

Font: Món Divers, 07/05/09


Paîs Basc: finâl di cope tant che ocasion di rivendicazion nazionâl

Internazionalitari 05 2008


Ai 13 di Mai l'Athletic di Bilbao e il Barcelona a zuiaran la finâl de "Cope dal re" propit denant dal rapresentant principâl dal stât spagnûl. Si trate di une ocasion pardabon impuartante par rivendicâ il dirit di bascs e catalans a vê des nazionâls di balon par lôr cont. Par chest, tune conference stampe, i rapresentants de organizazion basche ESAIT, che di agns si bat pal ricognossiment de nazionâl basche, a àn invidât i tifôs dal Athletic e dal Barça par che a trasformin la finâl tune manifestazion di rivendicazion nazionâl.

Font: ESAIT, 06/05/09; Gara, 07/05/09


Paîs Basc: prin guvier spagnolist pe CAB

Internazionalitari 05 2008


Ai 5 di Mai il Parlament de Comunitât Autonome Basche al à elet, pe prime volte te sô storie, un president che al rive di un partît spagnolist. Si trate dal socialist Patxi López, che al à otignût il vôt dai parlamentârs dal PSE (Partît Socialist di Euskadi, sezion basche dal PSOE), dal PP (Partît Popolâr) e di UPyD (Union, Progrès e Democrazie). Un tant al è stât pussibil in graciis dal pat jenfri socialiscj e popolârs che al fisse lis liniis principâls che il gnûf guvier al varà di puartâ indenant. López, dut câs, al vuidarà un esecutîf formât dome di socialiscj, dal moment che no si à sielzût la strade de aleance tra i doi partîts, ma chê de poie esterne dal PP. Intal so discors di program, López al à metût come prin pont la lote cuintri di ETA; po al à difindût il Statût di autonomie cussì cemût che al è; al à sigurât che nol sbassarà i fonts pe lenghe basche, ma al à ancje anticipât che a saran gjavadis ciertis garanziis pal euskara inte scuele; al à confermât la intenzion di riformâ la radiotelevision publiche basche EiTB; al à fevelât dal so plan cuintri de crisi economiche e al à garantît che si larà indenant cui progjets pal TAV. Cun di plui, il gnûf president de CAB nol à platât la sô sodisfazion pe esclusion dal Parlament de çampe indipendentiste basche. Critichis duris cuintri de sô legjitimitât e dal so program a son rivâts dal PNV, che tes urnis al veve otignût la maiorance relative. In ogni câs, a àn dite i rapresentants dal PNV, la lôr formazion e impedirà che si ledi a fâ dams al Paîs Basc. Inmò plui duris lis critichis rivadis di Eusko Alkartasuna e, massime, di Aralar che a àn ricuardât cemût che la presidence di López e sedi stade pussibile dome in graciis de magjistrature spagnole e de Leç sui partîts che a àn escludût la çampe indipendentiste basche de corse eletorâl e che no àn tignût in cont i 100 mil vôts che i eletôrs bascs a àn metût tes urnis par pandi la lôr poie ae rapresentance de ezkerra abertzale. Intune note di Eusko Alkartasuna si lei che "dome la manipolazion partesane des leçs e la magjistrature spagnole a àn permetût la elezion dal candidât socialist, che al varà simpri di vêlu iniment se nol vûl guviernâ cuintri de maiorance dal paîs". Par Aralar il gnûf guvier "al lasse fûr la maiorance sociâl e politiche basche".

Font: Gara, 05-08/05/09


Scozie: par Salmond si è a doi tierçs de strade pe indipendence

Internazionalitari 05 2008


Ai 6 di Mai dal 1999 i citadins scozês a vevin podût votâ pe prime volte par sielzi i lôr rapresentants intal Parlament de Scozie, istituzion tornade a meti in pîts daspò di trê secui di guvier diret di Londre. In chê volte la vitorie e jere lade ai laburiscj che a vevin otignût 56 deputâts (i nazionaliscj scozês a ‘nt vevin vûts 35). A dîs agns di chê date storiche, il guvier scozês al è cumò tes mans dal SNP (Partît Nazionâl Scozês) che al conte 47 deputâts, cuintri dai 46 dai laburiscj. Pal prin ministri scozês Alex Salmond, duncje, la Scozie si cjate vuê a jessi plui dongje de indipendence di ce che e je stade tai ultins 300 agns. Za doi tierç de strade pe indipendence a son stâts fats – al dîs Salmond – il prin tierç al è stât otignût cu la rinassite dal Parlament scozês, il secont cu la vitorie dal SNP e il tierç al rivarà cul referendum su la indipendence. Cun dut des dificoltâts de operazion, di fat, Salmond al spere ancjemò di rivâ a imbastî il referendum tal 2010. A tignî alt il morâl dai nazionaliscj al è massime l’ultin sondaç publicât dal Sunday Herald che ur da un vantaç tra i 10 e i 12 ponts percentuâi sui laburiscj.

Font: Món Divers, 04/05/09


Ladinie: “Aisciuda Ladina”, une setemane pe lenghe

Internazionalitari 05 2008


Dai 3 ai 7 di Mai, inte val di Fasse, si è davuelte la prime edizion de “Aisciuda Ladina” (Vierte Ladine): une manifestazion a pro de lenghe metude adun dal Comprensori ladin, intune cu la Union di Ladins, la scuele e l’Istitut Cultural de Fascia. La iniziative e riclame in maniere ideâl la prime manifestazion rivendicative dai ladins metude adun ai 5 di Mai dal 1920 sul Jouf de Frea. Propit inta chê ocasion e sarès nassude la bandiere ladine. Dilunc vie de setemane a son stâts metûts adun cetancj moments par valorizâ la identitât ladine, a tacâ propit de lenghe. Un puest di prin plan te iniziative lu àn vût lis scuelis de valade, dal moment che, in plui di cjalâ ae identitât e ae storie de comunitât ladine, si à volût fâ il pont su lis prospetivis che i ladins a àn tant che popul. La manifestazion e à ancje ufiert la pussibilitât di confrontâsi cun chês altris comunitâts di lenghe ladine, o sei furlans e grisons.

Font: La Usc di Ladins, 02/05/09


Scozie: nuie gaelic sui assegns bancjaris

Internazionalitari 05 2008


Pe Royal Bank of Scotland no si pues compilâ i assegns par gaelic. A denunciâ il fat al è Arthur Cormack, il president dal Ufici pe Lenghe Gaeliche (Bòrd na Gàidhlig), su la fonde dal episodi capitât a di un corentist de bancje che si à viodût refudâ un assegn compilât par gaelic. Al va dite che lis scritis sul assegn a jerin bilengâls e, duncje, al client de bancje i à vignût naturâl di compilâlu te sô lenghe proprie, ven a dî par gaelic. La bancje si difint cul dî che par verificâ che i dâts a sedin juscj e varès di vê personâl che al cognòs il gaelic in dutis lis sôs filiâls, ma chest no i è pussibil. L’Ufici pe Lenghe Gaeliche, invezit, al sugjerìs al istitût di riviodi il so ategjament se nol vûl che i siei corentiscj di lenghe gaeliche a sielzin di cambiâ bancje.

Font: Gaelport, 01/05/09


Galizie: denunciade la violazion dai dirits linguistics inte scuele

Internazionalitari 05 2008


A son miârs i gjenitôrs galizians che si cjatin a no vê garantît pai lôr fîs il dirit a studiâ inte lôr lenghe proprie. La denuncie e ven fate de organizazion “A Mesa pola Normalización Lingüística” cul dâ vôs ai gjenitôrs che a fasin part dal grup “Nais e Pais polo Ensino en Galego” che a àn puartât cetancj esemplis di violazions dai dirits linguistics dai lôr fîs a scuele. A confermâ cheste situazion a son ancje i passe 500 câs denunciâts, dome di Zenâr incà, ae linie telefoniche metude su di pueste di A Mesa. Contrari di ce che al dîs il PP – a disin i rapresentants di A Mesa – in dì di vuê, ancje tes scuelis là che si varès di garantî il bilinguisim, a jessi metude in secont plan e je simpri la lenghe galiziane. Baste pensâ che al è sucedût ancje che de stesse aministrazion regjonâl a rivassin materiâi didatics par castilian ancje ta chês materiis che, daûr dal curicul scolastic, a varessin di jessi insegnadis par galizian.

Font: A Mesa, 30/04/09; El País, 01/05/09


Grecie: il dinei de identitât macedone, une azion in vore di agns

Internazionalitari 05 2008


Il partît di riferiment de comunitât macedone che e vîf intal stât grêc al à fat cognossi ta chescj dîs i contignûts di un document segret che al sarès stât metût adun dal Servizi di sigurece nazionâl grêc ancjemò tal 1982. Intal test si fevele di un grup speciâl incjariât di infiltrâ dutis lis istituzions de aree là che e vîf la minorance macedone par impedî ogni azion di rivendicazion nazionâl de comunitât locâl. Cun di plui, tal document, si devin indicazions par fâi cuintri ae lenghe macedone, par esempli cul meti tai uficis e intes scuelis dal puest dome personis che no cognossin il macedon. Si rive fintremai a sburtâ i militârs grêcs in servizi te zone a maridâ lis feminis dal puest par rivâ a rompi la trasmission de lenghe macedone ancje in cjase. Par cumò des autoritâts greghis no si à vude nissune reazion di smentide dal document.

Font: Balkan Insight, 30/04/09


Gales: si slargje la poie al ûs dal galês ancje tes impresis privadis


L’Ufici pe lenghe galese al à fat cognossi i dâts di une inchieste fate par cognossi l’ategjament de int in mert al ûs dal galês. L’82% dai intervistâts, che in buine part a àn declarât di no fevelâ ben la lenghe, al à declarât che il galês al è alc che si à di tignîsi in bon di vê; l’81% al à ancje dite che al è impuartant che il personâl des aministrazions e des impresis al sedi formât ancje par galês; il 76% al à marcât la impuartance des etichetis dai prodots e de publicitât in forme bilengâl. I risultâts de inchieste – a comentin dal ufici pe lenghe galese – a mostrin che il galês al è un imprest impuartanton par comunicâ al public il leam des impresis cul teritori e che la lenghe locâl e da aes impresis e ai lôr prodots un di plui sul marcjât e une garanzie di rapuart vêr cu la lôr tiere. I dâts de inchieste a son stâts ricjapâts ancje de Cymdeithas yr Iaith Gymraeg (Associazion pe Lenghe Galese) par poiâ la sô campagne par une gnove legjislazion linguistiche che e cjapi dentri ducj i setôrs, ancje chel des impresis privadis. Pe Cymdeithas, par rivâ a chest obietîf, al covente che dutis lis competencis su la lenghe a vegnin trasferidis dal guvier britanic a chel galês: cuestion che propit ta chest periodi e je al centri di tratativis jenfri Londre e Caerdydd / Cardiff. Par sburtâ la lôr bataie, i militants de associazion a àn ancje jemplât lis puartis des compagniis economichis e des grandis impresis là che l’ûs dal galês nol è garantît di adesîfs cu la scrite “la gnove leç su la lenghe e limite i dirits linguistics dai galês ta chest lûc, no stait a jentrâ”.

Font: Welsh Language Board, 26/04/09; Cymdeithas, 24 e 27/04/09