Romanie: atacs incrosâts ae minorance magjare

Il president rumen Klaus Iohannis al à acusât i sociâi democratics (PSD), o sei il principâl partît di oposizion, di lavorâ parsot cul guvier di Budapest par consegnâ la Transilvanie ae Ongjarie. Un tant al è sucedût dopo che une propueste di leç presentade de Union Democratiche dai Ongjarês in Romanie (UDMR) su la autonomie dal Székelyföld e je passade in prime leture te Cjamare dai deputâts. Il Székelyföld al rapresente il teritori de Transilvanie là che la minorance ongjarese e je ancjemò maioritarie. In realtât il test al è passât dome pal fat che la legjislazion rumene e previôt che cuant che une propueste di leç e reste in aule par plui di 45 dîs e ven aprovade in automatic. Il PSD al à duncje vût zûc facil intal mostrâ di vê votât cuintri de propueste in comission e a ribaltâ la acuse sui liberâi nazionâi aleâts di Iohannis che no àn convocât il Parlament in timp par podê votâ. I dirits e lis rivendicazions de minorance ongjarese a tornin cussì al centri dal conflit politic tant che vitimis principâls di un nazionalisim rumen simpri plui agressîf. In maniere paradossâl, viodude la sô partignince ae minorance todescje de Romanie, il president Iohannis al è un dai prins a stiçâ lis sflamiadis xenofobichis cuintri des comunitâts minorizadis dal paîs.

Font: Balkan Insight, 29/04/20

Ucraine: trê modei scolastics diviers pes lenghis minorizadis

Il president ucrain Volodimir Zelenskij al à ratificât la leç di riforme dal sisteme educatîf fate buine dal Parlament che e previôt trê modei linguistics diferents pes diviersis minorancis che a vivin intal paîs. Il prin al è pensât pes comunitâts che no àn un stât daûr e che a son dislidrisadis dal lôr teritori origjinari, tant che i tatars de Crimee, e al previôt l’insegnament inte lôr lenghe native compagnât di un studi aprofondît dal ucrain. Il secont model al è invezit indreçât aes minorancis nazionâls che a fevelin une des lenghis de UE, tant che rumens e ongjarês (che, par numar, a rapresentin la seconde e la tierce minorance dal paîs), e al previôt un slargjament progressîf de presince de lenghe statâl che e partìs di cualchi ore tes primariis par rivâ almancul al 60% tes superiôrs. Il tierç model al vâl par chês altris minorancis (a partî di chê russofone) e dopo di une presince plui marcade de lenghe proprie tes primariis al previôt che tes secondariis l’ucrain al sedi doprât almancul pal 80% des oris di insegnament.

Font: Ukrainian News, 13/03/20

UE: e cres la rapresentance de EFA tal Parlament european

A son diviers i candidâts di moviments rapresentatîfs des comunitâts minorizadis che a son stâts elets intal Parlament european in ocasion des votazions che si son tignudis intai diviers stâts membris de UE tra i 23 e i 26 di Mai. La vicende che dal sigûr e à fat plui scjas e je stade la elezion di trê dai rapresentants plui significatîfs dal indipendentisim catalan, o sei Oriol Junqueras, che si cjate di plui di un an in regjim di preson preventive, Carles Puigdemont e Toni Comín, che si cjatin in esili inte Belgjiche. Il prin al è stât elet cuntune liste che e meteve adun la çampe nazionalitarie basche, catalane e galiziane e che e à puartât ancje ae elezion di Diana Riba (simpri di ERC) e di Pernardo Barrena (EH Bildu). Puigdemont e Comín si presentavin invezit cu la liste Lliures per Europa. Intal stât spagnûl a son stâts elets al Parlament european ancje Izaskun Bilbao dal PNV e Ernest Urtasun di ICV.

Ucraine: gnove leç su lis lenghis, tensions cu la Romanie

Il president de Romanie, Klaus Iohannis, al à cancelât une visite in program par chest Otubar in Ucraine tant che at formâl di proteste cuintri de gnove leç su lis lenghis fate buine ai 5 di Setembar dal Parlament ucrain. Iohannis al à dade la gnove in maniere direte al president Petro Poroshenko in ocasion de presince dai doi a New York pe assemblee gjenerâl de ONU. Une volte ratificade dal president, al à zontât Iohannis, la gnove leç e larès a limitâ cetant l’acès des minorancis ae educazion inte lôr lenghe proprie. In Ucraine la comunitât di lenghe rumene e je stimade su lis 400 mil personis, pe plui part centradis in Bucovine. Protestis cuintri de gnove leç a son rivadis tes zornadis stadis ancje dai guviers de Federazion Russe, de Ongjarie e de Moldova. La comunitât plui grande e je propite chê di lenghe russe che e conte sui 8 milions di personis (il 17% de popolazion), intant che i ongjarês a son sui 140 mil.

Font: RadioFreeEurope - RadioLiberty, 22/09/17

Romanie: propueste di leç cuintri dai autonomiscj magjârs

In Romanie il Senât al è clamât a discuti une propueste di leç che e previôt penis di 6 mês a 3 agns di preson par cui che al sfide l’ordin costituzionâl par mieç di ativitâts di stamp politic o di manifestazions. I ativiscj che tes ultimis setemanis a àn jemplâts lis placis des citâts plui impuartantis de Romanie par protestâ cuintri de depenalizazion di une serie di reâts leâts ae coruzion che il guvier al veve iniment di meti in vore, a àn tornât a mobilitâsi cuintri di chel che a calcolin un tentatîf par limitâ il dirit di espression. Il prin firmatari de propueste – il deputât sociâl democratic Todor Ciuhodaru – al à però spiegât che il proviodiment no si propon di limitâ i dirits dai ativiscj rumens, ma di colpî i militants de minorance ongjarese de Transilvanie che zaromai di agns a van dilunc a domandâ plui autonomie pes areis là che la comunitât magjare e je maioritarie (Székelyföld). La posizion ultranazionaliste di Ciuhodaru e à però metût in dificoltât il so stes partît che al à sotscrit un acuardi politic propit cu la Union Democratiche dai Magjârs de Romanie. Il puartevôs dal PSD, Adrian Dobre, al à vût duncje di intervignî in maniere uficiâl par dî che il partît nol condivît lis posizions di Ciuhodaru e che nol votarà la propueste di leç.

Font: Balkan Insight, 04/03/17

Ucraine: gnûf centri pe comunitât ongjarese de Transcarpazie

A front dai tentatîfs in at in Ucraine par limitâ i dirits des comunitâts minorizadis, il guvier ongjarês al incrès la poie aes iniziativis a pro de minorance magjare che e vîf te regjon de Transcarpazie. Dopo des risorsis metudis par sostignî i istitûts scolastics de minorance, cumò l’esecutîf di Budapest al à cofinanziât cun cuasi 100 mil euros la costruzion di un centri pe comunitât ongjarese logât te citadine di Csap / Chop. La struture, screade ta chestis setemanis, e je gjestide de Union Culturâl dai Ongjarês de Transcarpazie (KMKSZ).

Font: Politics.hu, 13/02/17

Ongjarie: fonts pes scuelis de infanzie magjaris in Romanie

Il guvier de Ongjarie al à metût a belanç 4 milions e 800 mil euros par sostignî lis scuelis de infanzie de minorance di lenghe ongjarese che e vîf in Transilvanie. La gnove e je stade comunicade dal segretari di stât magjâr Árpád Potápi a Sepsiszentgyörgy / Sfantu Gheorghe te suaze de fieste pai 25 agns de Associazion dai insegnants ongjarês de Romanie (RMPSZ). Ancje in gracie dal impegn di cheste associazion in dì di vuê la lenghe ongjarese e je insegnade in 1.400 istitûts scolastics de Romanie là che a lavorin 10 mil insegnants magjârs.

Font: Politics.hu, 12/12/16

Romanie: il PSD al vinç lis politichis, ben i ongjarês de UDMR

Lis elezions politichis in Romanie si son sieradis cu la vitorie dai Sociâi Democratics (PSD) che a àn otignût il 45,9% dai vôts, intant che il Partît Nazionâl Liberâl (PNL) al è colât jù al 20%. Rispiet aes previsions de vilie, la sorprese principâl e rive de Union par Salvâ la Romanie (USR), nassude sì e no sîs mês prime des elezions, che e à cjapât il 9% dai consens. Cuart par numar di vôts al è il partît di riferiment de minorance ongjarese, o sei la Union Democratiche dai Magjârs de Romanie (UDMR), cul 6,2%. Parsore dal soiâr par jentrâ tal Parlament a son ancje la Aleance dai Liberâi e Democratics (ALDE) cul 5,5% e il Moviment Popolâr dal ex president Traian Basescu cul 5,2%. Gjavâts i ongjarês, chês altris formazions politichis espression di minorancis no àn invezit rivât a passâ il soiâr eletorâl. Il prossim guvier al varès di nassi de coalizion formade di PSD e ALDE, ancje se a son inmò dai dubis sul non dal prin ministri incjariât di formâ l’esecutîf.

Font: Balkan Insight, 11-12/12/16

Ucraine: dirits linguistics des minorancis sot atac

Intun incuintri che si è tignût ai 24 di Novembar alì dal Parlament european, une delegazion formade di rapresentants de FUEN (Union Federâl des Nazionalitâts Europeanis) e de Union Culturâl dai Ongjarês de Transcarpazie (KMKSZ) e à denunciât i tentatîfs in at in Ucraine par limitâ i dirits des comunitâts minorizadis. Par esempli e je in discussion une mende ae leç su la educazion che e limite il dirit dai membris di une comunitât minorizade ricognossude a vê une istruzion te lôr lenghe proprie cul permeti l’insegnament te lôr lenghe dome tes areis là che la presince di cheste comunitât e je plui fuarte e dome te scuele de infanzie e tes superiôrs. Cun di plui si vûl limitâ chest dirit dome a chês lenghis che a son uficiâls dentri de Union Europeane. Une altre iniziative, cheste volte judiziarie, e ponte invezit a gjavâ il dirit di doprâ la lenghe proprie cu lis aministrazions publichis ancje tes areis là che la comunitât minorizade e rapresente almancul il 10% de popolazion totâl. Si trate, a disin i delegâts de FUEN e de minorance ongjarese, di une situazion une vore pericolose par vie che e je daûr a stiçâ gnovis tensions etnichis intun stât che za si cjate a vivi la pierdite de Crimee e il conflit intes regjons sudorientâls russofonis.

Font: FUEN, 25/11/16

Serbie: i partîts des minorancis si svicinin al guvier

Riza Halimi, president dal Partît pe Azion Democratiche che al rapresente une buine part de minorance albanese de Serbie, si è cjatât cul prin ministri serp Aleksandar Vučič inte suaze de prime serie di incuintris dal esecutîf di Belgrât cui partîts di riferiment des minorancis nazionâls dal paîs tant che la Aleance dai Ongjarês in Voivodine e la Comunitât Democratiche Bosgnache. Vučič si è confrontât cun Halimi massime sul avignî de Agjenzie di coordenament par Bujanovac, Medveđa e Preševo / Presheva o sei l’organisim che si ocupe de minorance albanese che e vîf te aree sudocidentâl de Serbie. Il prin incuintri tra lis parts si è sierât in maniere positive cu la disponibilitât dal Partît pe Azion Democratiche a cooperâ cul esecutîf di Belgrât e cun chê dal guvier di nomenâ pe prime volte un membri de comunitât albanese ae vuide de Agjenzie.

Font: Balkan Insight, 10/06/16

Romanie: manifestazion pe Zornade de libertât dal Székelyföld

Sù par jù 4 mil personis a àn partecipât ae manifestazion in program pe Zornade de libertât dal Székelyföld, o sei la part de Transilvanie là che e vîf la plui part de minorance ongjarese de Romanie. La iniziative, che si è davuelte ai 10 di Març te citât di Marosvásárhely / Targu Mures, e je stade inmaneade dal Consei Nazionâl Székely. E je stade la ocasion par tornâ a rivendicâ une regjon autonome dal Székelyföld, a front dal progjet di riforme teritoriâl de Romanie che al ponte invezit a incuarpâ chest teritori intune regjon plui grande là che la comunitât ongjarese e deventarà mancul dal 30% de popolazion totâl. Il Consei Nazionâl Székely al domande une regjon indotade di plui podês sul plan aministratîf e economic, là che l’ongjarês al sedi lenghe couficiâl e là che i simbui espression di cheste comunitât a puedin jessi esponûts cence il risi di finî sot procès. I rapresentants di chest moviment a àn duncje invidât lis autoritâts rumenis a vierzi un dialic istituzionâl par lâ ta cheste direzion. Ae manifestazion al à partecipât ancje Gunther Dauwen, diretôr de Aleance Libare Europeane, che al à invidât lis autoritâts rumenis a scoltâ lis rivendicazions de comunitât di lenghe ongjarese. Tal 2014 la Zornade de libertât dal Székelyföld e jere stade segnade di scuintris violents cu la polizie, l’an passât e jere stade improibide des autoritâts rumenis, chest an invezit si à sierade cence incidents.

Font: Hungarian Ambiance, 10/03/16; Agerpres, 11/03/16

Romanie: minorancis, il garant al tutele il stât e no i citadins

Il Consei Nazionâl Székely, une des organizazions di riferiment de minorance ongjarese de Romanie, al à segnalât ae autoritât di garanzie rumene une gnove leç statâl che in buine sostance e proibìs l’ûs public di bandieris o stemis des comunitâts locâls. Pai rapresentants de minorance la normative e va cuintri de Costituzion rumene e de Cjarte europeane sul autoguvier locâl e, par chest, a domandavin al garant di jevâ la cuistion denant de Cort costituzionâl. La autoritât di garanzie rumene e à però mostrât di jessi impegnade a difindi plui il stât che no i citadins dal moment che e à refudât la domande fate indenant dal Consei Nazionâl Székely cu la motivazion che il dirit ae autonomie al è simpri subordenât al interès statâl e che il principi di riferiment in câs come chescj al è chel de unitât dal stât.

Font: EFA, 05/08/15

Romanie: nissun pas indaûr de UDMR su lis sôs bataiis

Kelemen Hunor al è stât confermât ae presidence de Union Democratiche Magjare in Romanie (UDMR), il partît di riferiment de minorance ongjarese de Romanie, intant dal congrès che si è tignût tor de metât di Avrîl inte citât di Kolozsvár / Cluj. E je stade la ocasion par marcâ che il partît nol fasarà pas indaûr inte difese dai interès de minorance magjare, a partî de incressite dai dirits di cheste comunitât inte educazion, inte justizie e inte aministrazion publiche. La UDMR e je impegnade massime intal fâ passâ une leç gjenerâl pe tutele des minorancis che e aumenti i dirits garantîts cumò par mieç di normis di setôr. Une propueste di leç e je stade presentade zaromai di cinc agns, ma il Parlament rumen nol à ancjemò inviât la sô discussion. A front di cheste situazion, al à dite il president de UDMR, no son resons par che il partît al jentri o al dedi la sô poie ae coalizion di guvier.

Font: Balkan Insight, 20/04/15

Romanie: pal guvier voie di autonomie e razisim a son chel stes

Al pareve che cu la elezion di un membri de minorance todescje tant che president de Republiche, la Romanie e tacàs a fâ dai pas indenant sul plan dal ricognossiment de sô pluralitât linguistiche e nazionâl, invezit intes ultimis setemanis si viodin azions che a van juste de bande contrarie. In Març si veve proibît la celebrazion de Zornade de libertât dal Székelyföld, o sei la part de Transilvanie là che e vîf la plui part de minorance ongjarese de Romanie. Po si à vût l’arest dal sindic di Gyergyószentmiklós / Gheorgheni par vê metût fûr la bandiere szekely suntun edifici public. Cumò si è rivâts al pont che intal stampon des strategjiis pe sigurece 2015 – 2020 che il guvier rumen al à imbastît si à metût lis rivendicazions di autonomie des comunitâts minorizadis sul stes plan dal razisim e de xenofobie, cun dut ce che chest al compuarte sul plan juridic e repressîf. Fin cumò però, a nivel comunitari però, cheste menace simpri plui penze cuintri des minorancis no à cjatât censuris, fale par un intervent dûr di condane de Aleance Libare Europeane (EFA).

Font: EFA, 27/03/15

Ongjarie: 700 mil magjârs tal forest a vuelin la citadinance

Daûr dai ultins dâts comunicâts dal segretari di stât denant dal Parlament ongjarês, a son zaromai plui di 700 mil lis personis che a partegnin aes minorancis magjaris sparniçadis ator pe Europe centriorientâl che a àn domandât di vê ancje la citadinance ongjarese. A vuê, plui de metât di chestis domandis a àn za otignût une rispueste positive. La plui part des personis che a àn vût fin cumò la dople citadinance, ven a dî il 66%, al parten ae minorance magjare che e vîf in Romanie. Il 17% al rive de Serbie, là che lis comunitâts ongjaresis a vivin massime inte Voivodine. Il 14% al parten invezit aes comunitâts magjaris de Ucraine ocidentâl. Minorancis ongjaresis a vivin po ancje in Slovachie, in Slovenie e in altris stâts de aree. Par lôr il guvier di Budapest al à in program pal 2015 jutoris par 58 milions di euros.

Font: Finugor, 04/03/15

Romanie: proibide la zornade di mobilitazion székely

Lis autoritâts rumenis a àn proibît la celebrazion in program pe Zornade de libertât dal Székelyföld, o sei la part de Transilvanie là che e vîf la plui part de minorance ongjarese de Romanie. La manifestazion, in program vie pal mês di Març te citât di Marosvásárhely / Targu Mures, e jere stade pensade dai siei organizadôrs (Consei Nazionâl Székely) tant che ocasion par protestâ cuintri de riforme aministrative che si è daûr a imbastî in Romanie. Il progjet dal guvier rumen, di fat, al previôt di incuarpâ il Székelyföld intune regjon aministrative plui grande là che la comunitât ongjarese e deventarà mancul dal 30% de popolazion totâl. Cuintri de proibizion e je intervignude ancje la Aleance Libare Europeane (EFA) cuntune proteste uficiâl indreçade sei al president rumen che al sindic de citât là che la iniziative e varès vût di davuelzisi.

Font: EFA, 26/02/15

Romanie: minorance ongjarese neutrâl tes presidenziâls

Intal secont turni des elezions presidenziâls rumenis in program ai 16 di Novembar si frontaran il prin ministri Victor Ponta (Partît Sociâl Democratic) e Klaus Iohannis, sindic de citât di Hermannstadt / Sibiu. La sfide però e cjate avonde frede la Union Democratiche Magjare in Romanie (UDMR), partît di riferiment de minorance ongjarese de Romanie, che e à lassât libertât di vôt ai siei eletôrs. La cuistion no je di pôc se si pense che i ongjarês a son il 7% de popolazion totâl. La sielte di no poiâ nissun dai doi candidâts e diven dal fat che Iohannis si à refudât di discuti lis propuestis fatis indenant de UDMR par incressi l’autoguvier de minorance ongjarese, intant che Ponta al à za otignût la poie dal Partît de Grande Romanie, formazion di estreme diestre contrarie a ogni forme di tutele des minorancis. Di segnalâ che chest partît al à sielzût di poiâ Ponta par vie che Iohannis al parten a di une altre minorance presinte in Transilvanie, o sei chê todescje.

Font: Balkan Insight, 7/11/14

Romanie: no dal guvier a di une regjon autonome magjare

Il prin ministri rumen, il socialdemocratic Victor Ponta, al à dite che il so guvier nol poiarà la propueste fate indenant de Union Democratiche Magjare in Romanie (UDMR) di creâ une regjon autonome intes trê provinciis de Transilvanie là che i ongjarês a son maiorance (Székelyföld), o sei chês di Kovászna / Covasna, Hargita / Harghita e Marosvásárhely / Târgu Mureş. Intal progjet dal partît di riferiment de comunitât magjare si previodin la nassite di un Parlament regjonâl e di un guvier locâl che il so president al puedi partecipâ aes riunions dal esecutîf rumen che al ordin dal dì a àn temis che a tocjin cheste aree de Transilvanie. Cun di plui, dentri de regjon autonome, la lenghe ongjarese e varès di jessi couficiâl. Al è cumò di capî trop che il no dal prin ministri al pesarà su la tignude dal guvier che fin cumò al gjoldeve ancje de poie de UDMR.

Font: Balkan Insight, 22/09/14

Slovachie: elets doi eurodeputâts de minorance ongjarese

In Slovachie, là che i plui votâts a son stâts ancjemò une volte i socialdemocratics dal SMER cul 24% des preferencis e 4 rapresentants intal Parlament european, a son stâts elets ancje doi rapresentants de minorance ongjarese. Ancje intal 2009 la comunitât magjare de Slovachie e veve elet doi deputâts a Strasburc, ma cheste volte i elets a rivin di doi partîts diviers, ven a dî il Partît de Coalizion Ongjarese (MKP / SMK: Magyar Közösség Pártja / Strana maďarskej koalície), che al à otignût il 6,5% dai vôts, e il moviment Most-Híd che al à cjapât il 5,8% des preferencis. In Slovachie, compagn che inte Republiche ceche e in Ongjarie, e vîf ancje une gruesse comunitât rom che dut câs, ancje cuant che e si propon cun partîts di stamp etnic, no rive a vê risultâts eletorâi significatîfs.

Font: elections2014.eu

Romanie: elets doi ongjarês e un rom

In Romanie lis dôs comunitâts di minorance plui gruessis a son chê rom e chê ongjarese, ma dome cheste ultime e je ben organizade dal pont di viste politic. Intes elezions europeanis di chest an, la Union Democratiche Magjare in Romanie (UDMR) e à però pierdût teren e cul so 6,5% di vôts e à rivât a otignî dome doi europarlamentârs cuintri dai trê dal 2009. Inte aleance di çampe (PSD – PC – UNPR), vincidore des elezions cul 37,6% des preferencis e 16 eurodeputâts, al è stât elet ancje Damian Drăghici, membri e ativist de minorance rom.

Font: elections2014.eu; Romea.cz, 26/05/14