Svezie: une leç gnove e da plui pês ae volontât dai Sami

Par agns a dilunc la Svezie e je stade riclamade sei dal Consei de Europe che de ONU al rispiet dai pats internazionâi che a garantissin i dirits des popolazions nativis su la tiere e su lis aghis e ae lôr partecipazion intai procès decisionâi che a integnin il teritori. Cumò, cul mês di Març, e je jentrade in vore une leç su lis consultazions che e oblee il guvier centrâl e lis istituzions statâls a sintî i rapresentants des comunitâts sami prime di cjapâ decisions che a puedin vê un impat diret su la lenghe, su la culture, sul status e su lis ativitâts economichis di cheste popolazion. Si trate duncje di un pas indenant impuartant che però – a disin lis organizazions impegnadis pal rispiet dai dirits – al à di jessi infuartît. Cun di fat, la gnove leç no sclarìs ce pês che la posizion cjapade dai rapresentants sami e varà su la decision finâl. Dut câs si dîs che plui une decision e je negative pai dirits dai Sami, plui i interès di cheste comunitât a varan di pesâ rispiet a chei altris interès in zûc.

Font: Civil Rights Defenders, 01/04/22

Svezie: gnove menace minerarie pe Tiere dai Sami

Doi esperts internazionâi che a operin su mandât dal Consei pai Dirits Umans de ONU a àn denunciât i efiets negatîfs che il progjet par une gnove miniere di fier dongje di Gállok, te part svedese de Tiere dai Sami, al podarès vê sei pal ambient che pes comunitâts nativis che a vivin alì. Daûr dal studi che a àn puartât indenant, la iniziative minerarie e disviluparès un nivel alt di incuinament e di scarts di smaltî, cun dams grues sul ecosisteme locâl e sui percors migratoris des renis cul risultât di meti a risi il sisteme di vite tradizionâl dai sami. La UNESCO e calcole la Tiere dai Sami la plui grande aree dal mont là che une part impuartante de economie e de vite si fonde sui spostaments stagjonâi dal besteam e la leç svedese e ricognòs l’arlevament des renis un dirit des popolazions sami. La gnove miniere – a disin i esperts de ONU – e je duncje une menace a dut chest, tant plui che lis comunitâts locâls no son nancje stadis consultadis in proposit. La Svezie e à in esam une leç che e previodi l’oblic di sintî i rapresentants dai sami prime di cjapâ decisions che a puedin vê consecuencis su di lôr e su la lôr tiere e, ancje se no je ancjemò in vore, i esperts a invidin lis autoritâts statâls a procedi za ta chê direzion prime de decision finâl che e je fissade pal mês di Març. Intal framieç lis comunitâts locâls a van indenant cu lis lôr protestis e a àn cjatât aleâts ancje fûr de lôr tiere, tra chescj la ativiste climatiche Greta Thunberg che cun altris zovins dai Fridays For Future e à partecipât a di une azion di proteste a Gállok invidant il guvier svedês a meti fin ae colonizazion de Tiere dai Sami e al disfrutament de sô int e de sô nature.

Font: The Barents Observer, 11/02/22

Svezie: ancje la Glesie pronte a scusâsi cui sami

La Glesie svedese e je daûr a viodi dai ultins detais par presentâ in maniere uficiâl lis sôs scusis aes comunitâts sami par vê partecipât ae colonizazion des lôr tieris e, massime, par vê vût une part di prin plan intal procès di assimilazion e di distruzion dal patrimoni religjôs, tradizionâl e culturâl di cheste popolazion. Il procès di riconciliazion al à mot i prins pas uns trente agns indaûr ma dome cumò si son vudis lis cundizions par une domande di scusis uficiâl che e sarà fate te suaze dal sinodi gjenerâl de Glesie svedese in program ai 24 di Novembar. Propit par vie dal so passât coloniâl, in Svezie chest procès al è stât plui lunc e faturôs che no in Norvegje (là che i erôrs de Glesie locâl a son stâts ricognossûts ancjemò tal 1997) o in Finlande (là che lis scusis uficiâls de Glesie a son rivadis intal 2012).

Font: Yle Sapmi, 29/06/21

Sapmi: seconde edizion pe setemane de lenghe sami

Ai 25 di Otubar si à sierade la seconde edizion de setemane de lenghe sami. La iniziative e à tocjât cuasi dut il Sapmi, o sei lis tieris sami di Finlande, Norvegje e Svezie. La prime edizion si veve tignude tal 2019 inte suaze dal an internazionâl des lenghis nativis. La setemane e je une iniziative disvilupade in maniere coletive che si propon di stiçâ istituzions publichis e privadis, ativitâts economichis, organizazions e altris realtâts sociâls a doprâ la lenghe sami (o miôr, lis diviersis lenghis sami) e a studiâ azions par rindi la lenghe plui fuarte e visibile te vite di ogni dì. Viodude la situazion particolâr di chest an, la plui part des ativitâts programadis si à davuelte su la Rêt.

Font: The Barents Observer, 21/10/20

Sápmi: prins pas in Svezie pe comission su la veretât

«Un pas storic intal percors par dâi visibilitât aes violazions e ai abûs che i sami a àn patît dilunc vie de storie e che si cognòs ancjemò masse pôc.» A son lis peraulis de ministre svedese pe culture, Amanda Lind, tal compagnâ il finanziament che il guvier al à assegnât al Parlament Sami par imbastî l’implant di lavôr de comission pe veretât e pe riconciliazion clamade a fâ cognossi lis violencis patidis des comunitâts sami e a disvilupâ percors par superâ lis feridis che si son lassadis daûr. La Assemblee sami e varès di finî il so compit dentri dal Març di chest an che al ven e, dome in chê volte, la comission e podarà dâsi dongje e tacâ a lavorâ. La popolazion sami – stimade tra lis 100 e lis 150 mil personis – e je dividude des frontieris statâls tra Norvegje, Svezie, Finlande e Federazion Russe e cheste e je za une des problematichis che a pesin su cheste comunitât che vie pai secui si à cjatade espropriade des sôs tieris, in cualchi câs fintremai depuartade, e vitime di politichis e compuartaments di stamp razist, come il slontanament sfuarçât dai fîs par tirâju sù cuntune lenghe e cun costums diviers di chei des lôr fameis.

Font: The Barents Observer, 17/06/20

Sápmi: a risi l’orghin sorestatâl di politiche linguistiche

Il Sámi Giellagáldu – l’ent fondât intal 2013 par coordenâ i servizis e lis politichis linguistichis pes diviersis varietâts sami feveladis in Finlande, Norvegje e Svezie – al riscje di meti fin aes sôs ativitâts chest an che al ven par vie dal sotfinanziament. Cun di fat il ministeri des financis finlandês al à fat savê che tal 2019 al finanziarà l’ent cun mancul di 200 mil euros cundut che, dome par cuvierzi lis ativitâts davueltis in Finlande, si stime che a coventin almancul 370 mil euros. L’organisim al colabore ancje cul Parlament Sami de Finlande par difindi e par promovi la culture sami tai progjets di cooperazion internazionâl. Chel dal sotfinanziament al è un probleme che al tocje diviersis realtâts espression des comunitâts sami, comprendûts i Parlaments Sami de Norvegje e de Svezie.

Font: YLE, 21/08/18

Sápmi: prin confront sul disfrutament dal Násafjäll

Ai 19 di Lui il ministeri norvegjês pes ativitâts produtivis al à invidât rapresentants dai Parlaments Sami de Norvegje e de Svezie, dai ents locâi e di altris realtâts interessadis par un sorelûc e un prin confront sul progjet di disfrutament minerari che al interesse il Násafjäll, un teritori a cjaval tra Norvegje e Svezie che, in plui di jessi doprât di secui come passon pes renis, si cjate ad ôr di un parc nazionâl e di une aree di tutele dal paisaç. La compagnie Elkem AS e à intenzion di vierzi une miniere di cuarç che e pense di sgjavâ par 6/8 mês ad an par almancul 30 agns a dilunc. Cuatri secui indaûr, simpri ta cheste aree, si veve vût une miniere di arint che il so disfrutament al veve puartât fintremai a sclavizâ la popolazion locâl e si veve lassât daûr un incuinament che si viôt inmò in dì di vuê. Lis comunitâts sami di Svaipa, Semisjaur-Njarg e Gran, e il distret pal arlevament des renis di Saltfjell, a àn cussì proclamât l’autoguvier dal Násafjäll e decidût une moratorie che e impedissi cualsisei ativitât minerarie. La maiorance dai delegâts che a àn partecipât al sorelûc, in plui di lamentâ i ritarts par no dî la mancjance di informazions sul progjet, e à mostrât di vê pôre dai efiets negatîfs che la miniere e varès sui Sami, sul ambient e su la economie tradizionâl dal teritori, in primis l’arlevament des renis che al da di vivi a passe dusinte personis. I rapresentants de Elkem AS a àn fat savê che a son disponibii a di un acuardi cu lis comunitâts locâls ma che, se nol ves di rivâ, a fasaran valê la lôr concession e a laran indenant distès cul progjet. I Sami a àn rispuindût che fintremai che i progjets di disfrutament minerari no saran blocâts la aree e restarà ad in plen sot dal lôr control.

Font: The Barents Observer, 19/07/18

Sápmi: moratorie cuintri des minieris tal Násafjäll

Lis comunitâts sami di Svaipa, Semisjaur-Njarg e Gran, e il distret pal arlevament des renis di Saltfjell, a àn proclamât l’autoguvier inte aree dal Násafjäll, a cjaval tra Norvegje e Svezie, e a àn decidût une moratorie par cualsisei ativitât minerarie ta chest teritori. La decision e je stade cjapade dopo che si à savût che lis autoritâts norvegjesis a vevin autorizât la compagnie Elkem AS a espropriâ part de aree par inviâ ativitâts estrativis. Il disfrutament minerari nol va dome a pidimentâ la economie tradizionâl sami e, massime, l’arlevament des renis, ma al puarte ae memorie la ete tragjiche des minieris inviadis tai secui stâts intes tieris dai sami che a vevin puartât fintremai a sclavizâ la popolazion locâl e che si son lassadis daûr inmò in dì di vuê l’incuinament di une part dal teritori. Su la fonde dai dirits ricognossûts ai popui natîfs des leçs internazionâls, i sami dal Násafjäll a àn duncje decidût di no ricognossi il valôr des normativis e dai proviodiments de Norvegje e de Svezie fintremai che i progjets di disfrutament minerari no saran blocâts.

Font: The Barents Observer, 03/07/18

Svezie: in piês la situazion de minorance finlandese

Di cualchi an incà a van dilunc a cressi ancje in Svezie la intolerance e i compuartaments agressîfs, ofensîfs e discriminatoris cuintri dai grups minoritaris. Il fenomen al somee leât al aument dai flus migratoris, ma al colpìs ancje lis minorancis nazionâls storichis dal paîs tant che i finlandês di Svezie (Sverigefinnar) che a rapresentin il 7% de popolazion totâl. Un rapuart jessût di resint al piture un cuadri avonde neri. Inte scuele a cressin i episodis di intolerance e fintremai di atac cuintri dai students e dai insegnants che a doprin il finlandês fûr dal orari di lezion de bande di altris students e ancje di altris professôrs. Dongje de incressite di episodis di cheste fate, il probleme plui grues al è chel de mancjance di percors educatîfs par finlandês. Dome par fâ un esempli, dai 6 mil fruts di Göteborg che a àn tant che prime lenghe il finlandês, dome 177 a àn la pussibilitât di ricevi une educazion ta cheste lenghe. Daûr dal rapuart al mancje personâl finlandês cualificât sei te scuele che in altris cjamps tant che la assistence. Un tant al diven par altri propite de mancjance di percors formatîfs adats e dal no rispiet des misuris di tutele e di promozion des lenghis minorizadis. L’unic cjamp là che invezit la situazion e somee lâ in miôr al è chel de presince de lenghe intai mieçs di comunicazion e la maniere che chescj ultins a fevelin de minorance.

Font: The Guardian, 13-14/03/18

Svezie: dirits dai Sami su la tiere inmò sot menace

Intal so rapuart anuâl sul rispiet dai dirits umans in Svezie, Amnesty International e à segnalât che e reste inmò vierte la cuistion dai dirits des comunitâts Sami su lis lôr tieris nativis, dirits che la organizazion internazionâl e calcole “sot menace”. Intal document si met in evidence cun preocupazion ancje la situazion dai Rom. Tal lôr câs si segnale cemût che no vedin acès plen ae scuele, al mont dal lavôr e ai servizis abitatîfs, e che a sedin a risi di crimins dal odi

Font: The Independent Barents Observer, 23/02/17

Sapmi: adunance a 100 agns de prime assemblee unitarie

Ai 6 di Fevrâr dal 1917 te citât di Trondheim, in Norvegje, si son dâts dongje in assemblee pe prime volte rapresentants rivâts di dutis lis tieris dal Sami (Sapmi) par inviâ adun la lote pal ricognossiment dai lôr dirits e de lôr identitât. Za di agns cheste date e je stade sielzude tant che Zornade nazionâl dai Sami. Chest an, a cent agns di chê assemblee storiche, delegâts sami rivâts di Norvegje, Svezie, Finlande e Russie a àn tornât a cjatâsi a Trondheim. Ae iniziative e à partecipât ancje la prime ministre norvegjese Erna Solberg che e à denunciât i dams causâts des politichis di snazionalizazion puartadis indenant cuintri dai Sami e e à dite che, cundut che si à fat tancj pas indenant, lis politichis di tutele e di promozion de lenghe, de culture e de economie tradizionâl dai Sami a van infuartidis. La fieste e cole juste tal moment che i Parlaments dai Sami de Norvegje, de Svezie e de Finlande a son daûr a ratificâ la gnove convenzion che e ponte a vualivâ la suaze normative e lis azions di rivendicazion dai Sami tai trê stâts.

Font: The Independent Barents Observer, 06-07/02/17

Svezie: pas indenant pal ricognossiment dal elfdalian

La autoritât internazionâl che e gjestìs la regjistrazion dai codiçs ISO e à cjapât dentri tra lis lenghis ricognossudis e indotadis di un codiç di pueste ancje l’elfdalian, une varietât linguistiche fevelade te provincie di Dalarna, in Svezie. Si trate di un lengaç che al diven dal norvegjês antîc e che al à carateristichis origjinâls, a mieze strade tra lis lenghis gjermanichis nordorientâls, tant che il svedês, e chês nordocidentâls, tant che il norvegjês. Lis autoritâts de Svezie lu calcolin però dome un dialet dal svedês. Il ricognossiment di un codiç ISO specific, che al ven doprât par classificâ lis lenghis in areis tant che Internet, al devente cumò un element in plui par fâ ricognossi l’elfdalian tant che lenghe minoritarie e otignî cussì la tutele des autoritâts statâls. Fevelât di uns 3 mil personis, cun chest an al è stât metût tra lis materiis di insegnament de scuele de infanzie dal comun di Älvdalen là che a vivin la plui part dai siei locutôrs.

Font: The Local, 02/06/16

Rom: dirit ae cjase, critichis dal Consei de Europe a siet stâts

Il comissari pai dirits umans dal Consei de Europe al à criticât siet dai 47 stâts che a formin cheste istituzion par vie des politichis di sfrat sfuarçât metudis in at cuintri dai rom intai ultins agns. Sot acuse a son Albanie, Bulgarie, France, Italie, Ongjarie, Serbie e Svezie. Il comissari al domande ai guviers di chescj stâts di fermâ ducj i sfrats fintremai che no si cjataran soluzions abitativis alternativis. Chestis azions, di fat, a incressin la vulnerabilitât des fameis rom, a pidimentin la lôr inclusion sociâl e a impedissin percors regolârs di scolarizazion.

Font: Balkan Insight, 18 e 19/02/16

Sami: dirits su la tiere, vitorie cuintri dal Stât in Svezie

Il tribunâl de provincie svedese di Gällivare al à dât reson ai sami che a vivin a Girjas e i à ricognossût i dirits esclusîfs su la gjestion de cjace e de pescje ta chel teritori. La sentence e rive ae fin di passe vincj agns di scuintris e di bataiis legâls tra la comunitât locâl e lis istituzions statâls. Il conflit al jere nassût intal 1993 cuant che il Parlament svedês i veve dineât ai sami dirits che a vevin esercitât par secui e secui. Pai avocats dal Stât, la Svezie no à nissun oblic di ricognossi dai dirits speciâi ai sami dome pal fat che a son il popul natîf di chês tieris. La magjistrature invezit ur à dât tuart. Cun di plui, lis declarazions e lis motivazions puartadis indenant dai legâi dal Stât a son finidis sot acuse no dome par une ignorance clare de storie di chês tieris, ma ancje par une retoriche di stamp razist intai confronts dai sami. La bataie però no je ancjemò finide. Se lis istituzions statâls a decidaran di ricori in apel la cause e podarès lâ indenant ancjemò par agns. Chel istès la sentence e je calcolade cetant impuartante des comunitâts sami par vie che e rapresente un precedent decisîf inte lote pai dirits des popolazions sami de Svezie.

Font: The Guardian, 03/02/16

Sami: pe ONU a coventin plui garanziis pal dirit ae tiere

Intant di une conference inmaneade in Svezie dal Consei parlamentâr sami, la inviade de ONU pai dirits dai popui natîfs Victoria Tauli-Corpuz e à manifestât la sô preocupazion pal stât dai dirits su la tiere des comunitâts sami di Finlande, Norvegje e Svezie. Garantî i dirits su lis lôr tieris nativis e su lis risorsis naturâls di chest teritori – e à dite la rapresentante de ONU – al è fondamentâl pe autodeterminazion dai sami e pe lôr esistence come popul specific. La cuistion e je simpri plui di atualitât a front de incressite di progjets che a pontin a disfrutâ lis tieris dai sami par sgjavâ minerâi o pe produzion energjetiche. Se al somee che il guvier svedês al vedi in program di tornâ a viodi la leç sui minerâi, la inviade de ONU e invide ancje Finlande e Norvegje a meti man ae lôr normative e a rispietâ i dirits des popolazions nativis, a partî de lôr consultazion e dal lôr consens informât su ogni progjet che al ven fat indenant. Victoria Tauli-Corpuz e à po declarât di sperâ di viodi in curt aprovade la convenzion nordiche sui dirits dai sami cumò al centri dal confront tra i guviers di Finlande, Norvegje e Svezie e i Parlaments sami in vore ta chescj stâts. Intal 2016 la inviade e presentarà un rapuart detaiât su la situazion cu lis sôs conclusions e lis sôs racomandazions al Consei pai dirits umans de ONU.

Font: OHCHR, 28/08/15

Svezie: curricola scolastics par dutis lis lenghis minorizadis

La agjenzie svedese pe educazion (Skolverket) e à fat savê che e slargjarà la presince des cinc lenghis minorizadis ricognossudis inte scuele. In dì di vuê dome la lenghe sami e à un curriculum specific pal insegnament, ma cumò si cjaparà chê stesse strade ancje pal finlandês, pal meänkieli, pal romani e pal yiddish. Si à ancje tacât a meti adun materiâi scolastics di pueste par podê doprâ chestis lenghis intal percors educatîf. Il probleme principâl al è però chel dai insegnants, dal moment che a vuê a son ancjemò masse pôcs chei formâts par doprâ chestis lenghis inte ativitât scolastiche.

Font: ADN / Radio Sweden, 06/04/15

Norvegje: popui natîfs di Barents a congrès

Si è tignût a Tromsø, in Norvegje, il tierç congrès dai popui natîfs de regjon di Barents là che a jerin rapresentâts sei i cuatri stâts che si dividin cheste aree de Europe setentrionâl, ven a dî Norvegje, Svezie, Finlande e Federazion Russe, sei i trê popui natîfs che a vivin alì, o sei sami, veps e nenets. Tra i risultâts dal congrès si à l’acuardi tra i cuatri stâts par finanziâ in maniere continuative e avuâl il grup di lavôr internazionâl dai popui natîfs. Intant de riunion però no son mancjadis lis critichis pai pidiments che lis autoritâts russis a vevin metût ai delegâts des comunitâts indigjenis che intal Setembar stât a vevin di lâ a New York pe conference mondiâl dai popui natîfs. Une vicende che, a àn rispuindût i rapresentants rus, e je za al centri di une investigazion che i siei risultâts a saran comunicâts al Consei pai dirits umans de ONU.

Font: Barents Observer, 05/02/15

Un elet svedês in Finlande, une rom in Svezie

In Finlande l’unic partît in corse pes elezions europeanis che al rapresentave une comunitât di minorance al jere il Svenska Folkpartiet i Finland (SFP) che al à otignût il 6,7% des preferencis e un eurodeputât. Nissune rapresentance, invezit, pe comunitât sami che, par chel che al rivuarde i stâts membris de Union Europeane, e vîf ancje in Svezie. Tra l’altri, propit ta chest ultin paîs, e merete segnalade la elezion di Soraya Post, dal moviment Feministiskt Initiativ, che e je ancje une ativiste di prin plan de comunitât rom.

Font: elections2014.eu; YLE, 26/05/14; Finland Times, 26/05/14; Sverigesradio, 26/05/14

Svezie: a cressin i servizis comunâi par finlandês

Al va dilunc a cressi il numar dai comuns svedês che a dan fûr i lôr servizis ancje par finlandês. Dal 2010 a vuê la incressite e je stade continue e cumò a son 52 su 290 lis aministrazions locâls là che i servizis comunâi a son disponibii ancje par finlandês. Daûr des ultimis statistichis il 7,5% de popolazion che e vîf in Svezie e je di divignince finlandese e chei che a son ancjemò in stât di fevelâ o almancul di capî cheste lenghe a son sui 450 mil. Lis misuris di tutele pe comunitât finlandese a son stadis inviadis in maniere significative tor dal 2000 cu la nassite di une aree aministrative par finlandês intai cuatri comuns dongje dal confin cu la Finlande là che la minorance e jere presinte in maniere storiche e cul ricognossiment dal dirits a doprâ cheste lenghe sei a nivel aministratîf che judiziari. Cumò chestis misuris si son slargjadis e a cjapin dentri ancje cui che al è imigrât une o dôs gjenerazions indaûr de Finlande e al manten vive la sô identitât linguistiche.

Font: YLE, 01/02/14

Sami: in Svezie violâts i dirits des comunitâts nativis

Ancje la comissarie svedese cuintri de discriminazion, Agneta Bruberg, e à criticât la politiche dal guvier intai confronts dai sami. Ancjemò intal 1977 la Svezie e à ricognossût ai sami il status di nazionalitât native, ma – e spieghe la Bruberg – no à po jamplât chest ricognossiment cun contignûts concrets intal cjamp dai dirits par mieç di une normative di pueste. Un tant si lu viôt une vore ben par chel che al rivuarde i dirits su lis tieris che a partegnin par tradizion ai sami. Un dai câs plui resints al è chel dal progjet de multinazionâl Beowulf Mining PLC par vierzi un gnûf sît minerari a Gállok / Kallak, une citadine di 3 mil abitants che si cjate juste disore dal circul polâr artic. La popolazion locâl cu la poie di militants sami e à blocât plui voltis lis stradis di acès al sît par impedî che la compagnie minerarie e puedi inviâ lis esplorazions, ma e je stade atacade cun violence de polizie svedese. Lis autoritâts dal paîs a van dilunc a no tignî cont des protestis dai sami, ancje dopo de poie che ur è rivade de comission de ONU cuintri des discriminazions raziâls. Cun di plui, vie pal Astât, il guvier svedês al à autorizât une altre multinazionâl a disfrutâ i dipuesits di nichel che si cjatin intes tieris dai sami.

Font: Finugor, 27/09/13