UE: e cres la rapresentance de EFA tal Parlament european

A son diviers i candidâts di moviments rapresentatîfs des comunitâts minorizadis che a son stâts elets intal Parlament european in ocasion des votazions che si son tignudis intai diviers stâts membris de UE tra i 23 e i 26 di Mai. La vicende che dal sigûr e à fat plui scjas e je stade la elezion di trê dai rapresentants plui significatîfs dal indipendentisim catalan, o sei Oriol Junqueras, che si cjate di plui di un an in regjim di preson preventive, Carles Puigdemont e Toni Comín, che si cjatin in esili inte Belgjiche. Il prin al è stât elet cuntune liste che e meteve adun la çampe nazionalitarie basche, catalane e galiziane e che e à puartât ancje ae elezion di Diana Riba (simpri di ERC) e di Pernardo Barrena (EH Bildu). Puigdemont e Comín si presentavin invezit cu la liste Lliures per Europa. Intal stât spagnûl a son stâts elets al Parlament european ancje Izaskun Bilbao dal PNV e Ernest Urtasun di ICV.

Europe: passe 1,2 milions di firmis par “Minority Safepack”

Minority Safepack, la iniziative citadine inviade de FUEN (Union Federâl des Nazionalitâts Europeanis) par incressi lis misuris di tutele des personis che a partegnin a minorancis linguistichis e nazionâls e par infuartî la diversitât linguistiche e culturâl dentri de Union Europeane, e je stade un sucès. Cun di fat, par che la Comission Europeane e cjapi in man une iniziative citadine e covente la poie di almancul un milion di personis ator pe Union e ai 3 di Avrîl, date che e finive la racuelte des firmis, chês cjapadis sù a son stadis passe un milion e 215 mil. I stâts là che il quorum di firmis che si vevisi proponûts di cjapâ sù par Minority Safepack al è stât superât a son undis: Ongjarie (là che lis firmis racueltis a son stadis plui di mieç milion!), Romanie, Slovachie, Bulgarie, Cravuazie, Slovenie, Lituanie, Letonie, Danimarcje, Spagne e Italie. Ta chest ultin stât l’obietîf al jere stât fissât a 55 mil firmis e a ‘nd è stadis tiradis sù plui di 60 mil, pe plui part in Sud Tirôl, Val di Aoste e Friûl. I stâts a àn cumò trê mês par convalidâ lis firmis e la Comission Europeane a ‘nd à altris trê par presentâsi denant dal Parlament par riferî su la iniziative. Dopo dal agrât a ducj i citadins e aes organizazions che a àn poiât la iniziative, il president de FUEN, Loránt Vincze, al à celebrât la nassite di chel che al à clamât un vêr moviment european pai dirits des comunitâts minorizadis.

Font: FUEN, 04-05/04/18

Stât talian: comunitâts minorizadis, i risultâts des politichis

Lis elezions politichis che si son tignudis ai 4 di Març no àn dât risultâts masse bogns pes realtâts politichis rapresentativis des nazionalitâts cence stât e des minorancis linguistichis e nazionâls che a vivin dentri dai confins dal stât talian.

Stât talian: furlans, sarts, sudtirolês e valdostans tes politichis

Intes elezions politichis in program ai 4 di Març intal stât talian a son diviers i moviments di stamp autonomist, regjonalist o indipendentist che si son presentâts ancje se, in diviers câs, in aleance cun partîts di nivel statâl. Par chel che al rivuarde lis realtâts politichis rapresentativis des nazionalitâts cence stât e des minorancis linguistichis e nazionâls, a corin di bessôi «AutodetermiNatzione» in Sardegne (che al met adun buine part des diviersis animis dal nazionalitarisim sart), il «Patto per l'Autonomia» in Friûl - Vignesie Julie (che al nas de union di grups politics e associatîfs di aree autonomiste furlane), e «Pour Tous Per Tutti Pe Tcheut» in Val di Aoste (dulà che al gjolt de poie dai moviments autonomiscj Alpe, Stella Alpina e Pour Notre Vallée). Si presentin invezit intune cui partîts talians il «Partidu Sardu - Partito Sardo d'Azione» in Sardegne (cu la LN), «Union Valdôtaine», «Union Valdôtaine Progressiste» e «Edelweiss Popolare Autonomista Valdostano» in Val di Aoste (ducj cul PD). Situazion a miezis pe aleance «Südtiroler VollksPartei - Partito Autonomista Trentino Tirolese» che in Trentin - Sud Tirôl si presente intun pâr di circoscrizions di bessole e pal rest dentri de coalizion di centri çampe vuidade dal PD.

Sud Tirôl: campagne pai toponims storics

I nons di lûc a son un patrimoni culturâl coletîf e stramudâju al vûl dî falsificâ la storie, violâ la dignitât di chel teritori e savoltâ la sô identitât. A partî di chest resonament il partît Süd-Tiroler Freiheit al à inviât une petizion par abolî i decrets fats bogns ai 12 di Març dal 1923 dal grant consei dai fassisim che a scancelavin i nons storics todescs e ladins dal Sud Tirôl par sostituîju cun passe 8 mil toponims talians, pe plui part inventâts dal moment. A passe 90 agns di chê operazion di talianizazion sfuarçade, i decrets fassiscj a restin inmò in vore. La petizion e ponte a scancelâju cuntune leç dal Parlament talian o ben cun altris azions legjislativis. La cuistion no inten però dome i citadins sudtirolês di lenghe todescje e ladine, cussì il moviment politic al à publicât cumò sul so sît internet ancje une version par talian dal opuscul che al spieghe lis resons de sô iniziative.

Font: Süd-Tiroler Freiheit, 21/08/17

Stât talian: dome la SVP e oten un eurodeputât

Intal stât talian l’unic candidât di une formazion politiche rapresentative di une comunitât minorizade che elet intal Parlament di Strasburc al rive dal Sud Tirôl. Al è Herbert Dorfmann de Südtiroler Volkspartei (SVP). La liste, colegade al Partît Democratic talian (PD), e gjoldeve ancje de poie dal Partît Autonomist Trentin Tirolês (PATT) e de Slovenska Skupnost (SSk). In provincie di Bolzan la SVP e à cjapât il 48% des preferencis, ma e merete segnalade ancje la percentuâl alte otignude intai trê comuns ladins [storics] de provincie di Belum. La liste sudtirolese Die Freiheitlichen e jere invezit colegade cu la Leghe Nord, ma no à rivât a otignî avonde vôts inte sô circoscrizion par otignî un eurodeputât. In Val di Aoste al PD a jerin colegadis dôs listis autonomistis – Autonomie Liberté Partecipation Écologie e Union Valdôtaine Progressiste – che no àn rivât però a fâ elei il lôr candidât. Par chês altris comunitâts minorizadis dal stât talian la leç no previôt garanziis par favorî la elezion di candidâts espression di chestis realtâts discoragjant duncje fintremai la presentazion di listis nazionalitariis o autonomistis. Propit cheste situazion e à puartât diviers sogjets, massime in Sardegne e in Friûl, a presentâ ricors cuintri dal sisteme eletorâl in vore e che no àn ancjemò vût une rispueste definitive.

Font: elections2014.eu

Sud Tirôl: la SVP e piert la maiorance assolude

Domenie ai 27 do Otubar si son davueltis lis elezions pe Provincie Autonome di Bolzan e, pe prime volte di almancul cincuante agns incà, la SVP (Südtiroler Volkspartei) e à pierdût la maiorance assolude intal consei provinciâl. Cul 45,7% dai vôts, di fat, il partît di riferiment de comunitât sudtirolese al à otignût 17 elets, un in mancul des elezions stadis e un in mancul di ce che i coventave par vê la maiorance assolude. A gjavâi vôts e consens a son stâts massime i doi partîts de diestre sudtirolese, ven a dî Die Freiheitlichen che a àn vût il 17,9% des preferencis e 6 elets (un in plui de volte stade) e la Süd-Tiroler Freiheit cul 7,2% des preferencis e 3 elets (un in plui de volte stade). Di marcâ che, massime chest ultin partît, al è impegnât intune bataie pe indipendence sudtirolese che e previôt ancje dai referendums locâi pe autodeterminazion daûr dal model catalan.

Sud Tirôl: cu la gnove convenzion plui todesc e ladin in RAI

Ai 16 di Mai e je stade presentade in maniere uficiâl a Rome la gnove convenzion 2013-2015 tra la presidence dal consei dai ministris, la provincie di Bolzan e la RAI par realizâ e trasmeti programs radiotelevisîfs par todesc e par ladin in Sud Tirôl. La convenzion gnove e incrès lis trasmissions par todesc e par ladin, e adate l’organic a chest aument de programazion e e previôt il passaç ae provincie des competencis e dai coscj che fin cumò a jerin cuvierts dal stât centrâl. La provincie e sigurarà di fat un finanziament di 20 milions di euros ad an par 3 agns. In gracie di chestis risorsis si varan ancje grues invistiments tecnologjics che a permetaran di trasformâ chê di Bolzan inte prime sede regjonâl de RAI dute digjitâl.

Font: Adnkronos, 16/05/13

UE: partence in Jugn pe ICE su la diversitât linguistiche

La Iniziative dai Citadins Europeans (ICE) par infuartî il sisteme di tutele des minorancis linguistichis e nazionâls dentri de Union Europeane e sarà presentade in maniere uficiâl inte seconde metât di Jugn in Sud Tirôl in ocasion dal congrès de Union Federâl des Nazionalitâts Europeanis (FUEN). A imbastî cheste azion, in plui de FUEN, a son stadis la Zoventût des Nazionalitâts Europeanis (YEN), la Aleance Democratiche dai Ongjarês in Romanie (RMDSz) e la SVP, partît di riferiment de comunitât sudtirolese. Dongje di chestis cuatri realtâts organizadoris, si son però za zontadis cuasi un centenâr di associazions e organizazions di dute Europe impegnadis intal cjamp dai dirits linguistics e nazionâi. Il lôr compit al è chel di operâ a nivel locâl par tirâ sù un milion di firmis dentri di un an, di maniere che la Comission Europeane e meti adun un implant legjislatîf che al garantissi a dutis lis minorancis la no discriminazion, la protezion de diversitât linguistiche e culturâl, e la paritât intai dirits linguistics, intal insegnament des lôr lenghis e intal acès ai servizis publics.

Font: Agence Bretagne Presse, 28/04/13

Trentin – Sud Tirôl: minorancis in difese de autonomie

In plui di operâ une discriminazion arbitrarie tra lis lenghis ricognossudis cu la leç 482 dal 1999, il decret leç di revision de spese fat indenant dal guvier talian al ten dentri une schirie di intervents che a van a colpî la autonomie di diviersis regjons che a fondin la lôr “specialitât” propit suntune diviersitât storiche e linguistiche. Par chest i rapresentants des comunitâts minoritariis che a vivin in Trentin – Sud Tirôl, o sei ladins, mochens e zimbars, a son intervignûts adun par pandi la lôr poie pes azions inviadis dai presidents des provinciis autonomis di Trent e di Bolzan cun chê di difindi la specialitât regjonâl. Al è paradossâl, a àn dite, che intant che in Europe si domande di valorizâ la multiculturalitât e il plurilinguisim, in Italie si cîr di fâ passâ di privileç l’aministrâ il teritori cul tutelâ e cul promovi lis minorancis linguistichis.

Font: AGI, 26/07/12

Sud Tirôl: e je vuere vierte su la toponomastiche

Scuintri dûr jenfri il guvier talian e la Provincie autonome di Bolzan par vie de segnaletiche metude sù de AVS, o sei la associazion alpine sudtirolese, sui trois di mont dal Sud Tirôl. La plui part dai cartei e je dome par todesc e chest al à jevât lis protestis prime dai CAI e po des autoritâts talianis che a àn pretindût che la Provincie di Bolzan e gjavàs dute la segnaletiche monolengâl par meti al so puest dai cartei bilengâi. La Provincie e à ricuardât che la segnaletiche e je stade metude di un sogjet privât e cence spindi bêçs publics e che, duncje, no i tocjarès a jê di intervignî. Dut câs, ogni acuardi cul guvier talian al è stât impussibil ancje par vie dai timps imponûts di Rome (cuasi 40 mil cartei di sostituî intun an) e de pretese di meti formis talianis ancje là che no ‘nd è di tradizionâls. Sot vie, la cuestion principâl e somee jessi propite cheste, ven a dî la imposizion di nons talians che no son mai esistûts ma che a son stâts inventâts e imponûts intai agns dal fassisim. Propit il teme cjalt de toponomastiche al è ancje al centri di une propueste di leç fate indenant ta chestis zornadis de SVP, partît maioritari in Sud Tirôl, par cirî une soluzion al probleme.

Font: Alto Adige, 22-26/07/10

Ladinie: une femine prin “procurador” dal Comun General de Fascia

Ai 16 di Mai si son davueltis lis elezions aministrativis in passe 300 comuns dal Trentin e dal Sud Tirôl. Inte plui part dai comuns de provincie di Bolzan si à vût la vitorie di sindics poiâts de SVP. Chest partît al à ancje otignût cuatri sindics intai comuns ladins e si à mostrât fuart massime inte Val Gardene (Gherdëina). Ta chei altris comuns ladins a àn vinçût, inte plui part, des listis civichis. Il partît Ladins Dolomites si à presentât cul so simbul dome intal comun di Sëlva, là che al à cjapât il 23,9% dai vôts. Inte stesse zornade, pe prime volte, si à votât ancje pal Comun General de Fascia, la comunitât di valade che e cjape dentri dute la aree ladine de provincie di Trent. Tant che prin “procurador”, o sei president de comunitât, e je stade elete Cristina Donei.

Font: Provincie di Trent, 17/05/10

Sud Tirôl: azion par otignî la citadinance dople

Une delegazion de Südtiroler Volkspartei (SVP) si à cjatade tes zornadis stadis cul president de comission parlamentâr austriache pal Sud Tirôl, Hermann Gahr, e i à presentât la domande par inviâ il ricognossiment de citadinance dople, taliane e austriache, pai citadins che a son a stâ in provincie di Bolzan. La cuestion e jere za saltade fûr intai mês stâts, ma dome cumò si 'nd à tacât a fevelâ in maniere uficiâl. A front dai dubis che la propueste e à jevât intal guvier austriac, il parlamentâr de SVP Siegfried Brugger al à fat savê che al inviarà une racuelte di firmis par mostrâ trop che la citadinance dople e rispuindi ae volontât de popolazion sudtirolese. Segnâi di gradiment pe propueste a son rivâts ancje di altris formazions politichis dal Sud Tirôl.

Font: Austrian Times, 07/01/10; Món Divers, 12/01/10

Ladinie: nissune modifiche dal statût di autonomie cence ladins

La propueste di un referendum su la autodeterminazion dal Sud Tirôl, fate indenant dal vicepresident dal Parlament austriac Martin Graf (FPÖ), e à tornât a impiâ lis polemichis sul argoment sei in Austrie che in Sud Tirôl. Pes istituzions e pai partîts talians la cuestion no je in discussion; ai partîts sudtirolês, invezit, la propueste no displâs, massime a chei de diestre nazionaliste. Sul argoment, dut câs, a son intervignût ancje i ladins par bocje di Albert Pizzinini, president dal moviment “Ladins Dolomites”. I ladins no son ni talians, ni austriacs – al dîs Pizzinini – e, duncje cualsisei modifiche al statût di autonomie al à di fâ i conts ancje cun lôr e al à di puartâ a di un aument dal nivel di autoguvier di cheste comunitât.
Font: Noeles, 29/07/09

Stât talian: il vôt pes europeanis

Intal stât talian l’unic candidât di une formazion politiche rapresentative di une comunitât minorizade che al è stât elet intal Parlament di Strasburc al rive dal Sud Tirôl. Al è Herbert Dorfmann de Südtiroler Volkspartei (SVP). La liste, colegade al Partît Democratic talian (PD), e gjoldeve ancje de poie dal Partît Autonomist Trentin Tirolês (PATT) e de Slovenska Skupnost (SSk). A nivel talian la SVP e à otignût il 0,46% e 143 mil vôts, che pe plui part (117 mil) a rivin de provincie di Bolzan dulà che la liste sudtirolese e à vût il 52,1% dai consens.

In Val di Aoste, invezit, no si à rivât a elei nissun rapresentant locâl, cundut che ancje achì al è in vore un mecanisim che al favorìs la elezion di un rapresentant de minorance. Chest massime par vie che a jerin dôs lis formazions politichis che si contindevin chel puest, ven a dî la liste Vallée d’Aoste (colegade al Popolo della Libertà) che e à otignût il 0,1% a nivel talian e il 37,1% a nivel valdostan, e la aleance Autonomie Liberté Démocratie (colegade ae Italia dei Valori) che e à cjapât il 0,08% a nivel statâl e il 18,5% a nivel locâl.

Par chês altris comunitâts minorizadis no son stadis previodudis garanziis e nancje circoscrizions autonomis: une situazion che tai agns passâts e à impedît la elezion di candidâts espression di chestis comunitâts. In Sardegne, nissune liste indipendentiste o autonomiste e à partecipât aes elezions. Dut câs, i indipendentiscj dal moviment indipendentzia Repubrica de Sardigna (iRS) a àn promovût une campagne par invidâ i citadins sarts a meti dentri te schede une letare che e denuncie la impussibilitât pai sarts di elei in maniere autonome i lôr rapresentants a Strasburc. La iniziative e à po cjatât la poie ancje dal PSdAz. Rispiet aes elezions dal 2004, in Sardegne si à vude une diminuzion de partecipazion dal 35%. Lis schedis blancjis o nulis a son stadis il 4,3% dai vôts, in cetancj câs propit par vie de letare di iRS. Inte circoscrizion eletorâl des isulis, dut câs, la rinuncie di altris candidâts e à permetût la elezion di un candidât sart de IdV.

Inte circoscrizion nordorientâl, là che al è cjapât dentri ancje il Friûl, pe prime volte a son stâts elets doi candidâts furlans (un in maniere direte e il secont pe rinuncie di un altri candidât). Ducj e doi a son stâts elets inte filis di partîts talians (PD e PdL). Dut câs, un dai doi elets, ven a dî Debora Serracchiani (PD), si è impegnade a poiâ lis domandis di tutele e di promozion des lenghis minorizadis dal Friûl fatis indenant dal Comitât 482.

Font: elections2009-results.eu, 07-08/06/09; interno.it, 07-09/06/09; elezioni.bz.it, 07-09/06/09; iRS, 09/06/09; com482.org, 30/05-11/06/09

Sud Tirôl: l’esecutîf al ponte a vê plui autonomie e plui competencis

E à tacât la sô ativitât ai 30 di Dicembar la gnove aministrazion provinciâl sudtirolese jessude des elezions dai 26 di Otubar. L’esecutîf, formât di rapresentants de SVP e dal PD, al è vuidât ancje cheste volte di Luis Durnwalder, in carghe bielzà dal 1989. Intal so intervent programatic, Durnwalder al à declarât che l’obietîf par cheste legjislature al è chel di incressi la autonomie fiscâl e lis competencis de Provincie di Bolzan. In mert al progjet di federalisim fiscâl che il guvier talian al volarès inviâ intal 2009, il president de aministrazion provinciâl al à ricuardât che no si acetarà nissune riduzion rispiet a ce che a previodin i acuardis internazionâi sul Sud Tirôl. Si à di pontâ, invezit, a cressi la autonomie fiscâl par compagnâ lis gnovis competencis che la Provincie e domande in materie di puestis, personâl des aministrazions periferichis dal stât e dai tribunâi, sigurece e radiotelevision publiche.

Font: Nationalia, 30/12/08

Pontade 23 08 (11/11/08) - 5

Sud Tirôl: vitorie de SVP, ma e cres la diestre

Lis elezions aministrativis in provincie di Bolzan a àn tornât a dâ al partît storic sudtirolês, la SVP (Südtiroler Volkspartei), la maiorance dai conseîrs elets, ven a dî 18 su 35. Ta cheste maniere il president in scjadince, Luis Durnwalder, in carghe bielzà dal 1989, al larà indenant a guviernâ inmò par une legjislature. Cundut achel, la SVP e à pierdût la maiorance assolude dai consens, passant dal 55,6% des aministrativis dal 2003 al 48,1% di cumò. La plui part dai vôts pierdûts di cheste formazion politiche a son passâts al partît Die Freiheitlichen, partît di diestre cun leams fuarts cu la analighe formazion austriache, che al è stât votât dal 14,3% dai eletôrs passant dai 2 elets dal 2003 ai 5 dal dì di vuê. Al tierç puest par numar di vôts, cul 8,3%, si cjate il prin partît talian, o sei il Popolo della Libertà che al oten cussì 3 conseîrs. Cun doi elets parom si àn po il Partît Democratic (6% dai vôts), i Verts – Listis Civichis (5,8%), e la Süd-Tiroler Freiheit (4,9%), che e domande un referendum par tornâ cu la Austrie. A completâ il cuadri dai elets o cjatìn, cuntun conseîr ognidun, la Union für Südtirol (2,3%), la Leghe Nord (2,1%) e Unitalia (1,9%), coalizion de estreme diestre taliane. Lis formazions di stamp autonomist o nazionalist sudtirolês a cjapin in dut 26 dai 35 conseîrs disponibii. La liste Ladins Dolomites si è fermade al 1,1% dai vôts e no à rivât a jentrâ in Consei provinciâl. Intai Comuns ladins dal Sud Tirôl e je rivade cuasi pardut disore dal 15%, cun pontis dal 27,6% a S. Martin e dal 20,3% a Badia.
Font: Provincie di Bolzan, 27/10/08; Món Divers, 27/10/08; Nationalia, 27/10/08

Pontade 18 08 (02/09/08) - 3

Sud Tirôl: si trate par incressi la autonomie

L’incuintri dai 19 di Avost tra il ministri talian pe semplificazion legjislative, Roberto Calderoli, e il president de aministrazion provinciâl dal Sud Tirôl, Luis Durnwalder, al è stât judicât in maniere positive di ducj e doi. Inte riunion si à fevelât massime dai progjets di riforme dal implant des autonomiis che il guvier talian al è daûr a prontâ. Ta cheste suaze si à fevelât di une partecipazion indirete dal Sud Tirôl al font di solidarietât tra lis Regjons cul passaç di gnovis competencis ae Provincie, ma cence di un aument intal trasferiment dai contribûts. Tra lis competencis che a podaressin passâ al Sud Tirôl si à fevelât di polizie locâl, pueste e part de magjistrature. In cambi Durnwalder, che al guvierne la Provincie in rapresentance de SVP, al à fevelât di ecuidistance dal so partît rispiet aes dôs coalizions talianis di riferiment: inta cheste maniere si slontanisi de politiche di colaborazion ative cul centri çampe vude intai ultins agns. Calderoli al à sigurât che nissun al metarà in discussion il sisteme di autonomie dal Sud Tirôl, che par altri, al è garantît di acuardis internazionâi.
Font: Corriere della Sera, 20/08/08; Món Divers, 26/08/08

Pontade 14 08 (17/06/08) - 9

Grisons: ai sudtirolês il campionât european di balon des minorancis

E je lade ai sudtirolês (todescs e ladins adun) la vitorie intal campionât european di balon des minorancis che si è davuelt dai 31 di Mai ai 7 di Jugn intal Cjanton dai Grisons. Ae manifestazion, che e je stade batiade Europeada, a partecipavin disesiet scuadris amatoriâls in rapresentance di diviersis comunitâts minoritariis europeanis. In finâl la scuadre dal Sud Tirôl e à batût par 1 a 0 i cravuats de Serbie. Te finâl pal tierç e pal cuart puest, invezit, i rom de Ongjarie a àn subissât par 9 a 0 i danês de Gjermanie.
Font: Europeada, 07/06/08

Pontade 10 08 (22/04/08) - 6

Italie: sudtirolês, valdostans e slovens in Parlament

Lis elezions politichis dai 13 e dai 14 di Avrîl a àn confermât la presince di rapresentants sudtirolês, valdostans e slovens intal Parlament talian. In Senât a son stâts elets trê senatôrs de Südtiroler VolksPartei (SVP), un valdostan sot dal cartel “Autonomie, Liberté, Democratie” che al met adun partîts autonomiscj e dal centri çampe, e une slovene tes filis dal PD. Inte Cjamare dai deputâts, invezit, a son stâts elets doi rapresentants de SVP (ma te legjislature stade a ‘nd jere di plui) e un de liste “Vallée d’Aoste” che e meteve adun la Union Valdôtaine e altris doi moviments autonomiscj valdostans. Intes elezions politichis talianis, tra i partîts espression di comunitâts minorizadis, a jerin ancje i sudtirolês “Die Freiheitlichen” e “Union für Südtirol”, e i sarts “Sardigna Natzione” e “Partito Sardo d’Azione” che no àn vût nissun rapresentant elet. Di parlamentârs sarts e furlans a ‘nd è stâts elets in Parlament, ma dome framieç dai partîts di implant talian.
Font: Ministero dell’Interno (I), 15-16/04/08