15/09/19

Irlande: in cressi lis scuelis gaelichis te aree di Dublin

Il ministri pe educazion de Republiche di Irlande, Joe McHugh, al à fat savê che a partî dal prossim an inte aree metropolitane di Dublin si inviaran cinc gnovis scuelis primariis cul gaelic come lenghe veicolâr (gaelscoileanna). Dôs a tacaran la lôr ativitât cun chest an che al ven, dôs cul 2021 e la cuinte si inviarà – daûr di ce che a decidaran i gjenitôrs dai fruts – o tal 2020 o tal 2022. Daûr dai gnûfs regolaments ministeriâi, une scuele e à di jessi par gaelic se e ven fate sù tune aree là che no si àn altris istitûts di cheste fate e ancje tal câs che, tune stesse aree e tal zîr di trê agns, si previodi di fâ sù plui di une scuele.
Font: EiTB, 12/08/19

Paîs Catalans: Torra a procès ai 25 e 26 di Setembar

Il president dal guvier catalan (Generalitat), Quim Torra, al varà di comparî denant dal tribunâl superiôr di justizie de Catalogne ai 25 e ai 26 di Setembar pe acuse di disubidience. La procure i conteste di no vê ritirât i laçs zâi di solidarietât cui presonîrs politics e lis bandieris indipendentistis (esteladas) dai edificis publics dal guvier catalan intant de ultime campagne eletorâl. La zonte eletorâl centrâl di Madrid i veve comandât di fâlu parcè che a so parê si tratave di simbui di partît e no di une campagne pai dirits. Torra al riscje un an e vot mês di inabilitazion di ogni incarghe publiche.
Font: VilaWeb, 02/09/19; Naiz:, 02/09/19

Bretagne: insegnament bilengâl in altris 17 scuelis primariis

La partence dal an scolastic 2019-2020 in Bretagne e je compagnade dal inviament in 17 scuelis primariis di gnovis sezions bilengâls. Si trate di 15 scuelis publichis logadis inte regjon aministrative bretone e di une tal dipartiment de Loire Atlantiche. A chescj istitûts si zonte ancje une scuele catoliche parificade. Gnûfs percors bilengâi a saran inviâts ancje in 4 istitûts superiôrs de filiere publiche e in 3 di chê catoliche. Par cognossi il numar esat dai students che a frecuentaran chestis sezions si varà di spietâ il mês di Otubar. E je la prime volte, di cuant che si à inviât percors educatîfs bilengâi in Bretagne, che si àn cussì tantis sezions gnovis.
Font: ABP, 02/09/19

Gales: sbassadis lis investigazions dal comissari pe lenghe

Intal prin mês dopo de sô nomine tant che gnûf comissari pe lenghe galese, Aled Roberts, al varès investigât a pene il 26% des denunciis di violazion dai dirits linguistics rivadis ae sô atenzion. Tai prins doi mês di ativitâts lis denunciis no investigadis a àn tocjât percentuâls che no si vevin mai viodudis. A segnalâ cun preocupazion cheste situazion e je la organizazion pe lenghe Cymdeithas yr Iaith che e à ancje riferît che, daûr di chest compuartament, a saressin i indreçaments rivâts dal guvier. Si trate di une situazion une vore serie par vie che chê dal comissari e varès di jessi une figure indipendente rispiet al guvier, ma soredut parcè che cuant che aes denunciis no i ven daûr une investigazion si fâs passâ il messaç che cui che al viole la normative linguistiche nol riscje nuie e si fâs pierdi fiducie tal lavôr dal comissari. Roberts si à difindût spiegant che tai siei prins cuatri mês di ativitât a son stadis investigadis il 48% des denunciis e, ta chei altris câs, si àn vudis sigurazions de bande dai sogjets responsabii des violazions che a varessin proviodût a metisi in regule.
Font: Nation Cymru, 02/09/19

Asturiis: gnûf organisim pe politiche linguistiche

Il gnûf esecutîf des Asturiis al à decidût di recuperâ il non di direzion gjenerâl di politiche linguistiche pe struture de aministrazion regjonâl clamade a ocupâsi dal asturian e dal galizian fevelât te part plui ocidentâl de Comunitât. Il cambi dal non nol vûl jessi dome une modifiche di nature lessicâl ma un segnâl di atenzion par cheste tematiche. Cun di fat la decision e je stade compagnade ancje de creazion di un consei pe politiche linguistiche che, in gracie dal contribût di diviers esperts, al varà une funzion propositive e consultive su lis liniis di azion e su lis ativitâts di meti in cjamp.
Font: Asturies.com, 02/09/19

Galizie: campagne pe lenghe e cuintri de violence di gjenar

Il guvier galizian (A Xunta) al à svilupât un program di ativitâts che si propon di meti adun la promozion de lenghe galiziane cu la sensibilizazion cuintri de violence di gjenar. La campagne, che e je stade batiade «Nós contra a violencia», e ponte a rivâ a ducj i citadins ma e je indreçade massime sui zovins là che al è plui facil intervignî sui prejudizis di gjenar e ancje linguistics. Il program al cjape dentri iniziativis che a pontin a sensibilizâ i citadins par mieç de musiche, dal teatri e di altris ativitâts artistichis, ma ancje produzions editoriâls in stât di jessi dopradis come materiâl didatic dentri des scuelis.
Font: Lingua.gal, 30/08/19

Bretagne: la int e volarès un referendum su la riunificazion

La maiorance dai bretons – cun percentuâls che a van dal 58 al 60% – e volarès che la cuistion de riunificazion de Bretagne storiche tune uniche regjon aministrative e fos al centri di un confront public viert. La soluzion miôr e sarès chê di un referendum su la union dal dipartiment de Loire Atlantiche cul rest de Bretagne: une ipotesi che e cjate dacuardi il 63% des personis che a vivin inte Loire Atlantiche e il 68% dal rest dai bretons. Se si ves di votâ daurman, il 47% dai bretons al disarès di sì ae riunificazion a front di un 31% di contraris, intant che inte Loire Atlantiche i contraris a saressin a pene il 25%. Ducj chescj dâts a rivin di un scandai che i siei risultâts a son stâts presentâts ae stampe ai 29 di Avost. Tra lis domandis proponudis si ‘ndi veve une ancje sul sens identitari là che l’87% des personis sintudis si à identificât come breton, une percentuâl che e reste maioritarie ma che si ferme al 59% inte Loire Atlantiche.
Font: ABP, 29/08/19; FranceBleu, 29/08/19

Corsiche: Corsica Libera no mole sul “statût di resident”

Il moviment indipendentist Corsica Libera al à dât fûr un comunicât une vore dûr cuintri de speculazion imobiliâr che e menace la isule. Cun di fat a son simpri di plui i invistidôrs forescj che a comprin imobii o proprietâts ator pe Corsiche cul efiet di une incressite dai coscj che e impedìs a cetancj residents di vê acès a cjasis o terens tal lôr stes paîs. Ancjemò ai 24 di Avrîl dal 2014, cuntune largje maiorance, la Assemblee de Corsiche e veve votât il cussì clamât “statût di resident” che al favorive la int dal puest intal acuist di tieris o imobii. La norme no je stade ancjemò ratificade dal guvier francês e no à duncje valôr di leç, chel istès Corsica Libera e vise che i acuiscj fats di invistidôrs forescj dopo di chê date a son a risi. Di là dal vie libare di Parîs, pe int de isule il proviodiment al è legjitim e cui che al à cjolt proprietâts lu à fat savint di lâ cuintri de volontât dai cors. Di chi l’invît dal moviment indipendentist a lassâ pierdi lis speculazions imobiliârs parcè che, chê dai espropris, no je une pussibilitât di escludi.
Font: Alta Frequenza, 28/08/19

Bretagne: scuintri tra Regjon e associazions sul plan pe lenghe

Tune conference stampe che si à tignude ai 28 di Avost i rapresentants dal coletîf Rouedad ar brezhoneg, che al met adun une cincuantine di associazions impegnadis pe lenghe bretone, al à riclamât il consei regjonâl de Bretagne ai siei impegns e al à presentât un plan di intervent pe lenghe che al cjape dentri plui di otante misuris concretis di meti in vore. Ancjemò tal Dicembar dal an passât il consei regjonâl si veve impegnât a incressi vie pal 2019 misuris e risorsis pal breton e al veve fatis buinis lis liniis di indreçament par une gnove politiche linguistiche che a varessin vût di cjapâ sostance tun plan di azion. Dal moment che lis risorsis no son cressudis e che il plan no si lu à ancjemò viodût, Rouedad ar brezhoneg al à presentât la sô propueste – svilupade propit a partî des liniis fatis buinis de Regjon – e al à invidât il guvier locâl a dâsi une niçade. L’invît però nol è plasût al esecutîf breton che al à refudât lis acusis di inazion, al à lamentât la scjarsetât di risorsis a sô disposizion e al à ricuardât la pression fate sul guvier francês in difese dal sisteme scolastic bilengâl e a imersion. La reazion de Regjon e à lassât plui che perplessis lis associazions ancje parcè che no à nancje cjapât in considerazion lis propuestis fatis indenant e no à ufiert nissun gnove sul plan di politiche linguistiche.
Font: ABP, 28-30/08/19; Le Télégramme, 29/08/19

Stât francês: al reste il laç di Parîs su lis scuelis a imersion

Cu la partence dal an scolastic gnûf, intal stât francês si torne a proponi il probleme de assegnazion di insegnants e risorsis aes scuelis a imersion parificadis che a ufrissin ai fruts di cinc comunitâts minorizadis – ocitans, catalans, bretons, bascs e alsazians – un insegnament intes lôr lenghis propriis. Cun di fat, a front di une domande che e cres, lis assegnazions de bande dal stât centrâl a tindin a restâ fermis o fintremai piês. L’an passât a jerin stâts uns 15 mil i students che a vevin frecuentât chestis scuelis, 4 mil di lôr dome tal Paîs Basc setentrionâl (Ipar Euskal Herria) là che l’aument di iscrits par chest an al è di passe 200 fruts. Seaska, la federazion des scuelis baschis a imersion, e veve segnalât la dibisugne di trente insegnants e, dopo di un scuintri avonde dûr cul ministeri, e à otignût che in plui dai dîs assegnâts sul imprin a rivassin altris dîs professôrs. Cun chest an, la rêt di scuelis a imersion alsazianis (ABCM-Zweisprachigkeit) e varès di rivâ a dodis istitûts cu la zonte di une gnove scuele de infanzie ma di Parîs nol è rivât nancje un contrat in plui pai insegnants e chest al impedìs di vierzi altris classis. Inmò plui penze la situazion des Calandretas ocitanis là che, dome par restâ te aree di Montpelhièr / Montpellier, cu la concession di a pene doi insegnants in plui, si à di refudâ alc come 300 gnovis iscrizions intes scuelis de infanzie.
Font: Le Monde, 27/08/19

Montenegro: a van indenant lis tensions tra minorancis

E reste alte la tension in Montenegro tra lis diviersis minorancis e tra chestis e il stât centrâl. Daûr dal ultin censiment, dome il 45% de popolazion si ricognòs come montenegrin intant che si à un 29% che si declare di nazionalitât serbe e un 5% albanese. I contrascj tra lis comunitâts che a vivin ta cheste regjon no mancjin duncje di tocjâ ancje chest paîs balcanic. Dopo des critichis jevadis cuintri de decision des autoritâts statâls di sanzionâ i organizadôrs di doi events par vie di un ûs judicât strumentâl des bandieris albanesis e serbis, cumò a alçâ la temperadure e je stade la scree te aree di Tuzi – teritori a maiorance albanese tacât de capitâl Podgorica – di un monument a Dede Gjon Luli, nazionalist e combatent albanês vivût a cjaval tra i secui XIX e XX. Rapresentants dal Front Democratic, moviment di oposizion vicin ae comunitât serbe, a àn let chest episodi come une provocazion dal moment che – a disin – Dede Gjon Luli al rivendicave pe Albanie, ancje cu lis armis, la fasse meridionâl dal Montenegro là che e vîf la minorance albanese. I membris de oposizion a acusin il guvier centrâl di lassâ man libare ae comunitât albanese par vie che e poie l’esecutîf in cjarie.
Font: Balkan Insight, 26/08/19