15/10/19

Paîs Catalans: agns e agns di preson pai leaders indipendentiscj

Ai 14 di Otubar il tribunâl suprem spagnûl al à rindude publiche la sentence cuintri dai dodis dirigjents indipendentiscj catalans sot acuse pai reâts di ribelion, sedizion e malversazion che e previôt un totâl di pôc mancul di cent agns di preson. La cort e stime che e sedi provade la esistence de violence intant dai fats a judizi, ma no pues imputâle ai imputâts. Un tant al fâs duncje colâ la ipotesi di reât di ribelion, o sei propit chê doprade par justificâ la sospension dai dirits politics dai imputâts che, tal framieç, a jerin stâts elets intal Parlament catalan e ta chel spagnûl.
La condane plui dure e je chê assegnade a Oriol Junqueras che, come president vicjari dal guvier catalan intal Autun dal 2017, al à vût une responsabilitât plui alte tal procès pe indipendence e tal lâ cuintri de legjislazion statâl e des decisions dai tribunâi spagnûi. Il dirigjent di ERC al è stât duncje condanât a 13 agns di preson e di inabilitazion a ogni incarghe publiche pai reâts di sedizion e di malversazion. Pai stes reâts a son stâts condanâts invezit a 12 agns di preson e di inabilitazion i ex membris dal guvier Jordi Turull, Raül Romeva e Dolors Bassa. Il prin al varès vût un rûl di prin plan massime sul plan de gjestion informative sul procès pe indipendence, il secont inte gjestion dai rapuarts internazionâi e la tierce intal meti a disposizion une part dai spazis pal vôt referendari. La ex presidente dal Parlament catalan, Carme Forcadell, e à vût une condane a 11 agns e mieç par sedizion: pal tribunâl la sô colpe e je chê di vê facilitât in gracie de sô incarghe la votazion in aule di une legalitât alternative a chê statâl e di vê pidimentât la azion judiziarie che e cirive di blocâle. Simpri par sedizion, ma a 10 agns e mieç di preson e di inabilitazion, a son stâts condanâts ancje Josep Rull e Joaquim Forn, za membris dal guvier catalan. Al prin i si conteste di vê metût a disposizion une part dai spazis pal vôt referendari e al secont di vê pidimentât la azion de polizie catalane (mossos d’esquadra) in ocasion dal referendum dal prin di Otubar. Jordi Sànchez, in chê volte president de ANC, e Jordi Cuixart, president dal Òmnium Cultural, a son stâts condanâts par sedizion a 9 agns, doi di chescj za scontâts in regjim de carcerazion preventive. Sànchez, propit pe sô azion a cjâf de ANC, al è stât judicât centrâl intal svilup dal procès indipendentist, in plui di assegnâi la responsabilitât primarie inte manifestazion – judicade sediziose – dai 20 di Setembar dal 2017. Cuixart, acusât di vê stiçât la int ae resistence ative e a impedî la metude in vore dai ordins judiziaris, al paie massime il fat di vê rivendicât ancje denant dai judiçs il percors fat in direzion dal referendum dal prin di Otubar e la volontât di lâ indenant pe stesse strade (a partî de innomenade frase «ho tornarem a fer»). I ex membris dal guvier Meritxell Borràs, Carles Mundó e Santi Vila a son stâts condanâts invezit par disubidience a un an e vot mês di inabilitazion e a multis di 60 mil euros ognidun. Lis sentencis a son definitivis ma i avocats de difese a àn fat savê che a provaran distès a bati lis unichis dôs stradis che a son restadis: un ricors par violazion dai dirits umans denant dal tribunâl costituzionâl e la impugnazion de sentence denant dai tribunâl european pai dirits umans di Strasburc.
Za a misdì dai 14 di Otubar, a pene cognossude la sentence, passe un centenâr di realtâts associativis, sindacâls e professionâl catalanis a àn inmaneât un at public in place Sant Jaume, a Barcelone, par manifestâ cuintri de decision dal tribunâl suprem spagnûl. Intun document unitari, i rapresentants di chestis realtâts a denunciin la injustizie che e diven di cheste sentence che, in plui di no risolvi il conflit politic in at, e puartarà consecuencis une vore penzis pe normalitât politiche e sociâl de Catalogne. Si son po impegnâts a lavorâ sul plan politic e sociâl pe liberazion dai nûf dirigjents indipendentiscj condanâts. La sentence e à jevât cuasi dal moment mobilitazions e iniziativis di proteste in diviersis localitâts catalanis e no dome.
Font: VilaWeb, 14/10/19; Naiz:, 14/10/19

Nessun commento: