UE: e cres la rapresentance de EFA tal Parlament european

A son diviers i candidâts di moviments rapresentatîfs des comunitâts minorizadis che a son stâts elets intal Parlament european in ocasion des votazions che si son tignudis intai diviers stâts membris de UE tra i 23 e i 26 di Mai. La vicende che dal sigûr e à fat plui scjas e je stade la elezion di trê dai rapresentants plui significatîfs dal indipendentisim catalan, o sei Oriol Junqueras, che si cjate di plui di un an in regjim di preson preventive, Carles Puigdemont e Toni Comín, che si cjatin in esili inte Belgjiche. Il prin al è stât elet cuntune liste che e meteve adun la çampe nazionalitarie basche, catalane e galiziane e che e à puartât ancje ae elezion di Diana Riba (simpri di ERC) e di Pernardo Barrena (EH Bildu). Puigdemont e Comín si presentavin invezit cu la liste Lliures per Europa. Intal stât spagnûl a son stâts elets al Parlament european ancje Izaskun Bilbao dal PNV e Ernest Urtasun di ICV.

Europe: passe 1,2 milions di firmis par “Minority Safepack”

Minority Safepack, la iniziative citadine inviade de FUEN (Union Federâl des Nazionalitâts Europeanis) par incressi lis misuris di tutele des personis che a partegnin a minorancis linguistichis e nazionâls e par infuartî la diversitât linguistiche e culturâl dentri de Union Europeane, e je stade un sucès. Cun di fat, par che la Comission Europeane e cjapi in man une iniziative citadine e covente la poie di almancul un milion di personis ator pe Union e ai 3 di Avrîl, date che e finive la racuelte des firmis, chês cjapadis sù a son stadis passe un milion e 215 mil. I stâts là che il quorum di firmis che si vevisi proponûts di cjapâ sù par Minority Safepack al è stât superât a son undis: Ongjarie (là che lis firmis racueltis a son stadis plui di mieç milion!), Romanie, Slovachie, Bulgarie, Cravuazie, Slovenie, Lituanie, Letonie, Danimarcje, Spagne e Italie. Ta chest ultin stât l’obietîf al jere stât fissât a 55 mil firmis e a ‘nd è stadis tiradis sù plui di 60 mil, pe plui part in Sud Tirôl, Val di Aoste e Friûl. I stâts a àn cumò trê mês par convalidâ lis firmis e la Comission Europeane a ‘nd à altris trê par presentâsi denant dal Parlament par riferî su la iniziative. Dopo dal agrât a ducj i citadins e aes organizazions che a àn poiât la iniziative, il president de FUEN, Loránt Vincze, al à celebrât la nassite di chel che al à clamât un vêr moviment european pai dirits des comunitâts minorizadis.

Font: FUEN, 04-05/04/18

Stât talian: comunitâts minorizadis, i risultâts des politichis

Lis elezions politichis che si son tignudis ai 4 di Març no àn dât risultâts masse bogns pes realtâts politichis rapresentativis des nazionalitâts cence stât e des minorancis linguistichis e nazionâls che a vivin dentri dai confins dal stât talian.

Stât talian: furlans, sarts, sudtirolês e valdostans tes politichis

Intes elezions politichis in program ai 4 di Març intal stât talian a son diviers i moviments di stamp autonomist, regjonalist o indipendentist che si son presentâts ancje se, in diviers câs, in aleance cun partîts di nivel statâl. Par chel che al rivuarde lis realtâts politichis rapresentativis des nazionalitâts cence stât e des minorancis linguistichis e nazionâls, a corin di bessôi «AutodetermiNatzione» in Sardegne (che al met adun buine part des diviersis animis dal nazionalitarisim sart), il «Patto per l'Autonomia» in Friûl - Vignesie Julie (che al nas de union di grups politics e associatîfs di aree autonomiste furlane), e «Pour Tous Per Tutti Pe Tcheut» in Val di Aoste (dulà che al gjolt de poie dai moviments autonomiscj Alpe, Stella Alpina e Pour Notre Vallée). Si presentin invezit intune cui partîts talians il «Partidu Sardu - Partito Sardo d'Azione» in Sardegne (cu la LN), «Union Valdôtaine», «Union Valdôtaine Progressiste» e «Edelweiss Popolare Autonomista Valdostano» in Val di Aoste (ducj cul PD). Situazion a miezis pe aleance «Südtiroler VollksPartei - Partito Autonomista Trentino Tirolese» che in Trentin - Sud Tirôl si presente intun pâr di circoscrizions di bessole e pal rest dentri de coalizion di centri çampe vuidade dal PD.

Sud Tirôl: campagne pai toponims storics

I nons di lûc a son un patrimoni culturâl coletîf e stramudâju al vûl dî falsificâ la storie, violâ la dignitât di chel teritori e savoltâ la sô identitât. A partî di chest resonament il partît Süd-Tiroler Freiheit al à inviât une petizion par abolî i decrets fats bogns ai 12 di Març dal 1923 dal grant consei dai fassisim che a scancelavin i nons storics todescs e ladins dal Sud Tirôl par sostituîju cun passe 8 mil toponims talians, pe plui part inventâts dal moment. A passe 90 agns di chê operazion di talianizazion sfuarçade, i decrets fassiscj a restin inmò in vore. La petizion e ponte a scancelâju cuntune leç dal Parlament talian o ben cun altris azions legjislativis. La cuistion no inten però dome i citadins sudtirolês di lenghe todescje e ladine, cussì il moviment politic al à publicât cumò sul so sît internet ancje une version par talian dal opuscul che al spieghe lis resons de sô iniziative.

Font: Süd-Tiroler Freiheit, 21/08/17

Stât talian: sburt de ELEN pe ratifiche de Cjarte des lenghis

La organizazion ELEN – Rêt Europeane pe Avualiance des Lenghis – e à scrit al president dal consei dai ministris talian, Paolo Gentiloni, ai membris che a formin l’esecutîf e ai senatôrs par che si procedi cu la ratifiche de Cjarte europeane des lenghis regjonâls o minoritariis. Il stât talian al à firmât la Cjarte intal 2000, ma ducj i tentatîfs legjislatîfs par ratificâle a son lâts sù pai stecs. L’ultin test di ratifiche – che al viôt tant che prin firmatari il parlamentâr Francesco Palermo – si cjate cumò pantanât in Senât. La iniziative de ELEN si propon duncje di dâi un sburt par che al puedi jessi fat bon prime de fin de legjislature. In plui de azion direte, la Rêt Europeane e à ancje invidât lis realtâts di riferiment des comunitâts minorizadis che a vivin intal stât talian a fâ pressions par chel il test al ledi indenant.

Font: ELEN, 11/07/17

Rom: dirit ae cjase, critichis dal Consei de Europe a siet stâts

Il comissari pai dirits umans dal Consei de Europe al à criticât siet dai 47 stâts che a formin cheste istituzion par vie des politichis di sfrat sfuarçât metudis in at cuintri dai rom intai ultins agns. Sot acuse a son Albanie, Bulgarie, France, Italie, Ongjarie, Serbie e Svezie. Il comissari al domande ai guviers di chescj stâts di fermâ ducj i sfrats fintremai che no si cjataran soluzions abitativis alternativis. Chestis azions, di fat, a incressin la vulnerabilitât des fameis rom, a pidimentin la lôr inclusion sociâl e a impedissin percors regolârs di scolarizazion.

Font: Balkan Insight, 18 e 19/02/16

Stât talian: dome la SVP e oten un eurodeputât

Intal stât talian l’unic candidât di une formazion politiche rapresentative di une comunitât minorizade che elet intal Parlament di Strasburc al rive dal Sud Tirôl. Al è Herbert Dorfmann de Südtiroler Volkspartei (SVP). La liste, colegade al Partît Democratic talian (PD), e gjoldeve ancje de poie dal Partît Autonomist Trentin Tirolês (PATT) e de Slovenska Skupnost (SSk). In provincie di Bolzan la SVP e à cjapât il 48% des preferencis, ma e merete segnalade ancje la percentuâl alte otignude intai trê comuns ladins [storics] de provincie di Belum. La liste sudtirolese Die Freiheitlichen e jere invezit colegade cu la Leghe Nord, ma no à rivât a otignî avonde vôts inte sô circoscrizion par otignî un eurodeputât. In Val di Aoste al PD a jerin colegadis dôs listis autonomistis – Autonomie Liberté Partecipation Écologie e Union Valdôtaine Progressiste – che no àn rivât però a fâ elei il lôr candidât. Par chês altris comunitâts minorizadis dal stât talian la leç no previôt garanziis par favorî la elezion di candidâts espression di chestis realtâts discoragjant duncje fintremai la presentazion di listis nazionalitariis o autonomistis. Propit cheste situazion e à puartât diviers sogjets, massime in Sardegne e in Friûl, a presentâ ricors cuintri dal sisteme eletorâl in vore e che no àn ancjemò vût une rispueste definitive.

Font: elections2014.eu

Friûl e Italie: i gjestôrs di servizis publics a àn di doprâ il sloven

Ai 29 di Novembar la presidente de Regjon Friûl – Vignesie Julie e à sotscrit il decret che al fisse i ents gjestôrs e concessionaris di servizis publics che, su la fonde de leç statâl pai slovens, a son clamâts a doprâ la lenghe slovene tes tabelis e te toponomastiche che a metin fûr intes areis là che e vîf la minorance. La liste e je stade proponude dal Comitât istituzionâl paritetic pai problemis de minorance slovene. Tal specific si trate di societâts che a operin intal cjamp de viabilitât e dai traspuarts tant che Anas, Autovie Venete, Autostrade per l'Italia, FVG Strade, Trieste Trasporti, SAF di Udin, APT di Gurize, RFI-Rete ferroviaria italiana, Trenitalia, Aeropuart dal Friûl - VJ, in plui di Poste Italiane e RAI. Il decret al previôt une metude in vore graduâl de misure, ma e invide a inviâ daurman chest percors.

Font: ARC - RAFVJ, 30/11/13

Ladinie: conferme de UAL tes elezions trentinis

Ai 27 do Otubar si son davueltis lis elezions pe Provincie Autonome di Trent che a àn viodût la conferme al guvier de coalizion autonomiste di centri çampe. Ae vuide de Provincie al è stât elet Ugo Rossi che al à otignût il 58% e passe di preferencis. Di chei altris dîs candidâts pe presidence, il risultât miôr al è stât chel di Diego Mosna, poiât di une coalizion di aree centriste, che si è fermât pôc sot dal 20% di vôts. Dai 35 puescj disponibii in consei provinciâl, 23 a son lâts ae coalizion di maiorance: dongje di Rossi a son jentrâts cussì 9 conseîrs dal Partît Democratic dal Trentin, 7 dal Partît Autonomist Trentin Tirolês, 5 de Union pal Trentin e 1 de Union Autonomista Ladina. Avonde margjinâl la rapresentance in consei dai partîts talians di stamp unionist. Par chel che al rivuarde la Ladinie trentine, cjapade dentri intal Comun General de Fascia, i doi partîts plui votâts a son stâts la Union Autonomista Ladina, che e à cjapât cuasi il 52% des preferencis e che e à elet un so rapresentant in consei inte suaze de coalizion vincidore, e la liste Associazione Fassa che e à sfiliât il 32% des preferencis e che e coreve in solitari.

Font: Provincia Autonoma di Trento, 28/10/13

Sardegne: no de Regjon al test di ratifiche de Cjarte europeane

Ai 2 di Avost il Consei regjonâl de Sardegne al à fat bon un ordin dal dì là che si domande al Parlament talian di modificâ il test di ratifiche de Cjarte europeane des lenghis regjonâls o minoritariis. Par jentrâ in vore la Cjarte e à di jessi prime firmade e po ratificade, ma la Italie dopo vêle firmade intal 2000 no le à ancjemò ratificade. Il test de ratifiche al è cumò al esam dal Parlament talian, ma i nivei di tutele previodûts pal sart (ma ancje pal furlan e par altris lenghis minorizadis) a son in cierts câs fintremai plui bas di chei garantîts de leç statâl 482 dal 1999 pes lenghis minoritariis. Cundut che il sart al è la lenghe minorizade plui fevelade intal stât talian, intal test de ratifiche jessût des Comissions parlamentârs si cjate a jessi discriminât a front des lenghis bielzà tuteladis di tratâts internazionâls tant che il todesc dal Sud Tirôl o il francês de Val di Aoste. Par chest il Consei regjonâl, ducj dacuardi, al à domandât in maniere uficiâl al Parlament di modificâ il test de ratifiche e di garantî al sart i nivei massims di tutele previodûts de Cjarte europeane.

Font: Regione Sardegna, 02/08/12

Stât talian: lenghis minorizadis e autonomiis speciâls sot atac

Une sentence de Cort di cassazion taliane, clamade a intervignî suntune vicende processuâl là che no jerin stadis dopradis lis trascrizions di intercetazions ambientâls in lenghe sarde, e à calcolât il sart di dialet. Pai judiçs de cassazion, di fat, la lenghe proprie de Sardegne no à i stes dirits di chês ricognossudis cun acuardis internazionâi tant che il francês de Val di Aoste, il todesc e il ladin de provincie di Bolzan e il sloven de provincie di Triest. Un tant però, no dome nol ten cont de leç statâl 482/99 che e ricognòs in maniere compagne chestis e altris lenghis, ma nancje de convenzion cuadri pe protezion des minorancis nazionâls che il stât talian si è impegnât a rispietâ e che e met il sart sul stes plan di chês altris lenghis minorizadis ricognossudis.

Sardegne: discriminatori il test di ratifiche de Cjarte europeane pes lenghis

L’assessôr regjonâl pe istruzion de Sardegne, Sergio Milia, al à scrit a ducj i parlamentârs elets inte isule par domandâ che a intervegnin par modificâ il test di ratifiche de Cjarte europeane des lenghis regjonâls o minoritariis che al à di jessi esaminât de Cjamare dai deputâts. Cun di fat, il test cussì cemût che al è al ven judicât discriminatori tai confronts di ciertis lenghis minorizadis feveladis dentri dal stât talian. Par esempli, cundut che il sart e il furlan a sedin lis lenghis minoritariis plui feveladis, – al spieghe il rapresentant de Regjon Sardegne – intal test de ratifiche a son une vore penalizadis a front des lenghis bielzà tuteladis di tratâts internazionâi tant che il todesc dal Sud Tirôl o il francês de Val di Aoste. A mobilitâsi par che la aministrazion regjonâl e fasès sintî la sô vôs su chest teme al jere stât massime il Comitadu pro sa limba sarda.

Font: Italian Network, 14/06/12

Slovens: in curt une taule di lavôr pai problemis de minorance

Il ministeri talian pal interni al à sigurât che in curt al metarà sù une taule di lavôr continuative par frontâ lis cuistions leadis ae minorance slovene che e vîf inte regjon Friûl – Vignesie Julie. La conferme e je rivade dal sotsegretari Saverio Ruperto che ai 8 di Jugn si è cjatât cuntune rapresentance de minorance slovene. Inte taule a saran clamâts dongje rapresentants dal stât, de regjon, dai ents locâi, dal comitât paritetic e des organizazions rapresentativis de minorance. Tra lis primis cuistions di risolvi si à chê de scuele bilengâl di S. Pieri, che si cjate ancjemò intune situazion di precarietât logjistiche, e lis dificoltâts economichis de stampe par sloven, a tacâ dal cuotidian Primorski Dnevnik, là che il sotsegretari Ruperto al à confermât che al covente intervignî cuntun sfuarç plui grant.

Font: Il Piccolo, 09/06/12; Novi Matajur, 13/06/12

Italie: pas indenant pe ratifiche de Cjarte europeane des lenghis

Inte riunion dai 9 di Març il Consei dai ministris talian al à fat bon il disen di leç pe ratifiche de Cjarte europeane des lenghis regjonâls o minoritariis, document che la Italie e veve firmât agns indaûr cence mai ratificâlu. Pai membris dal guvier vuidât di Mario Monti i contignûts de leç statâl 482 dal 1999, che e previôt misuris di tutele par dodis lenghis di minorance ricognossudis in maniere uficiâl, a son suficients par permeti ae Italie di ratificâ la Cjarte. In spiete che il Parlament talian al dedi il so vie libare al proviodiment, i prins coments che a rivin des comunitâts minorizadis a son positîfs, ancje se si ricuarde che chest passaç al è dibant se po si tain lis risorsis par meti in vore la leç 482 come che al à fat propit il guvier Monti.

Font: Consiglio dei Ministri, 09/03/12; Comitât 482, 10/03/12

Italie: taiâts i fonts statâi pes minorancis

Il Dipartiment talian pai afârs regjonâi al à dât fûr une circolâr su la assegnazion dai fonts dal 2012 pe leç statâl che e garantìs formis di tutele pes lenghis di dodis des comunitâts minorizadis che a vivin intal stât talian (albanês, catalans, cravuats, francês, francoprovençâi, furlans, grêcs, ladins, ocitans, sarts, slovens, todescs). Lis risorsis metudis a disposizion a son in dut 1.768.792 euros, la cifre plui basse mai metude di un guvier talian di cuant che la leç e je stade fate buine intal 1999.

UE: nûf stâts riclamâts su lis politichis pai rom

La Comission Europeane, par bocje de comissarie Viviane Reding, e à riclamât nûf dai stâts membris a presentâ i lôr plans di intervent pe integrazion dai rom. La scjadince par consegnâ i plans aes autoritâts europeanis e jere chê dai 31 di Dicembar dal 2011. A no vêlu fat a son Belgjiche, Bulgarie, Cipri, Irlande, Italie, Lituanie, Slovenie, Spagne e Svezie.

Font: Focus Information Agency, 20/01/12

Slovens: prime cjarte bilengâl a Cividât

Inte republiche taliane la leç statâl sui slovens e previôt za di agns la pussibilitât pai citadins di lenghe slovene che lu domandin di vê la cjarte di identitât bilengâl, pûr che a sedin residents intun dai Comuns che a son inte aree là che storichementri e je presinte, ancje se in forme minoritarie, la comunitât slovene. Dut câs in cierts Comuns de provincie di Udin, che pûr a son cjapâts dentri ta cheste aree delimitade, la concession de cjarte e je stade une vore faturose. Al è il câs di Resie, là che la prime cjarte bilengâl dade a di un resident che le veve domandade e je stade compagnade di polemichis une vore pesantis e fintremai di diviers ats di intimidazion. Ancje a Cividât, là che si à une presince significative di nazionaliscj talians, no son mancjâts i problemis. Dut câs dopo diviers mês che e jere stade presentade la domande e dopo no pôcs rimants e pidiments fats indenant de aministrazion locâl, ae fin ancje ta chest Comun e je stade dade fûr la prime cjarte di identitât par talian e par sloven.

Font: Novi Matajur, 11/01/12

Sud Tirôl: e je vuere vierte su la toponomastiche

Scuintri dûr jenfri il guvier talian e la Provincie autonome di Bolzan par vie de segnaletiche metude sù de AVS, o sei la associazion alpine sudtirolese, sui trois di mont dal Sud Tirôl. La plui part dai cartei e je dome par todesc e chest al à jevât lis protestis prime dai CAI e po des autoritâts talianis che a àn pretindût che la Provincie di Bolzan e gjavàs dute la segnaletiche monolengâl par meti al so puest dai cartei bilengâi. La Provincie e à ricuardât che la segnaletiche e je stade metude di un sogjet privât e cence spindi bêçs publics e che, duncje, no i tocjarès a jê di intervignî. Dut câs, ogni acuardi cul guvier talian al è stât impussibil ancje par vie dai timps imponûts di Rome (cuasi 40 mil cartei di sostituî intun an) e de pretese di meti formis talianis ancje là che no ‘nd è di tradizionâls. Sot vie, la cuestion principâl e somee jessi propite cheste, ven a dî la imposizion di nons talians che no son mai esistûts ma che a son stâts inventâts e imponûts intai agns dal fassisim. Propit il teme cjalt de toponomastiche al è ancje al centri di une propueste di leç fate indenant ta chestis zornadis de SVP, partît maioritari in Sud Tirôl, par cirî une soluzion al probleme.

Font: Alto Adige, 22-26/07/10

Rom: denuncie dal ERRC pes espulsions dai cjamps

Il Centri european pai dirits dai rom (ERRC) al à domandât al comissari pai dirits umans dal Consei de Europe, ae Agjenzie pai dirits fondamentâi de Union Europeane e a altris sogjets impegnâts ta chest setôr di cjapâ posizion su lis politichis metudis in at intal stât talian cuintri di rom e sinti. Al centri de denuncie e je massime la situazion che si à a Milan là che, dome dal principi dal an, si àn za vudis passe sessante operazions di espulsion sfuarçade di fameis rom e sinti dai sîts là che a jerin a vivi. Si trate di une situazion che no à precedents e che in plui di lassâ cetantis fameis cence tet, e puarte efiets pesants sei pai oms che a lavorin, sei pai fruts che a van a scuele.

Font: ERRC, 05/05/10