Maroc: militants saharawi condanâts pai fats di Gdeim Izik

A àn jevât reazions une vore negativis a nivel internazionâl, là che a son presintis comunitâts di dispatriâts saharawi o organizazions che a poin la lote pe autodeterminazion di chest popul, lis sentencis emetudis dal tribunâl militâr di Rabat cuintri di une vincjine di militants saharawi. Cun di fat, la cort militâr marochine e à condanât vot di lôr ae preson a vite, cuatri a 30 agns di galere e altris dîs a penis che a van dai 20 ai 25 agns (intant che doi a saran liberâts viodût che a àn za passât in preson in spiete dal judizi i doi agns de lôr condane). Il procès al fâs riferiment a fats capitâts intal 2010 a Gdeim Izik, incjampament tirât sù intal Sahara Ocidentâl dongje de capitâl El-Aaiún, là che si vevin dâts dongje diviers miârs di saharawi.

Stât spagnûl: lis organizazions pro saharawi no acetin di ritirâsi

La maiorance des associazions dal stât spagnûl che a son ativis cui lôr volontaris intai cjamps di sfolâts saharawi inte aree di Tinduf (Alzerie) a àn comunicât che no intindin di ritirâ i cooperants cemût che ur domandave il guvier di Madrid. La decision dal esecutîf vuidât di Mariano Rajoy (PP) e je leade ae vicende di trê cooperants – un catalan, une spagnole e une sarde – che a jerin stâts secuestrâts di milizians fondamentaliscj intant che a jerin daûr a judâ lis popolazions saharawi intai cjamps di profugance alzerins e che a son stâts po liberâts ai 18 di Lui.

Sahara Ocidentâl: gnovis violencis a El-Aaiún

I osservatôrs internazionâi a àn denunciât gnovis violencis cuintri de popolazion civîl e dai militants saharawi inte citât di El-Aaiún, capitâl dal Sahara Ocidentâl. I fats a son capitâts ai 9 di Març cuant che un grup di ativiscj saharawi pai dirits umans a son tornâts in citât daspò di une visite intai cjamps di profugance là che e vîf une buine fete de popolazion saharawi scjampade denant de ocupazion marochine dal lôr paîs. Lis fuarcis di polizie marochine a àn atacât i ativiscj e la popolazion che e jere jessude in strade par dâi il bon acet. I osservatôrs internazionâi a àn fevelât di almancul une disine di ferîts, ma lis informazions a son ancjemò parziâls.

Font: Ambassade RASD Rome, 10/03/10

Sahara ocidentâl: la vitorie di Aminatu Haidar sul Maroc

Daspò di 32 dîs di siopar de fam, la ativiste saharawi pai dirits umans Aminatu Haidar e à podût tornâ a cjase sô, inte citât di El-Aaiún, cence condizions. Ai 13 di Novembar, intant che e tornave dai Stâts Unîts, la femine e jere stade blocade des autoritâts marochinis intal aeropuart de capitâl saharawi e, daspò che i jere stât secuestrât il passepuart, e jere stade imbarcjade a fuarce suntun avion par Lanzarote, intes isulis Canariis. Achì, lis autoritâts spagnolis, prime le vevin obleade a passâ la frontiere e po i vevin impedît di tornâ a imbarcjâsi parcè che no veve il passepuart. Dut câs, Aminatu Haidar no si à fate spaurî e par podê tornâ a cjase sô e à inviât un siopar de fam denunciant il compuartament des autoritâts marochinis e di chês spagnolis. Pes autoritâts marochinis la decision di fâle tornâ a cjase e je stade cjapade dome par resons umanitariis, ma pe comunitât saharawi e je stade une vitorie impuartante. Il câs di Aminatu Haidar e à tornât a puartâ la cuestion saharawi ae atenzion internazionâl, creant no pôcs problemis al Maroc che di passe trente agns al ocupe in maniere ilegâl il Sahara Ocidentâl e che al va dilunc a reprimi cun violence la resistence saharawi. I ultins episodis di violence si àn vûts propit cuant che Aminatu Haidar e je rivade a El-Aaiún: cun di fat, la polizie e à reprimût cun fuarce lis manifestazions di fieste dai saharawi che a jerin lâts in strade par saludâ la militante tornade a cjase.

Font: Ambassade RASD Rome - ANSPS, 18/12/09; Gara, 18/12/09

Sahara ocidentâl: ativiste “secuestrade” di Maroc e Spagne

A son daûr a cressi ogni dì di plui lis protestis internazionâls cuintri dal Maroc pal câs de ativiste saharawi pai dirits umans Aminatu Haidar. Ai 13 di Novembar, la femine, che e tornave dai Stâts Unîts dulà che e veve ritirât il premi Kennedy pai dirits umans, e je stade blocade des autoritâts marochinis alì dal aeropuart de capitâl saharawi El-Aaiún che, prime i àn secuestrât il passepuart, e daspò di un interogatori su lis sôs ideis politichis le àn imbarcjade a fuarce suntun avion che al è aterât a Lanzarote, intes isulis Canariis. Achì, lis autoritâts spagnolis, prime le àn obleade a passâ la frontiere e po i àn impedît di tornâ a imbarcjâsi parcè che no veve il passepuart. Aminatu Haidar e à inviât un siopar de fam par denunciâ lis autoritâts marochinis e spagnolis che i impedissin di tornâ a cjase. La sô situazion e à jevât la proteste dai militants saharawi in patrie e ator pal mont, dai grups di solidarietât pal popul saharawi, des organizazions internazionâi pai dirits umans (tant che Amnesty International e Human Rights Watch) e di diviers rapresentants politics, tra chescj ancje une trentine di europarlamentârs, che a denunciin lis autoritâts marochinis e spagnolis pe violazion dal dirit internazionâl. Daspò des protestis, il guvier spagnûl al à fat savê di jessi disponibil a ricognossii il status di rifugjât politic, ma Aminatu Haidar e domande dome di tornâ a cjase dai siei fîs e si refude di acetâ un tratament che la Spagne i dinee a ducj chei altris saharawis perseguitâts dal Maroc.

Font: Ambassade RASD Rome, 14-21/11/09; Europa Press, 20-21/11/09

Sahara Ocidentâl: siet ativiscj pai dirits umans secuestrâts in Maroc

Un grup di siet ativiscj saharawi pai dirits umans a son stâts secuestrâts dai servizis segrets marochins a pene che a son sbarcjâts al aeropuart di Casablanca. I siet a tornavin di un viaç là che a vevin visitât i cjamps di profugance de popolazion saharawi in Alzerie e che a vevin tignût intervents par denunciâ la repression in vore intal Sahara Ocidentâl sot ocupazion marochine. Di lôr no si àn plui notiziis e no si sa là che a sedin stâts puartâts. I rapresentants de comunitât saharawi a àn domandât aes autoritâts internazionâls, a tacâ dal consei di sigurece de ONU, di ativâsi daurman pe lôr liberazion. Intes presons marochinis a son une vore i ativiscj saharawi impresonâts, di un pôcs di lôr no si àn plui notiziis ancje di une vore di timp.

Font: Ambassade RASD Rome, 09/10/09

Sahara Ocidentâl: il Maroc al torne a fevelâ di autonomie

In ocasion dal discors uficiâl pai siei dîs agns tant che re dal Maroc, Mohamed VI al à comunicât il progjet di regjonalizâ il paîs. Tal zîr di cualchi mês une comission consultive e varès di meti jù un plan che al puarti al decentrament dai podês. Pal sovran marochin il pont di partence al varà di jessi chel di meti in pîts une struture regjonâl autonome intes “provinciis dal Sud”, ven a dî il Sahara Ocidentâl ocupât in maniere ilegâl dal esercit marochin vie pai agns ’70. Il progjet di meti sù une regjon autonome pal Sahara Ocidentâl al jere stât fat indenant ancjemò un doi agns indaûr, ma al cjate la contrarietât dal Polisario, il moviment di resistence dai saharawi che di passe trente agns si bat pe indipendence di chel teritori. I saharawi, di fat, a domandin, daûr di ce che a previodin diviersis risoluzions de ONU, che inte regjon si davuelzi un referendum su la autodeterminazion. Il plan marochin, in chê volte, al veve cjatât il bon acet sei dal Stâts Unîts che de Spagne (ex colonizadôr), ma cumò la situazion e je cambiade cu la aministrazion vuidade di Barack Obama. Par cirî une soluzion, il mediatôr ONU pal Sahara ocidentâl, Christopher Ross, al à clamât dongje une gnove schirie di incuintris tra la delegazion marochine e chê saharawi che si davuelzaran in Avost in Austrie.
Font: El País, 30/07/09; Món Divers, 31/07/09

Sahara ocidentâl: une television pe Republiche Saharawi

Ai 20 di Mai a son tacadis lis emissions de television de Republiche Arabe Saharawi Democratiche. Si trate di une iniziative che e ponte a superâ il mûr (ancje fisic) che al divît la popolazion dal Sahara Ocidentâl sot ocupazion marochine e chê che e vîf in profugance tai cjamps logâts intal desert alzerin. La television e trasmet propit di chest teritori e e ven finanziade massime cui contribûts che a rivin de rêt di solidarietât cui saharawi in vore intal stât spagnûl. Ogni dì si varan cuatri oris di trasmissions vie tiere e dôs oris vie satelit.

Font: Galiza Hoxe, 20/05/09

Pontade 24 08 (25/11/08) - 7

Sahara Ocidentâl: in miârs in place a Madrid pe autodeterminazion

A jerin in miârs ai 15 di Novembar a Madrid par manifestâ la lôr solidarietât cul popul saharawi e par denunciâ la ocupazion ilegâl dal Sahara Ocidentâl de bande dal Maroc e lis responsabilitâts dai diviers guviers spagnûi par cheste situazion. Cun di fat, propit la Spagne e à lis responsabilitâts plui grandis a nivel european pe ocupazion marochine dal Sahara Ocidentâl, dal moment che intant dal procès di decolonizazion e à lassât man libare al Maroc par ocupâ militarmentri il teritori. La manifestazion e je stade inmaneade dal coordenament des associazions solidariis cul popul saharawi e di une associazion che e ten adun rapresentants dal mont dal spetacul impegnâts pe libertât dal Sahara Ocidentâl. Lis responsabilitâts de Spagne, dut câs, no si riferissin dome al procès di decolonizazion, ma ancje al dì di vuê dal moment che e furnìs al Maroc materiâl militâr che al covente par mantignî la ocupazion dal Sahara Ocidentâl e par perseguitâ la popolazion saharawi che di passe trente agns si bat pal dirit ae autodeterminazion.
Font: Nationalia, 17/11/08

Pontade 19 08 (16/09/08) - 4

Sahara Ocidentâl: un altri bloc pal procès di autodeterminazion saharawi

Il procès di autodeterminazion dal popul saharawi al va dilunc a cjatâ pidiments di ogni sorte. Daspò dal no marochin al plan preparât dal inviât de ONU James Baker che al previodeve pal Sahara Ocidentâl un statût di semiautonomie sot dal Maroc par cinc agns prime di un referendum su la autodeterminazion, il puest di Baker al jere stât cjapât di Peter Van Walsum, ma cence che si fasessin dai pas indenant intes negoziazions jenfri lis autoritâts dal Maroc e chês de Republiche Arabe Saharawi Democratiche in esili. Cumò ancje Van Walsum al à lassât il so incaric di inviât de ONU. Cheste volte, dut câs, e je stade la segretarie gjenerâl de ONU a no confermâlu par vie che cu lis sôs declarazions al veve pierdût la stime des autoritâts saharawi. Cun di fat, Van Walsum al veve dite che aromai la strade de indipendence pal Sahara Ocidentâl, che di passe trente agns al patìs la ocupazion marochine, no jere realistiche. Cun chestis sôs declarazions – al à protestât il guvier in esili de Republiche Arabe Saharawi Democratiche – Van Walsum al à bandonât la posizion di neutralitât a pro de linie tignude dal Maroc che, cul so refût di rispietâ lis risoluzions ONU sul dirit ae autodeterminazion dai saharawi, al è la cause prime dal conflit.
Font: Nationalia, 02/09/08

Pontade 06 07 (17/04/2007)

Stât francês: i candidâts ae presidence e lis lenghis minoritariis

Cul svicinâsi des elezions presidenziâls intal stât francês un trop di ativiscj impegnâts inte difese e inte promozions des lenghis minoritariis e des varietâts linguistichis dal teritori a àn inviât une gnove iniziative che e à non “Pat des lenghis” e che dutis lis informazions in proposit si puedin cjatâ sul sît Internet pactedeslangues.com . Se l’obietîf finâl de campagne al è chel di rivâ a di une France che e ricognossi ad in plen la sô diviersitât linguistiche e là che si puedin doprâ in maniere paritarie, dongje dal francês, ancje lis lenghis regjonâls, intal sît si puedin bielzà viodi chês che a son lis opinions dai diviers candidâts su chest argoment. Par esempli, la candidade socialiste Ségolène Royal, il centrist François Bayrou e il vert Dominic Voynet a àn ducj declarât che a intindin poiâ la promozion des lenghis regjonâls e che si impegnin a lavorâ par che la France e ratifichi la Cjarte europeane pes lenghis regjonâls o minoritariis. Se si cjale a diestre, Nikolas Sarkozy, che tai sondaçs al svole adalt, al fevele di dâ une poie pal lôr insegnament, ma al dîs a clâr di jessi cuintri de ratifiche de Cjarte europeane pes lenghis. Plui a diestre, i candidâts Jean Marie le Pen e Philippe de Villiers, no àn nancje frontât l’argoment. I doi candidâts comuniscj Olivier Besancenot e Marie George Buffet a àn declarât di jessi a pro dal svilup des lenghis minoritariis in ducj i cantins de societât. Jose Bové, une vore cognossût pal so impegn cuintri de globalizazion, al à dite di jessi favorevul a modificâ la Costituzion francese par permeti la ratifiche de Cjarte europeane des lenghis e di jessi dacuardi cul jutori public pes scuelis che a puartin indenant l’insegnament a imersion di une lenghe minoritarie tant che lis Diwan, lis Calandretas e lis Ikastolak. Dut câs, tra i trê candidâts che a cjatin plui simpatie tra l’eletorât francês, ven a dî Nikolas Sarkozy, Ségolène Royal e François Bayrou, chel plui convint te poie des lenghis minoritariis al è propit chest ultin, che si à dite a pro de modifiche de Costituzion, de ratifiche de Cjarte europeane des lenghis e dal svilup di une politiche di valorizazion des lenghis regjonâls a tacâ de scuele e dai mieçs di comunicazion.

Bretagne: in place pes scuelis Diwan

A jerin plui di 5 mil lis personis che sabide ai 31 di Març si son dadis dongje in Bretagne, a Lorient, par protestâ pe mancjance di risorsis pes Diwan, lis scuelis bretonis a imersion. Lis personis che a àn manifestât, si domandin parcè che chestis scuelis no vegnin parificadis a chês publichis e finanziadis dal stât. Cun di fat, a spieghin, i gjenitôrs che a vuelin pai lôr fîs une istruzion in lenghe bretone, dongje di paiâ lis tassis pe scuele publiche, a àn po di paiâ ancje par mandâ i fruts tes Diwan, che a van indenant dome cui finanziaments privâts. Inmò tal 2001, il ministri pe educazion Jack Lang al jere intervignût par che lis scuelis bretonis a fossin finanziadis dal public, ma il proviodiment al è stât blocât dal Consei di Stât. E la situazion, invezit di lâ in miôr, e riscje di lâ simpri in piês.

Bretagne: prodots Microsoft par breton

L’Ofis ar Brezhoneg, ven a dî l’Ufici pe lenghe bretone, al à sotscrit un acuardi cu la Microsoft di maniere di meti a disposizion dai citadins ancje la version par breton dai prodots principâi de multinazionâl americane.

Paîs Catalans: volontaris pe lenghe tes Baleârs

La organizazion “Obra Cultural Balear” e à metût sù la Agjenzie dal Volontariât Linguistic, ven a dî un ent là che a puedin partecipâ ducj chei che a vuelin dâ une man a slargjâ l’ûs sociâl de lenghe catalane. Ta chestis zornadis la iniziative e je stade presentade ancje ae presidente dal Consei di Maiorca, Maria Antònia Munar. I prins grups di volontaris, cun di fat, a tacaran a lavorâ soredut tai cuartîrs de citât di Palma di Maiorca e tes zonis costieris li dongje. Un dai prins obietîfs de Agjenzie – al à spiegât il president de “Obra Cultural Balear”, Jaume Mateu – e je chê di tirâ dongje un miâr di volontaris che a puedin sensibilizâ al ûs dal catalan ancje setôrs gnûfs de societât.

Sahara Ocidentâl: ae ONU propueste dal Polisario

Il president de Republiche Arabe Saharawi Democratiche e segretari gjenerâl dal Front Polisario, che al rapresente lis popolazions saharawi, al à fat savê che e je stade metude adun une gnove propueste di risoluzion dal conflit che, daûr des risoluzions de Assemblee gjenerâl e dal Consei di sigurece de ONU, i permeti al popul saharawi di esercitâ il so dirit di autodeterminazion par mieç di un referendum libar e regolâr. Il test, che al presente ancje la disponibilitât a di une cooperazion cul Maroc, stât che al ocupe cu la fuarce il Sahara ocidentâl, al è stât consegnât cualchi zornade indaûr al segretari gjenerâl de ONU, Ban Ki Moon. In rispueste a cheste iniziative, il Maroc al à presentât ancje lui al segretari ONU une propueste che e previôt dome une forme lizere di autonomie pal Sahara Ocidentâl. La propueste, dut câs, e à za vût il parê contrari dal Front Polisario che al à dite che la soluzion de cuestion no pues passâ pe autonomie, ma dome pal dirit ae decision libare dal popul saharawi. O ricuardìn che, il regjim marochin, daspò di plui di 30 agns di ocupazion ilegâl di cheste tiere al va dilunc a perseguitâ no dome i militants saharawi che a vivin intai teritoris ocupâts, ma ancje il rest de popolazion native. Juste l’an passât si vevin vûts moments di repression une vore violente tes citâts saharawi plui impuartantis, cun agressions, arescj arbitraris, torturis e sparizion di diviers citadins saharawi.