Gjermanie: metude in vore de Cjarte des lenghis tra lûs e scûr

Ai 15 di Setembar il comitât di esperts dal Consei de Europe che al viôt de metude in vore de Cjarte europeane pes lenghis regjonâls o minoritariis al à dât fûr il so rapuart sul rispiet dai dirits linguistics in Gjermanie. Achì la Cjarte e je jentrade in vore tal 1999 e i siei contignûts a valin pal danês, pal frison, pal bas todesc, pal romani e pes dôs varietâts dal sorbian (feveladis inte Alte e te Basse Lusazie). Tra lis notis positivis si à il vie libare des autoritâts federâls ae zonte di gnovis garanziis pal ûs di bas todesc, danês e frison intai cjamps de culture, de toponomastiche e de aministrazion publiche tal land dal Schleswig-Holstein, e la incressite progressive de segnaletiche publiche bilengâl. Tra lis notis negativis la dibisugne di infuartî lis lenghis minorizadis intal insegnament là che un dai problemis principâi si riferìs ae mancjance di insegnants. Il rapuart al segnale ancje la scjarse presince di chestis lenghis intai rapuarts cu lis aministrazions publichis e tai mieçs di comunicazion.

Font: Council of Europe, 15/09/22

Europe: apel pal ricognossiment e la difese dal romani

In ocasion dai 5 di Novembar – Zornade mondiâl de lenghe romani – la presidente dal comitât di esperts su lis tematichis dai Rom e dai Cjaminants dal Consei de Europe (ADI-ROM), Tatjana Anđelić, e à indreçât un apel pal ricognossiment, la tutele e la promozion di cheste lenghe. I Rom, cui lôr 12 milions, no son dome la minorance linguistiche plui gruesse dal nestri continent ma ancje chê plui discriminade. La lôr lenghe, cu lis sôs diviersis varietâts, e je fevelade in cetancj stâts europeans e e rapresente une part integrante dal patrimoni culturâl continentâl. Tra lis finalitâts dal Consei de Europe si à la lote cuintri de discriminazion e la promozion di une societât inclusive che e rispieti la diversitât linguistiche e culturâl. A coventin duncje misuris concretis par che almancul lis gnovis gjenerazions rom a puedin cjapâ cussience e imparâ la lôr lenghe proprie. Par chest fin, il Consei de Europe al à ancje disvilupât un curriculum di riferiment pal romani a disposizion sei des istituzions scolastichis che di chês politichis europeanis.

Font: Council of Europe, 05/11/21

Cossovo: crepaduris intal model eletorâl “etnic”

20 dai 120 puescj dal Parlament dal Cossovo a son risiervâts aes minorancis etnichis. Di chescj, par solit, 10 a van a rapresentants de comunitât serbe e 3 a chei de minorance bosgnache. Tes elezions che si tignaran ai 14 di Fevrâr il moviment Vetevendosje al ven dât tor dal 48% dai consens, un risultât che i permetarès di guviernâ ancje dome cu la poie di cualchidun tra i deputâts des minorancis. Une prospetive che e preocupe e no pôc la part de comunitât serbe plui leade al guvier di Belgrât. Il vôt des minorancis al devente cussì centrâl intal scuintri politic. Ve che alore la Union Democratiche Sociâl e à acusât la Srpska Lista, partît leât ad in dopli cul guvier di Belgrât e che tes ultimis elezions al à simpri otignût ducj i dîs puescj risiervâts ae minorance serbe, di zuiâ sporc. Si stime che il partît al puedi fâ stât su almancul 10 mil vôts in plui di chei che i coventin par sigurâsi i dîs deputâts e che ju implearà par mandâ in Parlament candidâts “amîs” che si presentin intes listis di altris minorancis. Sot de lint a son in particolâr il partît bosgnac de Comunitât Unide (Ujedijnena Zajednica) e il moviment Iniziative Rom. Dut câs, a movisi ta cheste direzion, no saressin dome i serps. Di fat al è stât segnalât ancje il câs di un candidât albanês che si presente cul Gnûf Partît Democratic, che al varès invezit di rapresentâ i bosgnacs.

Font: Balkan Insight, 28-29/01/21

Bosgne / Cossovo: tensions etnichis e minorancis discriminadis

Intal ultin rapuart de organizazion Human Rights Watch dedicât ae Europe centrâl e sudorientâl si segnale cemût che a son diviers i stâts là che i dirits umans, chei des minorancis, la libertât di stampe e il rispiet des garanziis ufiertis de leç a son sot menace. Par chel che al rivuarde i dirits des comunitâts minorizadis si segnale, in particolâr, la situazion dal Cossovo dulà che, dongje des tensions simpri vivis tra la maiorance albanese e lis comunitâts serbis, si segnalin lis discriminazions patidis massime des minorancis rom, ashkalis e egjizianis. Par chel che al rivuarde la Bosgne, se la atenzion si centre simpri di plui su lis cundizions disperadis di miârs di dispatriâts che a domandin asîl, Human Rights Watch e ricuarde ancje che tal paîs balcanic a son inmò fuartis lis divisions etnichis tra bosgnacs, cravuats e serps e lis discriminazions intai confronts des minorancis internis.

Font: Balkan Insight, 13/01/21

Cechie: riclam dal Consei de Europe sul romani a scuele

La Cjarte europeane des lenghis regjonâls o minoritariis e je operative te Republiche Ceche dal 2007 incà. Tal moment de sô ratifiche a son stadis segnaladis come lenghis di tutelâ cravuat de Moravie, polac, romani, slovac e todesc. Intal so ultin rapuart sul rispiet de Cjarte, il Consei de Europe al à segnalât cemût che te documentazion prontade dal guvier di Praghe al sedi sparît ogni riferiment ae lenghe slovache. L’organisim european al domande ancje aes istituzions cechis di sbassâ il soiâr dal 10% de popolazion che al parten a di une minorance come criteri par meti fûr segnaletiche bilengâl. Il dât plui critic però al è chel che si riferìs ae presince dal romani a scuele. Cun di fat, se la lenghe de comunitât rom e cjate une cierte atenzion te universitât e je invezit dal dut insuficiente tes scuelis primariis e secondariis e assente te scuele de infanzie. Tra i elements positîfs si àn invezit la ufierte dal insegnament de lenghe todescje in diviersis scuelis de aree storiche di presince di cheste comunitât e lis iniziativis par promovi il cravuat de Moravie.

Font: Romea.cz, 25/09/20

Stât spagnûl: prin intervent dal relatôr ONU su lis minorancis

Ai 25 di Zenâr il relatôr speciâl de ONU su lis minorancis, Fernand de Varennes, al à presentât lis sôs osservazions preliminârs su la visite fate tal ream di Spagne par racuei informazions su la situazion des minorancis nazionâls, linguistichis e religjosis che a vivin ta chest stât. De Varennes al à segnalât la diference che si à tra i dirits ricognossûts e lis pratichis concretis intal ûs des lenghis couficiâls – o sei catalan, basc e galizian – massime tai setôrs de justizie e de educazion e tai orghins statâi decentrâts. Inmò plui grivie la situazion ta chês realtâts là che lis lenghis propriis no àn ancjemò un statût di couficialitât tant che l’asturian e il basc intune part de Navare. Il relatôr speciâl de ONU al ricuarde ancje cemût che te Costituzion e ancje te leç organiche dal 2000 cuintri de discriminazion no si vedi nissun riferiment esplicit a chê linguistiche.

Stât spagnûl: visite ONU par viodi de situazion des minorancis

Il relatôr speciâl de ONU su lis minorancis, Fernand de Varennes, al sarà in visite tal stât spagnûl tra i 14 e i 25 di Zenâr par racuei informazions su la situazion des minorancis nazionâls, linguistichis e religjosis che a vivin intal ream di Spagne, in particolâr su temis tant che la educazion, la partecipazion politiche e la lote cuintri de intolerance. A son duncje previodûts incuintris cun funzionaris dal guvier centrâl e di chei autonomics, cun rapresentants de societât civîl e cun membris des minorancis. De Varennes in plui che a Madrid, al à in program visitis intai Paîs Catalans, tal Paîs Basc, in Galizie e in Andalusie. Ta cheste ultime comunitât e sarà frontade in particolâr la situazion des comunitâts gjitanis.

Font: VilaWeb, 11/01/19

Serbie: a Bujanovac si riscje la segregazion scolastiche

Bujanovac e je une des localitâts de Serbie cuntune maiorance di lenghe albanese. Cun di fat, dai 47 mil abitants si stime che il 60% al sedi albanês, il 30% serp e plui o mancul il 10% rom. Il sisteme cumò in vore al previôt doi modei scolastics diferents, un cul serp come lenghe veicolâr e chel altri cul albanês. Cussì, dai doi istitûts primaris, un al è di lenghe albanese e un serbe. La plui part dai fruts rom e frecuente chest secont istitût. Cumò però si riscje une altre crevadure. La maiorance dai gjenitôrs serps, di fat, e à domandât che i lôr fîs a frecuentin classis separadis rispiet ai fruts rom. Se in gjenerâl il rapuart tra serps e rom al è di 3 a 1, te scuele primarie chest ecuilibri si ribalte cun 740 fruts rom e 360 serps. Fin cumò duncje in dutis lis classis si veve une maiorance di fruts rom: situazion che lis fameis serbis no vuelin plui acetâ. Di chi la domande di une separazion marcade tra lis dôs comunitâts. Ta cheste maniere però – a disin lis associazions pai dirits umans – si mande sù pai stecs il lavôr fat cun fature ta chescj agns par judâ la integrazion e si riscje di alçâ ancjemò di plui la tension za alte par vie dai rapuarts tirâts cu la comunitât albanese.

Font: Balkan Insight, 19/07/18

Ream Unît: cuarte opinion sul stât des minorancis nazionâls

Il Comitât consultîf dal Consei de Europe pe Convenzion cuadri pe protezion des minorancis nazionâls al à dade fûr la sô cuarte opinion su la metude in vore di chest acuardi tal Ream Unît. Tra i elements critics plui pençs segnalâts intal document si à la mancjance di une legjislazion in stât di garantî l’ûs e la promozion de lenghe irlandese tes sîs conteis de Irlande dal Nord cjapadis dentri tal stât britanic e par chest si invide il guvier di Londre a impegnâsi par creâ lis cundizions par garantî i dirits linguistics ancje ta cheste part dal Ream Unît. Si domande po aes autoritâts britanichis di tornâ indaûr su la decision di taiâ i fonts pe lenghe corniche. Il Comitât consultîf al sburte ancje par che si intervegni cun urgjence par fâi cuintri ae incressite dai prejudizis e dai discors che a favorissin l’odi etnic, e par garantî sîts pe soste dai grups di Rom o cjaminants che a àn ancjemò un stîl di vite nomadic.

Font: Council of Europe, 09/03/17

Cravuazie: in cressi la intolerance cuintri de minorance serbe

Ai 7 di Març il Consei Nazionâl Serp, che al rapresente la comunitât serbe de Cravuazie, al à dât fûr il so rapuart anuâl su la situazion che si cjate a vivi la minorance. Daûr dai dâts publicâts, vie pal 2016 i câs di incidents leâts ae intolerance etniche, discors publics violents, menacis o agressions cuintri di membris de comunitât serbe a son stâts 331, a front dai 189 segnalâts intal 2015 e dai 82 dal 2014. Plui in detai, rispiet al an prime i câs di agressions fisichis a son passâts di 9 a 16, intant che lis menacis a son passadis si 20 a 62. A favorî cheste clime no son dome i ambients politics plui nazionaliscj, ma ancje i mieçs di comunicazion, cun diviers câs di discors di odi etnic dâts fûr fintremai de radiotelevision di stât (HRT). La realtât e riscje però di jessi inmò piês dal moment che plui di cualchidun nol denuncie i abûs patîts par pôre di vê consecuencis ancjemò plui penzis. Il cuadri al ven confermât ancje dal rapuart su la Cravuazie dal Dipartiment di Stât dai Stâts Unîts che al marche la discriminazion sociâl e i episodis di violence cuintri des minorancis, a partî di serps e rom.

Font: Balkan Insight, 07/03/17

Svezie: dirits dai Sami su la tiere inmò sot menace

Intal so rapuart anuâl sul rispiet dai dirits umans in Svezie, Amnesty International e à segnalât che e reste inmò vierte la cuistion dai dirits des comunitâts Sami su lis lôr tieris nativis, dirits che la organizazion internazionâl e calcole “sot menace”. Intal document si met in evidence cun preocupazion ancje la situazion dai Rom. Tal lôr câs si segnale cemût che no vedin acès plen ae scuele, al mont dal lavôr e ai servizis abitatîfs, e che a sedin a risi di crimins dal odi

Font: The Independent Barents Observer, 23/02/17

Ongjarie: comunitâts rom menaçadis, polizie condanade

Dopo di chê rivade in Zenâr de Cort europeane dai dirits umans, lis istituzions ongjaresis a àn patît une gnove condane par no vê tutelât lis comunitâts rom des intimidazions de diestre xenofobe. Cheste volte la sentence e je stade dade fûr de Kúria, la Cort supreme de Ongjarie, che e à condanât la polizie locâl par no vê difindût la comunitât rom di Gyöngyöspata vie pal 2011 cuant che grups paramilitârs de diestre ongjarese a vevin inmaneât rondis e altris azions intimidatoriis cuintri des fameis rom dal paîs.

Font: Politics.hu, 09/02/17

Ongjarie: violencis sui rom, condane de Cort europeane

La Cort europeane dai dirits umans e à condanât lis istituzions statâls ongjaresis a paiâ une indenizazion a doi citadins de comunitât rom par vie che no àn garantît la lôr tutele intant di une manifestazion inmaneade de diestre xenofobe ongjarese. I fats a rimontin al Avost dal 2012 cuant che, te citât di Devecser, i doi rom a jerin stâts vitimis prime di abûs verbâi di stamp razist e po ancje di une agression fisiche de bande di un trop di manifestants. La denuncie e jere partide dal fat che la polizie che e controlave la manifestazion no veve fat nuie par impedî i discors raziscj tignûts intant de iniziative, no jere intervignude par difindi i doi rom des violencis dai manifestants e po no veve indagât in maniere serie sul episodi.

Font: Politics.hu, 18/01/17

Ongjarie: fonts par facilitâ la cognossince de culture rom

Il guvier ongjarês al à publicât un bant par finanziâ une serie di progjets su la culture rom che a àn une disponibilitât di 160 mil euros. L’intindiment al è chel di slargjâ framieç dai citadins une cognossince dai elements culturâi de plui impuartante minorance etnolinguistiche de Ongjarie. Par fâlu si ponte massime su dôs liniis di azions, ven a dî poiâ manifestazions specifichis dedicadis ae culture rom e sburtâ la presince di iniziativis dedicadis a cheste culture dentri di altris events.

Font: Politics.hu, 08/04/16

Rom: dirit ae cjase, critichis dal Consei de Europe a siet stâts

Il comissari pai dirits umans dal Consei de Europe al à criticât siet dai 47 stâts che a formin cheste istituzion par vie des politichis di sfrat sfuarçât metudis in at cuintri dai rom intai ultins agns. Sot acuse a son Albanie, Bulgarie, France, Italie, Ongjarie, Serbie e Svezie. Il comissari al domande ai guviers di chescj stâts di fermâ ducj i sfrats fintremai che no si cjataran soluzions abitativis alternativis. Chestis azions, di fat, a incressin la vulnerabilitât des fameis rom, a pidimentin la lôr inclusion sociâl e a impedissin percors regolârs di scolarizazion.

Font: Balkan Insight, 18 e 19/02/16

Romanie: fraude sui fonts pe inclusion dai rom

Il Parlament rumen al à autorizât l’arest di doi deputâts indagâts par vie che a varessin doprât par interès personâl i fonts assegnâts de Union Europeane pe integrazion dai rom. Il progjet finanziât al previodeve la formazion di passe 6 mil fantats rom e il lôr indreçament su percors imprenditoriâi, invezit i bêçs a saressin stâts doprâts par ingrassâ un grup di funzionaris cence inscuelâ e inviâ al lavôr i zovins. La vicende e infuartìs duncje lis acusis jevadis za di timp ae Romanie di no fâ avonde par integrâ i rom che, cun passe 2 milions e mieç di personis, a rapresentin la comunitât minorizade plui grande di chest stât.

Font: Balkan Insight, 16/02/16

Gjermanie: minorancis, risoluzion dal Consei de Europe

Ai 3 di Fevrâr il Comitât dai ministris dal Consei de Europe al à fate buine la cuarte risoluzion su la metude in vore de Convenzion cuadri pe protezion des minorancis nazionâls in Gjermanie, là che a gjoldi de tutele di chest pat internazionâl a son lusazians (o sorbians), frisons, danês, rom e sinti. Dongje dal invît aes istituzions todescjis di lavorâ adun cui rapresentants des diviersis comunitâts minorizadis par difindi e promovi lis lôr culturis specifichis, si racomande di cressi la poie ai mieçs di comunicazion intes lenghis minorizadis, di garantî l’ûs plen di chestis lenghis intai rapuarts cu lis autoritâts locâls e regjonâls, e di slargjâ la presince de segnaletiche bilengâl. Par chel che al rivuarde la scuele il Consei de Europe al domande ae Gjermanie di slargjâ framieç di insegnants e students la cognossince des minorancis nazionâls, di incressi il numar di professôrs formâts par insegnâ lis/tes lenghis minorizadis e di garantî plui risorsis pal insegnament, massime in Lusazie e inte Frisie centrâl e setentrionâl. La risoluzion e invide po lis autoritâts todescjis a fâ di plui par garantî la avualiance sul plan socioeconomic a sinti e rom e a meti fin aes discriminazions cuintri di lôr, massime intal percors educatîf. Plui in gjenerâl, si domande ae Gjermanie di combati razisim e intolerance cuintri des minorancis e di fâi cuintri ae xenofobie de estreme diestre.

Font: COE, 05/02/16

Montenegro: puescj di vore publics, minorancis discriminadis

Daûr dai dâts dal ultin censiment, in Montenegro i montenegrins “etnics” a rapresentin il 45% de popolazion totâl ma inte aministrazion publiche a son il 74%. I serps, che a son il 28% de popolazion, a rapresentin dome l’11% dai dipendents publics. I albanês a ocupin il 2,5% dai puescj di vore de aministrazion publiche, ma a son il 5% de popolazion. Ancje lis comunitâts plui piçulis tant che bosgnacs, rom e cravuats a son sotrapresentâts intal public. Un cuadri che al à pôc a ce viodi cu la legjislazion montenegrine che e previôt che i membris des minorancis a sedin rapresentâts in maniere proporzionâl inte aministrazion publiche. A denunciâ cheste situazion al è un rapuart dal ministeri pai dirits umans e des minorancis che al à esaminât passe 140 organisims publics statâi e locâi. Za di timp partîts e organizazions des comunitâts serbe e albanese a segnalin che i puescj di vore intal public a son assegnâts discriminant lis minorancis e che, par dâur acès a chescj puescj di vore, a vegnin fatis pressions su serps e albanês par che si declarin montenegrins.

Font: Balkan Insight, 24/08/15

Macedonie: no des ONG al censiment prime des elezions

Passe cuarante ONG de Macedonie, a partî de sezion locâl dal Comitât Helsinki pai dirits umans, a àn cjapât une posizion unitarie cuintri dal plan presentât dal prin ministri Nikola Gruevski par tignî un censiment etnic prime des elezions anticipadis che si tignaran intal Avrîl dal 2016. Subissât dai scandui, Gruevski al à vût di acetâ che si torni a votâ in curt e che si riformi la leç e lis listis eletorâls par evitâ gnûfs suspiets di imbrois. Ta cheste clime di tension politiche un censiment etnic al riscje di butâ benzine sul fûc massime se si calcole che i risultâts dal censiment dal 2011 a vevin vût di jessi anulâts par vie des acusis incrosadis di vê alterât i dâts, cui partîts de minorance albanese che a vevin acusât la maiorance di vê calât il numar dai membris di cheste comunitât e i partîts macedons che a acusavin i albanês di vê falsificât a lôr vantaç i dâts cjapâts sù intai comuns là che a vevin la maiorance. Ancje i membris de comission eletorâl che e veve lavorât su chel censiment a visin dai pericui che une gnove consultazion fate di presse e podarès puartâ e a invidin a concuardâ cu lis istituzions europeanis la planificazion e il davuelziment dal prossim censiment. Par intant, duncje, i ultins dâts ricognossûts a restin chei dal 2002 cuant che il 64% de popolazion al risultave slâf macedon, il 25% albanês e il rest al jere formât di rom, turcs, serps e altris minorancis.

Font: Balkan Insight, 05/08/15

Svezie: curricola scolastics par dutis lis lenghis minorizadis

La agjenzie svedese pe educazion (Skolverket) e à fat savê che e slargjarà la presince des cinc lenghis minorizadis ricognossudis inte scuele. In dì di vuê dome la lenghe sami e à un curriculum specific pal insegnament, ma cumò si cjaparà chê stesse strade ancje pal finlandês, pal meänkieli, pal romani e pal yiddish. Si à ancje tacât a meti adun materiâi scolastics di pueste par podê doprâ chestis lenghis intal percors educatîf. Il probleme principâl al è però chel dai insegnants, dal moment che a vuê a son ancjemò masse pôcs chei formâts par doprâ chestis lenghis inte ativitât scolastiche.

Font: ADN / Radio Sweden, 06/04/15