03/07/21

Stât francês: in Corsiche i risultâts miôr pai nazionaliscj

Ai 27 di Jugn, il secont turni des elezions regjonâls intal stât francês al è stât segnât di une astension cence precedents (doi tierçs dai eletôrs a son restâts a cjase) e di risultâts negatîfs pai candidâts de estreme diestre (RN) e dal partît dal president Emmanuel Macron (LRM).

Gales: campagne antinucleâr in difese de lenghe

I militants pe lenghe galese si son dâts adun cun chei antinucleârs par sburtâ i conseîrs regjonâi dal Gwynedd a adotâ un plan di disvilup teritoriâl gnûf che nol ledi a infuartî la industrie nucleâr par pontâ invezit su implants plui piçui leâts a energjiis rinovabilis e che a dedin di vore ae int dal puest. Il plan atuâl, centrât su la centrâl nucleâr Wylfa B, al previôt ancje la costruzion di passe 7 mil cjasis gnovis tra Gwynedd e Anglesey. La nature dal lavôr, che e domande personâl cuntune specializazion particolâr, e la espansion edilizie a vegnin viodudis tant che une gnove menace pe realtât sociolinguistiche atuâl cul risi di une riduzion de popolazion di lenghe galese a vantaç di une imigrazion di lavoradôrs e fameis di lenghe inglese.

Font: Nation Cymru, 26/06/21

Paîs Basc: gnove manifestazion pal euskara il prin di Lui

Ai 29 di Mai dîs mil personis a vevin manifestât pes stradis di Baiona / Bayonne cuintri de decision de cort costituzionâl francese di inibî l’insegnament a imersion intes lenghis minorizadis intes scuelis publichis. Sul imprin cheste decision e someave sparagnâ i istitûts parificâts, une note de magjistrature e à perà cjapât dentri ancje chestis realtâts che, zaromai di agns, a doprin il sisteme a imersion. Cussì, par difindi l’insegnament dal e par basc, si è daûr a inmaneâ une gnove manifestazion che si tignarà il prin di Lui a Donapaleu / Saint-Palais. I atacs al insegnament de lenghe proprie a rivin però su plui fronts, cussì ai 17 di Jugn cuarante students dal liceu Bernat-Etxepare di Baiona / Bayonne, par rivendicâ il dirit a completâ il cicli di studis par basc, a àn davuelt il lôr esam finâl di filosofie par euskara cul risi di une boçadure coletive. Une azion similâr, ma pal esam di siencis, e sarà fate ae fin dal mês dai students des superiôrs che a aderissin ae rêt des scuelis imersivis baschis Seaska. Par ordin dal ministeri francês de istruzion, dal 2018 incà, il control dai esams scrits al è stât assegnât a esaminadôrs monolinguis che no son bogns di judicâ in maniere corete tescj scrits par basc. 

Font: MediaBask, 25/06/21

Irlande: gnove crisi politiche tal Nord par vie de leç sul gaelic

La leç organiche pe lenghe gaeliche irlandese si ricjate ancjemò une volte al centri des tensions politichis in Irlande dal Nord. Previodude in maniere esplicite dai acuardis di pâs dal 2006 (Saint Andrews Agreement) e cjapade dentri tal pat di legjislature (New Decade, New Approach) fat bon dai partîts nordirlandês intal Zenâr dal an passât, e someave sul pont di concretizâsi dopo che, cu la mediazion dal segretari di stât pe Irlande dal Nord, i leaders dal Democratic Unionist Party (DUP) e dal Sinn Féin a vevin concuardât un acuardi di guvier che di une bande al assegnave lis incarghis di prin ministri e prin ministri vicjari e di chê altre al fissave dentri dal an la scjadince par fâ buine la leç pal irlandês, se dal câs cul intervent diret dal guvier di Londre. Dut câs, la dì dopo dal acuardi il leader unionist Edwin Poots al jere stât sconfessât dal so stes partît e obleât a dimetisi. Il so puest al è stât cjapât di Jeffrey Donaldson che si à impegnât a dreçâ i “erôrs” dal so predecessôr. Il so intindiment al è chel di deventâ prin ministri al puest di Paul Given, judicât un om di Poots e duncje compliç dal acuardi su la leç pal irlandês: si trate dut câs di une operazion imberdeade no dome par vie che Donaldson al è un membri dal Parlament britanic e no di chel nordirlandês ma ancje parcè che al coventarès un acuardi cul Sinn Féin, il partît principâl dal front nazionalist che nol intint di rinunciâ ae leç sul irlandês. La leç su la lenghe, intune cul protocol pe Irlande dal Nord su la gjestion specifiche de Brexit, a son daûr de crisi politiche dentri dal DUP – cul cambiament di trê leaders intal zîr di un mês – che e met sotsore dute la politiche nordirlandese, menaçant il funzionament des stessis istituzions autonomis.

Font: The Guardian, 24-26/06/21

Paîs Catalans: la Generalitat e cree une segretarie linguistiche

Il guvier catalan (Generalitat de Catalunya) al à decidût di infuartî il braç operatîf che si ocupe di promovi e valorizâ la lenghe proprie, o sei la direzion gjenerâl de politiche linguistiche, e lu à trasformât intune segretarie. No si trate dome di un cambi nominâl, ma ancje operatîf che si propon di mostrâ la centralitât de lenghe tes politichis dal guvier. La segretarie e à di viodi che lis politichis linguistichis decidudis dal guvier a vegnin metudis in vore, coordenâ lis azions dai diviers dipartiments, fissâ i criteris di ûs de lenghe a nivel istituzionâl, e disvilupâ propuestis legjislativis leadis aes politichis a pro dal catalan, dal ocitan aranês e de lenghe dai segns catalane. 
 
Font: Generalitat de Catalunya, 22/06/21

Paîs Catalans: indult parziâl par nûf leaders indipendentiscj

Ai 22 di Jugn il consei dai ministris spagnûl al à indultât nûf dirigjents dal indipendentisim catalan (Oriol Junqueras, Joaquim Forn, Jordi Turull, Josep Rull, Jordi Cuixart, Jordi Sànchez, Raül Romeva, Carme Forcadell e Dolors Bassa) condanâts pal rûl davuelt intal procès di autodeterminazion de Catalogne che al veve puartât al referendum dal prin di Otubar dal 2017. La misure e je individuâl, parziâl e reversibile, ven a dî che l’indult nol met in discussion lis sentencis di condane, al manten la inabilitazion a davuelzi incarghis publichis e, par un periodi variabil che al va dai 3 ai 6 agns, al condizione la jessude de preson ae proibizion di ripeti il “delit” che ju à puartâts ae condane. Come a dî che ogni ativitât politiche a pro de indipendence de Catalogne e riscje di tornâ a puartâju in galere. La decision – presentade dal prin ministri spagnûl Pedro Sánchez come une misure di “utilitât publiche” che e judarà a “vierzi une gnove tape di dialic” – e à jevât no pôc marum framieç de societât spagnole e no je plasude nancje in Catalogne là che si domande invezit une amnistie totâl par ducj i presonîrs politics e i esiliâts.

Paîs Catalans: Betevé e siere lis sôs emissions par ocitan

Cui 31 di Lui Betevé – la television publiche di Barcelone – e sierarà lis sôs emissions par ocitan. La direzion de emitente e à di fat comunicât che no sprolungjarà l’acuardi cu la associazion che e garantive il servizi, o sei une trasmission di cinc minûts a setemane par ocitan che e jere tacade zaromai tal 2002. Cundut che Barcelone e je fûr de aree storiche di lenghe ocitane, e je la capitâl di un teritori che al cjape dentri ancje une comunitât di lenghe d’òc (la Val di Aran) e un riferiment par tancj ocitans che a vivin o a lavorin alì. Si trate dal secont colp ae lenghe ocitane dopo che, tal 2015, e jere stade la aministrazion comunâl a scancelâ l’acuardi cul Consei gjenerâl di Aran pe promozion de lenghe e de culture ocitane in citât.

Font: Jornalet, 20/06/21

Corsiche: ai 4 di Lui prime edizion di a Currilingua

Domenie ai 4 di Lui si tignarà in Corsiche la prime edizion di a Currilingua, une corse sul model de Korrika basche pensade par cjapâ sù fonts pe promozion de lenghe proprie. Si partìs cuntune manifestazion che si davuelzarà dute tune zornade sole e che e scjavaçarà par 90 chilometris la part orientâl de isule di Borgu / Borgo a Sulinzara / Solenzara. Cui che al vûl partecipâ – singul o coletîf che al sedi – al à di comprâ un dai chilometris de corse. I bêçs tirâts sù a saran doprâts par iniziativis a pro de lenghe, tant che la vierzidure di classis a imersion o il jutori a centris di formazion. Di là de racuelte di fonts, l’invît al è a partecipâ in tancj ancje par mostrâ la atenzion che e je framieç de societât corse sul teme de lenghe. La iniziative e je inmaneade dal coletîf Parlemu Corsu.

Font: Alta Frequenza, 19/06/21

Paîs Basc: acuardi par pesâ su lis politichis linguistichis

Ai 19 di Jugn i moviments sociâi che a lavorin pe lenghe basche, unîts intal coordenament Euskalgintzaren Kontseilua, a àn presentât un document che si propon di lavorâ sul consens sociâl par incidi su lis politichis linguistichis. Il test al met adun une serie di propuestis che a stimin che a podaran permeti tai prossims vincj agns di fâ pas indenant impuartants. La idee di fonde e je di creâ lis cundizions par garantî i dirits linguistics in ducj i cjamps in maniere che i citadins, a nivel individuâl e coletîf, a puedin vivi ad in plen in lenghe basche cence bisugne di sfuarçs in plui che se a doprassin il castilian e cence patî discriminazions. Ae presentazion, in plui des cuasi cent entitâts cu lu àn sotscrit, a àn partecipât ancje diviers rapresentants istituzionâi e politics dal Paîs Basc.

Font: EiTB, 19/06/21

Grecie: nissun pas indaûr inte opression des minorancis

Il comitât dai ministris dal Consei de Europe e il partît Amicizie, Avualiance e Pâs (DEB – Dostluk Esitlik Baris Partisi) – espression politiche de minorance di lenghe turche che e vîf in Grecie – a àn riclamât la cort di cassazion greghe al so dovê di rispietâ lis sentencis de cort europeane dai dirits umans (ECHR) che a àn condanât lis autoritâts elenichis par vê violât l’articul 11 de convenzion dai dirits umans, o sei chel che al garantìs la libertât di associazion. Tra il 2007 e il 2008 la Grecie e je stade condanade trê voltis par vê sierade une associazion e par no vê autorizade la regjistrazion di altris dôs par vie che a promovevin la tutele des minorancis linguistichis. Lis istituzions greghis, di fat, no ricognossin la esistence di nissune minorance linguistiche dentri dai confins statâi: une posizion che, par altri, e favorìs il disvilup di ategjaments agressîfs sei dentri che fûr des istituzions cuintri di ogni ativitât o rivendicazion de bande des minorancis stessis. Dopo cuasi cuindis agns, lis decisions de cort europeane a restin ancjemò letare muarte. Su la cuistion e je intervignude ancje la Aleance Libare Europeane (EFA) che e à riclamât la UE ai siei dovês, dal moment che cu la sô inazion e facilite i compuartaments antidemocratics dai stâts membris.

Font: EFA, 18/06/21

Portugal: plan cuincuenâl par sburtâ il mirandês

La Associazion di Lenghe e Culture Mirandese (ACLM) e à presentât un plan cuincuenâl par promovi il mirandês, varietât asturiane-leonese fevelade in Portugal intai comuns di Miranda do Douro, Mogadouro e Vimioso. Il progjet al partìs de situazion atuâl de lenghe là che il probleme principâl al è rapresentât de mancjance di fonts pal so insegnament e la sô promozion. Il plan si poie su cuatri liniis primariis, o sei la racuelte di materiâi linguistics e culturâi, la incressite de visibilitât de lenghe, il disvilup di puescj di vore leâts aes ativitâts linguistichis e culturâls, incentîfs par evitâ che il numar dai fevelants si ridusi inmò di plui. Il progjet al previôt un invistiment di mieç milion di euros, risorsis che la associazion e spere di rivâ a racuei intal arc di cinc agns.

Font: RTP, 14/06/21