Man: iniziative par svicinâ la famee linguistiche gaeliche

Par iniziative de Bunscoill Ghaelgagh de isule di Man, dôs artistis a àn realizât une serie di cartulinis trilengâls pai fruts, adatadis ancje in formât di placât e dedicadis a siet temis diviers, o sei mangjâ, timp, emozions, animâi, colôrs, vistîts e splaze. Lis figuris a son compagnadis dai nons par manx, gaelic scozês e irlandês, ven a dî lis trê lenghis che a fasin part de famee gaeliche. Nassude di un viaç di studi in Irlande dal Nord fat dai fruts de Bunscoill Ghaelgagh intal 2019, cheste iniziative – ancje se piçule – e à un valôr simbolic impuartant. Lis cartulinis, di fat, a saran dopradis dai fruts de scuele a imersion de isule di Man par metisi in contat cun chei des scuelis gaelichis de Scozie e de Irlande par cognossisi miôr e infuartî i leams tra lis lôr lenghis.

Font: IOM Today, 19/11/21

Ream Unît / Gjermanie: a cressin lis tutelis pes minorancis

La Gjermanie e il Ream Unît a àn slargjât lis misuris di tutele garantidis aes comunitâts minorizadis su la fonde de Cjarte europeane des lenghis regjonâls o minoritariis. Al jere dal 2008 incà che nissun dai stâts firmataris al incresseve lis azions di protezion concuardadis intal moment de ratifiche. Ai 6 di Zenâr lis istituzions todescjis a àn informât il Consei de Europe di vê aumentât lis misuris di tutele previodudis sul plan de aministrazion publiche, de toponomastiche e de culture pes popolazions di lenghe danese, frisone e basse todescje che a vivin intal Schleswig-Holstein. E rimonte invezit ai 23 di Dicembar la comunicazion dal guvier britanic là che si fâs savê di vê disvilupât 37 misuris specifichis par promovi la lenghe gaeliche fevelade te isule di Man (manx). A finanziâ e coordenâ chestis azions al sarà il guvier locâl. Tra lis misuris previodudis si à la incressite de presince de lenghe proprie tes scuelis de infanzie, la pussibilitât di comunicâ in forme scrite par manx cu lis istituzions locâls e la promozion de lenghe tai mieçs di comunicazion, inte vite sociâl e economiche de isule, e te cooperazion internazionâl cun Irlande e Scozie là che si fevelin altris lenghis de famee gaeliche.

Font: Council Of Europe, 13/01/21

Ream Unît: Europe critiche sul rispiet dai dirits linguistics

L’ultin rapuart dal Consei de Europe sul rispiet de cjarte europeane des lenghis regjonâls o minoritariis de bande dal Ream Unît al palese no pôcs ponts critics. La situazion plui penze e je chê leade ae Irlande dal Nord là che zaromai di agns si spiete une leç organiche di tutele dal gaelic irlandês che, par altri, e jere part ancje dai acuardis di pâs dal Vinars Sant. Il document al segnale ancje la inazion dal esecutîf britanic in mert ae promozion dal cornic e al invide Londre a trasferî competencis e risorsis pe politiche linguistiche al guvier locâl. Par chel che al rivuarde il galês, i setôrs là che si invide a intervignî cun plui fuarce a son chei de sanitât, de assistence, de educazion privade e dal guvier locâl. In mert al gaelic scozês si invide invezit a intervignî massime su lis radios e lis televisions comerciâls. Tra lis notis positivis, invezit, si à lis politichis metudis in at des autoritâts locâls pe varietât gaeliche fevelade ti isule di Man.

Font: The Guardian, 08/09/20

Man: finanziament public plen pe scuele a imersion

Declarât “estint” intal 2009 de UNESCO, ancje se no son plui personis che lu àn di prime lenghe in realtât il manx – la lenghe de famee gaeliche che si fevele te isule di Man – inta chescj agns al è daûr a vivi une sorte di resuriment. Tra i protagoniscj di cheste rinassince e je ancje la Bunscoill Ghaelgagh, la scuele primarie a imersion fondade 19 agns indaûr e gjestide de organizazion privade Mooinjer Veggey. A front di chest lavôr fondamentâl, cumò il guvier de isule al à decidût di ricognossile come part dal sisteme scolastic public. Chest al vûl dî che di cumò indenant al proviodarà a assumi e a paiâ in maniere direte i insegnants e il personâl tecnic e aministratîf dal istitût. Cun di plui, su la fonde dai risultâts de scuele, si resone su la pussibilitât di inviâ un percors similâr ancje pal cicli secondari de istruzion.

Font: Manx Radio, 05/08/20

Scozie / Irlande: novitâts pal progjet pangaelic “Colmcille”

Ai 9 di Jugn lis agjenziis pe lenghe gaeliche irlandese e scozese Foras na Gaeilge e Bòrd na Gàidhlig a àn lançât un gnûf portâl pal program Colmcille che si propon di infuartî i leams e i scambis tra chestis dôs ramis de famee linguistiche gaeliche. Fondadôr dal munistîr su la isule di Ì Chaluim Chille / Iona, Colmcille – sant Colum – al à davuelt une funzion centrâl inte vite spirituâl e culturâl de Irlande e de Scozie. Il program che al cjape il so non si propon di favorî la cognossince, la cooperazion e il dialic tra lis comunitâts gaelichis irlandesis e scozesis su temis e problematichis in comun, e di disvilupâ percors condividûts ancje cu lis comunitâts gaelichis de isule di Man e cun chês dal Canadà. La scree dal sît gnûf e je stade compagnade di diviersis propuestis culturâls e di concors indreçâts ai fruts e ai artiscj des dôs comunitâts. La iniziative e rapresente ancje une anticipazion des ativitâts programadis par celebrâ i 1500 agns de nassite dal sant che si inviaran cui 7 di Dicembar di chest an.

Font: Bòrd na Gàidhlig, 09/06/20

Man: serie di boi par celebrâ la lenghe proprie

In ocasion de setemane dal manx, la lenghe de famee gaeliche che si fevele te isule di Man, e je stade publicade une serie di sîs boi che a celebrin cheste lenghe. Declarât “estint” intal 2009 de UNESCO, in realtât il manx al è daûr a vivi ta chescj agns une sorte di resuriment ancje se no son plui personis monolengâls o che lu àn di prime lenghe. La serie e à par protagonistis dôs surisutis che a proponin in ogni bol un mût diferent di saludâsi par manx. Ta cheste maniere, in plui di celebrâ la lenghe, si vûl ufrî cualchi frase semplice di podê doprâ tes conversazions di ogni dì ancje ae int de isule che no fevele par manx e ai turiscj che a vegnin a visitâ cheste tiere.

Font: BBC, 03/07/19

Man: lu dan par muart, ma il manx al è daûr a cressi

Un articul publicât su la stampe inglese sul prin tacâ di Zenâr al à tornât a piâ par un moment la atenzion sul manx, la lenghe celtiche imparintade cul gaelic scozês e cul irlandês fevelade inte isule di Man. L’autôr dal toc al fevelave dal manx tant che di une lenghe muarte e disparide. Inte realtât, cemût che a àn replicât de isule, la lenghe e reste dal sigûr in pericul ma no je par nuie muarte. Zaromai di agns cheste piçule lenghe celtiche e je daûr a vivi une rinassince che le à puartade a risultâts significatîfs. In dì di vuê a son un miâr i fruts che le studiin a scuele e, ancje se la materie no je obligatorie, il numar di chei che le sielzin al va dilunc a cressi an dopo an. Za di cualchi an e je stade metude sù ancje une scuele a imersion par manx. A son po in 2 mil i adults che a frecuentin cors par imparâle o par miorâ la lôr cognossince de lenghe. Il guvier de isule al à ancje metût in vore un ufici di pueste e diviersis misuris pe promozion dal manx. L’articul al è, magari cussì no, un dai tancj che a mostrin la superficialitât e la ignorance che e je ancjemò su lis lenghis minorizadis.

Font: IOM Today, 16/01/19

Ream Unît: front unît in difese des lenghis celtichis

In ocasion di une manifestazion in Gales, rapresentants des realtâts associativis impegnadis a pro des lenghis minorizadis dal Ream Unît a àn sotscrit un document unitari là che si impegnin a doprâ ducj i mieçs democratics a disposizion par impedî che la jessude de Union Europeane e puarti a di une riduzion dai dirits linguistics. Il tai di ducj i fonts statâi pe lenghe corniche in vore cun chest an e la pussibilitât di pierdi il tet di tutele rapresentât des convenzions europeanis al preocupe une vore lis organizazions pai dirits linguistics che a fasin front comun e a cirin di tignî alte la atenzion sul teme. Il document al è stât firmât di rapresentants de comunitât galese, di chê corniche, di chês gaelichis de Scozie e de Irlande dal Nord, e al à vût la poie di chê de isule di Man.

Font: CnaG, 15/08/16

Man: une app par cognossi la storie de isule

Intai ultins agns la isule di Man e je al centri di une rinassince nazionâl che e à puartât a di un sflorî di ativitâts par tornâ a scuvierzi la culture e la identitât origjinâl di cheste dipendence de corone britaniche logade juste intal mieç dal Mâr de Irlande. Ta cheste suaze si son svilupâts percors educatîfs, dentri e fûr des scuelis, par studiâ la lenghe proprie di cheste comunitât, une lenghe celtiche imparintade cul irlandês e cul gaelic scozês che e jere aromai sul pont di disparî. Cumò però si vûl dâi un sburt ancje ae cognossince de storie di Man e par chest si à a pene lançât une aplicazion pensade massime pai students des scuelis secondariis, ma che e pues tornâ buine par ducj, là che si fâs cognossi la storie de isule ancje cul jutori di videos e di induvinins. La app, svilupade dal Comitât pe radiodifusion gaeliche e di une fondazion privade, e je gratuite e si pues doprâle sei su computer che sui dispositîfs informatics mobii.

Font: BBC, 26/01/15

Man: sfide linguistiche pal an de culture

Par celebrâ l’an de culture, che inte isule di Man al cole intal 2014, la Manx Heritage Foundation e à decidût di saborâ la popolazion locâl par che, dilunc vie dal an, e impari almancul un miâr di peraulis par manx, o sei la lenghe proprie di cheste isule. La idee e je chê di fâ imparâ un pocjis di peraulis par setemane vie par dut il 2014 a ducj chei che a acetin di partecipâ a cheste sorte di sfide linguistiche. Cui che al rivarà insom, cuntun vocabolari di un miâr di peraulis, al rivarà a imbastî almancul une comunicazion di base par manx. Il delegât pe lenghe, Adrian Cain, al à spiegât che ducj chei che a cjaparan part ae iniziative a ricevaran des regjistrazions audio par judâju a imparâ la lenghe. Si à decidût di tacâ cui salûts e cussì lis primis peraulis di imparâ a saran moghrey mie (bundì), fastyr mie (buine sere) e oie vie (buine gnot).

Font: BBC, 11/11/13

Jersey: si studie lis politichis linguistichis pal manx

Il jèrriais al è une varietât linguistiche normande carateristiche de isule di Jèrri / Jersey. In dì di vuê a doprâlu in maniere cuotidiane al è a pene il 3% de popolazion, intant che il 15% al è in stât di capîlu. L’an passât al è jentrât tant che materie curicolâr in dutis lis scuelis primariis de isule, ancje se par pocjis oris, ma cumò la aministrazion locâl e vûl inviâ gnovis azions par valorizâlu e par slargjâ il so ûs. Cussì, ai 25 e ai 26 di Otubar, une delegazion di Jersey e à visitât la isule di Man par studiâ lis politichis linguistichis svilupadis intai ultins agns par dâi gnove vite al manx, la lenghe proprie di cheste isule in pericul di disparî e cumò al centri di une gnove sfloridure. In plui di vê une lenghe proprie divierse di chê uficiâl, lis dôs isulis a àn altris carateristichis in comun a partî dal fat di jessi dipendencis diretis de corone britaniche che no fasin part dal Ream Unît e nancje de Union Europeane.

Font: BBC, 23/10/13

Man: aplicazion in manx pai fruts

La Manx Heritage Foundation, intune cul Comitât pes trasmissions radiotelevisivis gaelichis, e à dât fûr une gnove aplicazion par smart phones e tablets cun chê di judâ i fruts a imparâ il manx, la varietât gaeliche fevelade di un miâr di personis su la isule di Man. Dopo dal sucès de prime aplicazion jessude l’an passât e discjariade di passe 4 mil personis, cheste gnove app e je stade pensade di pueste pai fruts. E je formade di 34 cjançons e rimarolis che si puedin sei scoltâ, sei cjantâ par mieç di un sisteme stîl karaoke. Ancje cheste aplicazion si pues discjariâ in forme gratuite di Google Play e iStore.

Font: BBC, 13/10/13

Man: sucès de aplicazion par imparâ il manx

Il manx, la plui piçule tra lis lenghis de famee che e cjape dentri ancje il gaelic irlandês e chel scozês, al jere stât declarât estint de UNESCO intal 2009. Inte realtât la lenghe e je ancjemò vive e inte isule di Man e ven fevelade di plui di un miâr di personis. Cun di plui l’interès par cheste lenghe al va dilunc a cressi ancje fûr de isule. Par vignî incuintri a cheste domande, nancje un an indaûr, la Manx Heritage Foundation e veve dât fûr une aplicazion gratuite par smart phones e tablets. A vuê a son plui di 4 mil lis personis che le àn za discjariade, intant che lis lezions di manx sei su la isule che vie internet a cjatin simpri plui frecuentadôrs.

Font: BBC, 01/10/13

Man: prime serie animade televisive par manx

La serie animade “Friends and Heroes” produsude de BBC a partî dal 2007 e je stade cumò voltade par manx, la lenghe celtiche fevelade su la isule di Man (Ellan Vannin). Si trate de prime serie televisive par fruts disponibile ta cheste lenghe e lis sôs pontadis a son stadis dadis fûr ancje in dutis lis scuelis de isule. Ogni pontade e dure vincjecinc minûts e e je sottitulade par inglês e, ancje par vie dal atrat che e à pai fruts, e ven calcolade un strument didatic une vore bon. Intal 2009 il manx al jere stât declarât estint de Unesco, ma in realtât cumò al è daûr a vivi une gnove sfloridure e al cres il numar di chei che a vuelin imparâlu sei su la isule che ator pal mont.

Font: BBC, 19/04/13

Man: lançade une aplicazion par imparâ il manx

Intal 2009 l’UNESCO al veve declarade estinte la lenghe manx, la plui piçule tra chês de famee goideliche, ven a dî chê che e cjape dentri ancje il gaelic irlandês e chel scozês. La decision e veve però discjadenât la reazion de popolazion de isule di Man là che a fevelâ cheste lenghe a son plui di mil personis. A protestâ a jerin stâts prin di dut i fruts e i professôrs de Bunscoill Gaelgagh, la scuele primarie là che lis materiis a son insegnadis cuasi dutis par manx. L’istitût al jere partît intal 2001 cun a pene nûf fruts e cumò a ‘nt conte 60. L’interès par cheste lenghe al va dilunc a cressi e ancje chei che a domandin di imparâle. La ultime iniziative che e cîr di vignî incuintri a cheste domande e je une aplicazion gratuite par smart phones e tablets che e je stade lançade propit ta chestis zornadis. Si trate di une iniziative imbastide de Manx Heritage Foundation che e previôt dîs sezions cun diviersis ativitâts par imparâ la lenghe. Tai prossims sîs mês a saran svilupadis altris sezions che a laran a completâ i contignûts de aplicazion di maniere di permeti di imparâ a doprâ la lenghe par fevelâ di cualsisei tematiche.

Font: BBC, 19/11/12

Man: progjet par imparâ il manx cun skype

Il manx al è la plui piçule lenghe de famee goideliche, o sei chê che e cjape dentri il gaelic irlandês e chel scozês, e a fevelâle a son cualchi centenâr di personis inte isule di Man. L’interès par cheste lenghe però al va une vore plui innà de isule e si cjatin personis che a vuelin studiâle intai Stâts Unîts, in Canadà, in Australie e in altris paîs. La maniere miôr par imparâ e je chê di podê esercitâsi a fâ conversazion, ma viodûts i numars e lis distancis al è dificil inmaneâ des classis ancje par chescj students. Par vignîur incuintri, dut câs, i funzionaris linguistics de isule di Man a son daûr a imbastî un scheme educatîf a distance là che insegnants e students a podaran esercitâ lis lôr competencis linguistichis par mieç de rêt skype.

Font: BBC, 30/08/12

Paîs celtics: sfuarç unitari par sburtâ lis lenghis celtichis su Wikipedia

La Celtic League e à imbastît un progjet che al ponte a incressi la presince des lenghis celtichis su la rêt e, in particolâr, su Wikipedia. Lis lenghis interessadis a son duncje il galês, il gaelic irlandês, il breton, il gaelic scozês, il cornic e il manx. Tal zîr di un an, si ponte a fâ jentrâ une des lenghis celtichis tra lis dîs plui dopradis su Wikipedia. Un tant di une bande par ufrî plui risorsis scritis ta chestis lenghis intun lûc che al è disponibil par ducj, e di chê altre par incressi la cognossince des lenghis celtichis ator pal mont e la cussience di chei che lis fevelin. Par rivâ a chescj obietîfs, in plui di tirâ dongje int che si impegni a scrivi articui ta chestis lenghis par Wikipedia, la Celtic League e cirarà di coordenâ lis azions des diviersis organizazions che a operin a pro de lenghe intes sîs nazions celtichis. Cun di plui, a man a man che il progjet al larà indenant, si proviodarà a informâ sui progrès fats.

Font: Gaelport, 20/10/09; Celtic League, 10/09

Pontade 11 08 (06/05/08) - 7

Man: bandieris e lenghis de Interceltiche sui boi

La isule di Man e je une des nazions cence stât de Europe che e stampe dai boi par so cont (adun cul lis isulis Fær Øer e Åland). Chest an la aministrazion postâl de isule e à decidût di dedicâ une serie di boi aes nazions che a partecipin al Festival Interceltic di An Oriant / Lorient, ven a dî Asturiis, Bretagne, Cornualie, Gales, Galizie, Irlande, Scozie, e la stesse Man. I vot boi a mostrin ognidun la bandiere di une di chestis nazions cence stât e une frase te lenghe proprie dal paîs che si riferìs ae impuartance di mantignî vive la lenghe native. Par esempli, sul bol che al rapresente Man, si pues lei “Gyn chengey, gyn cheer”, ven a dî “cence lenghe, nol è paîs”.

Font: Mon Divers, 28/04/08

Pontade 08 07 (29/05/2007)

ONU: 2008 proclamât an internazionâl des lenghis

Il 2008 al sarà l’an internazionâl des lenghis. La decision e je stade cjapade de Assemblee gjenerâl de Organizazion des Nazions Unidis. La iniziative e à chê di sburtâ la unitât traviers de diviersitât linguistiche. La Assemblee e à duncje indreçât ai Stâts e al Segretariât de ONU un invît a difindi e a promovi l’ûs di dutis lis lenghis feveladis intal mont, tune suaze di multilinguisim. Si trate dal sigûr di une finalitât meritorie che, magari cussì no, si cjate a fâ i conts cuntune realtât là che la plui part dai Stâts e puarte indenant politichis che a van te direzion contrarie dal plurilinguisim.

Galizie: Guvier impegnât pal galizian tai celulârs

Il Parlament de Galizie, cul vôt dai deputâts nazionaliscj e di chei socialiscj, al à impegnât la “Xunta”, o sei il Guvier galizian, a sotscrivi acuardis dome cun chês compagniis di telefonie mobile che a doprin ancje la lenghe galiziane intai lôr celulârs. In pratiche, al à spiegât il deputât nazionalist Bieito Lobeira, “se nol è il galizian, nol è nancje il contrat”. Par spiegâ la sô posizion contrarie, la diestre dal PP e à dite che par otignî cierts risultâts si à doprâ “la strade dal convinciment e no chê de imposizion”.

Galizie: campagne sindacâl par doprâ il galizian sul puest di vore

In Galizie, il sindacât CIG al à inviât une campagne par sburtâ l’ûs de lenghe galiziane intai rapuarts tra imprese e lavoradôrs e, plui in gjenerâl, dentri dal mont dal lavôr. Il sindacât al met dongje dal model di precarietât lavorative che al è daûr a slargjâsi, ancje un model di precarietât linguistiche, e al acuse i impresaris di imponi il spagnûl intes relazions cui lôr lavoradôrs e cui clients. La CIG e à cussì decidût di dâ fûr volantins, manifescj e altri materiâl par informâ i lavoradôrs sui lôr dirits linguistics e par sburtâ l’ûs dal galizian ancje sul puest di vore. Inte suaze de campagne, a vegnin dâts fûr ancje dai manualuts di formazion pai delegâts sindacâi.

Frisie: ultins dâts sul ûs de lenghe

Daûr de ultime ricercje puartade indenant de Provincie de Frisie, il 94% dai citadins frisons al capìs la lenghe proprie di chel teritori, il 74% le fevele, il 75% al è bon di leile e il 25% al è in stât di scrivile. Chescj numars a mostrin che la lenghe e je plui fuarte – al à comentât il ministri frison pe culture, Bertus Mulder – par esempli, rispiet al 1980, chei che a san scrivi par frison a son cressûts dal 15%. Dut câs, no dutis lis vôs de inchieste a son positivis: par esempli il frison e je la lenghe doprade in famee dome dal 48% des personis, ven a dî il 10% in mancul dal 1980. Il frison al va dilunc a tignî bot soredut in campagne, invezit al mostre dificoltâts tes citâts, massime chês plui grandis come la capitâl Ljouwert. Il 54% dai citadins de Frisie al considere il frison la sô prime lenghe, il 35% al ten invezit di prime lenghe l’olandês; par chel altri 10% la prime lenghe e je rapresentade dal cussì clamât “frison urban”, ven a dî un miscliç tra frison e olandês, o dal stellingwarfs, o sei il bas sasson che però al è daûr a pierdisi simpri di plui.

Irlande dal Nord: a risi la leç sul gaelic

In Irlande dal Nord la gnove leç sul gaelic e riscje di partî çuete o fintremai di no partî par nuie. Cun di fat, daspò che la propueste di leç pe promozion de lenghe irlandese, metude adun su la fonde di chês za in vore pal galês e pal gaelic scozês, e veve vût un judizi positîf dal guvier britanic e di chel de Republiche irlandese e che e jere stade poiade de grande maiorance des realtâts scoltadis intant des audizions tignudis in Març, cumò il Dipartiment pe culture, pes arts e pal timp libar di Belfast, al à decidût di fâ un altri zîr di consultazions che a rivaran insom ai 5 di Jugn. Cheste volte, i sogjets clamâts a dî la lôr a somein par trê cuarts contraris ae propueste di leç. Si riscje, duncje, che la legjislazion par difindi e promovi il gaelic irlandês e ledi sù pai stecs.

Isule di Man: il manx lenghe di insegnament ancje tes superiôrs

A van un tic miôr lis robis, invezit, pal manx, ven a dî la lenghe celtiche che e parten ae stesse famee dal gaelic irlandês e di chel scozês e che e je fevelade inte isule di Man. Di fat, il guvier de isule al à fat savê che l’insegnament dal manx al sarà disponibil ancje intes scuelis secondariis. Di fat, chest an a son daûr a rivâ insom dal lôr prin cicli di studis i fruts de Bunscoill Ghaelgagh – la uniche scuele primarie de isule là che l’insegnament al è puartât indenant par manx, metude sù intal 2001 – e, duncje, par lôr al jere il risi di no podê lâ indenant a studiâ inte lôr lenghe. Ta cheste maniere, come che al è stât provât di altris esperiencis ator pal mont, i fruts a riscjin di pierdi lis competencis linguistichis che a àn cjapadis sù. In graciis dal intervent dal guvier autonomic, cun Setembar i fruts che a tacaran il cicli di istruzion superiôr a varan a disposizion altris trê agns di scuele cul manx tant che lenghe di insegnament. Si trate di un esempli impuartant di trop che si pues fâ cuant che e je la volontât, se o pensìn che ai prins dal Nûfcent il manx al vignive aromai calcolât di lenghe muarte.

Scozie: l’indipendentist Salmond elet prin ministri

Alex Salmond al è stât elet tant che prin ministri scozês. Salmond al à vût la maiorance relative intal Parlament scozês, là che al à cjapât i 47 vôts dai deputâts dal so partît, il Scottish National Party, e i 2 vôts dai parlamentârs verts. Il candidât laburist, Jack McConnell, al à cjapât, invezit, lis 46 preferencis dai siei compagns di partît. Chei altris 33 deputâts elets intes filis dal partît Liberâl Democratic e ta chês dai Conservadôrs a àn sielt la strade de astension, par permeti la nassite di un Guvier di minorance che cumò al varà di concuistâsi, su ogni proviodiment, une maiorance divierse. Salmond al è il prin indipendentist che al à a cjâf di un guvier scozês.