Stât spagnûl: il cuadri dal vôt pes europeanis

Intal stât spagnûl lis circoscrizions pes elezions europeanis organizadis su scjale statâl a favorissin i doi partîts spagnoliscj principâi, ven a dî socialiscj (PSOE) e popolârs (PP). Al è ce che al è sucedût ancje chest viaç, là che chestis dôs formazions si son cjapadis 44 dai 50 elets a disposizion, ven a dî: 23 pal PP che al à cressût dal 1% lis sôs preferencis puartantsi denant dai socialiscj, che a àn vût di contentâsi di 21 europarlamentârs. La plui part dai partîts nazionalitaris a jerin organizâts in dôs listis. Di une bande e jere la Coalizion pe Europe che e meteve adun i catalans di Convergència i Unió (CiU), Bloc Nacionalista Valencià (BNV) e Unió Mallorquina (UM), i bascs dal PNV, ma ancje il Partît Andalusist e la Coalizion Canarie. Di chê altre bande e jere la liste “Europe dai Popui – I Verts” che e tignive dongje Esquerra Republicana de Catalunya (ERC), il Bloque Nacionalista Galego (BNG), i bascs di Eusko Alkartasuna (EA) e di Aralar, Entesa per Mallorca, Chunta Aragonesista (CHA) e i Verts. I prins a àn otignût doi elets, ven a dî Ramon Tremosa (CiU) e Izaskun Bilbao (PNV). La liste “Europe dai Popui – I Verts”, invezit, e à vût un elet che, daûr dai acuardis pe aleance, al ocuparà il puest intal Parlament european dome par un pôc di timp, par lassâi po il puest a altris doi rapresentants di chês altris fuarcis de coalizion. Il prin a partî al sarà il catalan Oriol Junqueras (ERC). In ducj e doi i câs si à une conferme de rapresentance che chescj partîts a vevin a Strasburc. Intal Parlament european al sarà presint ancje un tierç rapresentant catalan di aree nazionalitarie, o sei Raül Romeva di Iniciativa per Catalunya Verds (formazion che e coreve in coalizion cui partîts de çampe radicâl). La liste “Iniciativa Internacionalista – La Solidaridad entre los Pueblos” (II-SP), che il guvier spagnûl al voleve meti fûr leç cu la acuse di jessi leade ae çampe indipendentiste basche, no à rivât a vê nissun elet.

Anìn cumò a cjalâ il vôt plui in detai a tacâ dai Paîs Catalans. Intal Principât di Catalogne, i socialiscj (PSC) a restin il prin partît cun passe il 35% dai vôts, ma a pierdin cuasi siet ponts percentuâi rispiet aes elezions europeanis dal 2004. CiU, invezit, e fâs un salt indenant di cinc ponts (22,45%) passant denant al PP. In cuarte e cuinte posizion o cjatìn ERC cul 9,21% des preferencis e ICV-EUiA cul 6,09%. Dut câs, si à di dî che ducj e trê i partîts de coalizion di guvier (PSC, ERC e ICV-EuiA) a àn pierdût vôts. Inte Comunitât Valenziane il PP al à passât il 50% dai consens, intant che i partîts nazionalitaris a àn otignût pardabon dai risultâts scjars. Intes Baleârs i popolârs a restin il prin partît des isulis cul 43,81% dai vôts, ma a pierdin teren rispiet al 2004. I socialiscj a restin plui o mancul su la stesse percentuâl de ultime volte (38,48%). Al tierç puest si place Unió Mallorquina cun pôc mancul dal 4% dai vôts. Daûr di jê ERC – Entesa cul 2,98%.

Inte Comunitât Autonome Basche il PNV al reste il prin partît cul 28,54% des preferencis, ma al fâs piês dal 2004 cuant che al veve cjapât il 35% dai vôts. Daûr de formazion nazionaliste si placin i socialiscj (PSE) cul 27,61% dai vôts. Il PP al rive tierç cul 15,98% e cinc ponts percentuâi in mancul des elezions stadis. Iniciativa Internacionalista (II-SP) e rive di un nuie daûr dai popolârs cul 15,89% des preferencis. Su cheste formazion si son orientâts cetancj dai vôts de çampe indipendentiste basche, baste pensâ che propit inte CAB e à otignût 115 mil dai 170 mil vôts otignûts in dut il stât spagnûl (cence dismenteâ i cuasi 23 mil vôts cjapâts in Navare). Aralar e EA adun a son rivâts al 5,65% des preferencis. In Navare, invezit, i popolârs a restin al prin puest cul 37,90%, ma a pierdin plui di siet ponts percentuâi rispiet aes elezions stadis. Daûr di lôr si cjatin i socialiscj cul 31,29% dai vôts, cuntune diminuzion di cuasi il 3,5%. II-SP, cul so 11,46%, si place al tierç puest. Aralar e EA a sfiliin il 7% des preferencis. Il PNV, invezit, nol rive nancje al 2%. In gjenerâl, inte aree nazionaliste, si à di segnalâ il risultât grues di II-SP, la diminuzion marcade dal PNV (cuasi sparît in Navare) e il scjars atrat eletorâl de aleance jenfri Aralar e EA.

Sucès ancje in Galizie pal PP che al passe il 50% dai vôts, intant che i socialiscj a àn di contentâsi dal 34,25%. Il Bloque Nacionalista Galego si conferme la tierce fuarce de Comunitât cul 9,40% des preferencis, ma al piert cuasi trê ponts rispiet aes elezions dal 2004. Une vore plui lontanis chês altris formazions dutis disot dal 1,5%.

Socialiscj (43,86%) denant dai popolârs (41,82%), invezit, intal Aragon. Cul 3,52% dai vôts Izquierda Unida e rapresente la tierce fuarce de Comunitât. Dome al cuint puest Chunta Aragonesista cul 2,84% des preferencis.

Ancje intes Asturiis chel nazionalitari al rapresente pardabon une part minime dal vôt. Cui socialiscj al 43,12%, i popolârs al 42,50%, Izquierda Unida al 5,74%, UPyD al 4,22%, par chei altris partîts a restin dome percentuâls sot dal 0,5%. Il partît nazionalitari Andecha Astur al à cjapât a pene il 0,18% dai vôts.

Font: El País, 07-08/06/09; Món Divers, 08/06/09; VilaWeb, 08/06/09; Gara, 07-08/06/09; Aralar, 07-08/06/09; Galiza Hoxe, 07/06/09; elections2009-results.eu, 07-08/06/09

Stât francês: il cuadri dal vôt pes europeanis

Intal stât francês lis elezions europeanis a son stadis segnadis de conferme de Union pour un Mouvement Populaire (UMP) dal president Nicolas Sarkozy tant che prin partît cul 27,8% des preferencis e cun 29 elets suntun totâl di 72 puescj a disposizion. Al secont puest si son plaçâts i socialiscj (PS) cul 16,48% dai vôts e cun 14 eurodeputâts. Dut câs, la grande sorprese des elezions europeanis intal stât francês e je rivade de liste Europe Écologie che e à vût il 16,28% des preferencis e 14 elets intal Parlament european. Cheste aleance eletorâl e meteve adun rapresentants dal ambientalisim militant e de plui part dai partîts nazionalitaris atîfs intal stât francês, tant che Convergencia Democratica de Catalunya (CDC), Esquerra Republicana de Catalunya (ERC), Abertzaleen Batasuna (AB), Eusko Alkartasuna (EA), Union Démocratique Bretonne (UDB), Partidu di a Nazione Corsa (PNC), Partit Occitan (PO) e Union du Peuple Alsacien – Elsässische Volksunion (UPA-EV). E propit des filis di cheste aleance al è jessût l’unic europarlamentâr espression di une comunitât minorizade, ven a dî il cors François Alfonsi che al rapresentarà a Strasburc sei il Partidu di a Nazione Corsa, sei la confederazion des Regjons e dai Popui Solidaris che e ten adun i partîts nazionalitaris a pene nomenâts. Aes elezions pal Parlament european a partecipin ancje i teritoris dal stât francês che si cjatin in altris continents, o sei il cussì clamât Outre-mer. Sui trê puescj a disposizion di chescj teritoris, doi a son lâts a membris di partîts francês (UMP e PS) e un al rapresentant di une coalizion di partîts locâi (Alliance des Outre-Mers), ven a dî Elie Hoarau dal Partît Comunist de isule de Réunion.

Viodìn cumò plui in detai cemût che al è lât il vôt intes diviersis comunitâts minorizadis dal stât francês, cundut dai problemis leâts aes divisions aministrativis in vore. Chest al vâl massime pe Ocitanie, là che la division in cetancj dipartiments e in plusôrs circoscrizions eletorâls no permet di rivâ a di une analisi corete.

Il teritori storic breton, invezit, al è dividût tra la regjon aministrative de Bretagne e il dipartiment de Loire Atlantiche. In ducj e doi i teritoris la UMP e je prime (25,08% / 26,14%). I socialiscj, invezit a son seconts in Bretagne (19,12%) e tierçs te Loire Atlantiche (17,55%). Posizions invertidis par Europe Écologie (15,85% / 20,16%) che tra lis sôs filis e veve ancje rapresentants de Union Démocratique Bretonne. Par so cont al coreve il Partît Breton (Strollad Breizh) che al à vût une medie dal 2,59% inte regjon de Bretagne e dal 1,51% inte Loire Atlantiche, ma che in cierts comuns al è rivât ancje al 10%.

Ancje in Alsazie la UMP e je la plui votade cul 32,45% des preferencis, intant che Europe Écologie cul 16,88% e je seconde e i socialiscj a son in tierce posizion cul 14,64%.

Stes ordin ancje intal dipartiment dai Pireneus Orientâi, che al cjape dentri la Catalogne Nord, cundut che ducj e trê i partîts a àn vût percentuâls plui bassis di chês vudis in Alsazie.

Intai Pireneus Atlantics, là che si cjate la part setentrionâl dal Paîs Basc (Ipar Euskal Herria), la UMP e à cjapât il 25,90% dai vôts. Daûr di jê, cul 17,03%, si son plaçâts i socialiscj. Europe Écologie, che e rapresentave ancje Abertzaleen Batasuna e Eusko Alkartasuna, e à vût il 14,57% dai consens (ma tai teritoris bascs cheste liste e à cjapât plui vôts dai socialiscj). Altris doi partîts bascs a corevin, invezit, di bessôi. A nivel di dipartiment, la liste abertzale vuidade di Ixabel Etxeberria e à vût il 2,7% des preferencis e chê dal Partît Nazionalist Basc pôc mancul dal 2%: in ducj e doi i câs cuntun aument dai vôts rispiet aes ultimis elezions.

UMP prin partît ancje Corsiche cul 27,39% dai vôts. Europe Écologie e à vût, invezit, il 13,99% dai consens e, come za dite, e à elet François Alfonsi dal Partidu di a Nazione Corsa. Tierce posizion pai socialiscj cul 12,98% dai consens. Po, cul 9,47%, o cjatìn il Front de Gauche, une aleance di moviments di çampe, e cul 7,61% il Nouveau Parti Anticapitaliste che su la isule al veve dentri ancje i nazionalitaris di A Manca Naziunale.

Font: Le Monde, 08/06/09; elections2009-results.eu, 07-08/06/09; Gara, 08/06/09; Agence Bretagne Presse, 07-08/06/09; p-n-c.eu, 07-08/06/09; partibreton.org, 08/06/09; europeecologie.fr

Scozie: il vôt pes europeanis

In Scozie il Partît Nazionâl Scozês (SNP) al conferme i siei doi rapresentants intal Parlament european e par pôcs vôts nol rive a concuistâ un tierç europarlamentâr. A rapresentâlu a Strasburc a saran Ian Hudghton e Alyn Smith. Il SNP al è stât il partît plui votât in Scozie cun passe 320 mil preferencis, cuasi 100 mil in plui dai laburiscj (che a àn vût doi elets) e il dopli di chês otignudis dai conservadôrs (un elet). Il sest eurodeputât scozês al rive, invezit, des filis dai Liberâi Democratics. Presince dome simboliche pai nazionalitaris dal Scottish Socialist Party che a cjapin pôc plui di 10 mil vôts (0,94%).

Font: The Guardian, 08-09/06/09; elections2009-results.eu, 07-08/06/09

Gales e Cornualie: il vôt pes europeanis

In Gales lis elezions europeanis a àn viodût i conservadôrs plaçâsi al prin puest cun 145 mil vôts, denant dai laburiscj che a ‘nd àn vûts 138 mil e dai nazionalitaris dal Plaid Cymru che a àn cjapât 126 mil preferencis. Plui lontans, cun 87 mil vôts, a son rivâts i antieuropeiscj dal United Kingdom Independence Party. A son chestis formazions a otignî i cuatri europarlamentârs che il Gales al à a disposizion. Cu la elezion di Jill Evans, duncje, il Plaid Cymru al conferme il so rapresentant intal Parlament a Strasburc.

La elezion di un so rapresentant in Europe e jere invezit une mission impussibile pal Mebyon Kernow, il partît nazionalitari cornic. Cun di fat, la Cornualie no à une circoscrizion eletorâl autonome e i eletôrs cornics si cjatavin a votâ intune cuntun numar ben plui grant di citadins inglês des conteis dal Sud Ovest. Cundut achel, il Mebyon Kernow al à vût cuasi 15 mil vôts, o sei sù par jù il 7% dai eletôrs cornics. Si trate di un risultât storic pai nazionaliscj cornics che, a nivel locâl, ju met fintremai denant dai laburiscj. Par chel che al rivuarde lis elezions aministrativis, il Mebyon Kernow al à rivât a otignî 3 dai 33 puescj di conseîr là che al partecipave un so candidât: il risultât miôr daspò di conservadôrs, liberâi democratics e indipendents.

Font: The Guardian, 08-09/06/09; Mebyon Kernow, 08-09/06/09; elections2009-results.eu, 07-08/06/09

Irlande: il vôt pes europeanis

Inte Irlande dal Nord il Sinn Féin al è stât il partît plui votât e al à otignût passe 126 mil vôts, ven a dî il 26,04% dal totâl. In graciis di chest sucès, la formazion republicane e larà dilunc a vê une rapresentance a Strasburc. A rapresentâ il partît e sarà ancjemò une volte Bairbre de Brun. Chei altris doi puescj a disposizion pal Parlament european a van ai doi partîts di riferiment de comunitât unioniste, ven a dî il Democratic Unionist Party (DUP) e l’Ulster Unionist Party (UUP). Il prin al à vût il 18,23% des preferencis, il secont il 17,11%. Pôc daûr, cul 16,20% dai vôts, si è plaçât chel altri partît de comunitât nazionaliste irlandese, o sei il Social Democratic and Labour Party (SDLP).

Inte Republiche irlandese, invezit, Fine Gael e Fianna Fáil si confermin i doi partîts plui votâts. Il prin al à cjapât il 29,13% dai vôts, cuntun aument dal 1,3% rispiet aes elezions stadis, e al à otignût 4 eurodeputâts. Il secont al à vût il 24,06% des preferencis (il 5,4% in mancul di chê altre volte) e 3 elets. I laburiscj a son cressûts al 13,92% dai consens e a àn rivât a otignî ancje lôr trê eurodeputâts. Par colpe dal sisteme eletorâl in vore te Republiche, il Sinn Féin, cundut dal so 11,24% (passe 200 mil vôts), nol à rivât a vê nissun elet. Dut câs, il partît republican – l’unic organizât in maniere unitarie su dute la isule – al à cressût i siei vôts ancje ta cheste part de Irlande.

Font: The Belfast Telegraph, 08-09/06/09; elections2009-results.eu, 07-08/06/09

Belgjiche: il vôt pes europeanis

Inte Belgjiche, ancje il vôt pes europeanis al è organizât daûr des trê comunitâts principâls che a componin il paîs, ven a dî i flamants, i valons e la minorance di lenghe todescje che e vîf te part orientâl dal stât.

Tes Flandris i partîts plui votâts a son stâts i cristians democratics (CD&V) cul 23,39% e i liberâi democratics (Open VLD) cul 20,09% che a àn vût trê elets parom. Daûr di lôr, cul 16,22% dai vôts e 2 elets, si à plaçade la estreme diestre indipendentiste dal Vlaams Belang. Intune cu lis europeanis, intes Flandris si votave ancje pal Parlament locâl. Ancje chi i cristians democratics (CD&V) a son stâts i plui votâts, cul 22,9% des preferencis e 32 deputâts suntun totâl di 124. Secont puest, invezit, pal Vlaams Belang che al à vût il 15,3% dai vôts e 21 deputâts. Il partît de estreme diestre flamande però al à pierdût cuasi il 9% dai consens otignûts tes elezions stadis. I liberâi democratics e i socialiscj a àn cjapât sù par jù il 20% des preferencis, ma i prins a àn vût 20 deputâts e i seconts 19. La Gnove Aleance Flamande (N-VA) e à vût 16 elets, la liste Dedecker 8, e i Verts 7. Ancje la minorance di lenghe francese e je presinte intal Parlament flamant cu la elezion di un deputât de Union dai Froncofons. Cun cheste situazion, dut câs, nol sarà masse sempliç cjatâ fûr une maiorance di guvier.

Par chel che al rivuarde lis europeanis, invezit, in Valonie a son stâts i socialiscj a cjapâ plui vôts, ven a dî il 29,22% che i à permetût di cjapâ trê eurodeputâts. Il Moviment Riformadôr al à vût il 26,24% des preferencis e doi elets. Doi eurodeputâts ancje pai ambientaliscj dal Ecolo che a àn vût il 23,28% dai vôts.

Te circoscrizion di lenghe todescje al jere dome un puest a disposizion. A otignîlu al è stât il candidât dal Partît Cristian Sociâl (CSP) cun cuasi un tierç des preferencis totâls.

Font: elections2009-results.eu, 07-08/06/09; Nationalia, 09/06/09

Stâts baltics: il vôt pes europeanis

In Estonie, Letonie e Lituanie la comunitât di minorance plui gruesse e je dal sigûr chê russe ancje se, in diviers câs, i citadins che a partegnin a cheste nazionalitât si ricjatin a patî limitazions dai dirits civîi che a rimontin ancjemò al procès di indipendence dai trê stâts baltics. Cheste situazion e à i siei riflès ancje sul plan eletorâl.

In Estonie la formazion politiche che e ponte a rapresentâ la comunitât russe, o sei il Partît de Çampe Unide Estone (EUVP: Eestimaa Ühendatud Vasakpartei), al à cjapât a pene il 0,83%, ancje par vie che la plui part dai vôts e je stade dividude tra i cuatri partîts principâi dal paîs.

In Letonie la aleance Centri Armonie (SC: Saskaņas Centrs), che e mostre une cierte atenzion pe comunitât russe dal paîs, e je stade la seconde formazion politiche plui votade cul 19,57% des preferencis e doi elets. Dut câs il partît di riferiment pe comunitât russe e par chês altris minorancis dal paîs al è chel pai Dirits Umans intune Letonie Unide (PCTVL: Par cilvēka tiesībām vienotā Latvijā) che al à cjapât il 9,66% dai vôts e al à rivât a confermâ a Strasburc la ativiste Tatyana Zdanoka, za elete tal 2004.

In Lituanie i partîts plui votâts a son stâts chel cristian democratic (26,80% dai vôts e 4 elets) e chel socialdemocratic (18,62% dai vôts e 3 elets). Ta chest câs, la comunitât di minorance plui ative sul front politic e je stade chê polache. Cun di fat, il moviment Azion Eletorâl dai Polacs in Lituanie (LLRA / AWPL: Lietuvos lenkų rinkimų akcija / Akcja Wyborcza Polaków na Litwie) al à cjapât il 8,46% des preferencis e al à ancje rivât a otignî un europarlamentâr.

Font: elections2009-results.eu, 07-08/06/09

Finlande: il vôt pes europeanis

In Finlande l’unic partît in corse pes elezions europeanis che al rapresentave une comunitât di minorance al jere il Svenska Folkpartiet i Finland (SFP) che al à otignût il 6,1% des preferencis e che al à rivât a concuistâ un eurodeputât. Nissune rapresentance, invezit, pe comunitât sami.

Font: elections2009-results.eu, 07-08/06/09

Slovachie: il vôt pes europeanis

In Slovachie a son stâts i plui votâts a son stâts i socialdemocratics (SMER) cul 32,02% des preferencis e 5 rapresentants elets intal Parlament european. In seconde e in cuarte posizion si son plaçâts doi partîts democratics cristians (SDKU – DS e KDH) cun doi europarlamentârs parom. Il Partît de Coalizion Ongjarese (MKP / SMK: Magyar Koalíció Pártja / Strana maďarskej koalície), che al rapresente il riferiment politic pe gruesse comunitât magjare de Slovachie, al à otignût l’11,34% dai vôts e 2 elets a Strasburc.

Font: elections2009-results.eu, 07-08/06/09

Ongjarie: il vôt pes europeanis

In Ongjarie i cristians democratics dal Fidesz – KDNP a àn otignût la maiorance assolude cul 56,37% dai consens e 14 dai 22 puescj di eurodeputât a disposizion. Sconfite marcade pai socialdemocratics che si son fermâts al 17,38% dai vôts (4 elets), ma ancje pe Aleance dai Democratics Libars (SZDSZ: Szabad Demokraták Szövetsége) che e je colade al 2,16% e no à rivât e elei nissun. Propit di chest partît a rivavin dôs eurodeputadis rom presintis te legjislature stade, ven a dî Lívia Járóka e Viktória Mohácsi. Cui che, invezit, al à fat un salt indenant al è stât il moviment de estreme diestre xenofobe Jobbik che al à cjapât il 14,77% dai vôts e 3 eurodeputâts. Un dai cjavai di bataie di chest partît, leât al grup paramilitâr de Magyar Gárda (Vuardie Ongjarese), a son i atacs ae gruesse comunitât rom ongjarese. Aes elezions si veve presentât ancje un partît etnic rom che, però, al à cjapât a pene il 0,46% des preferencis.

Font: elections2009-results.eu, 07-08/06/09

Romanie: il vôt pes europeanis

In Romanie la aleance di çampe (PSD e PC) e il Partît Democratic Liberâl (PD-L) si son dividûts passe il 60% dai vôts. I prins a àn otignût 11 eurodeputâts e i seconts 10. Grues sucès pe Union Democratiche Magjare in Romanie (UDMR): la coalizion tra i doi partîts di riferiment de comunitât ongjarese, o sei la Aleance Democratiche dai Ongjarês in Romanie (RMDSz) e il Consei Nazionâl Székely (SZNT). I doi moviments adun a àn otignût il 8,92% des preferencis e 3 eurodeputâts, ven a dî László Tőkés, Iuliu Winkler e Csaba Sógor. La UDMR e je stade il partît plui votât in sîs provinciis de Transilvanie e in dôs di chestis e à fintremai passât l’80% dai consens.

Font: elections2009-results.eu, 07-08/06/09; udmr.ro, 08-09/06/09

Bulgarie: il vôt pes europeanis

In Bulgarie il partît di centri diestre Citadins pal Svilup European de Bulgarie (GERB) al à otignût il risultât miôr cul 24,36% des preferencis e 5 rapresentants elets a Strasburc. Al secont puest a son rivâts i liberâi de Coalizion pe Bulgarie (BSP) che a àn vût il 18,5% dai vôts e 4 eurodeputâts. Inte Coalizion a son dentri ancje rapresentants des comunitâts rom bulgaris. Il Moviment pai Dirits e pe Libertât (DPS), che al ven calcolât di partît di riferiment de comunitât turche dal paîs, si è plaçât al tierç puest cul 14,14% des preferencis e al à vût elets a Strasburc 3 dai siei rapresentants.

Font: elections2009-results.eu, 07-08/06/09

Grecie: il vôt pes europeanis

Situazion dificile, invezit, in Grecie là che il stât nol ricognòs nissune minorance. Cundut achel tra i partîts in corse si à vût ancje la liste Arc di Sant Marc (Vinožito / Ouránio Tóxo) che e rivendiche i dirits de comunitât macedone che e vîf intal stât grêc. La liste, colegade ae Aleance Libare Europeane (EFA), e à cjapât il 0,09% dai vôts. Te aree di Lerin / Florina, centri principâl de comunitât macedone greghe, il partît al à cjapât cuasi 1.200 vôts a front di une popolazion di 16 mil personis.

Font: elections2009-results.eu, 07-08/06/09

Stât talian: il vôt pes europeanis

Intal stât talian l’unic candidât di une formazion politiche rapresentative di une comunitât minorizade che al è stât elet intal Parlament di Strasburc al rive dal Sud Tirôl. Al è Herbert Dorfmann de Südtiroler Volkspartei (SVP). La liste, colegade al Partît Democratic talian (PD), e gjoldeve ancje de poie dal Partît Autonomist Trentin Tirolês (PATT) e de Slovenska Skupnost (SSk). A nivel talian la SVP e à otignût il 0,46% e 143 mil vôts, che pe plui part (117 mil) a rivin de provincie di Bolzan dulà che la liste sudtirolese e à vût il 52,1% dai consens.

In Val di Aoste, invezit, no si à rivât a elei nissun rapresentant locâl, cundut che ancje achì al è in vore un mecanisim che al favorìs la elezion di un rapresentant de minorance. Chest massime par vie che a jerin dôs lis formazions politichis che si contindevin chel puest, ven a dî la liste Vallée d’Aoste (colegade al Popolo della Libertà) che e à otignût il 0,1% a nivel talian e il 37,1% a nivel valdostan, e la aleance Autonomie Liberté Démocratie (colegade ae Italia dei Valori) che e à cjapât il 0,08% a nivel statâl e il 18,5% a nivel locâl.

Par chês altris comunitâts minorizadis no son stadis previodudis garanziis e nancje circoscrizions autonomis: une situazion che tai agns passâts e à impedît la elezion di candidâts espression di chestis comunitâts. In Sardegne, nissune liste indipendentiste o autonomiste e à partecipât aes elezions. Dut câs, i indipendentiscj dal moviment indipendentzia Repubrica de Sardigna (iRS) a àn promovût une campagne par invidâ i citadins sarts a meti dentri te schede une letare che e denuncie la impussibilitât pai sarts di elei in maniere autonome i lôr rapresentants a Strasburc. La iniziative e à po cjatât la poie ancje dal PSdAz. Rispiet aes elezions dal 2004, in Sardegne si à vude une diminuzion de partecipazion dal 35%. Lis schedis blancjis o nulis a son stadis il 4,3% dai vôts, in cetancj câs propit par vie de letare di iRS. Inte circoscrizion eletorâl des isulis, dut câs, la rinuncie di altris candidâts e à permetût la elezion di un candidât sart de IdV.

Inte circoscrizion nordorientâl, là che al è cjapât dentri ancje il Friûl, pe prime volte a son stâts elets doi candidâts furlans (un in maniere direte e il secont pe rinuncie di un altri candidât). Ducj e doi a son stâts elets inte filis di partîts talians (PD e PdL). Dut câs, un dai doi elets, ven a dî Debora Serracchiani (PD), si è impegnade a poiâ lis domandis di tutele e di promozion des lenghis minorizadis dal Friûl fatis indenant dal Comitât 482.

Font: elections2009-results.eu, 07-08/06/09; interno.it, 07-09/06/09; elezioni.bz.it, 07-09/06/09; iRS, 09/06/09; com482.org, 30/05-11/06/09