Europe: passe 1,2 milions di firmis par “Minority Safepack”

Minority Safepack, la iniziative citadine inviade de FUEN (Union Federâl des Nazionalitâts Europeanis) par incressi lis misuris di tutele des personis che a partegnin a minorancis linguistichis e nazionâls e par infuartî la diversitât linguistiche e culturâl dentri de Union Europeane, e je stade un sucès. Cun di fat, par che la Comission Europeane e cjapi in man une iniziative citadine e covente la poie di almancul un milion di personis ator pe Union e ai 3 di Avrîl, date che e finive la racuelte des firmis, chês cjapadis sù a son stadis passe un milion e 215 mil. I stâts là che il quorum di firmis che si vevisi proponûts di cjapâ sù par Minority Safepack al è stât superât a son undis: Ongjarie (là che lis firmis racueltis a son stadis plui di mieç milion!), Romanie, Slovachie, Bulgarie, Cravuazie, Slovenie, Lituanie, Letonie, Danimarcje, Spagne e Italie. Ta chest ultin stât l’obietîf al jere stât fissât a 55 mil firmis e a ‘nd è stadis tiradis sù plui di 60 mil, pe plui part in Sud Tirôl, Val di Aoste e Friûl. I stâts a àn cumò trê mês par convalidâ lis firmis e la Comission Europeane a ‘nd à altris trê par presentâsi denant dal Parlament par riferî su la iniziative. Dopo dal agrât a ducj i citadins e aes organizazions che a àn poiât la iniziative, il president de FUEN, Loránt Vincze, al à celebrât la nassite di chel che al à clamât un vêr moviment european pai dirits des comunitâts minorizadis.

Font: FUEN, 04-05/04/18

Ucraine: leç su lis lenghis contestade ancje de Ongjarie

Dopo des tensions cu la Romanie, cumò e je la Ongjarie a tignî cjalt il scuintri diplomatic cu la Ucraine su la leç des lenghis fate buine in Setembar dal Parlament ucrain. La gnove normative e previôt che l’insegnament intes scuelis secondariis a imersion des comunitâts minorizadis si davuelzi pe plui part par ucrain cul ûs des lenghis locâls limitât dome a cualchi materie. Pes autoritâts ucrainis la leç e rispiete i criteris in vore in Europe pe tutele des minorancis linguistichis e par chest e à domandât une opinion legâl al Consei de Europe. No le pense cussì il guvier di Budapest che al domande aes istituzions comunitariis di riclamâ la Ucraine al rispiet dal acuardi di associazion sotscrit cu la Union Europeane. Si stime che in Ucraine e in particolâr te regjon de Transcarpazie a vivin uns 140-150 mil ongjarês. Lis dôs comunitâts minorizadis plui gruessis a son chê russe, che e conte sui 8 milions di personis, e chê rumene cun sù par jù 400 mil personis. Critichis pe leç su lis lenghis a jerin rivadis ancje de Federazion Russe, de Polonie e de Moldova.

Font: BBC, 10/10/17

Romanie: universitâts ongjaresis sot atac

La normative che il guvier ongjarês vuidât di Viktor Orbán al è daûr imbastî par sierâ la Universitât de Europe Centrâl, leade a George Soros, e podarès vê un efiet negatîf ancje pes universitâts privadis finanziadis di Budapest in Romanie e che a permetin ogni an a passe doi mil students de comunitât magjare che e vîf in Transilvanie di completâ i studis inte lôr lenghe proprie. Cun di fat l’ex prin ministri rumen, Victor Ponta, al à dite che al presentarà in curt un progjet di leç che si ispire a chel dal guvier ongjarês par colpî lis universitâts che no jentrin intal sisteme di ricognossiment e di reciprocitât in vore a nivel european. Daûr di cheste definizion gjeneriche al è però un atac clâr ae Universitât Ongjarese Sapientia de Transilvanie e ae Universitât Cristiane Partium di Nagyvárad / Oradea, istitûts privâts finanziâts dal guvier di Budapest par ufrî une istruzion universitarie te lôr lenghe ai students de comunitât ongjarese de Romanie. La iniziative e vûl jessi une ritorsion cuintri des politichis nazionalistis di Orbán e di ducj chei che, framieç de minorance ongjarese de Romanie, i dan la lôr poie.

Font: Hungarian Free Press, 02/04/17

Ongjarie: comunitâts rom menaçadis, polizie condanade

Dopo di chê rivade in Zenâr de Cort europeane dai dirits umans, lis istituzions ongjaresis a àn patît une gnove condane par no vê tutelât lis comunitâts rom des intimidazions de diestre xenofobe. Cheste volte la sentence e je stade dade fûr de Kúria, la Cort supreme de Ongjarie, che e à condanât la polizie locâl par no vê difindût la comunitât rom di Gyöngyöspata vie pal 2011 cuant che grups paramilitârs de diestre ongjarese a vevin inmaneât rondis e altris azions intimidatoriis cuintri des fameis rom dal paîs.

Font: Politics.hu, 09/02/17

Ongjarie: violencis sui rom, condane de Cort europeane

La Cort europeane dai dirits umans e à condanât lis istituzions statâls ongjaresis a paiâ une indenizazion a doi citadins de comunitât rom par vie che no àn garantît la lôr tutele intant di une manifestazion inmaneade de diestre xenofobe ongjarese. I fats a rimontin al Avost dal 2012 cuant che, te citât di Devecser, i doi rom a jerin stâts vitimis prime di abûs verbâi di stamp razist e po ancje di une agression fisiche de bande di un trop di manifestants. La denuncie e jere partide dal fat che la polizie che e controlave la manifestazion no veve fat nuie par impedî i discors raziscj tignûts intant de iniziative, no jere intervignude par difindi i doi rom des violencis dai manifestants e po no veve indagât in maniere serie sul episodi.

Font: Politics.hu, 18/01/17

Ucraine: acuardi cun Budapest par judâ la minorance ongjarese

Ai 9 di Jugn il guvier ongjarês al à sotscrit un acuardi di svilup economic cu la federazion des organizazions de minorance magjare che e vîf inte regjon de Transcarpazie, in Ucraine sudocidentâl. La intese, che si poie suntune disponibilitât economiche di 96 milions di euros, e je pensade par judâ lis ativitâts economichis gjestidis di membris de minorance ongjarese ancje par mieç di prestits vantazôs. L’intindiment principâl de iniziative al è di evitâ che i ongjarês de Transcarpazie a sbandonin la lôr tiere par resons economichis.

Font: Politics.hu, 10/06/16

Ongjarie: fonts par facilitâ la cognossince de culture rom

Il guvier ongjarês al à publicât un bant par finanziâ une serie di progjets su la culture rom che a àn une disponibilitât di 160 mil euros. L’intindiment al è chel di slargjâ framieç dai citadins une cognossince dai elements culturâi de plui impuartante minorance etnolinguistiche de Ongjarie. Par fâlu si ponte massime su dôs liniis di azions, ven a dî poiâ manifestazions specifichis dedicadis ae culture rom e sburtâ la presince di iniziativis dedicadis a cheste culture dentri di altris events.

Font: Politics.hu, 08/04/16

Rom: dirit ae cjase, critichis dal Consei de Europe a siet stâts

Il comissari pai dirits umans dal Consei de Europe al à criticât siet dai 47 stâts che a formin cheste istituzion par vie des politichis di sfrat sfuarçât metudis in at cuintri dai rom intai ultins agns. Sot acuse a son Albanie, Bulgarie, France, Italie, Ongjarie, Serbie e Svezie. Il comissari al domande ai guviers di chescj stâts di fermâ ducj i sfrats fintremai che no si cjataran soluzions abitativis alternativis. Chestis azions, di fat, a incressin la vulnerabilitât des fameis rom, a pidimentin la lôr inclusion sociâl e a impedissin percors regolârs di scolarizazion.

Font: Balkan Insight, 18 e 19/02/16

Slovachie: scuelis ongjaresis a risi cu la riforme de istruzion

La riforme scolastiche in discussion in Slovachie e menace di colpî ancje lis scuelis magjaris che si cjatin massime inte aree meridionâl dal paîs, là che e vîf une significative minorance di lenghe ongjarese. I rapresentants dal partît di riferiment de comunitât (MKP – Partît de Comunitât Magjare) a àn segnalât che se la leç no sarà blocade o emendade si riscje di ricjatâsi cence plui scuelis publichis cul ongjarês tant che lenghe di insegnament, ma a àn ancje dite che no àn la fuarce par sburtâ il Parlament slovac a cambiâ direzion. Su la cuistion al è intervignût il president dal comitât pai afârs forescj dal Parlament di Budapest, Zsolt Németh, che al à dite a clâr che par mantignî buinis relazions jenfri Ongjarie e Slovachie al covente che lis scuelis de minorance no vegnin tocjadis.

Font: Politics.hu, 27/11/15

Ongjarie: jutori par insegnâ lis lenghis ugrofinichis in Russie

Lis autoritâts ongjaresis, par mieç dal Collegium Fenno-Ugricum e dal Istitût pes politichis linguistichis, a finanziaran un program par formâ i insegnants e par svilupâ imprescj educatîfs intes lenghis de famee ugrofiniche feveladis inte federazion russe. La iniziative, in program tra 2014 e 2017, e puarte indenant il percors inviât cul progjet pe preparazion di dizionaris specialistics par dîs materiis scolastichis. Tra lis lenghis interessadis di cheste azion o cjatìn l’udmurt, il komi e il mari.

Font: Finugor, 17/11/14

Ongjarie: intese cui insegnants des minorancis magjaris

Ai 17 di Otubar il guvier ongjarês al à sotscrit un acuardi di cooperazion plurienâl cun vot organizazions che a metin adun la plui part dai insegnants des comunitâts magjaris che a vivin in altris paîs de Europe centrâl e orientâl. Cun cheste intese si vûl inviâ une strategjie educative unitarie che e judi la cooperazion tra i insegnants e il svilup di programs di insegnament in comun. Vuê come vuê a son plui o mancul tresinte i insegnants che a rivin des minorancis magjaris sparniçadis ator pal bacin carpatic che ogni an a van in Ongjarie par visitis di studi o par miorâ la lôr formazion.

Font: Politics.hu, 18/10/14

Slovachie: Budapest e domande di mantignî lis scuelis magjaris

Il guvier ongjarês, par bocje dal ministri Zoltan Balog, al à domandât a chel slovac di no sierâ lis scuelis de minorance magjare inte suaze de riforme scolastiche che e previôt une riduzion dai istitûts scolastics là che a son iscrits mancul fruts. Balog al à ancje sigurât che la Ongjarie e fasarà compagn cu lis scuelis là che si studie par slovac. Il ministri pe istruzion de Slovachie, Dušan Čaplovič, al à spiegât che la responsabilitât pe gjestion des scuelis e je comunâl, ma al à ancje dite che il guvier al intint mantignî l’insegnament in dutis lis lenghis minoritariis dal paîs par garantî a ducj i citadins lis stessis oportunitâts di gjoldi di une istruzion di cualitât.

Font: Politics.hu, 27/03/14

Ongjarie: i dirits dai ongjarês de Ucraine, prioritât par Budapest

Ai 26 di Març il prin ministri ongjarês Viktor Orbán si è cjatât a Budapest cul president vicjari de Federazion Culturâl Magjare de Transcarpatie, Laszlo Brenzovics, par jessi inzornât su la situazion de comunitât ongjarese che e vîf ta cheste regjon de Ucraine. Ducj i doi a àn concuardât su la dibisugne di favorî il procès di svicinament di chest paîs ae Union Europeane. Par Orbán però, la poie dal guvier di Budapest e sarà condizionade dal plen rispiet dai dirits des minorancis, a tacâ dai 150 mil ongjarês che a vivin in Transcarpatie.

Font: Politics.hu, 26/03/14

Ucraine: abolide la leç su lis lenghis, protestis internazionâls

Un dai prins ats aprovâts dal Parlament de Ucraine dopo vê dimissionât il president Viktor Janukovič al è stât chel di abolî la leç che e previodeve la couficialitât pes lenghis minoritariis intes provinciis là che a fevelâlis al è almancul il 10% de popolazion. La misure e sarès stade cjapade par atacâ la popolazion di lenghe russe che, pe plui part, e poiave Janukovič e la sô politiche. La abolizion de leç però, in plui di colpî la comunitât di lenghe russe che e vîf massime tes citâts principâls tant che Kiev e Odessa e tes provinciis dal Sud e dal Est, e va cuintri ancje di chês altris lenghis minorizadis tant che l’ongjarês fevelât di sù par jù 150 mil personis in Transcarpazie (Zakarpats’ka / Kárpátalja) o il rumen che al è presint massime inte provincie di Çernivtsi / Cernăuţi. La iniziative e je stade condanade cun fuarce di diviers rapresentants internazionâi, de Russie ae Ongjarie, e fintremai in Bulgarie, dal moment che intal Sud de Ucraine a vivin minorancis bulgaris. Ancje la comissarie de OSCE pes minorancis etnichis, Astrid Thors, e à lamentât la abolizion de leç e e à domandât aes autoritâts ucrainis un compuartament plui ecuilibrât e inclusîf intai confronts des minorancis.

Font: RIA Novosti, 24 e 26/02/14; Balkan Insight, 26/02/14; Politics.hu, 24/02/14

Voivodine: Serbie riclamade al rispiet de minorance ongjarese

La Serbie e à otignût la candidature par jentrâ inte UE intal Març dal 2012 e, cul Zenâr di chest an che al ven, a varessin di tacâ lis tratativis pe sô jentrade. Un dai pidiments principâi pe adesion al jere la cuistion dai rapuarts cul Cossovo che aromai e somearès avonde a bon. A metisi di stuart cumò e je però la Ongjarie, o almancul un grup di parlamentârs di chest paîs che, intant di une iniziative tignude ai 20 di Novembar intal Parlament di Strasburc, al à domandât che no si aceti la jentrade de Serbie fintremai che nol sarà garantît il plen rispiet dai dirits dai 250 mil membris de minorance ongjarese che a vivin in Voivodine e che no si ricognossarà une fuarte autonomie par cheste regjon. Daûr de operazion al è il partît di estreme diestre ongjarês Jobbik.

Font: Balkan Insight, 21/11/13

Ongjarie: mediatôrs rom intai uficis publics

A son un centenâr i mediatôrs rom che a àn tacât servizi chest Astât intai uficis publics distretuâi de Ongjarie cun chê di judâ i citadins che a partegnin a cheste comunicât a cognossi lis pussibilitâts e i servizis che ur vegnin ufierts de aministrazion publiche. L’obietîf al è chel di svicinâ aes istituzions i citadins che a fasin part di cheste minorance. Cun di plui, par mieç di dipendents publics rom, si à chê di facilitâ la integrazion di cheste comunitât inte societât ongjarese.

Font: Politics.hu, 23/08/13

Romanie - Ongjarie: inmò tensions sui magjârs de Transilvanie

E je tornade la tension intes relazions diplomatichis jenfri Romanie e Ongjarie e al centri dal contindi e va dilunc a jessi la gruesse comunitât di lenghe ongjarese de Transilvanie. Cun di fat al è propit ta cheste aree che e vîf la maiorance dal milion e mieç di magjârs de Romanie, une comunitât che e rapresente plui o mancul il 7% de popolazion totâl. A saborâ i contrascj cheste volte al è stât l’intervent di Gábor Vona, president dal partît ongjarês di estreme diestre Jobbik, che intant di un cjamp pe zoventût magjare in Romanie al à declarât che par sigurâ la autonomie de comunitât ongjarese de Transilvanie al sarès pront a jentrâ in conflit cu la Romanie. Il president rumen Traian Basescu al à cussì acusât la Ongjarie di doprâ politichis pes minorancis che a incressin la instabilitât di chê part di Europe, intant che il ministri pai forescj rumen al à domandât al guvier di Budapest di dissociâsi des peraulis di Vona. Plui di cualchi osservadôr internazionâl però al calcole che chescj scuintris verbâi jenfri autoritâts ongjaresis e rumenis a coventin plui che altri par slontanâ la atenzion dai citadins dai problemis reâi dai doi paîs. Ce che al reste, dut câs, e je une clime di difidence cuant che no di dinei dai dirits des minorancis.

Font: Balkan Insight, 13/08/13

Ongjarie: celebrazions pe zornade dai slovacs

Ai 7 di Lui e je stade celebrade a Palhaza la Zornade dai slovacs de Ongjarie. Ae manifestazion a àn partecipât ancje doi ministris dal guvier magjâr par manifestâ la volontât di amistât tra lis dôs comunitâts. Une amicizie, si à dite, che si palese ancje intal plen rispiet de identitât nazionâl de minorance che tai ultins dîs agns e je cressude dal 70% e che in dì di vuê e conte plui o mancul 30 mil membris. Pai rapresentants dal esecutîf ongjarês chest rispiet al è stât infuartît cu la gnove leç che e permet a dutis lis 13 minorancis nazionâls ricognossudis di vê dai rapresentants garantîts intal Parlament. Intant des celebrazions e je stade po ricuardade ancje la impuartance de colaborazion tra i doi stâts pal rispiet de minorance slovache in Ongjarie e di chê ongjarese in Slovachie. Teme che al è stât po frontât ai 9 di Lui a Budapest dai doi prins ministris Viktor Orban e Robert Fico.

Font: Finugor, 07/07/13

Ongjarie: acuardi par sburtâ la imprenditorialitât rom

La Cjamare pal cumierç e pe industrie ongjarese (MKIK) e à sotscrit un acuardi cul organisim di autoguvier dai rom (ORO) par cjapâ dentri esperts e rapresentants di cheste comunitât intal svilupâ percors di formazion e di nassite di progjets imprenditoriâi pai rom. L’intindiment al è chel di ufrî a plui o mancul 35 mil rom dai cors di educazion secondarie o di formazion professionâl che ur permetin di svilupâ lis lôr capacitâts di imprese di maniere di judâ la lôr situazion economiche e la integrazion inte societât ongjarese. L’obietîf plui ambiziôs dal acuardi però al è chel di rivâ a impleâ dentri dal 2015 100 mil rom che in dì di vuê a son disocupâts.

Font: Politics.hu, 29/05/13

Ongjarie: atacs ongjarês de Voivodine, acusis a AI

Ai 6 di Març la organizazion Fidelitas, braç zovanîl dal partît Fidesz al guvier cumò in Ongjarie, al à tignût une manifestazion di proteste a Budapest denant de sede ongjarese di Amnesty International. Daûr di cheste iniziative al è il fat che intai rapuarts de organizazion internazionâl su la Serbie si fevele di pas indenant inte tutele dai dirits umans inte provincie de Voivodine e no si condanin invezit lis intimidazions e lis violencis di stamp etnic cuintri di membris de minorance ongjarese. I rapresentants di Fidelitas a acusin Amnesty International di intervignî a pro di cualchi minorance, ma no di dutis. La diretore de sezion ongjarese di Amnesty International, Orsolya Jeney, e à sigurât che la organizazion e condane la discriminazion di cualsisei minorance e che e calcole ogni at motivât dal odi etnic un crimin une vore seri.

Font: Politics.hu, 07/03/13