28/09/21

Stât francês: Castex al promet di difindi il model imersîf

Ai 15 di Setembar il prin ministri francês Jean Castex, intune cul ministri pe educazion Jean-Michel Blanquer e cui deputâts Yannick Kerlogot e Christophe Euzet (autôrs di un rapuart sul insegnament des lenghis minorizadis), si à cjatât in videoconference cui rapresentants dai diviers uficis publics pes lenghis minorizadis e des rêts scolastichis di insegnament imersîf. L’incuintri al veve propit chê di fâ il pont su chest sisteme di insegnament dopo che la cort costituzionâl francese lu à declarât contrari ae Costituzion republicane. Pal prin ministri l’insegnament imersîf al è necessari pes lenghis minorizadis e si à impegnât a dâ fûr in curt une circolâr là che si fissin i elements par garantî la sô continuazion. Al à ancje fat savê che si metarà sù un organisim di conciertazion interministeriâl permanent su lis lenghis minorizadis dipendent in maniere direte dal so ufici par frontâ cun regolaritât chest teme. I impegns di Castex a àn cuietât un tic la clime ma, prime di declarâsi sodisfats, i rapresentants des rêts scolastichis a imersion a spietin di viodi i contignûts de circolâr. No sin disponibii – a disin – a fâ nissun pas indaûr rispiet al sisteme di insegnament doprât inta chescj agns.

Font: France3 Bretagne, 15/09/21; Le Telegramme, 15/09/21; VilaWeb, 16/09/21

Paîs Basc: sprlungjât l’acuardi jenfri CAB e Euskaltzaindia

Il guvier de Comunitât Autonome Basche e chei des trê provinciis che lu componin (Araba, Bizkaia e Gipuzkoa) a àn rignuvît la convenzion cu la academie de lenghe basche Euskaltzaindia che e regole la colaborazion tra i cinc sogjets e e imbastìs la programazion dai obietîfs principâi pal studi e pe difusion dal euskara. L’acuardi al cuvierç cuatri agns, dal 2021 al 2024, e al puarte indenant une colaborazion inviade ancjemò tal 2000. Tra i obietîfs de convenzion si à ancje chel di infuartî lis ativitâts de academie sul plan de difusion sociâl de lenghe basche. L’acuardi al met a disposizion di Euskaltzaindia un finanziament plurienâl che al è tor dai 7 milions di euros.

Font: Eusko Jaurlaritza, 15/09/21

Aragon: atac ai organisims di politiche linguistiche

Intai ultins agns lis autoritâts dal Aragon a vevin cressût lis ativitâts par tutelâ e par promovi lis lenghis propriis ma il Parlament locâl al à votât a pro di une misure che e va juste te direzion contrarie. La Assemblee e à di fat poiât a maiorance une propueste fate indenant di Vox, il partît de estreme diestre spagnoliste, par eliminâ la direzion gjenerâl di politiche linguistiche dal guvier dal Aragon, l’Istitût Aragonês pal Catalan e l’Istitût pal Aragonês. La uniche oposizion fuarte a cheste linie e je rivade dai rapresentants de federazion locâl di Podemos / Podèm. La asse de diestre spagnoliste pes lenghis propriis si le à viodude a clâr propit intant dal intervent di un dai deputâts di Podemos / Podèm, Nacho Escartin. Cuant che, in plui che par castilian, al à fevelât ancje par aragonês e par catalan, i parlamentârs dal PP i àn vosât cuintri e chei di Vox a son jessûts de Aule.

Font: Jornalet, 14/09/21

Cornualie: ai 9 di Otubar manifestazion pal autoguvier

Il gnûf moviment pe autodeterminazion de Cornualie – All Under One Banner Kernow – al à invidât la popolazion di cheste piçule nazion celtiche a manifestâ ai 9 di Otubar par domandâ l’autoguvier. Intal 2014 lis istituzions britanichis a àn ricognossût i cornics tant che minorance nazionâl ma cheste iniziative e à vût cualchi efiet, e ancje chel limitât, dome sul plan linguistic. Il Consei de Cornualie al à une funzion rapresentative e cualchi competence esecutive ma no legjislative. La iniziative e vûl duncje sburtâ il guvier britanic a ricognossi formis di autoguvier che a ledin daûr dai esemplis di Gales e Scozie.

Font: Jornalet, 09/09/21