27/08/13

Scozie: mape in rêt pai servizis scolastics par gaelic

Il Consei regjonâl des Highlands e des isulis (Gàidhealtachd agus nan Eilean) al à metût a disposizion une mape sui servizis scolastics par gaelic. L’obietîf al è chel di judâ i gjenitôrs che a vuelin che i lôr fîs a studiin il e par gaelic a sielzi la struture scolastiche miôr. Il sît al ufrìs la liste dai nîts, des scuelis pe infanzie, des primariis e des secondariis là che si dopre la lenghe gaeliche scozese cun specifichis sui servizis ufierts e ancje sul numar di fruts che ju frecuentin. Tal câs des scuelis secondariis, in plui dal numar dai students che a studiin des materiis par gaelic, si dîs ancje trops che a son chei che a doprin il gaelic tant che lenghe native e chei che invezit a son inmò principiants.
Font: Gaelport, 23/08/13

Ongjarie: mediatôrs rom intai uficis publics

A son un centenâr i mediatôrs rom che a àn tacât servizi chest Astât intai uficis publics distretuâi de Ongjarie cun chê di judâ i citadins che a partegnin a cheste comunicât a cognossi lis pussibilitâts e i servizis che ur vegnin ufierts de aministrazion publiche. L’obietîf al è chel di svicinâ aes istituzions i citadins che a fasin part di cheste minorance. Cun di plui, par mieç di dipendents publics rom, si à chê di facilitâ la integrazion di cheste comunitât inte societât ongjarese.
Font: Politics.hu, 23/08/13

Cossovo: prins pas par une polizie miste te aree serbe

Prin pas inte creazion di un cuarp di polizie miste che al operi intes areis a maiorance serbe dal Cossovo, massime inte regjon setentrionâl dulintor di Mitrovica. Cun di fat, dopo de nomine tant che comandant dal cuarp di Nenad Djurić, che al parten ae minorance serbe, cumò al stât sielzût tant che so secont Besim Hoti, che al è invezit un cossovan albanês. La nassite di une polizie miste ta cheste part dal Cossovo e fâs part dai acuardis sotscrits dai doi prins ministris serp e albanês Ivica Dačić e Hashim Thaçi ancjemò intal mês di Avrîl cu la mediazion des autoritâts europeanis. Acuardis che cumò a àn di jessi però svilupâts plui in detai. Par chest un gnûf incuintri tra lis parts al è za stât inmaneât ai 27 di Avost.
Font: Balkan Insight, 21/08/13

Sardegne: propueste di leç par rindi uficiâl il sart

Ai 21 di Avost i conseîrs regjonâi dal Partidu Sardu / Partît Sart di Azion (PSd’Az) a àn presentât une propueste di leç par modificâ il prin articul dal Statût di autonomie de Regjon Sardegne. Il test proponût al dîs che sul teritori de isule il sart al è lenghe proprie e parificade cul talian e che ducj i citadins de Sardegne a àn il dirit di cognossi e di doprâ dutis dôs lis lenghis. Cun di plui la propueste e previôt che chest stes ricognossiment al vali ancje pal catalan intal comun dal Alguer e par galurês, sassarês e tabarchin intes areis là che a son fevelâts. I conseîrs dal PSd’Az a invidin cumò i parlamentârs sarts a sburtâ par che cheste modifiche dal Statût e cjati strade intal Parlament talian. Il Statût di autonomie regjonâl al à di fat un valôr costituzionâl e par jessi modificât al à bisugne di un percors che al previôt diviers passaçs ancje inte Cjamare e intal Senât dal stât talian.
Font: Sardegna Oggi, 21/08/13

Romanie - Ongjarie: inmò tensions sui magjârs de Transilvanie

E je tornade la tension intes relazions diplomatichis jenfri Romanie e Ongjarie e al centri dal contindi e va dilunc a jessi la gruesse comunitât di lenghe ongjarese de Transilvanie. Cun di fat al è propit ta cheste aree che e vîf la maiorance dal milion e mieç di magjârs de Romanie, une comunitât che e rapresente plui o mancul il 7% de popolazion totâl. A saborâ i contrascj cheste volte al è stât l’intervent di Gábor Vona, president dal partît ongjarês di estreme diestre Jobbik, che intant di un cjamp pe zoventût magjare in Romanie al à declarât che par sigurâ la autonomie de comunitât ongjarese de Transilvanie al sarès pront a jentrâ in conflit cu la Romanie. Il president rumen Traian Basescu al à cussì acusât la Ongjarie di doprâ politichis pes minorancis che a incressin la instabilitât di chê part di Europe, intant che il ministri pai forescj rumen al à domandât al guvier di Budapest di dissociâsi des peraulis di Vona. Plui di cualchi osservadôr internazionâl però al calcole che chescj scuintris verbâi jenfri autoritâts ongjaresis e rumenis a coventin plui che altri par slontanâ la atenzion dai citadins dai problemis reâi dai doi paîs. Ce che al reste, dut câs, e je une clime di difidence cuant che no di dinei dai dirits des minorancis.
Font: Balkan Insight, 13/08/13

Aragon: ricors costituzionâl cuintri de leç su lis lenghis

I partîts di oposizion a àn impugnât denant dal tribunâl costituzionâl spagnûl la gnove leç su lis lenghis fate buine dal Parlament dal Aragon. La iniziative e je stade cjapade in forme unitarie dal Partît Socialist (PSOE), di Izquierda Unida (IU) e de Chunta Aragonesista (ChA). Il proviodiment, che al va a scancelâ fintremai il non dal “catalan” par sostituîlu cu la definizion di “lenghe aragonese proprie de aree orientâl”, al ven judicât discriminatori par vie che al limite a fuart i dirits di chei citadins che a fevelin par catalan e par aragonês. Cun di plui, a disin i rapresentants dai partîts di oposizion, cheste leç e je za deventade une barzalete pe comunitât sientifiche internazionâl par vie che ur dinee a catalan e aragonês fintremai il non.
Font: Heraldo, 13/08/13

Sami: mobilitazion cuintri dal progjet minerari a Gállok

Il progjet di vierzi une miniere inte aree sami de Svezie al à discjadenât une reazion dure de bande di cheste comunitât. La multinazionâl Beowulf Mining PLC cu la sô rame svedese Jokkmokk Iron Mines AB e vûl vierzi un gnûf sît minerari a Gállok / Kallak, une citadine di 3 mil abitants che si cjate juste disore dal circul polâr artic. Di chi a stimin di podê rigjavâ passe 100 milions di toneladis di minerâl di fier une vore pûr.

Galizie: prime riviste par galizian pai fruts

Cul mês di Setembar al jessarà intes ediculis il mensîl “Oink!”, il prin dut di plante fûr par galizian dedicât ai fruts. La riviste e je di fat indreçade a di un public tra i 6 e i 15 agns. Intes cincuantesîs pagjinis dal mensîl i fruts a varan a disposizion fumuts, zûcs e rubrichis pensadis di pueste par lôr. Par lançâ la gnove produzion i siei creadôrs a àn metût adun un numar zero di “Oink!” che al è stât presentât al festival dal fumut che si è tignût ai prins di Avost inte citât di A Coruña.
Font: Sermos Galiza, 10/08/13

Montenegro: i albanês a domandin il referendum su Tuzi

A son doi i partîts che in Montenegro a àn menaçât di gjavâsi de aleance di guvier se no si davuelzarà cence altris ritarts il referendum su la separazion de citadine di Tuzi dal comun di Podgorica. Il moviment Gnûf Podê Democratic – Forca che al rapresente une part dal eletorât albanês dal Montenegro e Iniziative Civiche, altri partît espression de minorance, a àn di fat declarât che se la consultazion referendarie no si tignarà dentri dal Autun, a bandonaran la coalizion di guvier formade dal Partît Democratic dai Socialiscj, dal Partît Democratic Sociâl e dal Partît Liberâl (Coalizion par un Montenegro European). Un acuardi tra lis parts al previodeve che il referendum si tignìs za in Avost, ma il Partît Democratic dai Socialiscj al à decidût di rinviâ la date par vie che a stimin che il gnûf comun nol sarès bon di stâ in pîts di bessôl dal pont di viste economic; une valutazion che però e ven contestade dai doi partîts etnics. La municipalitât di Podgorica e à in dut 160 mil abitants. Tuzi, che in dì di vuê al è dome un cuartîr de capitâl, a ‘nd à 13 mil e la plui part di lôr e parten ae minorance albanese.
Font: Balkan Insight, 09/08/13

Galizie: campagne pal galizian intai cjamps estîfs

Il guvier de Galizie (Xunta de Galicia) al à inviât une gnove campagne di promozion linguistiche framieç dai fruts e dai fantats che a frecuentin i cjamps estîfs. La iniziative e previôt che a sedin dâts fûr diviers materiâi promozionâi e di lavôr par sburtâ l’ûs de lenghe galiziane tra la zoventût. Tra lis novitâts di cheste edizion de campagne si à un concors che al premiarà il slogan pe lenghe plui biel jessût dai cjamps estîfs. La votazion e sarà fate par mieç des rêts sociâls e i autôrs dai slogans plui votâts a varan tant che premi mp3 di musiche e libris par galizian.
Font: Xunta de Galicia, 09/08/13

Finlande: zovins ugrofinics in congrès a Helsinki

Si è tignude a Helsinki, dai 5 ai 7 di Avost, la edizion numar undis dal congrès dal MAFUN, la organizazion che e met adun lis associazions zovanîls des comunitâts di lenghe ugrofiniche. L’apontament si è sierât cu la aprovazion di un document unitari che, in plui di decidi diviersis azions pal svilup de organizazion, al à metût jù lis liniis di indreçament pai prossims agns. Si partìs cu la volontât di infuartî il MAFUN a nivel internazionâl cul incressi la colaborazion tra lis associazions che za indi fasin part, cul slargjâ la adesion a altris realtâts espression des comunitâts ugrofinichis, cul inviâ o infuartî la colaborazion cun organizazions tant che UNESCO, FUEN, Consei Artic, Conference Mondiâl dai Popui Natîfs e altris ancjemò. Intal document si fevele però ancje des iniziativis di meti in cjamp par modernizâ e valorizâ lis lenghis ugrofinichis, par promovi il patrimoni culturâl di chestis comunitâts e par judâ un svilup socioeconomic des areis là che a vivin. Il prossim congrès dal MAFUN si tignarà a Tartu, in Estonie, intal 2015.
Font: Finugor, 07/08/13

Irlande: tal Nord nissun rapuart sui progrès des lenghis

Il parlamentâr dal SDLP Patsy McGlone al à invidât l’esecutîf nordirlandês a fâ cognossi il rapuart sui progrès des azions di politiche linguistiche pal gaelic irlandês e pal scots e al à descrit tant che alarmant il fat che il document nol sedi stât inviât par timp aes autoritâts britanichis clamadis a presentâ al Consei de Europe un rapuart complessîf su la tutele e la promozion des lenghis minorizadis. La ministre pe culture, pes arts e pal timp libar de Irlande dal Nord, Carál Ní Chuilín, e veve presentât il rapuart al guvier doi mês prime de scjadince ma i membris dal esecutîf no son stâts bogns di cjatâ une posizion unitarie sul teme. Su la fonde dai acuardis di pâs, il guvier nordirlandês al à di jessi formât di rapresentants de comunitât unioniste e di chê nazionaliste irlandese – un compit che cumò al è tes mans dal DUP e dal Sinn Féin – ma su diviersis cuistions chest al ingredee lis decisions. Tal câs de lenghe gaeliche, il DUP che al cîr di pidimentâ ogni azion di politiche linguistiche e il Sinn Féin al sburte par che i dirits linguistics de comunitât irlandese a vegnin rispietâts.
Font: BBC, 06/08/13

Paîs Basc: dirit dai ents locâi de Navare a regolâ l’ûs dal basc

Il tribunâl superiôr di justizie de Navare al à ricognossût il dirit des aministrazions locâls a regolâ l’ûs de lenghe basche (euskara) intai cjamps di lôr competence, ancje se si cjatin inte aree no bascofone. La Comunitât Forâl de Navare e je di fat dividude in trê areis – bascofone, miste e no bascofone – cun nivei di tutele de lenghe une vore diferents. Il câs al jere nassût dopo che un proviodiment de provincie di Izarbeibar / Valdilzarbe che al regolave l’ûs dal euskara intal so teritori al jere stât boçât dal tribunâl aministratîf de Navare par vie che il teritori in cuistion si cjatave fûr de aree bascofone. Pal tribunâl superiôr di justizie de Navare invezit ducj i articui che si riferissin a di un ûs paritari de lenghe basche intai documents uficiâi, inte cartelonistiche e inte toponomastiche a van ben se a àn un impat dome a nivel locâl, cuant che però a àn efiets ancje su altris aministrazions là che l’euskara nol à un ricognossiment uficiâl no puedin jessi acetâts, come tal câs dal ûs dal non uficiâl de provincie in forme bilengâl o de redazion in dôs lenghis di chei ats che a vegnin inviâts ancje a altris aministrazions locâls.
Font: Noticias de Navarra, 06/08/13