27/06/15

Paîs Basc: confermât l’espropri des herriko tabernak

Il tribunâl suprem spagnûl al à confermât lis decisions de Audiencia Nacional, ven a dî l’orghin judiziari che al à cjapât sù la ereditât dai tribunâi speciâi di ete franchiste, cuintri de rêt des herriko tabernak, o sei i locâi gjestîts de çampe indipendentiste basche. Cundut di cualchi piçule mende, la sentence e fâs duncje buine la linie de acuse e, dongje di condanâ ae preson vincj militants, e previôt la confische di 107 herriko tabernak. Daûr de tesi de acuse viodût che i locâi a jerin di proprietât di Batasuna e che il moviment basc al jere stât metût fûr leç su la fonde de teorie che al sarès stât une emanazion di ETA, alore ancje lis herriko tabernak a vevin di jessi leadis ae organizazion armade basche e le varessin fintremai sostignude cu lis lôr ativitâts ancje se no si à puartade nissune prove concrete di chest finanziament. Pal puartevôs di Sortu, il gnûf partît de çampe indipendentiste basche, si trate di une sentence che e colpìs ativitâts legjitimis e legâls dome par resons ideologjichis e che e puarte ae plui grande confische di bens par motivazions politichis dai timps dal franchisim. Pal partît Aralar si trate di un scandul juridic: che passe un centenâr di societâts metudis in pîts cul contribût di miârs di citadins bascs a sedin confiscadis e a jentrin intal patrimoni dal stât spagnûl e rapresente une vere robarie.
Font: Naiz:, 19/06/15

Paîs Catalans: Baleârs, azion politiche pe scuele catalane

Prime ancjemò di screâ il gnûf esecutîf, la coalizion che e guviernarà lis isulis Baleârs e à comunicât l’intindiment di fâi cuintri ae leç di riforme dal sisteme scolastic imbastide dal guvier spagnûl e che e penalize lis lenghis minorizadis. Socialiscj (PSIB – PSOE), Podemos/Podem, Més per Mallorca, Més per Minorca e Gent per Formentera a àn anticipât che inte prime riunion dal gnûf guvier des isulis a fasaran buinis dutis lis misuris legâls che a coventin par derogâ regolaments e ats che l’esecutîf precedent al veve cjapât par meti in vore la riforme scolastiche volude de diestre spagnoliste. A nivel statâl si ciraran acuardis cun altris comunitâts autonomis par fâi cuintri ae riforme. I sarà po lassade ai istitûts scolastics la libertât di lavorâ cui modei in vore prime de riforme.
Font: Ara Balears, 19/06/15

Stât francês: citadins a pro de ratifiche de Cjarte des lenghis

Dopo che il president francês François Hollande si è impegnât pe ratifiche de Cjarte europeane des lenghis regjonâls o minoritariis e al à fat savê che l’esecutîf al è daûr a meti jù un progjet di leç pe ratifiche de Cjarte, il gjornâl Ouest France al à comissionât un scandai su chest teme. Il risultât al à lassât scaturîts diviers di lôr dal moment che al mostre cemût che i citadins a sedin une vore plui vierts de classe politiche sul argoment. Cun di fat, il 72% dai intervistâts al à declarât di jessi dacuardi cul ricognossiment uficiâl des lenghis minorizadis.
Font: Jornalet, 19/06/15

Ocitanie: Tolosa si prepare a Euro2016 par ocitan

Il prossim campionât european di balon si davuelzarà chest an che al ven intal stât francês. Tra lis partidis in program cuatri si davuelzaran a Tolosa / Toulouse e la aministrazion comunâl si prepare a dâi acet ancje par ocitan. No dome la vuide uficiâl pai tifôs che a rivaran in citât e sarà scrite ancje inte lenghe proprie dal paîs, ma al ocitan i sarà dade visibilitât ator par dute la citât. L’obietîf, a disin i aministradôrs locâi, al è chel di marcâ la identitât de comunitât locâl e di ufrî a ducj i visitadôrs une testemoneance de culture ocitane. E magari l’esempli di Tolosa al podarès stiçâ ancje cualchidun altri a lâi daûr: baste pensâ che, dome in Ocitanie, a son ancjemò trê citâts là che si zuiaran partidis di Euro2016 o sei Bordèu / Bordeaux, Marselha /Marseille e Niça / Nice.
Font: Jornalet, 18/06/15

Bretagne: progjet politic unitari pes prossimis regjonâls

Cuntune maiorance di passe il 70%, i iscrits de UDB, il partît storic dal autonomisim breton, a àn acetât di partecipâ aes prossimis elezions regjonâls de Bretagne adun cul moviment nazionalitari Nous te ferons Bretagne vuidât di Christian Troadec. Intes listis de coalizion si volarès zontâ ancje personis fûr dai partîts in maniere di dâi ancjemò plui fuarce a cheste aleance pe Bretagne. L’obietîf al è chel di rivâ a passâ il 10% dai consens, o sei il soiâr che al permet di passâ al secont turni eletorâl e che al ufrìs po la ocasion di pesâ pardabon intai ecuilibris politics regjonâi.
Font: Jornalet, 18/06/15

Paîs Catalans: CiU si creve sul progjet indipendentist

Il percors istituzionâl par rivâ ae indipendence de Catalogne che al jere nassût dal acuardi jenfri il president dal guvier catalan Artur Mas e il segretari di ERC, Oriol Junqueras, al à puartât ae crevadure dai doi sogjets politics che a formavin CiU (Convergència e UDC), o sei la federazion che e cjate propit in Mas il rapresentant principâl. Dopo di un scuintri interni avonde dûr, la UDC e à decidût di no poiâ la strade concuardade e di gjavâsi dal esecutîf vuidât di Mas ancje se a àn sigurât che no menaçaran la stabilitât des aministrazions là che a son dentri come fuarce di guvier. Denant di cheste decision, Convergència e à comunicât di considerâ finide la federazion in pîts cu la UDC e e à fat savê di no sintîsi plui leade ai pats che a regolavin i rapuarts tra lis dôs formazions politichis. Di là des declarazions fatis a bote cjalde, a son dificii cumò di capî fint insom i efiets che cheste crevadure e varà no dome su la tignude des aministrazions là che la UDC e jere fuarce di guvier, ma ancje sul procès pe indipendence catalane e sul avignî dal stes partît. Une fete de UDC e à di fat za cjapât lis distancis des decisions dal diretîf e nol è di escludi che, par lâ dilunc a sostignî il percors sovranist, si gjavi de UDC par lâ cun Convergència o par meti sù un altri sogjet politic.
Font: Naiz:, 17/06/15; VilaWeb, 18/06/15

Scozie: gnove leç su la istruzion par gaelic

Al è rivât al esam de comission su la educazion dal Parlament scozês il gnûf progjet di leç su la istruzion che al previôt che lis aministrazions locâls a sedin obleadis a verificâ la pussibilitât di meti sù sezions par gaelic cuant che lu domandin lis fameis. Di 30 agns incà tes scuelis scozesis a àn tacât a svilupâsi sezions là che si dopre il gaelic tant che lenghe curicolâr, a son però ancjemò cetancj i istitûts là che cheste opzion no je pussibile. L’an passât i fruts che a frecuentavin chestis unitâts gaelichis a jerin passe 3.500. Cun cheste leç si vûl duncje slargjâ cheste pussibilitât cuant che si à un minim di domande de bande des fameis. La union des aministrazions locâls e à mostrât dubis in proposit, almancul che la normative no vegni compagnade di un aument des risorsis disponibilis e dai docents abilitâts a insegnâ par gaelic. Il Bòrd na Gàidhlig al à invezit invidât a slargjâ inmò di plui lis pussibilitâts pe lenghe ufiertis de leç e a infuartî il leam tra lis sezions gaelichis des scuelis de infanzie, des primariis e des secondariis.
Font: BBC, 16/06/15; The Scotsman, 16/06/15

Paîs Catalans: tes Baleârs, il 78% al sielç il catalan a scuele

Il 78,7% des fameis des isulis Baleârs al à sielzût il catalan tant che prime lenghe di insegnament pai lôr fîs pal prossim an scolastic cuintri dai 21,3% che al à domandât il spagnûl. Si trate di un dât in cressite rispiet al an passât, là che il catalan al jere stât sielzût dal 77,1% dai gjenitôrs. Il dât al è impuartant ancje par vie che intai ultins agns la scuele par catalan e jere stade al centri di atacs une vore dûrs de bande de diestre spagnoliste che e jere al guvier de isulis.
Font: Ultima Hora, 16/06/15

Corsiche: in miârs par reclamâ une “soluzion politiche”

Couficialitât de lenghe corse, amnistie pai presonîrs politics e pai militants in clandestinitât, statût dal resident, autonomie fiscâl. A son tra lis rivendicazions che sabide ai 13 di Jugn a àn puartât in place a Aiacciu / Ajaccio uns 3 mil personis. La manifestazion, imbastide su la onde de mobilitazion de Ghjuventù Indipendentista, e à viodût la partecipazion di membris de Assemblee de Corsiche e di altris aministradôrs de isule in rapresentance di une aree politiche ben plui largje di chê dal nazionalisim cors. Cun di fat chescj temis, che a formin lis fondis di une soluzion politiche par risolvi i contrascj che a scjassin la isule, a àn za cjatât une poie maioritarie inte Assemblee, ma no son stâts inmò recepîts dal guvier francês.
Font: Alta Frequenza, 15/06/15

Macedonie: partît albanês in place cuintri des discriminazions

A jerin plui o mancul 2 mil lis personis che ai 13 di Jugn a àn manifestât pes stradis di Skopje par domandâ la fin des discriminazions cuintri de minorance albanese, che e rapresente un cuart de popolazion de Macedonie, e lis dimissions dal prin ministri Nikola Gruevski e dal so guvier, sostignût ancje dal partît albanês Union Democratiche pe Integrazion (DUI). La proteste e je stade inmaneade dal moviment albanês Besa, ma e je stade criticade di diviersis organizazions che i fasin cuintri al guvier Gruevski par vie dal so tai etnic. Un dai motîfs centrâi che a àn puartât ae mobilitazion e je la condane di sîs membris de minorance albanese pal sassinament di cinc pescjadôrs macedons dopo di un procès che a tancj di lôr i à someât pilotât e puartât indenant plui sul plan politic che no su chel judiziari.
Font: BBC, 14/06/15; Balkan Insight, 12/06/15

Stât spagnûl: guviers progressiscj par València, Palma e Iruñea

Ultimis zornadis di tratativis par definî programs e composizion dai esecutîfs intes trê comunitâts autonomis de Navare, des Baleârs e dal Paîs Valenzian là che dopo agns di guvier de diestre spagnoliste si son dadis dongje des aleancis progressistis nazionalitariis. In Navare a dâsi adun a son Geroa Bai, EH Bildu, Podemos e Izquierda – Ezkerra, intes isulis Baleârs socialiscj, Podemos e Més, e inte Comunitât Valenziane socialiscj, Compromís e Podemos/Podem. La diestre spagnoliste e je stade però batude ancje intes citâts plui impuartantis di chestis trê comunitâts là che il percors di formazion des gnovis coalizions al è stât inmò plui svelt. Inte capitâl navare Iruñea / Pamplona il gnûf sindic al è Joseba Asiron Saenz, di EH Bildu, che al gjolt de poie di Geroa Bai, Izquierda – Ezkerra e de liste civiche Aranzadi e che al met fin a cuasi trente agns di aministrazions di diestre (PP e UPN). Ancje a València, citât guviernade dal 1991 indenant dal PP, il gnûf sindic al rive de aree nazionalitarie: si trate di Joan Ribó i Canut di Compromís e al è sostignût ancje de liste València en Comú e dai socialiscj (PSPV). A Palma, invezit, il gnûf prin citadin al è il socialist (PSIB – PSOE) José Hila Vargas che al vuide une coalizion formade ancje de civiche Som Palma e Més per Mallorca. Daûr dal acuardi di guvier però inte capitâl des isulis al è previodût che si vedi un cambi di sindic a metât mandât cuant che Hila i lassarà il puest a Antoni Noguera, rapresentant al moviment nazionalitari Més.
Font: Naiz:, 12-19/06/15; Ara Balears, 16-19/06/15; La Veu del PV, 13-16/06/15; Levante EMV, 16/06/15; Diario de Navarra, 13-16/06/15

Europe: Patxi Baztarrika gnûf president de NPLD

Il responsabil pe politiche linguistiche de Comunitât Autonome Basche, Patxi Baztarrika, al è il gnûf president de Rêt europeane pe Promozion de Diversitât Linguistiche (NPLD), incarghe che al tignarà pai prossims trê agns. La presidence vicjarie de rêt formade di guviers locâi e istituzions impegnâts inte valorizazion des lenghis minorizadis e je lade invezit al frison Alex Riemersma. Tra lis liniis di azion che Baztarrika al vûl sburtâ sot de sô presidence o vin une colaborazion plui strente cu lis istituzions europeanis e un aument de cognossince tra lis diviersis comunitâts minorizadis ancje cul scambi di buinis pratichis.
Font: NPLD, 12/06/15

Paîs Basc: a Parîs un gnûf sburt al procès di pâs

Ai 12 di Jugn la Assemblee francese i à dât acet a di une conference svilupade ator dal manifest pe pâs intal Paîs Basc sotscrit di 110 personalitâts dal stât francês. Dopo vê ricuardât la poie maioritarie de societât basche al procès di pâs e il contribût internazionâl pe soluzion dal conflit (cul Grup internazionâl di contat e cu la Comission internazionâl di verifiche), il document al fâs indenant cuatri domandis: a ETA par che e puarti insom il so disarmament; ai stâts spagnûl e francês par che a partecipin in maniere ative al procès di pâs; aes autoritâts dai doi stâts par che a metin fin ae dispersion dai presonîrs bascs e ur dedin chei stes sconts di pene che i spietin a chei altris condanâts; e, in fin, par che a svilupin percors di ricognossiment, assistence e compensazion par dutis lis vitimis dal conflit. Il manifest al à cjatât la poie di cetancj oms politics in rapresentance di une aree politiche avonde trasversâl (de eurodeputade de çampe radicâl Gabrielle Zimmer a chel dal UMP Alain Lamassoure, dal ex prin ministri socialist Michel Rocard al president de ALE François Alfonsi), ma ancje di magjistrâts, oms di glesie, miedis, artiscj e scritôrs (tant che Gilles Perrault). Si trate di un pas impuartant inte strade par coinvolzi intal procès di pâs ancje la France che fin cumò e à cirût di licuidâ la cuistion basche tant che un probleme dut spagnûl.
Font: Naiz:, 12/06/15

Asturiis: campagne par sburtâ il studi dal/par asturian

Cui 10 di Jugn l’assessorât pe educazion e pe culture des Asturiis al à inviât la campagne #yoapúntome, porque lo llevamos dientro (#euapúntome, porque lo levamos dentro) cun chê di sburtâ lis fameis a domandâ pai lôr fîs il percors scolastic che al previôt l’insegnament dal e par asturian o, pe aree de Comunitât là che si lu fevele, dal e par galizian. L’insegnament dal asturian al è scomençât in maniere uficiâl intal 1984 intune schirie di centris educatîfs publics e in dì di vuê al è presint in 331 istitûts. Su la cjarte l’asturian e il galizian a varessin di jessi materiis curicolârs in dutis lis scuelis primariis e secondariis, ma in plui di cualchi câs cheste pussibilitât e reste dome su la cjarte.
Font: AsturNews, 05/06/15