Paîs Catalans: vôt pe indipendence tal Novembar dal 2014

Lis cuatri fuarcis sovranistis che a metin adun la maiorance dai elets dal Parlament catalan, o sei CiU, ERC, ICV-EUiA e CUP, a àn concuardât la date dal referendum su la autodeterminazion e ce che i si domandarà ai citadins. Par meti dacuardi i partîts indipendentiscj cun chei che a àn miôr une soluzion federâl dentri dal stât spagnûl, lis domandis a saran dôs. Cu la prime si domande ai citadins di dî se a vuelin che la Catalogne e deventi un stât, cu la seconde se a vuelin che chest stât al sedi indipendent. Ta cheste maniere se la maiorance dai citadins e rispuindarà sì a dutis lis dôs domandis, si varà une poie popolâr clare par cjapâ la strade de indipendence; se invezit i sì a saran in maiorance dome pe prime domande si varà un mandât par tratâ cu lis istituzions spagnolis une riforme in sens federâl dal ream di Spagne. Tes intenzions dai promotôrs, il referendum al varès di davuelzisi ai 9 di Novembar dal 2014.
L’acuardi tra i cuatri partîts al è stât comunicât ai 12 di Dicembar intant di une conference stampe. Il percors par rivâ ae consultazion al previôt che il Parlament catalan al domandi a chel spagnûl il trasferiment des competencis par clamâ dongje il referendum. Denant de plui che probabile rispueste negative di Madrid, nol è stât ancjemò specificât cemût che si movaran lis istituzions catalanis. Subite dopo de conference stampe, sei il prin ministri spagnûl Mariano Rajoy (PP), sei il segretari dal principâl partît di oposizion Alfredo Pérez Rubalcaba (PSOE), a àn declarât che il referendum catalan no si tignarà par vie che al è incostituzionâl.

Font: VilaWeb, 12/12/13; El Pais, 12/12/13; El Punt Avui, 13/12/13