Galizie: campagne par sburtâ il galizian tes espuartazions

Dopo chê dal 2012, che e veve tant che sproc “Il galizian, clâf pai tiei cumierçs cul mont”, il guvier de Galizie adun cu la Federazion galiziane dai distrets imprenditoriâi al à inviât une gnove campagne che si propon di sburtâ l’ûs de lenghe galiziane tra lis impresis che a lavorin cul forest. La iniziative, che e à non “Espuartâ par galizian”, e je stade presentade in maniere uficiâl ai 12 di Avrîl inte localitât di San Cibrao das Viñas. La fonde di cheste campagne e sta intal fat che, par vie de sô vicinance cul portughês, la cognossince e l’ûs dal galizian a ufrissin un vantaç competitîf cuant che si à a ce fâ cun marcjâts tant che chel brasilian o chel angolan che a son in cressite.

Font: Xunta de Galicia, 12/04/13

Paîs Basc: campagne in Araba pal ûs dal euskara tal cumierç

La aministrazion provinciâl de Araba, inte Comunitât Autonome Basche, e à inviât la campagne “Giro Onean” par sburtâ la presince e l’ûs dal euskara intal setôr dal cumierç, de ristorazion e des struturis di acet. Si trate, in particolâr, di fâ jentrâ in maniere progressive la lenghe basche intal paisaç linguistic e te documentazion pai clients di chestis realtâts economichis. La iniziative e je cjapade dentri intal ultin plan strategjic pe lenghe basche ancje par vie che, daûr dai dâts des ultimis inchiestis sul euskara, a son propit chescj i setôrs economics là che l’interès pe lenghe al va dilunc a cressi. Inte suaze de campagne, la aministrazion provinciâl e met a disposizion un servizi di traduzions sore nuie par ducj i tescj e i documents che a puedin coventâ in albiercs, ristorants, buteghis e locâi publics, ma ancje vocabolaris setoriâi e finanziaments pai operadôrs dal setôr che a vuelin imparâ la lenghe basche.

Font: La Vanguardia, 12/04/13

Letonie: la maiorance e je dacuardi che si insegni ancje il rus

Daûr dai dâts di une inchieste fate dal istitût di ricercje SKDS uns 60% dai citadins de Letonie e je dacuardi par che la lenghe russe e vegni insegnade a scuele. La percentuâl e mude in maniere significative a seconde de comunitât di riferiment, cun di fat pes fameis di lenghe letone cheste pussibilitât e à une poie dal 47%, tra chês di lenghe russe la adesion e va sù al 77%. Vuê come vuê la uniche lenghe uficiâl dal paîs e je chê letone, cundut che il rus al sedi la lenghe native dal 27% de popolazion, e intes scuelis il rus al ven insegnât dome tant che lenghe foreste.

Font: Voz da Rússia, 12/04/13

Paîs Basc: il Parlament de Navare a pro di une radio par basc

Cul vôt a pro di Bildu, Aralar-Nafarroa Bai, Geroa Bai, Izquierda-Ezkerra e socialiscj (PSN) e chel cuintri dai doi partîts de diestre (UPN e PPN), il Parlament de Navare al à fate buine une mozion che e impegne il guvier di cheste comunitât autonome a rispietâ lis indicazions che a rivin des autoritâts europeanis e a garantî ancje in Navare la esistence di une radio che e trasmeti dome par basc. Cu la stesse maiorance e je stade fate buine ancje une mozion dulà che si domande al guvier regjonâl un compuartament plui positîf e plui atîf intal promovi la lenghe basche e, di chê strade, di tornâ su la sô decision di dineâi la licence ae emitente Euskalerria Irratia. La astension dai socialiscj e à invezit impedît di fâ bon ancje un altri pont de mozion che al varès impegnât il guvier de Navare a colaborâ cu la Comunitât Autonome Basche par che lis trasmissions par euskara dal prin e dal tierç canâl public EiTB si puedin viodi in digjitâl ancje in Navare. Unanimitât invezit su la mozion là che si invide il guvier de Navare a domandâi al ministeri spagnûl pe industrie di incressi il numar di licencis radiotelevisivis previodudis par chest teritori in maniere di garantî une pluralitât plui grande, massime sul plan linguistic.

Font: Noticias de Navarra, 11/04/13

Paîs Catalans: al cres il scuintri linguistic cun Madrid

Al va dilunc a cressi il scuintri tra Catalogne e Spagne ancje sul plan linguistic. A stiçâ cheste situazion a son stadis lis iniziativis judiziariis di piçui grups spagnoliscj che a àn metût sot atac l’implant de scuele catalane che al previôt l’insegnament a imersion inte lenghe proprie de Catalogne. L’ultin passaç di cheste vicende al è leât ae sentence dal tribunâl superiôr di justizie de Catalogne là che si dîs che, ancje tal câs che la famee di un sôl arlêf e domandi l’ûs veicolâr dal spagnûl, ducj i fruts de classe a àn di adatâsi a doprâ un model di insegnament bilengâl. Cheste sentence e à vût un rivoc ancje intal Parlament spagnûl là che, pe prime volte, trê deputâts a son stâts espuls de Aule inte stesse zornade. Il proviodiment al è stât metût in vore cuintri dai parlamentârs Joan Tardà, Alfred Bosch e Teresa Jordà di ERC par vie che a vevin provât a fevelâ par catalan. E je la dimostrazion, a àn spiegât i trê deputâts, che il principi che i spagnûi a pensin che al vedi di valê in Catalogne, nol vâl invezit a Madrid: di une bande se un al vûl doprâ il spagnûl ducj a àn di adatâsi, ma di chê altre se un al vûl fâ chel stes par catalan al ven butât fûr. I trê parlamentârs catalans a àn vût la plene solidarietât dal deputât basc Sabino Cuadra (Amaiur) che, propit par chest, al à tacât a fevelâ in Aule par euskara.

Font: La Vanguardia, 10/04/13; VilaWeb, 12/04/13

France: delusion pe leç sul decentrament

Le propueste di leç sul decentrament che e veve jevât une vore di sperancis, massime framieç des comunitâts minorizadis dal stât francês, e je stade presentade al consei dai ministris ai 10 di Avrîl pal vie libare che i permetarà di tacâ il so percors parlamentâr par deventâ leç. Il test al è stât dividût in trê parts cun chê di limitâ il risi di jessi boçât par vie dai blocs trasversâi di oposizion che si àn su lis singulis sezions che lu formin. La prime part e interven sul gnûf statût des citâts metropolitanis, o sei lis tredis realtâts urbanis che a passin i 400 mil abitants. La seconde e modifiche lis competencis des regjons e dai dipartiments, cun chescj ultins che a varan une funzion primarie intal setôr sociâl e lis primis inta chel economic. La ultime part e regole invezit lis competencis dai comuns e des comunitâts di comuns. Di là dal consens che e cjatarà in Parlament, la propueste di leç e je za stade declarade une delusion des organizazions des comunitâts minorizadis par vie che no rispuint aes rivendicazions di unificazion des regjons storichis, tant che la nassite di une coletivitât teritoriâl basche, e nancje a di une incressite significative des competencis des regjons e a di une valorizazion des identitâts e des lenghis regjonâls.

Font: Le Monde, 10/04/13

Corsiche: la maiorance e vûl il bilinguisim

Ai 25 di Avrîl la Assemblee de Corsiche e à in program di esaminâ la propueste par rindi il cors lenghe couficiâl de isule. Il test al è svilupât su 28 articui che a pontin a fâ dal cors une lenghe doprade in maniere normâl in ducj i aspiets de societât a partî di un ûs paritari dal cors e dal francês in dutis lis situazions uficiâls: istituzions, organisims publics e comunicazion istituzionâl. La aprovazion de propueste no je par nuie scontade, par vie che par podê jentrâ in vore e varès po di vê il vie libare ancje dal guvier francês. A dâi un bon sburt però a son i risultâts di une inchieste sociolinguistiche fate intal Novembar dal 2012 e dade fûr ta chescj dîs. Il scandai al mostre che l’86% de popolazion de isule al palese un interès fuart pal cors cundut che a fevelâlu a son sù par jù 100 mil personis, a front di un totâl di passe 260 mil abitants. Pal 90% dai intervistâts la strade di bati e je chê di un ûs paritari di cors e francês, intant che un altri 7% al pense che si varès di doprâ dome il cors. Par chel che al rivuarde plui intal specific l’insegnament, il 52% al calcole che al covente insegnâ lis dôs lenghis in maniere compagne, intant che il 9% al pense al cors tant che lenghe di riferiment e il 39% al crôt che si vedi di insegnâle dome come materie.

Font: Corse Net Infos, 09/04/13; Alta Frequenza, 18/04/13

Cravuazie: gnove manifestazion cuintri dal serp a Vukovar

Ai 7 di Avrîl si à vude une gnove manifestazion a Vukovar, in Cravuazie, par protestâ cuintri de metude in vore ancje ta chste citât de leç statâl su lis minorancis linguistichis. La leç e previôt l’ûs couficiâl de lenghe minoritarie te segnaletiche, te cartelonistiche e intai rapuarts cu la aministrazion publiche cuant che i membris di chê comunitât a son almancul un tierç de popolazion totâl e, daûr dal ultin censiment, a Vukovar il 34,8% de popolazion si declare serbe. In place si son dadis dongje plui o mancul 20 mil personis, pe plui part veterans di vuere, che a domandin di no meti in vore la leç ta cheste citât che e à paiât un presit altonon intant de vuere pe indipendence. Dut câs il prin ministri cravuat Zoran Milanović al à confermât che dopo dal mês di Jugn la leç e tacarà e jessi metude in vore ancje li. Il ministri pai veterans Predrag Matić, che al è stât ancje presonîr di vuere dai serps, al à condanât la proteste e al à acusât i organizadôrs di manipolâ i sintiments dai veterans.

Font: Balkan Insight, 08/04/13

Alsazie: nuie di fâ pal Consei regjonâl unitari

Nuie di fâ pe nassite dal Consei de Alsazie intal referendum che si è tignût domenie ai 7 di Avrîl. Il gnûf organisim al varès vût di nassi de fusion tra l’atuâl Consei regjonâl de Alsazie e i doi dipartiments dal Alt e dal Bas Ren. Par passâ però, cheste riforme e veve bisugne dal vôt a pro di almancul il 25% dai citadins cun dirit di vôt dai doi dipartiments. Intal Bas Ren, là che al à votât il 37,5% dai citadins, il sì al à otignût tor dal 67% des preferencis, come a dî pôc plui dal 24% dai citadins cun dirit di vôt. Ancjemò piês la situazion intal dipartiment dal Alt Ren là che, cuntune partecipazion di cuasi il 40%, il no al è rivât a plui dal 54% e là che duncje, in rapuart ai citadins cun dirit di vôt, il sì al è stât tor dal 17%, une vore lontan dal minim domandât par inviâ la nassite dal Consei de Alsazie.

Paîs Catalans: si invie la proteste fiscâl pe indipendence

La strade pe indipendence de Catalogne e passe ancje pe proteste fiscâl. A sburtâ par cheste soluzion e je la Associazion dai Comuns pe Indipendence (AMI) che e à comunicât che inte riunion dal esecutîf dai 15 di Avrîl e darà fûr diretivis precisis ai 650 comuns che le componin par che a esercitin la sovranitât fiscâl. Il percors, za inviât di une disine di aministrazions locâls, al previôt che i bêçs des tassis che i comuns a àn di versâ aes cassis dal stât centrâl a vegnin paiâts ae Agjenzie Tributarie Catalane cualchi zornade prime de scjadence. Al sarà po chest organisim a versâju ae agjenzie statâl pes jentradis dentri dai tiermins previodûts. Denant dai dubis jevâts sul fat che in ogni câs i bêçs des tassis catalanis a van a finî intes cassis di Madrid, la Associazion dai Comuns pe Indipendence e à spiegât che si trate di usâ lis aministrazions catalanis a chest passaç e a slargjâ il plui pussibil il sisteme di maniere che cuant che si proclamarà la indipendence si varà za une agjenzie tributarie catalane in vore e in stât di gjestî lis jentradis de Catalogne cence plui passâlis al guvier spagnûl. Ancje la Assemblee Nazionâl Catalane e à fat savê che e batarà la strade de disubidience fiscâl, spiegant ancje ai citadins cuâl che al è il percors miôr par fâlu.

Font: VilaWeb, 05/04/13

Bretagne: campagne di promozion dal insegnament bilengâl

Par dut il mês di Avrîl, intes citâts plui impuartantis de Bretagne, si puedin viodi dai manifescj di cuatri metris par trê che a invidi lis fameis a sielzi pai lôr fîs l’insegnament bilengâl o chel a imersion par breton. Si trate di une campagne istituzionâl finanziade dal Consei regjonâl de Bretagne e svilupade dal Ufici public pe lenghe bretone (OPAB) che e ricuarde che l’ûs dal breton tant che lenghe veicolâr al è disponibil in 430 istitûts e che al è stât sielzût bielzà di passe 14 mil fruts. Par permeti ai gjenitôrs di vê plui informazions sul argoment al è stât ancje metût sù un numar vert che al ven publicizât par mieç di cheste campagne.

Font: Agence Bretagne Presse, 05/04/13

Paîs Basc: denuncie di Herrira pe muart di Xabier López Peña

A son centenârs i bascs sierâts intes presons spagnolis e francesis par vie de lôr partecipazion direte ae lote armade pe indipendence dal Paîs Basc o ancje dome pe lôr ativitât politiche par chest stes fin, cence contâ po ducj chei che pe stesse reson si cjatin dispatriâts. Cundut che par solit si tint a associâ il conflit basc al stât spagnûl, la situazion no je mancul grivie In France. Cun di fat, in dì di vuê, a son 130 i presonîrs bascs intal stât francês là che si cjatin a vivi lis stessis condizions repressivis dai lôr compagns intes presons spagnolis, a tacâ de politiche di dispersion che ju slontane ancje a plui di un miâr di chilometris di cjase e dal tratament disuman tai confronts di chei tra di lôr che si cjatin a vê malatiis une vore seriis. A denunciâ cheste situazion cuntun document inviât aes autoritâts francesis e je la organizazion Herrira dopo de muart in circostancis ancjemò dutis di sclarî dal presonîr Xabier López Peña.

Paîs Catalans: simpri mancul domandis pal spagnûl a scuele

L’implant de scuele catalane che al previôt l’ûs veicolâr de lenghe proprie de Catalogne nol è cambiât e al va dilunc a mantignî la centralitât di cheste lenghe dilunc vie dal percors scolastic sei intai istitûts publics, sei ta chei privâts finanziâts cun fonts publics. Chest il messaç marcât de ministre pe scuele, Irene Rigau, intal rispuindi a di une interogazion fate indenant dal PP intal Parlament de Catalogne. Lis sentencis dai tribunâi spagnûi che tai ultins agns a son intervignudis sul sisteme scolastic catalan, e à zontât la Rigau, a son stadis rispietadis dal moment che lis fameis che a àn domandât pai lôr fîs l’ûs dal castilian tant che lenghe veicolâr a son stadis contentadis. Lis domandis a restin però margjinâls e a son daûr a calâ. Cun di fat, daûr dai dâts comunicâts in Aule de ministre, se intal an scolastic 2011-2012 a domandâ di doprâ il spagnûl tant che lenghe di riferiment pai lôr fruts a jerin stadis 106 fameis, chest an a son stadis a pene 17 in ducj i istitûts publics de Catalogne.

Font: Granada Digital, 03/04/13

Cossovo: inmò nissun acuardi sul destin des areis serbis

Gnûf incuintri ai 2 di Avrîl a Bruxelles tra la delegazion serbe e chê cossovane vuidadis dai doi prins ministris Ivica Dačić e Hashim Thaçi par cirî di cjatâ un acuardi su la gjestion dai comuns dal Cossovo a maiorance serbe. La riunion e à permetût di fâ un pas indenant, ma si è sierade cuntun scuintri verbâl avonde dûr che al à sustât no pôc la responsabile pe politiche foreste de Union Europeane, Catherine Ashton, che e veve di mediâ tra lis parts. Lis areis a maiorance serbe si daran dongje intune gnove realtât aministrative clamade Associazion dai Comuns Serps che e cjape dentri cuatri comuns de aree setentrionâl dal Cossovo e altris sîs sparniçâts intal rest dal paîs. Cheste Associazion e varès di gjoldi di une cierte autonomie e di puartâ cussì ae disparizion des istituzions paralelis finanziadis de Serbie che cumò a guviernin i comuns dongje de frontiere e che no ricognossin la autoritât dal guvier cossovan. Lis dôs delegazions a àn cjatât un acuardi su la costituzion di un cuarp di polizie multietnic che al operi intai comuns de Associazion, ma si son scuintradis su la gjestion dal sisteme judiziari, cui serps che a proponin che i prins doi grâts di judizi a sedin gjestîts dentri de Associazion e i cossovans che invezit a volaressin une integrazion intal sisteme judiziari statâl cu la garanzie di cuotis etnichis. No sec des autoritâts di Belgrât ancje ae presince di reparts militârs cossovans intai comuns a maiorance serbe.

Font: Balkan Insight, 03/04/13

Paîs Basc: in miârs in place pal Aberri Eguna

Miârs di personis si son dadis dongje intes dôs citâts dal Paîs Basc là che ai 31 di Març si son tignudis lis celebrazions principâls pal Aberri Eguna, la Zornade de Patrie Basche. Inte place gnove (Plaza Barria) di Bilbo / Bilbao si è tignude la manifestazion inmaneade dal PNV, partît che cumò al à in man il guvier de Comunitât Autonome Basche. Achì il teme centrâl dai discors uficiâi al è stât chel de crisi economiche e sociâl che e tocje ancje chest blec de Europe. Frontâ cheste situazion e je la prioritât dal guvier basc, al à spiegât il president dal esecutîf Iñigo Urkullu, che al à però rivendicât ancje il dirit a otignî un gnûf status dentri dal stât spagnûl di otignî par mieç di un confront paritari cun Madrid. Se i riferiments ae crisi no son mancjâts, al è stât il teme de indipendence chel plui batût inta chê altre manifestazion pal Aberri Eguna che si è tignude invezit a Iruñea / Pamplona. La celebrazion e je stade coordenade de rêt Independentistak cu la partecipazion maioritarie dai moviments de çampe indipendentiste basche tant che EH Bildu e Sortu. O sin indipendentiscj parcè che o sin realiscj, a àn dite i oratôrs, parcè che o savìn che al è plui facil fâ sù une vere democrazie intun gnûf stât basc che no dentri dai stâts spagnûl e francês. Tancj ancje i riferiments ae situazion dai militants bascs impresonâts, segnâts de emozion pe gnove a pene rivade di Parîs de muart dal presonîr Xabier López Peña.

Font: Gara, 01/04/13

Carelie: si domande di meti ancje la nazionalitât sui documents

Inte Federazion Russe lis popolazions nativis par vie de lôr condizion di minorizazion a gjoldin di cierts vantaçs di nature economiche. Dut câs dispès ce che la leç e previôt al reste dome su la cjarte, massime intes regjons autonomis che a àn mancul risorsis a disposizion. Tant plui che dispès, cui che al varès dirit di gjoldi di chescj jutoris, nol rive a fâsi ricognossi tant che membri di une popolazion native. La cuistion e je stade jevade intant dal congrès federâl rus des popolazions nativis dal Nord, de Siberie e dal Orient lontan. Une strade par superâ chest pidiment, al à zontât il delegât de comunitât dai Veps de Carelie, e sarès chê di tornâ a specificâ sui passepuarts o su chei altris documents identificatîfs la proprie partignince nazionâl, dongje di chê statâl.

Font: Finugor, 29/03/13

Russie: la lenghe dai Komis e fâs un pas indenant su internet

La Academie de Republiche dai Komis pe direzion e pai servizis governatîfs (KRAGSiU) e je il prin istitût di educazion superiôr a creâ une version complete dal so sît internet ancje inte lenghe proprie di chê comunitât de Federazion Russe. Nol è tant che propit un studi svilupât de Academie al veve mostrât cemût che lis lenghis des republichis e des regjons autonomis de Federazion russe, ancje cuant che a àn un ricognossiment uficiâl, a àn une presince margjinâl intai sîts istituzionâi. Sul front de educazion superiôr, dome altris doi istitûts in dute la Federazion, a àn il lôr sît internet intune lenghe de famee ugrofiniche, ven a dî la Academie statâl pedagogjiche de Carelie e la Universitât statâl Petrozavodsk, dutis e dôs cuntune version dal sît ancje par finlandês.

Font: Finugor, 28/03/13

Bosgne: clârs e scûrs pe integrazion tra comunitâts

Ivo Komsic al è il gnûf sindic di Sarajevo, il prin dopo de fin de vuere a no fâ part de comunitât bosgnache. Komsic, rapresentant de Union Sociâl Democratiche e dean de facoltât di filosofie de universitât citadine, al è di fat un membri de comunitât cravuate. Si trate di un segnâl positîf pe integrazion des diviersis comunitâts che a formin la capitâl de Bosgne e, propit ta cheste logjiche, intal so prin discors di sindic al à dite che al lavorarà pe integrazion ancje dai cuartîrs orientâi di Sarajevo, che a fasin part de Republiche Srpska.

Dut câs, propit di cheste part de Bosgne, a rivin brutis gnovis sul front dai rapuarts cu la Federazion di Bosgne e Erzegovine. Cun di fat, la part serbe dal paîs e à decidût di indotâ i siei citadins di codiçs identificatîfs indipendents rispiet a chei de Federazion dopo che lis parts no vevin rivât a cjatâ une posizion condividude su la riforme de leç che e regole chest cantin. I codiçs identificatîfs a àn un valôr impuartant dal moment che a son la fonde par otignî i documents personâi plui impuartants tant che cjarte di identitât, passepuart, tessare sanitarie e cjarte par vuidâ.

Font: Balkan Insight, 28/03/13 e 03/04/13

Galizie: il Parlament al difint la centralitât dal galizian te scuele

I cuatri grups rapresentâts intal Parlament de Galizie – Partît Popolâr (PPdeG), Partît Socialist (PSdeG), Alternativa Galega de Esquerda (AGE) e Bloc Nazionâl Galizian (BNG) – a àn fate buine une mozion unitarie là che a domandin al guvier de Comunitât autonome di difindi la funzion centrâl de lenghe galiziane intal insegnament, cuintri dal procès di margjinalizazion des lenghis couficiâls puartât indenant dal esecutîf spagnûl cul so progjet di leç di riforme scolastiche. I popolârs no àn acetât però di poiâ chei altris ponts previodûts de mozion fate indenant des fuarcis di oposizion là che, tra lis altris robis, si domande di lavorâ par cjatâ un acuardi condividût su la presince dal galizian intes scuelis che al cjapi il puest de cussì clamade leç sul plurilinguisim che, in plui di cjatâ cuintri sei i socialiscj che lis fuarcis nazionalitariis de Galizie, e à vût ancje i judizis negatîfs de magjistrature.

Font: Galicia Hoxe, 27/03/13

Paîs Basc: Ondarroa il paîs là che si fevele di plui par euskara

Al è Ondarroa, inte provincie di Bizkaia, il paîs là che si fevele di plui par basc. Daûr dai dâts di une ricercje curade de associazion Soziolinguistika Klusterra e dal istitût basc di statistiche (Eustat), il 93,6% dai passe 8.800 abitants di chest comun al dopre ogni dì l’euskara. Si trate di une percentuâl une vore plui alte di chê de medie provinciâl, che e je tor dal 31%, e di chê dal rest de comunitât autonome che si sbasse fintremai al 13%. Il dât al è avonde plui alt ancje di chel di localitâts de Bizkaia là che si calcole che la lenghe basche e sedi plui fuarte tant che Gernika e Lekeitio, che a àn un ûs cuotidian de lenghe tor dal 70%. Al è ancje di zontâ che il dât che al ven fûr di cheste ricercje specifiche al è plui alt di chel che si veve otignût cui modei matematics doprâts par inchiestis sociolinguistichis a difusion plui largje.

Font: El Correo, 26/03/13