Serbie: no a di une union dai comuns a maiorance albanese

Lis autoritâts serbis a àn dite di no a ogni ipotesi di creâ une associazion autonome tra i comuns a maiorance albanese di Preševo / Presheva, Medvedja e Bujanovac. La domande e jere stade fate indenant dai conseis comunâi di cheste aree, là che a vivin plui o mancul 50 mil albanês, e ancje dal deputât Riza Halimi, l’unic rapresentant de comunitât albanese elet intal Parlament de Serbie. Il model proponût al è chel che il guvier serp al volarès pes municipalitâts de part setentrionâl dal Cossovo a maiorance serbe. Lis dôs situazions a son dal dut diferentis, a àn replicât però di Belgrât, e duncje no si pense di svilupâ soluzions aministrativis similârs.

Font: Balkan Insight, 13/03/13

Paîs Catalans: catalan prime lenghe tra i students di Andorra

Ai 12 di Març e je stade rindude publiche la ultime inchieste sociolinguistiche su la popolazion scolastiche di Andorra. De ricercje al ven fûr che il 58% dai students dal principât pirenaic al à tant che lenghe plui doprade il catalan, ancje se par solit no in forme esclusive. Cheste lenghe e je la plui doprade a scuele, o sei cun professôrs e personâl scolastic pal 84% e cui compagns di classe pal 76%, ma ancje a cjase, cui gjenitôrs pal 49% e cui fradis pal 64%. Par resons storichis o di imigrazion, dopo dal catalan, tra lis lenghis plui feveladis in Andorra si cjatin il spagnûl, il francês e il portughês. Pal 96% dai students cheste pluralitât linguistiche e puarte vantaçs sei sociâi che economics.

Font: Govern Andorran, 12/03/13

Paîs Basc: sburt pal ûs dal euskara in Bizkaia

Il consei provinciâl de Bizkaia al à fate buine une propueste par garantî la presince de lenghe basche intai rapuarts cui citadins intes aziendis che a operin par cont dal ent provinciâl o che di chest a otegnin jutoris finanziaris. La iniziative e je stade cjapade par vie che, ancje se su la cjarte chest al è za previodût, plui di cualchi volte al sucêt che ae teorie no i ven daûr la pratiche. La propueste e je stade fate indenant dai conseîrs di Bildu, moviment de çampe indipendentiste basche, e al à vût il vôt a pro dal PNV, intant che i socialiscj a àn sielzût di astignîsi e il PP al à votât cuintri.

Font: El Mundo, 07/03/13

Paîs Basc: Trebiñu e Argantzun a domandin di passâ te CAB

I conseis comunâi di Trebiñu e Argantzun a àn fate buine a largje maiorance une mozion là che si domande di passâ de provincie di Burgos, che e je part de regjon Castilie e Leon, a chê di Araba inte Comunitât Autonome Basche. Il document al à vût il vôt a pro di ducj i conseîrs, fûr che chei de diestre spagnoliste (PP). Pal passaç di une comunitât autonome a di une altre al covente un vôt a favôr di almancul doi tierçs dai conseîrs comunâi, che la provincie e la comunitât di partignince a disin di sì ae separazion, che i citadins a ratifichin la decision cuntun vôt referendari e che il Parlament spagnûl al dedi il so vie libare. Cumò il prin dai cuatri passaçs al è stât fat, ma al è il risi che za di Burgos (provincie) o di Valladolid (regjon) al rivi un no ae separazion, cemût che al jere za sucedût intal 1980 e intal 1996. Se ancje cheste volte la rispueste e ves di jessi negative, lis aministrazions di Trebiñu e Argantzun a fasin savê di jessi prontis a bati une altre strade, ven a dî chê di une propueste di leç pal passaç fate indenant dal Parlament de Comunitât Autonome Basche, propueste che par deventâ leç e varès però bisugne in ogni câs dal sì dal Parlament spagnûl là che la diestre spagnoliste e à la maiorance. La prime reson par domandâ chest passaç di comunitât al è che i comuns di Trebiñu e Argantzun a son une isule aministrative cercenade di teritoris che a fasin part de provincie di Araba e no àn un contat diret cun chê di Burgos.

Font: Gara, 09/03/13

France: nassût il comitât consultîf pes lenghis regjonâls

Al à non “Comitât consultîf pe promozion des lenghis regjonâls e de pluralitât linguistiche interne” l’organisim metût in pîts ai 6 di Març de ministre francese pe culture Aurélie Filippetti cun chê di butâ jù dai indreçaments par valorizâ la pluralitât linguistiche che si à intal stât francês. Intal comitât a son dentri parlamentârs, linguiscj, costituzionaliscj e rapresentants des coletivitâts teritoriâls. La domande principâl fate indenant zaromai di agns des comunitâts minorizadis dal stât francês e je chê de ratifiche de Cjarte europeane des lenghis regjonâls o minoritariis, un impegn che l’atuâl president François Hollande si veve cjapât intant de campagne eletorâl ma che nol à ancjemò mantignût. Ancje su la fonde de posizion za cjapade de cort costituzionâl francese, par podê procedi ae ratifiche de Cjarte si stime che e coventi une modifiche de Costituzion che intal so articul 2 e dîs che “la lenghe de Republiche e je il francês”. Di indiscrezions publicadis de stampe però al somee che Hollande nol intindi inviâ il procès par vie che al stime che no si vedi la maiorance di trê cuints che e covente par modificâ la Costituzion. La nassite dal comitât e somearès duncje pensade par cjatâ une strategjie alternative, magari par mieç di une leç ordenarie, par garantî cualchi slambri di dirit in plui pes lenghis minorizadis feveladis intal stât francês.

Font: Le Journal du Pays Basque, 09/03/13

Ongjarie: atacs ongjarês de Voivodine, acusis a AI

Ai 6 di Març la organizazion Fidelitas, braç zovanîl dal partît Fidesz al guvier cumò in Ongjarie, al à tignût une manifestazion di proteste a Budapest denant de sede ongjarese di Amnesty International. Daûr di cheste iniziative al è il fat che intai rapuarts de organizazion internazionâl su la Serbie si fevele di pas indenant inte tutele dai dirits umans inte provincie de Voivodine e no si condanin invezit lis intimidazions e lis violencis di stamp etnic cuintri di membris de minorance ongjarese. I rapresentants di Fidelitas a acusin Amnesty International di intervignî a pro di cualchi minorance, ma no di dutis. La diretore de sezion ongjarese di Amnesty International, Orsolya Jeney, e à sigurât che la organizazion e condane la discriminazion di cualsisei minorance e che e calcole ogni at motivât dal odi etnic un crimin une vore seri.

Font: Politics.hu, 07/03/13

Corsiche: Leghe pai Dirits dal Om in cjamp pe lenghe corse

La Assemblee corse e je daûr a meti adun une propueste par rindi il cors lenghe couficiâl su la isule. Il lavôr al varès di jessi metût adun dentri dai prossims mês. In mert e interven la sezion corse de Leghe pai Dirits dal Om che e cjape posizion a pro di une gnove normative che e tuteli e e promovi la lenghe corse. La organizazion e domande però ancje di rindi public il dibatiment che al compagne la preparazion de propueste di maniere di coinvolzi di plui i citadins. La Leghe e domande ancje al guvier francês di mantignî la promesse di ratificâ la Cjarte europeane des lenghis regjonâls o minoritariis.

Font: Alta Frequenza, 07/03/13

Ongjarie: inserzioniscj vie dai media che a dan acet al razisim

A son za cinc lis multinazionâls e lis gruessis aziendis che a àn decidût che no compraran altris spazis publicitaris sul cuotidian ongjarês Magyar Hírlap. La decision e je stade cjapade su la fonde de domande fate indenant di diviersis organizazions pai dirits umans che a vevin scrit a cuindis dai inserzioniscj principâi par che no comprassin plui publicitât fintremai che il cuotidian nol finirà di publicâ articui e declarazions di stamp razist, antisemitic e omofobic, e nol domandarà scuse par chei za publicâts. Intal cuotidian, juste par fâ un esempli, a vevin cjatât spazi articui là che si descriveve i rom tant che animâi.

Font: Politics.hu, 06/03/13

Bosgne: vierzidure ai bosgnacs intal guvier de part serbe

Un segnâl di vierzidure intal rispiet des minorancis al rive de Republiche serbe, entitât autonome che e fâs part de Bosgne. Cun di fat la gnove prime ministre Željka Cvijanović, rapresentante de Aleance dai Socialdemocratics Indipendents (SNSD), e à ufiert un puest di ministri al Partît de Azion Democratiche (SDA) formât in maiorance di bosgnacs (musulmans). La ufierte e je rivade dopo di un confront cun chei altris partîts che a formin l’esecutîf, o sei il Partît Socialist (SP) e la Union Democratiche dal Popul (DNS).

Font: Balkan Insight, 05/03/13

Carinzie: risultâts eletorâi positîfs pe minorance slovene

Lis elezions anticipadis che si son tignudis in Carinzie ai 3 di Març a àn viodût un savoltament dai ecuilibris politichis cu la vitorie dal Partît Socialdemocratic (SPÖ) e il colàs dal Partît Liberâl Nazionâl Carinzian (FPK) che al veve guviernât intai ultins agns la regjon austriache. Il partît che al puartave indenant la ereditât di Haider, subissât dai scandui, al è passât dal cuasi 45% des elezions stadis a pôc plui dal 17%, intant che i socialdemocratics a son cressûts di plui di vot ponts percentuâi e a àn passât il 37% dai consens. Daûr di lôr a son rivâts il Partît Popolâr (ÖVP) cun pôc plui dal 14% dai vôts e in flession rispiet ae volte stade, i Verts cun cuasi il 12% e cuntun consens plui che dopleât, il Team Stronach che si presentave pe prime volte aes elezions e che al à vût pôc plui dal 11% des preferencis, e il BZÖ cul 6,5% dai vôts. Pe formazion dal guvier i socialdemocratics, vuidâts di Peter Kaiser, a varan cumò di cjatâ un acuardi cun almancul une altre fuarce politiche, ma nol somee che si trati di un compit masse dificil. Chest risultât eletorâl al varès di vê efiets positîfs pe comunitât slovene carinziane che, cui guviers di diestre, si veve cjatade dispès in contrast sul front de tutele dai dirits linguistics. Tra i partîts plui sensibii su chest teme a son invezit i Verts e duncje il lôr risultât positîf al è stât viodût di bon voli dai rapresentants des organizazions slovenis. Nol è un câs che in diviers dai comuns là che si à une presince fuarte di cheste comunitât i Verts a vedin passât ancje il 20% dai consens.

Font: Nationalia, 05/03/13; Novi Matajur, 06/03/13

Galizie: discriminazions linguistichis inte sanitât

La organizazion A Mesa pola Normalización Lingüística e à rindût public un altri câs di discriminazion linguistiche intal servizi sanitari de Galizie. Il fat al è capitât intal ospedâl di Pontevedra là che un pazient che al veve di fâ dai esams in spiete di une operazion si è sintût a rispuindi che se al voleve la modulistiche par galizian e no par spagnûl al veve di tornâ a cjase cence vê fat l’esam. Câs dal gjenar a jerin za sucedûts e ancje par chest la direzion dal servizi sanitari de Galizie e veve dât fûr une note che e informave dut il personâl de disponibilitât di un servizi di traduzion che intal zîr di miezore al podeve garantî la traduzion dal document domandât. Cheste ultime vicende e palese però che, cundut de disponibilitât dal servizi di traduzion, a son ancjemò câs là che il personâl sanitari al sielç la strade dal dinei dai dirits linguistics dal pazient. Un compuartament ancjemò plui penç – e comente A Mesa – par vie che al fâs jeve su la condizion di dibisugne dal pazient. La organizazion galiziane e à fat indenant une denuncie su cheste vicende sei al assessorât pe sanitât, sei ae segretarie gjenerâl pe politiche linguistiche par violazion dai dirits ricognossûts cu la leç pe lenghe dal 1983.

Font: A Mesa, 04/03/13

Macedonie: un altri sclop di violence etniche

Gnovis violencis di stamp etnic in Macedonie intes ultimis zornadis dopo che Talat Xhaferi, za membri de vuerilie albanese, al è stât nomenât ministri pe difese. Il prin di Març grups di zovins macedons si son dâts dongje inte capitâl Skopje par manifestâ cuintri de nomine di Xhaferi intal esecutîf, ma in curt la proteste e je deventade violente e si è indreçade cuintri di membris de minorance albanese. Dopo de prime zornade di violence, a son rivadis lis cuintrimanifestazions de comunitât albanese, finidis ancje chês in scuintris tra grups etnics diviers e cu la polizie. Lis violencis a son ladis indenant par diviersis zornadis e a àn causât disinis di ferîts e di arestâts. Maiorance e oposizion – dutis dôs formadis sei di partîts macedons che albanês – a àn condanât lis violencis, ma a àn ancje acusât la cuintripart di vêlis stiçadis. Cun di fat la situazion e reste ancjemò une vore cjalde e al baste pardabon pôc par tornâ a piâ un scuintri viert tra macedons e albanês, che a son la plui grande minorance dal paîs.

Font: Balkan Insight, 04-07/03/13

Cossovo: inmò nissun acuardi sul destin des areis serbis

Ai 4 di Març il prin ministri serp Ivica Dačić e chel cossovan Hashim Thaçi si son tornâts a cjatât pe seste volte a Bruxelles, sot de mediazion de UE, par cirî di regolâ i rapuarts tra i doi paîs, massime par chel che al rivuarde la aministrazion de aree setentrionâl dal Cossovo a maiorance serbe. De fin de vuere cheste aree e je restade sot dal guvier cossovan, ma e je controlade di istituzions paralelis finanziadis de Serbie che no ricognossin la autoritât dal esecutîf a maiorance albanese. Di ce che si à savût, ancje intal ultin incuintri Dačić si à refudât di acetâ che i comuns a maiorance serbe a vegnin aministrâts di Pristina e Thaçi no si à mostrât disponibil a ricognossi nivei alts di autoguvier par chestis comunitâts.

Gales: il guvier al dîs di no ai gnûfs standards pal galês

Il guvier galês al à dite di no ai nivei gnûfs di tutele e di promozion de lenghe pes aziendis publichis e par chês privadis clamadis a garantî servizis di utilitât publiche. I standards linguistics gnûfs a jerin stâts fats indenant de comissarie pe lenghe galese, Meri Huws, dopo di une lungje dade di consultazions. Denant di cheste decision, la Cymdeithas yr Iaith Gymraeg (Societât pe Lenghe Galese), organizazion in prime linie inte difese dai dirits linguistics, e à comentât che l’esecutîf al à decidût cussì che i interès des aziendis publichis e i profits des grandis compagniis privadis a son plui impuartants de lenghe galese. Ogni dì o vin segnalazions di citadins che a àn problemis a acedi ai servizis par galês – al à zontât il president de Cymdeithas, Robin Farrar – no si pues duncje lâ dilunc a discuti de cuistion, si à di aumentâ i nivei di tutele linguistiche intai servizis pal public. Il messaç al è indreçât prin di dut al ministri pe lenghe galese, Leighton Andrews, che al veve fevelât di un gnûf periodi di consultazions. La comissarie pe lenghe galese invezit e à fat savê che si inviarà un confront plui strent cul guvier par cjatâ une soluzion condividude, ma altris organizazions impegnadis pal galês tant che Dyfodol ir Iaith si son domandadis a ce che e covente une figure come chê dal comissari se po il guvier nol ten cont des sôs indicazions.

Font: Cymdeithas yr Iaith Gymraeg, 25/02/13; BBC, 26/02/13 e 06/03/13

Paîs Basc: rapuart de Comission internazionâl sul procès di pâs

Ai 18 e ai 19 di Fevrâr la Comission internazionâl di control che e viôt dal andament dal procès di pâs intal Paîs Basc e à tignût diviers incuintris cun rapresentants istituzionâi, partîts politics, organizazions e altris sogjets sociâi di chest teritori par cirî di fâ il pont su la situazion e di sburtâ il lâ indenant dal procès. La Comission e à declarât che ETA e va dilunc a mantignî il bloc di dutis lis sôs ativitâts armadis e che nol è il pericul che e torni indaûr su la sô decision di meti fin ae lote armade. Il probleme, a zontin i rapresentants dal organisim internazionâl, al è che se ETA fin cumò e à colaborât in maniere francje e totâl, invezit dal stât spagnûl e di chel francês nol è rivât nissun segnâl de volontât di fâ dai pas indenant intal procès. La Comission e invide duncje ducj i sogjets a fâ la lôr part par frontâ i ponts clâf che a permetaressin di passâ ae prossime tape dal percors che al covente par meti fin in maniere definitive al conflit basc, ven a dî il disarmament, la situazion dai presonîrs e il ricognossiment des vitimis.

Paîs Basc: inte CAB la scuele par basc e cres simpri di plui

I ultins dâts su lis preiscrizions intes scuelis de Comunitât Autonome Basche a mostrin che a van dilunc a cressi lis fameis che a sielzin pai lôr fîs il model di insegnament in lenghe basche. I sistemis scolastics principâi de CAB a son trê, ven a dî il Model A che al è dut par spagnûl, gjavadis lis oris di lenghe e leterature basche che a vegnin fatis par euskara, il Model B che al à un implant bilengâl e al previôt che un pocjis di materiis a sedin insegnadis par spagnûl e un pocjis par basc, e il Model D che invezit al ven fat dut par euskara, gjavadis lis oris di lenghe e leterature castiliane che a son fatis par spagnûl. Dilunc vie dai agns, chest ultin model al è lât indenant a cressi simpri di plui e cumò, daûr di chescj ultins dâts, al ven sielzût di cuasi il 78% des fameis. Il Model B, o sei chel bilengâl, al à pierdût une vore di teren e aromai a sielzilu al è a pene il 19% dai gjenitôrs. Il Model A, ven a dî chel cul spagnûl tant che lenghe principâl, al è colât jù a di une presince cuasi simboliche; cun di fat, daûr des ultimis preiscrizions, a optâ par chest model di insegnament al è stât dome il 3% des fameis.

Font: El Correo, 19/02/13

Crimee: pocjis lis scuelis pai tatars

In Crimee a son dome 15 i istitûts scolastics là che si insegne il tatar, un numar masse piçul par rispuindi aes dibisugnis di cheste comunitât. Daûr dai ultins dâts comunicâts, di fat, dome il 16% dai fruts che a partegnin ae comunitât tatare al à acès al insegnament inte lôr lenghe proprie. Cun di plui, si à di zontâ che chestis scuelis a son in vore plui in gracie dai jutoris che a rivin de Turchie che no des risorsis pe educazion metudis de Ucraine, là che la Crimee e je dentri. Par riclamâ la atenzion su cheste problematiche, la associazion Maarifchi, che e met adun i educatôrs tatars de Crimee, e à inmaneât diviers incuintris pai 21 di Fevrâr, zornade internazionâl dedicade ae lenghe mari. L’insegnament dal tatar, a ricuardin, al pues ancje judâ a svilupâ rapuarts plui fuarts cun chei stâts e cun chês comunitâts là che si fevele une lenghe de famee turche.

Font: World Bulletin, 19/02/13

Maroc: militants saharawi condanâts pai fats di Gdeim Izik

A àn jevât reazions une vore negativis a nivel internazionâl, là che a son presintis comunitâts di dispatriâts saharawi o organizazions che a poin la lote pe autodeterminazion di chest popul, lis sentencis emetudis dal tribunâl militâr di Rabat cuintri di une vincjine di militants saharawi. Cun di fat, la cort militâr marochine e à condanât vot di lôr ae preson a vite, cuatri a 30 agns di galere e altris dîs a penis che a van dai 20 ai 25 agns (intant che doi a saran liberâts viodût che a àn za passât in preson in spiete dal judizi i doi agns de lôr condane). Il procès al fâs riferiment a fats capitâts intal 2010 a Gdeim Izik, incjampament tirât sù intal Sahara Ocidentâl dongje de capitâl El-Aaiún, là che si vevin dâts dongje diviers miârs di saharawi.

Bretagne: progjet par digjitalizâ il tesaur de lenghe bretone

Za a tacâ di chest an e in maniere progressive al sarà metût a disposizion di ducj su internet il tesaur de lenghe bretone. Si trate di un dizionari storic de lenghe in version digjitâl là che si ponte a meti dentri dut il corpus dal breton scrit de Ete di Mieç al dì di vuê. Il progjet al è stât inviât in gracie di un acuardi tra la direzion regjonâl pai afârs culturâi de Bretagne e l’Ufici public pe lenghe bretone.

Font: Agence Bretagne Presse, 15/02/13

Corsiche: riforme de scuele cence cors, no de Assemblee

La Assemblee de Corsiche e à cjapât posizion cuintri dal progjet di leç statâl che al ponte a modificâ i indreçaments e i programs scolastics. Cheste contrarietât e diven dal fat che intal test de propueste no si fâs mai riferiment aes lenghis minorizadis feveladis intal stât francês. Su la cuistion a jerin intervignûts sul imprin i nazionaliscj di Femu a Corsica che a àn presentât ae Assemblee de isule une mozion là che si domande che intal progjet si meti dentri ancje l’insegnament dal cors. La mozion e je stade fate buine di ducj i membris de Assemblee e e je stade zontade al document di valutazion su la propueste di leç che al sarà mandât al guvier francês. Cun di plui, si à fat un apel ai parlamentârs cors par che a fasin indenant dai emendaments par che intal progjet al cjati spazi ancje l’insegnament bilengâl.

Font: Alta Frequenza, 14/02/13