01/03/13

Paîs Basc: rapuart de Comission internazionâl sul procès di pâs

Ai 18 e ai 19 di Fevrâr la Comission internazionâl di control che e viôt dal andament dal procès di pâs intal Paîs Basc e à tignût diviers incuintris cun rapresentants istituzionâi, partîts politics, organizazions e altris sogjets sociâi di chest teritori par cirî di fâ il pont su la situazion e di sburtâ il lâ indenant dal procès. La Comission e à declarât che ETA e va dilunc a mantignî il bloc di dutis lis sôs ativitâts armadis e che nol è il pericul che e torni indaûr su la sô decision di meti fin ae lote armade. Il probleme, a zontin i rapresentants dal organisim internazionâl, al è che se ETA fin cumò e à colaborât in maniere francje e totâl, invezit dal stât spagnûl e di chel francês nol è rivât nissun segnâl de volontât di fâ dai pas indenant intal procès. La Comission e invide duncje ducj i sogjets a fâ la lôr part par frontâ i ponts clâf che a permetaressin di passâ ae prossime tape dal percors che al covente par meti fin in maniere definitive al conflit basc, ven a dî il disarmament, la situazion dai presonîrs e il ricognossiment des vitimis.
Propit su chest ultin pont al è di dî che plui o mancul tai stes dîs e je stade ancjemò la organizazion armade basche a fâ un pas indenant. Cun di fat, intant de udience di un procès che al è daûr a davuelzisi a Parîs cuintri di une disine di militants di ETA, al è stât let un document uficiâl de organizazion basche là che si rignuvìs l’impegn par une soluzion pacifiche dal conflit. La novitât principâl de declarazion e sta però intal fat che pe prime volte ETA e à ricognossût lis soferencis causadis aes vitimis che no vevin nuie a ce fâ cul conflit e ur à domandât scuse pes sôs azions.
Font: Gara, 20-21/02/13

Nessun commento: