Ai 4 di
Març il prin ministri serp Ivica Dačić e chel cossovan Hashim
Thaçi si son tornâts a cjatât pe seste volte a Bruxelles, sot de
mediazion de UE, par cirî di regolâ i rapuarts tra i doi paîs,
massime par chel che al rivuarde la aministrazion de aree
setentrionâl dal Cossovo a maiorance serbe. De fin de vuere cheste
aree e je restade sot dal guvier cossovan, ma e je controlade di
istituzions paralelis finanziadis de Serbie che no ricognossin la
autoritât dal esecutîf a maiorance albanese. Di ce che si à savût,
ancje intal ultin incuintri Dačić si à refudât di acetâ che i
comuns a maiorance serbe a vegnin aministrâts di Pristina e Thaçi
no si à mostrât disponibil a ricognossi nivei alts di autoguvier
par chestis comunitâts.
Intant, di
un sondaç fat in Serbie, al ven fûr che il 63% dai serps al
ricognòs la indipendence dal Cossovo e al pense che aromai il guvier
di Belgrât al puedi dome cirî di sigurâ lis condizions miôr pe
minorance serbe restade sot dal guvier di Pristina. Al è di dî che,
dal stes scandai, al ven ancje fûr che il 65% dai serps al à plui a
cûr che il Cossovo al torni sot dal guvier di Belgrât che no che la
Serbie e jentri inte UE. Cun di plui, cuasi l’80% dai intervistâts
al stime che lis istituzions europeanis no sedin neutrâls inte
mediazion jenfri Serbie e Cossovo, ma a favorissin chest ultin.
Font:
Balkan Insight, 04-05/03/13
Nessun commento:
Posta un commento