Paîs Catalans: mobilitazion indipendentiste pai 11 di Setembar

A man a man che si svicine la date dai 11 di Setembar, zornade là che e cole la fieste nazionâl de Catalogne, a cressin lis adesions ae manifestazion clamade dongje de ANC (Assemblea Nacional de Catalunya) a Barcelone par rivendicâ la indipendence. Di là des declarazions publichis, pe plui part afidadis aes rêts sociâls, une prime idee dai partecipants si pues vêle dal fat che a son za plui di cuatricent lis corieris organizadis par puartâ la int a Barcelone e doi i trens speciâi che, in curt, si podarès zontâ ancje un tierç, ma i numars a cressin dì par dì. Pe ANC si trate di cifris che a van une vore plui innà di chel che si spietavisi e al è za cui che al dîs che e podarès deventâ “la manifestazion indipendentiste plui impuartante inte storie dal paîs”. A front dal numar di adesions simpri plui grues, si à vût di cambiâ ancje il percors de manifestazion che e scomençarà alì de crosere jenfri Gran Via e Passeig de Gràcia par sierâsi po dongje dal Parlament catalan. La Assemblee Nazionâl de Catalogne, organizazion nassude intal Març di chest an par sburtâ la indipendence catalane, e va dilunc intant a inmaneâ ancje altris iniziativis che a cjapin dentri ancje i aspiets simbolics. Cussì intune cuarantine di comuns de Catalogne i militants de ANC a àn sostituît la peraule “Spagne” cun “Indipendence” intal non di viis o placis.

Font: VilaWeb, 31/08/12 e 01-02/08/12

Paîs Basc: inmò malsigûr l’avignî dai presonîrs politics malâts

Intal Paîs Basc a van indenant lis mobilitazions par difindi i dirits dai presonîrs politics, in particolâr par domandâ che chei di lôr che a patissin di une malatie mortâl o invalidante a puedin finî di scontâ la pene a cjase lôr cemût che e previôt la leç spagnole. A son 14 i presonîrs bascs che si cjatin ta cheste situazion, ma che no son stâts ancjemò liberâts. A inviâ lis mobilitazions al jere stât il câs di Iosu Uribetxebarria, presonîr basc cuntun cancar in fase terminâl. La sô vicende e il siopar de fam che al veve puartât indenant par dôs setemanis cundut des sôs condizions critichis di salût, a son stâts compagnâts di diviersis manifestazions di place, di siopars de fam e di altris formis di proteste dentri e fûr des presons, e de poie manifestade di cetancj rapresentants des associazions, des istituzions, dai sindacâts e de glesie. Ae fin il judiç incjariât di esaminâ il câs al à decidût di decretâ par Uribetxebarria la libertât condizionâl, misure che però no je stade rindude daurman operative in spiete di viodi se a saran presentâts ricors. Chest bloc dal proviodiment al è stât judicât iregolâr dai avocats dal presonîr basc e al à puartât a gnovis manifestazions di proteste. Une proteste che però e podarès lâ indenant ancjemò a dilunc se, dongje dal câs specific di Iosu Uribetxebarria, no si proviodarà a rispietâ la leç ancje par chei altris 13 presonîrs bascs che si cjatin a vivi une situazion similâr.

Font: Naiz:, 31/08/12 e 01-02/09/12; Gara, 31/08/12

Macedonie: fruts rom discriminâts intai percors educatîfs

In Macedonie cetancj fruts rom a vegnin metûts in scuelis “speciâls” cence che i gjenitôrs a sedin informâts in maniere corete su lis consecuencis che cheste situazion e pues vê sul avignî dai lôr fîs. Cun di fat, une volte jentrâts in chest percors educatîf al è une vore dificil tornâ aes scuelis “normâls” e, piês ancjemò, cui che al jes des scuelis “speciâls” si ricjate a vê oportunitâts professionâls un grum limitadis. La denuncie e rive dal Centri european pai dirits dai rom (ERRC) che, adun cul Centri Nazionâl dai Rom, al à davuelt une inchieste su chest teme di dulà che al ven fûr che, no dome ai gjenitôrs dai fruts rom ur ven dade une informazion une vore parziâl sul argoment, ma che dispès a son i funzionaris scolastics a inviâ lis proceduris di trasferiment dai fruts intes scuelis “speciâls” prime ancjemò che i gjenitôrs a vegnin sintûts in proposit. Lis organizazions pai dirits dai rom a domandin duncje aes autoritâts de Macedonie di meti fin a chest compuartament discriminatori e inviâ invezit des politichis pe integrazion reâl des comunitâts rom che a rapresentin une part significative de popolazion dal paîs.

Font: ERRC, 30/08/12

Sardegne: un sburt pal ûs dal sart intai traspuarts

La iniziative dal comandant e dai assistents di svol di un avion de compagnie Ryanair in servizi intal aeropuart di Casteddu / Cagliari di doprâ ancje la lenghe sarde intes comunicazions di servizi pai passizîrs e je stade cjapade cun entusiasim no dome des personis che a jerin su chel svol, ma ancje di cui che in Sardegne al lavore pe promozion de lenghe proprie de isule. Il Comitadu pro sa limba sarda al à domandât che cheste pratiche e deventi la normalitât su ducj i svoi che a rivin in Sardegne e che e sedi slargjade ancje a chei altris mieçs di traspuart, a tacâ des compagniis di navigazion e des autoliniis internis. Il comitât al à ancje domandât aes autoritâts competentis di proviodi a garantî che dute la segnaletiche e la cartelonistiche che si cjate intai lûcs pe rivade e pe partence dai passizîrs a sedin ancje par sart.

Font: Comitadu pro sa limba sarda, 30/08/12

Bretagne: l’insegnament bilengâl si slargje ancjemò di plui

Intant di une conference stampe che si è tignude ai 29 di Avost l’Ufici public de lenghe bretone al à comunicât i dâts sul insegnament bilengâl, là che il stes Ufici al à davuelt une funzion promozionâl impuartante. Cussì, intal an scolastic 2012/2013, a saran 14 i sîts gnûfs che a ufrissin un insegnament bilengâl o a imersion: 7 intal setôr public, 4 inta chel privât e 3 intal sisteme Diwan, o sei lis scuelis a imersion associadis al sisteme public. Si trate dal aument plui impuartant di almancul dodis agns incà e, chel istès, nol rive ancjemò a cuvierzi ad in plen la domande che e rive dal teritori. Lis gnovis vierziduris a interessin ducj i dipartiments storics bretons, ancje chel de Loire Atlantiche che, di un pont di viste aministratîf, al è fûr de Regjon Bretagne. I fruts che a frecuentaran chestis scuelis a son stimâts tra i 600 e i 800 e a puartaressin il totâl di chei che a studiin par breton a sfiliâ i 15 mil.

Font: Agence Bretagne Presse, 30/08/12

Man: progjet par imparâ il manx cun skype

Il manx al è la plui piçule lenghe de famee goideliche, o sei chê che e cjape dentri il gaelic irlandês e chel scozês, e a fevelâle a son cualchi centenâr di personis inte isule di Man. L’interès par cheste lenghe però al va une vore plui innà de isule e si cjatin personis che a vuelin studiâle intai Stâts Unîts, in Canadà, in Australie e in altris paîs. La maniere miôr par imparâ e je chê di podê esercitâsi a fâ conversazion, ma viodûts i numars e lis distancis al è dificil inmaneâ des classis ancje par chescj students. Par vignîur incuintri, dut câs, i funzionaris linguistics de isule di Man a son daûr a imbastî un scheme educatîf a distance là che insegnants e students a podaran esercitâ lis lôr competencis linguistichis par mieç de rêt skype.

Font: BBC, 30/08/12

Sardegne: lenghe sarde discriminade inte justizie

Il judiç pes indagjins preliminârs incjariât di seguî il câs di Salvatore Meloni, arestât che nol è tant par reâts di nature fiscâl (ma che pai siei difensôrs a saressin invezit di nature politiche), i à dineât il dirit di davuelzi l’interogatori di garanzie in lenghe sarde. Cundut che il codiç di procedure penâl al garantìs chest dirit ai membris des comunitâts di minorance ricognossudis e che la leç statâl 482/99 e ricognòs chest status ancje al sart, il judiç si è poiât suntune sentence dade fûr che nol è tant de Cort di Cassazion che e trate il sart di dialet. La decision dal judiç, compagnade di un siopar de fam de bande dal imputât, e à jevât la proteste di diviers sogjets atîfs inte difese dai dirits linguistics. Tra chescj ancje il Comitadu pro sa limba sarda che al à invidât dutis lis fuarcis politichis e culturâls de isule a mobilitâsi par fâi cuintri ai atacs, simpri plui pençs, che a rivin des istituzions statâls intai confronts de lenghe sarde.

Font: Comitadu pro sa limba sarda, 21/08/12

Ongjarie - Romanie: acusis su la tutele des minorancis

E cres la tension jenfri Ongjarie e Romanie cun scambis di acusis simpri plui pençs su cemût che a vegnin tratadis lis minorancis. Za di timp il guvier ongjarês al è impegnât a imbastî contats cu la part plui a diestre de comunitât magjare che e vîf in Romanie. Chest compuartament però nol à dome jevât lis critichis des autoritâts di Bucarest, ma ancje chês dai partîts moderâts che a rapresentin la maiorance de comunitât ongjarese che e vîf in Transilvanie. In Romanie i magjârs a son almancul un milion e mieç e il lôr pês si fâs sintî ancje sul plan politic e istituzionâl, di chi duncje lis preocupazions dal guvier rumen par chescj tentatîfs dal esecutîf ongjarês di condizionâ la minorance. Il gnûf ministri pai forescj de Romanie, Titus Corlatean, al à difindût lis politichis dal so guvier pes minorancis e al à lamentât il fat che ae minorance rumene che e vîf in Ongjarie no vegnin garantîts i stes dirits che a gjoldin i ongjarês de Romanie: par esempli no je garantide une rapresentance parlamentâr pe minorance e si àn grues problemis cu la presince dal rumen inte educazion e intai media. La segretarie di stât ongjarese vicjarie, Zsuzsanna Repas, e à rispuindût che la rapresentance parlamentâr pe minorance rumene e sarà garantide a partî des elezions dal 2014 e che i 8 mil rumens che a vivin in Ongjarie a àn garantidis formis di autoguvier che no cjatin pareli in Romanie.

Font: Finugor, 21/08/12

Cornualie: conservadôrs al atac dal progjet di Assemblee nazionâl

Il procès di devoluzion che al à permetût di tornâ a meti in vore un Parlament in Scozie e di inviâ une Assemblee nazionâl in Gales, nol à vût invezit nissune consecuence pe Cornualie, la piçule nazion celtiche che dal pont di viste aministratîf e ven cjapade dentri de Ingletiere. Il partît indipendentist Mebyon Kernow za di agns al è in vore par otignî une Assemblee nazionâl daûr dal model galês e intal 2001 al veve ancje presentât une petizion al guvier britanic poiade des firmis di 50 mil personis. Profitant des politichis di austeritât metudis in vore ancje intal Ream Unît i deputâts conservadôrs elets in Cornualie a cirin di cumò di sierâ in maniere definitive chest progjet acusât di costâ masse. La idee di une Assemblee nazionâl pe Cornualie – a àn dite George Eustice e Sarah Newton – e je aromai fûr de agjende politiche e ce che si à di fâ al è lavorâ par trasferî cualchi competence in plui aes aministrazions locâls. Pai indipendentiscj di Mebyon Kernow la idee e reste invezit simpri di atualitât parcè che e permetarès ae Cornualie di decidi di bessole lis prioritâts di intervent e di fâlu cun plui risorsis a disposizion di ce che cumò a àn i diviers ents locâi cornics.

Font: BBC, 20/08/12

Russie: un comissari pes nazionalitâts dentri de fin dal an

Lis tensions tra lis diviersis nazionalitâts che a formin la Federazion Russe, i scuintris di stamp etnic e chei tra nazionaliscj rus e membris des minorancis a varessin di jessi il cjamp di intervent pal comissari pes nazionalitâts, une gnove figure istituzionâl che – daûr des informazions dadis dal ufici di presidence de Federazion – al varès di nassi in Russie dentri de fin dal an. La propueste e cjape il puest di un altri progjet, o sei chel di meti sù un ministeri pai afârs des nazionalitâts, che invezit nol à cjatât avonde consens par deventâ realtât. Il Comissari, a àn spiegât i promotôrs dal progjet, al varà a disposizion personâl in dutis lis regjons de Federazion, al varà un ciert nivel di indipendence di azion e al sarà in contat diret cul president rus. No mancjin però i critics che si domandin cemût che une persone sole e podarà discrosâ problemis cussì complès e slargjâts che, in cierts câs, si strissinin indenant zaromai di agns.

Font: RBTH, 17/08/12

Paîs Basc: la ultime bataie di Iosu Uribetxebarria

Di là di cemût che si sierarà, la storie di Iosu Uribetxebarria e à mostrât ancjemò une volte cemût che lis autoritâts spagnolis si compuartin cuant che a àn a ce fâ cu la cuistion basche. Cun di fat la leç spagnole e previôt che, in câs di une forme di malatie mortâl o une vore serie, un presonîr al finissi di scontâ la sô pene a cjase sô. I esams medics a àn confermât che Iosu Uribetxebarria, impresonât cu la acuse di jessi un membri de organizazion armade basche ETA, al à un cancar che al è aromai in fase terminâl ma, chel istès, lis autoritâts spagnolis no àn mostrât nissune intenzion di fâlu saltâ fûr de preson: un compuartament che nol à nissune justificazion juridiche, ma che al palese dome l’acaniment cuintri dai presonîrs bascs. Par chest, cundut des sôs condizions di salût precariis, Iosu Uribetxebarria al à inviât un siopar de fam par denunciâ cheste situazion che e rivuarde ancje altris presonîrs bascs. Ricoverât cumò intal ospedâl di Donostia in condizions critichis, il presonîr al à cjatât la solidarietât di cetancj di lôr.

Stât spagnûl: servizis gnûfs su Google par basc, catalan e galizian

Il servizi di ricercje vocâl di Google, in vore inte telefonie mobile cun sisteme operatîf Android, al è cumò disponibil ancje par basc, catalan e galizian. In dì di vuê a son in dut 42 lis lenghis che chest servizi al è disponibil, 13 a son chês zontadis intal mês di Avost. Tra di lôr, in plui des trê lenghis minorizadis principâls feveladis intal stât spagnûl, o cjatìn ancje ongjarês, portughês, rumen, serp e svedês par un totâl di sù par jù cent milions di gnûfs utents potenziâi.

Font: Galicia Hoxe, 17/08/12; Diario Vasco, 17/08/12

Gales: disubidience civîl cuintri de discriminazion linguistiche

A son 35 i dîs di preson che Jamie Bevan al è daûr a scontâ par vêsi refudât di paiâ une multe che al veve cjapât pe sô partecipazion a di une azion in difese de lenghe galese. No je une cuistion di bêçs, al à spiegât, ma di rispiet dai dirits linguistics. Cun di fat, sei la documentazion che i è rivade dai uficis judiziaris, sei buine part dal procediment cuintri di lui a jerin dome par inglês. Denant de impussibilitât di frontâ il procediment judiziari inte sô lenghe proprie, Jamie Bevan al à decidût di no paiâ la multe e di fâ dal so câs un at di denuncie cuintri de discriminazion che la lenghe galese e cui che le fevele si cjatin a frontâ intal cjamp de justizie. Une bataie, la sô, che e va indenant ancje inte preson di Caerdydd / Cardiff là che cumò si cjate sierât. Cun di fat, il zovin militant galês, refudantsi di firmâ i modui che a jerin dome par inglês, si è cjatât disprivât di diviers dirits che i spietin ai presonîrs. A poiâ la sô azion di disubidience civîl e je la Societât pe Lenghe Galese (Cymdeithas yr Iaith Gymraeg) che e domande aes istituzions judiziariis di rispietâ i dirits linguistics dai galês, e aes istituzions e aes fuarcis politichis galesis di intervignî par cambiâ cheste situazion. Par cumò, a pandi la lôr solidarietât a Jamie Bevan, a son stâts i dirigjents dal partît nazionalist Plaid Cymru e diviers rapresentants laburiscj.

Font: Cymdeithas yr Iaith Gymraeg, 13 e 16/08/12

Gales: consultazions su la lenghe galese te sanitât e te tv

La presince de lenghe galese inte sanitât e inte radiotelevision publiche e je al centri di dôs consultazions publichis. Di une bande e je la inchieste su la situazion de lenghe galese intai servizis sociosanitaris publics, la prime inviade de comissarie pe lenghe Meri Huws. Cun di fat a son stâts denunciâts diviers câs là che no dome il personâl sanitari nol jere in stât di comunicâ cui pazients inte lôr lenghe proprie, ma si rivave fintremai a cridâi al personâl e ai pazients che a fevelavin tra di lôr par galês. Sul ûs de lenghe inte sanitât publiche lis posizions in cjamp a son une vore diviersis: si va di cui che, tant che la Associazion Mediche Britaniche, al dîs che il galês nol è prioritari e che lis competencis linguistichis domandadis a limitin il reclutament dal personâl, a cui che – al è il câs de Societât pe Lenghe Galese (Cymdeithas yr Iaith Gymraeg) – al spieghe che un servizi dât intune lenghe divierse di chê dal pazient nol è dome un servizi fat mâl, ma ancje une violazion dai dirits umans.

Paîs Catalans: sburt ai progjets di imprese pal catalan

A son 34 i progjets di imprese che a promovin l’ûs de lenghe catalane che il guvier de Catalogne al à decidût di finanziâ, di chescj 31 a integnin il cjamp des gnovis tecnologjiis e 3 chel dai servizis pal public. Si trate di une gnove linie di intervent decidude dal esecutîf catalan l’an passât e che cumò e jentre inte fase operative. La plui part dai progjets imprenditoriâi finanziâts a rivuardin aplicazions par telefonie celulâr e tablets, programs informatics gjestionâi e di svilup; si àn po ancje guidis turistichis audiovisuâls, programs di valutazion di doprâ intal cjamp de formazion, videozûcs e altri ancjemò.

Font: Generalitat de Catalunya, 08/08/12

Nenetsie: prime propueste di leç su la lenghe native

Un grup di esperts al à metût adun une propueste di leç su la tutele e la promozion des lenghis nativis che e varès di rivâ avonde in curt al esam de aministrazion de regjon autonome de Nenetsie, inte Federazion Russe. Si trate dal prin proviodiment che al interven in maniere organiche ta chest cantin. Il test al previôt che inte areis là che e vîf la comunitât dai nenets la lôr lenghe e gjoldi di une situazion di couficialitât cul rus. La propueste e interven intal ûs dal nenets intes aministrazions publichis, inte toponomastiche, inte cartelonistiche e inte educazion.

Font: Finugor, 08/08/12

Cornualie: gjavade la Ingletiere de promozion turistiche

Lis mobilitazions dai ativiscj locâi e dal partît indipendentist Mebyon Kernow a àn rivât a mudâ la politiche de agjenzie Visit Cornwall che si ocupe de promozion turistiche de Cornualie. Lis gnovis diretivis rivadis al personâl dal ent a disin che intal materiâl promozionâl dedicât a cheste piçule nazion celtiche no si varà di fevelâ plui di “contee”, peraule che e riclame la organizazion aministrative inglese, ma dome di “regjon” o ben di “ducât”, titul che la Cornualie e à mantignût dopo de fin de sô indipendence. Daûr de stesse logjiche, dal materiâl turistic si varà di eliminâ ogni riferiment ae Ingletiere. La gnove e je stade cjapade cun sodisfazion dai moviments che si batin pe difese de identitât corniche e che a rivendichin la indipendence culturâl e nazionâl de Cornualie, intant che la dirigjence di Visit Cornwall e à spiegât che la decision e je stade cjapade par evitâ di stiçâ la popolazion locâl cuntune terminologjie che no i agrade.

Font: BBC, 07/08/12

Stâts Unîts: petizion par vierzi une scuele gaeliche a New York

La maiorance dai irlandês no vîf in Irlande, ma intai Stâts Unîts, là che a son passe 40 milions di personis che a declarin di jessi di divignince irlandese, 400 mil di lôr a vivin a New York. Daûr dal ultin censiment, dome inta cheste citât, a son 4 mil chês che a fevelin par gaelic irlandês. L’interès par cheste lenghe al va dilunc a cressi e no dome framieç de comunitât di divignince irlandese. Si calcole che, in dì di vuê, a sedin plui di 100 mil lis personis che a son daûr a studiâle intai Stâts Unîts. A front di cheste situazion e je stade inviade une petizion par domandâ ae aministrazion comunâl di New York di meti sù ancje ta chê citât une Gaelscoil, ven a dî une scuele là che dutis lis materiis a vegnin insegnadis par gaelic. Tal zîr di pocjis zornadis la petizion e je za stade sotscrite di centenârs di lôr, ma l’obietîf al è chel di cjapâ sù almancul uns 20 mil firmis. Di là dal risultât de iniziative, al è dal sigûr un segnâl di atenzion impuartant che al mostre che une lenghe e pues jessi une vore di atrat, ancje se si cjate a vivi intune condizion di minorizazion.

Font: Gaelport, 07/08/12

Scozie: il pont su la ativitât de agjenzie pal gaelic

La agjenzie Bòrd na Gàidhlige e à presentât al Parlament scozês i dâts su lis ativitâts davueltis intal ultin an par sostignî sul plan organizatîf e finanziari lis istituzions, lis organizazions e lis comunitâts impegnadis inte promozion e inte difusion dal gaelic. A cjaval tra il 2011 e il 2012 i finanziaments de agjenzie a àn garantît la ativitât di 256 lavoradôrs dal setôr e di cuasi dusinte grups di comunitât. Pôc mancul di 750 mil sterlinis a son ladis par judâ i progjets svilupâts di 74 istituzions publichis, massime aministrazions locâls. Une buine part dai progjets e à interessât percors educatîfs par fruts e par adults, ma ancje iniziativis di comunicazion istituzionâl e di difusion de cussience linguistiche. Il sfuarç operatîf principâl però – a àn spiegât i rapresentants dal Bòrd na Gàidhlige intant de audizion – al è stât chel di meti adun il gnûf plan nazionâl pal gaelic che al va a cuvierzi la dade 2012 – 2017.

Font: Bòrd na Gàidhlige, 01 e 07/08/12

Paîs Catalans: il catalan al è doprât te maiorance des buteghis di Barcelone

Il Comun di Barcelone e la Union dai Consumadôrs de Catalogne a àn fat cognossi i risultâts de prime inchieste unitarie su la situazion dal cumierç inte capitâl catalane e sul rispiet des normativis che a regolin chest setôr. Tra i cantins tocjâts si à ancje chel de politiche linguistiche, viodût che la leç e previôt che intes buteghis scritis internis e esternis, materiâi informatîfs, modulistiche, scontrins, segnalazions a vedin di jessi ancje par catalan. Par chel che al rivuarde lis scritis principâls che a comparissin in vitrine o tai reparts internis, al ven fûr che intal 19,2% dai câs il catalan al mancje. Tal câs de documentazion pai clients – des informazions contratuâls aes faturis – il catalan al mancje intal 34% dai câs. Chel istès, a comentin i responsabii de inchieste, si trate di dâts positîfs dal moment che no si à mai fatis pressions fuartis pal rispiet di cheste normative.

Font: La Vanguardia, 27/07/12