Ai
12 di Jugn si à sierade, denant dal tribunâl suprem di Madrid, la
prime part dal procès cuintri dai leaders indipendentiscj catalans
che e je lade indenant par cuatri mês, cun 52 udiencis e 422
testemonis. Il confront tra acusis e difesis no à però mudât la
situazion dal moment che lis domandis di condane (o di assoluzion) a
son restadis lis stessis fatis indenant sul principi. In particolâr
il public ministeri al domande 25 agns di preson par Oriol Junqueras,
17 agns par Jordi Sànchez, Jordi Cuixart e Carme Forcadell, 16 agns
par Raül Romeva, Jordi Turull, Josep Rull, Joaquim Forn e Dolors
Bassa, e 7 agns par Meritxell Borràs e Santi Vila.
La ultime zornade
e je stade ancje la ocasion pai undis imputâts par tornâ a fâ
sintî la lôr vôs. Ducj, ancje se cun modalitâts e tonalitâts
diferentis, a àn marcât il fat che si trate di un procès politic
dal moment che se a son sot acuse al è dome pes ativitâts
politichis che a àn puartât indenant. L'intervent plui significatîf
al è stât chel dal president dal Òmnium,
Jordi Cuixart, che al à rivendicât la disubidience civîl come
strument legjitim e democratic di proteste metint duncje in evidence
cemût che la sentence dal procès e pesarà sul nivel di democrazie
dal stât spagnûl. In curt i magjistrâts a saran clamâts a decidi
su lis domandis di liberazion condizionâl dai imputâts. Pe
sentence, invezit, probabil che si varà di spietâ chest Autun.
Intant
il tribunâl suprem nol à pierdût timp tal decidi di no autorizâ
Oriol Junqueras, elet che nol è tant al Parlament european, a
partecipâ ai ats par assumi la incarghe di eurodeputât, incarghe
che i da dirit ae imunitât e che duncje e met a risi dute la tignude
dal procès. A chest pont Junqueras al pues sei domandâ un intervent
dal Parlament european in difese dal so status di eurodeputât, sei
presentâ une denuncie cuintri dal tribunâl par abûs di podê, dal
moment che i dinee dai dirits politics che, ancje se imputât, nol à
pierdût.
Font:
VilaWeb,
13-14/06/19;
Naiz:, 13-14/06/19
Nessun commento:
Posta un commento