Irlande: e monte la rabie tal Nord pal bloc de leç sul gaelic

I acuardis di pâs pe Irlande dal Nord dal 1998 (Good Friday Agreement) a previodevin ancje misuris concretis par promovi e par tutelâ l’irlandês. Il perfezionament di chei acuardis intal 2006 (Saint Andrews Agreement) al impegnave il guvier britanic e chel nordirlandês par fâ buine une leç organiche pal gaelic irlandês. Intal 2016 dut câs, denant di une inazion durade agns a dilunc, si veve inviât un moviment popolâr trasversâl une vore atîf e partecipât che al domandave il rispiet dai dirits linguistics e la aprovazion di une normative specifiche. Tal Zenâr dal 2020 la fuarce de mobilitazion e veve puartât i partîts nordirlandês a sotscrivi un pat di legjislature (New Decade, New Approach) che al previodeve une leç pal irlandês e altris misuris pe tutele e pe protezion dal patrimoni linguistic e culturâl de Irlande dal Nord dentri di cent dîs.

A plui di un an di distance di chel impegn, cu la normative linguistiche restade su la cjarte e denant de impussibilitât – par vie de pandemie – di tornâ a jemplâ lis stradis cun miârs di personis, lis organizazions pal irlandês, a tacâ di Conradh na Gaeilge, a àn puartât la lôr proteste denant dal comitât interstatâl che al viôt dal rispiet e de integrazion dai acuardis di pâs. La violazion continuative dai impegns cjapâts – a àn dite – e je une dimostrazion di dispresi par ducj chei che a fevelin o che a àn a cûr la lenghe irlandese. I partîts che a son rapresentâts intal comitât a àn sotscrit un document unitari par domandâ al esecutîf nordirlandês e ai guviers di Londre e di Dublin che a fasin la lôr part par che la normative e jentri in vore cence altris ritarts.

Font: CnaG, 02/03/21; BBC, 03/03/21