A
son diviers i candidâts di moviments rapresentatîfs des comunitâts
minorizadis che a son stâts elets intal Parlament european in
ocasion des votazions che si son tignudis intai diviers stâts
membris de UE tra i 23 e i 26 di Mai. La vicende che dal sigûr e à
fat plui scjas e je stade la elezion di trê dai rapresentants plui
significatîfs dal indipendentisim catalan, o sei Oriol Junqueras,
che si cjate di plui di un an in regjim di preson preventive, Carles
Puigdemont e Toni Comín, che si cjatin in esili inte Belgjiche. Il
prin al è stât elet cuntune liste che e meteve adun la çampe
nazionalitarie basche, catalane e galiziane e che e à puartât ancje
ae elezion di Diana Riba (simpri di ERC) e di Pernardo Barrena (EH
Bildu). Puigdemont e Comín si
presentavin invezit cu la liste Lliures
per Europa. Intal stât spagnûl a son
stâts elets al Parlament european ancje Izaskun Bilbao dal PNV e
Ernest Urtasun di ICV.
Par chel che al rivuarde il Ream Unît, il SNP
al à cressût ancjemò la sô rapresentance a Bruxelles/Strasburc cu
la elezion di trê dai siei rapresentants (la volte stade a ‘nt
veve elets doi), o sei metât dai elets scozês, intant che i galês
dal Plaid Cymru
a confermin l’europarlamentâr che a vevin. In Irlande dal Nord, il
front unionist al manten un elet intes filis dal DUP, intant che
l’UUP al piert il puest che al veve a vantaç dai moderâts dal
Alliance Party;
i nazionalitaris dal Sinn Féin
a confermin un elet intal Nord e a àn un elet inte Republiche di
Irlande. Intal stât francês i risultâts positîfs de liste Europe
Ecologie les Verts, che za di agns e je
leade ae federazion des Regjons e dai Popui Solidaris, e à puartât
ae elezion dal deputât cors François Alfonsi (PNC) che te isule al
è stât poiât dal 22% dai eletôrs. Intal stât talian si conferme
la elezion di un rapresentant dal partît autonomist sudtirolês SVP.
Par chel che al rivuarde i paîs de Europe dal Est, la Union
Democratiche dai Magjârs de Romanie (UDMR) e manten i siei doi
europarlamentârs, intant che i partîts de minorance ongjarese in
Slovachie a pierdin la rapresentance che a vevin. A confermin un
deputât parom i partîts de minorance svedese in Finlande (SFP/RKP),
di chê taliane in Cravuazie (DDI/IDS), di chê polache in Lituanie
(LLRA) e di chê russe in Letonie (LKS). Ta cheste republiche
baltiche o vin ancje doi elets intes filis de liste Harmonia,
une vore votade de comunitât russofone. In Bulgarie invezit il
Moviment pai Dirits e pes Libertâts (DPS), che al racuei il vôt de
minorance turche e dai rom, al piert un dai cinc elets che al veve
cjapât la volte stade. Câs particolâr al è po chel de Belgjiche
là che cuasi ducj i partîts a fasin riferiment a di une comunitât
linguistiche specifiche – flamande, valone o gjermanofone che e
sedi – e là che dome un dai vincjeun parlamentârs elets al rive
di un partît a dimension statâl. Framieç di chescj elets, chei che
a aderissin ae Aleance Libare Europeane (EFA) – federazion che e
met adun une buine part dai partîts nazionalitaris e regjonaliscj de
Europe – a son dodis (2 di ERC, 1 di EH
Bildu, 3 dal SNP, 1 dal PC, 1 di R&PS,
3 dal N-VA e 1 de LKS), un di plui de legjislature stade.
Font:
Alta Frequenza, 26/05/19; BBC,
26-27/05/19; EFA, 27/05/19;
Jornalet, 29/05/19
Nessun commento:
Posta un commento