La mobilitazion in Corsiche e larà indenant, a partî di une gnove manifestazion di place fissade pai 3 di Avrîl a Aiacciu / Ajaccio (che e à tornât a puartâ par strade miârs di personis). La decision e je stade cjapade dal Coletîf nassût ai 9 di Març dopo de agression a Yvan Colonna par meti adun i moviments zovanîi, politics e sociâi leâts ae galassie nazionalitarie. Lis rivendicazions che a puartin indenant cu la lôr azion a restin lis stessis concuardadis sul imprin, ven a dî: veretât e justizie par Yvan Colonna, libertât pai presonîrs politics e ricognossiment dal popul cors. Lis promessis fatis indenant intant de visite su la isule dal ministri pal interni francês, Gérald Dermanin, no son stadis avonde par fermâju dal lâ indenant. Cheste volte però si àn vudis posizions diviersis dentri dal coletîf. Cun di fat, Femu a Corsica – il partît di maiorance relative che al vuide lis istituzions isolanis – al varès vût miôr evitâ la place in spiete di viodi cemût che a van i incuintris istituzionâi prometûts par chest mês di Avrîl dal guvier francês. Dut câs i scuintris tra zovins e fuarcis di polizie che a vevin segnât lis primis setemanis de proteste si son srarîts (dopo di diviers dîs di calme a son tornâts a scomençâ fûr des casermis dai reparts speciâi tignûts di responsabii di vê cjantât la “Marsiliese” juste cuant che a jerin daûr a davuelzisi i funerâi di Yvan Colonna).
Ai 25 di Març si son tignûts a Cargèse, paîs di divignince di Colonna, i funerâi dal militant indipendentist cors cu la partecipazion di passe 4 mil personis e di delegazions rivadis ancje di Sardegne, Bretagne, Paîs Catalans e Paîs Basc. Tra l’altri, propit intal Paîs Basc dal Nord sot aministrazion francese, la dì dopo si à tignude une manifestazion a Baiona / Bayonne là che uns 500 personis a àn rindût omaç a Colonna e a àn domandât une soluzion politiche dal conflit.
Nessun commento:
Posta un commento