Si varà di spietâ dopo des elezions legjislativis francesis pe prime riunion tra i rapresentants des istituzions corsis e di chês francesis par discuti dal avignî de isule, a partî de domande di autoguvier che zaromai di agns e ven fate indenant dal esecutîf e de Assemblee corse. La vierzidure di un procès di discussion tra il stât centrâl e lis istituzions corsis e jere stade prometude dal ministri pal interni francês, Gérald Darmanin, ancjemò in Març intant de sô visite su la isule tal doman des manifestazions massivis e dai scuintris che a vevin inflamât la Corsiche dopo de agression mortâl al militant indipendentist Yvan Colonna. Sul imprin si veve prometût la partence dal confront istituzionâl subite dopo des elezions presidenziâls; cumò invezit si lu à rimandât a dopo des legjislativis, par altri cence fissâ nissune date precise. La gnove e à tornât a jevâ il marum su la isule là che e cres la pôre che a Parîs si vedi chê di lâ indenant a rimandâ cu la sperance di inflapî la mobilitazion dai cors.
Une altre gnove negative si riferìs ae domande di acès a di un regjim di libertât condizionade pai doi militants cors, Pierre Alessandri e Alain Ferrandi, acusâts cun Colonna di formâ il grup di fûc che al veve copât il prefet Claude Erignac. Al è dal 2017 che i doi a varessin vût dirit a misuris detentivis alternativis ma dome dopo de agression mortâl a Colonna e aes violencis su la isule ur jere stât gjavât il regjim di massime sigurece (DPS, détenu particulièrement signalé) e a jerin stâts spostâts intune preson corse. La domande di semilibertât di Ferrandi e jere stade acetade des autoritâts penitenziariis ma, ai 24 di Mai, la cort di apel di Parîs je à dineade su domande de procure antiteroriste. Il stes al riscje di sucedi pe domande di Alessandri aprovade in prime istance ai 12 di Mai. Ancje su chest front duncje lis promessis rivadis des istituzions francesis intai moments plui cjalts de crisi corse al pâr che no saran mantignudis.
Font: CorseNetInfos, 24/05/22
Nessun commento:
Posta un commento