Ancje l’esecutîf dal Gwynedd al à fat bon il plan di un milion e 100 mil sterlinis che al previôt di slargjâ la presince dai centris a imersion in lenghe galese. Si trate di struturis educativis indreçadis ai arlêfs des primariis e des secondariis che no àn familiaritât cul galês e che, par mieç di chescj centris, a puedin cjapâ sù chês competencis che i permetaran po di frecuentâ lis scuelis bilengâls cence restâ indaûr. In particolâr si previodin lezions imersivis par cuatri dîs par setemane par une dade che e va tra lis vot e lis dîs setemanis. Intant des lezions a son seguîts di personâl di pueste par judâju tes dificoltâts che a puedin cjatâsi denant. La riorganizazion dai centris e previôt la creazion di dôs struturis gnovis, la sierade di une e il potenziament di une altre. Tal Setembar dal 2022, ae fin dal percors, i centris a saran sîs: Bangor, Dolgellau, Eifionydd (Porthmadog), Llangybi, Maesincla (Caernarfon) e Tywyn.
Nessun commento:
Posta un commento