12/02/21

Irlande: e torne a montâ la tension intal Nord

Un dai elements di fonde dai acuardis di pâs pe Irlande dal Nord al jere di eliminâ i controi dilunc dal confin che al divît in doi la isule. La jessude dal Ream Unît de Union Europeane e meteve risi il rispiet di cheste cundizion e par chest al è stât metût jù il cussì clamât protocol pe Irlande dal Nord che, in buine sostance, al previôt che i controi doganâi de Union no vegnin fats dilunc dal confin tra la Republiche di Irlande e lis Sîs Conteis dal Nord ma tai puarts nordirlandês dulà che a rivin lis marcjanziis de Grande Bretagne.

Cui 2 di Fevrâr però i funzionaris europeans incjariâts di supervisionâ i controi a àn vût di bandonâ la lôr ativitât par vie des menacis e des azions intimidatoriis metudis in at di grups lealiscj nordirlandês che no acetin nissune forme di separazion des Sîs Conteis dal rest dal Ream Unît. Dal gnûf ativisim dai estremiscj lealiscj a àn profitât il guvier di Londre e i politics unioniscj par domandâ une revision dal protocol. Une pretese che e ven refudade cun fuarce sei dal guvier di Dublin che dal front republican nordirlandês là che al monte il marum pes violazion e pes menacis ai acuardis di pâs.

Font: BBC, 05/02/21

Nessun commento: