Cundut des limitazions in at par fâi cuintri ae pandemie, a jerin uns 2 mil lis personis che si son dadis adun ai 30 di Zenâr a Corti par domandâ il rispiet dai dirits dai presonîrs politics cors. A convocâ la mobilitazion a son stadis la organizazion Ora di u Ritornu e la sezion locâl de Leghe pai Dirits dal om cun riferiment al câs di Pierre Alessandri e Alain Ferrandi che a son daûr a scontâ une condane al ergastul a Poissy, te regjon parigjine, in regjim di DPS (détenu particulièrement signalé) o sei chel di massime sigurece.
Daûr di ce che e previôt la leç, dopo 22 agns
passâts in galere, a varessin za vût di gjoldi di une serie di
dirits ricognossûts ai presonîrs comuns, a partî de pussibilitât
di scontâ il rest de pene tune preson dongje di cjase. Lis
autoritâts carcerariis si son za declaradis a pro de eliminazion dal
regjim di massime sigurece che al impedìs il svicinament a cjase. A
blocâ cheste pussibilitât al è però il guvier francês, cul prin
ministri che tal Dicembar stât al à refudât di gnûf di gjavâur
la condizion di DPS. La decision e à discjadenât une proteste
massive in Corsiche là che la cuistion dai militants nazionaliscj
impresonâts e je une vore sintude. La Assemblee corse e à votât ae
unanimitât une mozion pal rispiet dai dirits che la leç e ricognòs
ai presonîrs e il stes a àn fat plui di une trentine di
aministrazions locâls. La manifestazion popolâr dai 30 di Zenâr e
je duncje dome la ultime di une rie di azions a pro dai militants
impresonâts.
Font: CorseNetInfos, 30/01/21
Nessun commento:
Posta un commento