Paîs Catalans: gnûf passaç pal referendum su la indipendence

Ai 15 di Zenâr il Parlament catalan al à votât cuntune maiorance di cuasi i doi tierçs (87 deputâts su 135) une propueste di leç di inviâ al congrès dai deputâts spagnûl par che i trasferissi lis competencis par celebrâ un referendum su la indipendence. Chê dal passaç di competencis par tignî un referendum e je une pussibilitât previodude de Costituzion spagnole, ma e je destinade a scuintrâsi cul no da assemblee spagnole là che PP, PSOE e UpyD a àn za fat savê di jessi cuintri a ogni ipotesi di referendum. Si trate de ultime pussibilitât legjislative ametude par celebrâ la consultazion, dopo la uniche strade pussibile e restarà chê de proclamazion unilaterâl di indipendence de bande de Catalogne. Intal Parlament catalan la propueste di leç e je stade votade di CiU, ERC, ICV-EUiA, ma ancje di trê deputâts socialiscj che a son lâts cuintri des indicazions di vôt dal lôr partît. Cuintri a àn invezit votât chei altris socialiscj e i deputâts dai doi partîts de diestre spagnoliste, o sei PP e Ciutadans. I indipendentiscj de CUP a àn sielzût la strade de astension, ma dome par vie che no vuelin che i si domandi a Madrid nissun permès par celebrâ il referendum.
Il vôt al à mostrât a clâr la crevadure dentri dai socialiscj catalans sul teme de autodeterminazion. Cun di fat, dongje dai trê deputâts che cul lôr vôt a àn sfidât i ordins dal partît e la espulsion, altris si son za dimetûts o a àn decidût di dimetisi dal esecutîf dal partît par protestâ cuintri de linie imponude, altris ancjemò a àn dât fûr un manifest che al ponte a dâi vôs a chei che a vuelin un partît socialist gnûf e pardabon catalan.

Font: VilaWeb, 16-17/01/14; Naiz:, 16/01/14; El País, 16/01/14