Paîs Basc: passe 130 mil in place pai dirits dai presonîrs

Almancul 130 mil personis a àn manifestât sabide ai 11 di Zenâr a Bilbo / Bilbao par rivendicâ il rispiet dai dirits dai presonîrs bascs e il svilup di un procès di pâs che al permeti di dâ une soluzion politiche ae cuistion basche. Une mobilitazion storiche sei pal numar di cui che al partecipave, al pont che il viâl sielzût pe manifestazion nol à rivât a dâi acet a ducj, sei par vie che a clamâle dongje a jerin i rapresentants de maiorance politiche e sindacâl basche cemût che nol sucedeve di almancul cuindis agns incà. Cun di fat, la manifestazion e je stade clamade dongje sei dai partîts de çampe indipendentiste che di chei de aree nazionaliste moderade (ven a dî Sortu, Aralar, Eusko Alkartasuna, Alternatiba, EH Bildu, Geroa Bai e PNV) e de maiorance sindacâl basche rapresentade di ELA e LAB. La mobilitazion massive e unitarie e jere nassude par rispuindi aes azions puartadis indenant des autoritâts spagnolis tant che l’arest ai 8 di Zenâr di vot militants e avocats impegnâts in maniere direte o indirete intal rapresentâ il coletîf dai presonîrs bascs, e la proibizion de manifestazion clamade dongje de organizazion Tantaz Tanta in difese dai dirits dai presonîrs. Dôs azions, rivadis une daûr di chê altre, che a àn indignât fintremai la part plui moderade de societât e de politiche dal Paîs Basc.
Fintremai il Partît Socialist Basc (PSE), cundut che nol à aderît ae manifestazion, al à criticât lis azions decidudis a Madrid. Cumò che ETA e à metût jù lis armis e che il coletîf dai presonîrs al à sielzût il troi de legalitât e dal ricognossiment dal dam causât, a àn dite i dirigjents dal PSE, il guvier dal PP vuidât di Mariano Rajoy nol pues lâ indenant a fâ la stesse politiche che al faseve ancje prime. Il guvier de Comunitât Autonome Basche, cumò intes mans dal PNV, al à mostrât la sô sodisfazion pe adesion massive ae manifestazion che e podarès ancje vierzi stradis gnovis di colaborazion tra la çampe indipendentiste e il nazionalisim moderât par evitâ che la oportunitât de pâs e vegni pidimentade des autoritâts spagnolis. Al è di dî po che ae manifestazion dai 11 di Zenâr a vevin partecipât ancje rapresentants di altris partîts e sindacâts tant che Ezker Batua, ERC, CUP e CCOO e delegazions rivadis dai Paîs Catalans, des Asturiis, de Ocitanie, de Corsiche e di altris nazions cence stât.

Font: Naiz:, 10-14/01/14; El País, 11-13/01/14