E je une
vore dure la critiche indreçade dal Consei de Europe cuintri dal
guvier nordirlandês intal so rapuart sul rispiet de Cjarte pes
lenghis regjonâls e minoritariis. Cun di fat, l’esecutîf che al
guvierne lis sîs conteis de Irlande dal Nord sot aministrazion
britaniche, in plui di fâ une vore pôc pe promozion des lenghis
minorizadis, nol à nancje proviodût a dâ lis informazions che i
vignivin domandadis in proposit. A blocâ dut e je la componente
unioniste dal guvier che e va ancjemò dilunc a viodi la lenghe
irlandese come une cuistion che e interesse dome la comunitât
nazionaliste e duncje se no di combati, almancul di pidimentâ. Il
Consei de Europe al lamente il fat che, cundut de incressite de
domande, il guvier locâl nol fâs avonde par aumentâ lis scuelis là
che si dopre il gaelic e nancje pe formazion dai professôrs che a àn
di doprâlu par insegnâ. Pidiments e ritarts a son segnalâts ancje
tal ûs dal irlandês inte segnaletiche e intai materiâi informatîfs
pal public. Plui in gjenerâl, al dîs il rapuart, ce che e mancje e
je une politiche linguistiche complessive pal gaelic. Par chel che al
rivuarde invezit la varietât scots fevelade inte Irlande dal Nord,
la nassite di une agjenzie publiche pe lenghe e à miorât la
situazion, ma al reste ancjemò tant di fâ par incressi la presince
dal scots sei inte scuele che inte vite publiche.
Font:
BBC, 16/01/14
Nessun commento:
Posta un commento