La decision
dal Grup di vuide internazionâl (ISG) pal Cossovo di meti fin al
cussì clamât periodi di “indipendence controlade” par che il
paîs si invii pe strade de plene indipendence cul mês di Setembar e
je stade criticade cun fuarce dal cjâf de delegazion serbe intai
negoziâts sul Cossovo, Borislav Stefanović. Pai rapresentants di
Belgrât, il Cossovo nol è un sogjet politic democratic e lassâlu
cence control internazionâl al podarès causâ pericui no di pôc pe
comunitât serbe che e vîf ancjemò intal paîs. Ancje altris
rapresentants dal guvier di Belgrât a condividin cheste pôre e a
invidin lis missions de Union Europeane (EULEX) e de Nato (KFOR) a
incressi la lôr atenzion par evitâ incidents.
Inte aree a maiorance
serbe dal Cossovo, che si svilupe dongje de citât di Mitrovica, la
gnove no à jevât masse preocupazions dal moment che popolazion e
aministradôrs locâi no ricognossin lis istituzions cossovanis e no
intindin fâlu nancje in avignî. Che la gjestion dai rapuarts jenfri
serps e cossovans e resti une vore dificile lu dimostrin però ancje
i incidents capitâts sul finî di Jugn cuant che grups di serps si
son mots par lâ in piligrinaç dongje Prishtina, intal sît de
bataie di Cossovo Polje, considerât un dai lûcs plui impuartants de
storie e de mitologjie serbe. Scuintris tra polizie cossovane e serps
cun almancul une cincuantine di ferîts si son vûts sui confins,
intant che i serps che a vevin rivât a partecipâ ae cerimonie sul
sît de bataie a àn patît diviersis agressions e in cualchi câs a
son ancje stâts arestâts.
Font:
Balkan
Insight, 04/07/12 e 29/06/12
Nessun commento:
Posta un commento