31/01/12

Scozie: referendum su la autodeterminazion, consultazions viertis

Ai 25 di Zenâr il prin ministri scozês Alex Salmond (Scottish National Party) al à presentât i elements di fonde leâts al referendum su la autodeterminazion de Scozie e al à inviât une consultazion, che si sierarà ai 11 di Mai, là che ducj i citadins a puedin dî la lôr sul document presentât. Dut câs, ancje il guvier britanic al à sclarît la sô posizion in proposit e al à inviât une consultazion publiche sul referendum che si sierarà ai 9 di Març.
Daûr de propueste fate indenant dal guvier scozês, inte schede pal referendum la domande che i eletôrs si cjataran denant e sarà “Sêso dacuardi che la Scozie e vedi di jessi un paîs indipendent?” Tal câs che si vedi une maiorance di sì, si varà une dade di transizion là che il guvier scozês al tratarà cun chel di Londre par gjestî il passaç di podês. Ancje in câs di indipendence, la Scozie e restarà dentri inte UE e e varà tant che cjâf di stât la regjine. Il vôt al varès di tignîsi intal Autun dal 2014, intant che la leç che e covente par imbastî il referendum e sarà discutude intal Parlament scozês vie pal 2013. A votâ a varessin di jessi ancje i fantats di 16 e 17 agns. La coretece de campagne referendarie e dal vôt e sarà tignude di voli de Comission eletorâl za in vore intal Ream Unît. Se chest ultin pont si svicine ae posizion dal guvier britanic, su chei altris ponts lis diferencis a restin une vore marcadis. Une leç referendarie – a disin di Londre – no pues jessi fate dal Parlament scozês cence dal vie libare di Westminster o di un trasferiment di podês de bande dal guvier centrâl. Sui timps pal referendum, no si propon nissune date, ma si invide a votâ prime che si pues. Pal guvier britanic su la schede si varà di vê dome il sì o il no pe indipendence, ma cumò ancje Salmond si mostre plui frêt su la pussibilitât di meti dentri une tierce opzion leade al aument dal autoguvier. Cun di plui si bat sul fat che la etât minime pal vôt e à di restâ chê dai 18 agns. Dutis chestis cuistions a varessin di jessi frontadis ancje tal incuintri jenfri il prin ministri britanic David Cameron e chel scozês Salmond che al varès di davuelzisi avonde in curt.
Font: BBC, 24-25/01/12

Nessun commento: