Cossovo: scuintris violents sui confins cu la Serbie

Tor de metât di Zenâr cualchi centenâr di militants dal partît Vetevendosje (Autodeterminazion) si è scuintrât cu lis fuarcis di polizie cossovanis dongje de frontiere cu la Serbie, alì dal passaç di Merdare. I nazionaliscj cossovans a cirivin di blocâ lis marcjanziis che a rivavin de Serbie par rivendicâ la reciprocitât intai rapuarts economics tra i doi paîs.
Intant dai scuintris a son stâts arestâts passe cent manifestants e une cincuante di personis e je restade feride, pe plui part poliziots. Une altre manifestazion si è davuelte po inte capitâl Pristina par protestâ cuintri de repression metude in at de polizie. Pes autoritâts dal Cossovo però la manifestazion inmaneade dai nazionaliscj e jere fûr leç e la rispueste de polizie e je stade misurade. La proteste metude in at dilunc dal confin cu la Serbie e je stade condanade cun fuarce des autoritâts de UE che le àn acusade di invelegnâ i rapuarts tra i doi paîs e di lâ cuintri dai principis europeans di libare circolazion des marcjanziis.

Intant, inte part a maiorance serbe dal Cossovo, lis autoritâts locâls a son daûr a decidi se spostâ plui indenant il referendum là che a volevin domandâ ae popolazion di chê aree se e vûl ricognossi lis istituzions cossovanis o pûr no. La votazion e varès vût di davuelzisi tor de metât di Fevrâr, ma di Belgrât al è rivât un invît par fermâ la iniziative. La Serbie, di fat, e je sot esam par jentrâ inte Union Europeane e un dai elements che a son domandâts par judâ il so ingrès al è chel di lavorâ par normalizâ i siei rapuarts cul Cossovo. Pal guvier di Pristina il referendum che la comunitât serbe e volarès davuelzi al sarès un at ilegâl. 

Font: Balkan Insight, 14-20/01/12; RFE/RL, 14-17/01/12