Bretagne: la riunificazion ae atenzion de Comission europeane

Rapresentants des organizazions Bretagne Réunie, Institut culturel de Bretagne e Agence des Droits fondamentaux a àn scrit ae presidente vicjarie de Comission europeane cun deleghis su justizie, dirits fondamentâi e citadinance, Viviane Reding, par che e dedi une poie ae riunificazion de Bretagne. Ancjemò intant de ocupazion naziste, al teritori storic breton i jere stât cjonçât vie il dipartiment de Loire Atlantiche che, inmò in dì di vuê, al reste inte regjon dal Paîs de Loire là che al va dilunc a patî politichis di snazionalizazion. Intal Dicembar dal an passât il Parlament francês al à dineât al dipartiment la pussibilitât di un referendum par tornâ a dâsi dongje cul rest de Bretagne, intant che il prin ministri al à fat passâ un emendament che al permet la fusion tra dôs Regjons cence di une consultazion popolâr. E cres duncje la pôre che, no dome si dinei la riunificazion de Bretagne, ma si pensi fintremai di cjapâ dentri chest teritori intune grande Regjon dal Ovest là che la sô identitât e sarès in pericul. Par chest si domande ae Comission europeane di intervignî sul guvier francês par sclarî la situazion e pretindi il rispiet di une des minorancis nazionâls plui impuartantis de Europe e de sô integritât teritoriâl.

Font: Agence Bretagne Presse, 30/01/14

Paîs Catalans: apel ae UE cuintri de discriminazion linguistiche

Un grup di eurodeputâts, adun cu la organizazion catalane Plataforma per la Llengua, al à domandât ae Comission europeane intervents concrets cuintri de discriminazion linguistiche. Intant de iniziative al è stât presentât ancje un rapuart sui câs plui grues di discriminazion che si àn vûts intai ultins agns de bande di funzionaris publics cuintri di citadins che a fevelavin par catalan. I eurodeputâts a calcolin une disfunzion serie che la Union Europeane e proibissi e e combati lis discriminazions leadis al orientament sessuâl, ae religjon o ae divignince etniche, ma no chês leadis ae lenghe, e a denunciin il fat che in diviers stâts de UE si metin in vore discriminazions linguistichis in maniere sistematiche. Si trate, a zontin, di une cuistion di dirits umans, ma che e je ancje leade ae stesse idee di fonde de UE e par chest a invidin la comissarie europeane cun deleghis su justizie, dirits fondamentâi e citadinance, Viviane Reding, a finîle di svuincâ la cuistion cul dî che al è un probleme interni dai singui stâts. Il grup di eurodeputâts al domande ae Comission europeane une diretive specifiche cuintri de discriminazion linguistiche, la inclusion de lenghe inte propueste di diretive su la avualiance intal tratament des personis, e une modifiche de diretive 78 dal 2000 su la avualiance di tratament intal marcjât dal lavôr che e tegni cont ancje dal element linguistic.

Font: VilaWeb, 30/01/14

Irlande: gnûfs risis pal gaelic intal Nord

La agjenzie Foras na Gaeilge e à vût la incarghe dai guviers de Republiche de Irlande e de Irlande dal Nord di riviodi la gjestion e la distribuzion dai finanziaments pes organizazions che a promovin la lenghe gaeliche. Cussì, lis risorsis che fin cumò a vignivin dadis fûr a disenûf organizazions, siet di chestis nordirlandesis, cui 30 di Jugn a saran centradis dome su sîs realtâts dutis logadis a Dublin. Pal coordenament Pobal cheste centralizazion e darà un colp une vore dûr al gaelic intes sîs conteis dal Nord sot aministrazion britaniche là che lis struturis pe lenghe a son mancul svilupadis e la posizion normative dal gaelic e je dal dut diferente di chê che e à inte Republiche irlandese. Di chi, duncje, la domande par tornâ parsore de decision e dâi plui atenzion aes realtâts che a operin in prime linie intal Nord.

Font: Irish News, 29/01/14

Corsiche: mobilitazion de zoventût indipendentiste

Ai 29 di Zenâr une mobilitazion de zoventût indipendentiste corse a Corti / Corte si è sierade cun scuintris violents cu la polizie. La manifestazion, clamade adun de Ghjuventù Indipendentista e poiade di diviersis organizazions politichis e sindacâls tant che Corsica Libera, Femu a Corsica, U Rinnovu Naziunali, A Manca e STC Educazione, e à puartât in place passe un miâr di personis, pe plui part students des scuelis superiôrs e universitaris. La iniziative e jere nassude par domandâ la couficialitât de lenghe corse e il ricognossiment de culture corse, ma ancje il dirit di precedence dai cors intai puescj di lavôr publics e de vecje leç su lis sucessions. Cundut de presince in place di 250 poliziots, la manifestazion si è davuelte cence problemis cuasi fin ae fin. Cuant che però al è stât dât l’ordin di dispierdisi, a son tacâts i incidents che a àn puartât a cuasi trê oris di vuerilie urbane cun baricadis in flamis, tîr di granadis lacrimogjenis e di butiliis molotov.

Font: Alta Frequenza, 29/01/14; 7seizh.info, 29/01/14; Le Figaro, 29/01/14

France: Cjarte europeane des lenghis, sì de Assemblee

Ai 28 di Zenâr i deputâts de Assemblee francese a àn votât a grande maiorance la propueste di leç costituzionâl che e à di puartâ ae ratifiche de Cjarte europeane des lenghis regjonâls o minoritariis. Il test al à vût 361 vôts a pro, 149 contraris e 19 astensions. Plui in detai, la propueste e à cjatât la poie di cuasi ducj i deputâts socialiscj e di plui de metât di chei dal Çampe Democratiche e Republicane; inte aree di centri diestre la UDI e à votât a pro, intant che la maiorance de UMP e à votât cuintri (no però i deputâts bretons e alsazians di chest partît); il no al test al è rivât ancje dai deputâts de estreme diestre. Cumò al covente che almancul i trê cuints dal Senât a votin la propueste di leç, prime che il president francês al puedi ratificâ la Cjarte. Al jere stât il stes François Hollande a prometi intant de campagne eletorâl che al varès fat chest pas, intant che nancje doi mês indaûr la promesse e jere stade rignuvide dal prin ministri Jean-Marc Ayrault intant de sô visite in Bretagne.

Font: Libération, 28/01/14; Agence Bretagne Presse, 29/01/14; Jornalet, 29/01/14

Cossovo: divisions su la presince des minorancis in Parlament

La revision de rapresentance des minorancis intal Parlament dal Cossovo e je daûr a dividi lis fuarcis politichis dal paîs e no si rive a cjatâ une convergjence su la strade di cjapâ. Dal 2008 incà, intal Parlament cossovan a son vincj i puescj risiervâts pes minorancis ricognossudis: dîs pai serps e dîs di dividi tra rom, turcs, goranis, bosgnacs, egjizians e ashkalis, che si ur zonte ducj i puescj che i partîts rapresentatîfs di chestis comunitâts a rivin a otignî tes elezions. Daûr dal plan proponût dal inviât ONU pal Cossovo, poiât dome di une part dai parlamentârs, la situazion e varès di cambiâ par vie che ai serps si ur ricognossarès juste i deputâts otignûts cul vôt eletorâl, ancje se cuntun minim di dîs puescj garantîts. Par chês altris minorancis invezit a restaressin simpri dîs puescj, ma plui fruçonâts par vie dal ricognossiment tant che minorancis ancje di cravuats e montenegrins.

Font: Balkan Insight, 27/01/14

Portugal: su You Tube il mirandês pai fruts

Intal 1999 il Parlament portughês al à ricognossût il mirandês tant che lenghe regjonâl dal teritori di Miranda do Douro, te aree nordorientâl dal stât. Si calcole che il mirandês, che al parten al grup asturian – leonês, al sedi fevelât di sù par jù 10 mil personis. Il so insegnament, fat pal plui in maniere facoltative, al è disponibil intes scuelis primariis e tal prin cicli des secondariis. Par svicinâ i plui piçui a cheste lenghe, intal istitût scolastic di Miranda do Douro si à cumò inviât il progjet “Mirandês for Kids” che al ponte massime sul aspiet dal zûc e dal divertiment par fâ imparâ la lenghe. Lis fondis par imparâ il mirandês a son cussì metudis jù par mieçs di cjançons, spetacui di teatri e moments di divertiment che a son po metûts a disposizion ancje su You Tube, in maniere di jessi disponibii sei pai fruts de scuele, sei par ducj chei che a àn voie di svicinâsi a cheste lenghe.

Font: Diário Digital, 26/01/14

Paîs Basc: plui atenzion pal euskara tai servizis de CAB

Ai 24 di Zenâr il guvier de Comunitât Autonome Basche al à presentât a Donostia il cuint plan gjenerâl di normalizazion dal euskara che al sarà in vore fin al 2017. Di cuant che l’esecutîf basc al à tacât a svilupâ il prin plan di normalizazion intal 1990, il numar di dipendents dal guvier de Comunitât Autonome in stât di doprâ la lenghe basche intal lôr lavôr al è passât dal 23,5% al 59,9%. Chest cuint plan al vûl duncje che l’euskara al fasi altris pas indenant tant che lenghe di lavôr. Si sburtarà cussì pal so ûs intes relazions tra lis aministrazions publichis, ma ancje par che al vegni doprât di plui dai rapresentants politics de Comunitât Autonome. Cun di plui, par favorî l’ûs de lenghe de bande dai citadins, si larà a infuartî la presince di personâl bilengâl in ducj i uficis a contat diret cul public e si prepararà une version basche par dute la modulistiche.

Font: Deia, 25/01/14

Paîs Catalans: sieradis lis emissions par catalan tal Valenzian

Ai 21 di Zenâr a son stadis sieradis lis emissions di Catalunya Ràdio e Catalunya Informació intal Paîs Valenzian che, dopo de sierade di TV3, a jerin trasmetudis dai ripetidôrs de organizazion Acció Cultural del País Valencià. In dì di vuê, duncje, inte comunitât autonome valenziane la uniche font di informazion radiotelevisive par catalan e je internet o cualchi emitente locâl. L’ordin di sierade al è rivât dret dal guvier spagnûl che al à ancje fat savê che la organizazion e varà di paiâ dôs multis par emissions e possès di ripetidôrs cence autorizazion par un totâl di un milion di euros. Al è un proviodiment cence precedents de bande dal ministeri pe industrie spagnûl e al rive pôc dopo che il prin ministri spagnûl, Mariano Rajoy, al veve dite di vê pront un plan cuintri dal percors di indipendence de Catalogne. Pal segretari gjenerâl di Acció Cultural del País Valencià, Toni Gisbert, chê che si à cumò intal Paîs Valenzian e je une situazion di emergjence dal pont di viste de libertât di informazion, dal pluralisim e de lenghe. La sierade des emissions de radiotelevision publiche valenziane e di chês che a rivavin de Catalogne e à puartât ancje a diviersis manifestazions di proteste, la plui resinte si è tignude ai 29 di Zenâr denant dal palaç dal guvier dal Paîs Valenzian (intes mans de diestre spagnoliste).

Font: VilaWeb, 22-30/01/14

Gales: campagne di disubidience civîl a pro de lenghe

Intune assemblee che si è tignude ai 18 di Zenâr, i delegâts de Cymdeithas yr Iaith Gymraeg (Societât pe Lenghe Galese) a àn fat savê che cul mês di Fevrâr a inviaran une campagne di disubidience civîl par sburtâ il guvier galês a meti in vore azions plui fuartis par garantî i dirits linguistics. Plui di sîs mês indaûr la organizazion e veve proponût al esecutîf une schirie di azions di podê meti in vore par permeti ai galês di vivi ad in plen inte lôr lenghe. Al guvier i si conteste in particolâr di no vê slargjât l’ûs curicolâr dal galês in dutis lis scuelis, di vê imbastît dai nivei di tutele e di promozion de lenghe tai servizis di utilitât publiche masse bas, di no vê espuartât in ducj i uficis publics il model linguistic positîf in vore te regjon dal Gwynedd, di vê taiât i fonts pal galês e di no vê nancje publicât un belanç sul impat che lis risorsis dopradis a àn vût su la lenghe.

Font: Cymdeithas, 18/01/14

Sardegne: lis prospetivis par normalizâ la lenghe sarde

La otave conference regjonâl de lenghe e de culture sarde e je vignude a colâ sù par jù un mês prime des elezions pe Regjon Sardegne, in program ai 16 di Fevrâr. Ta chê ocasion il president de Regjon, Ugo Cappellacci, al à presentât lis liniis che al ponte a svilupâ se al sarà confermât inte sô incarghe. Lis lenghis minoritariis, al à dite, si salvin dome se a vegnin consideradis normâls e al covente duncje lâ indenant par che il sart al deventi une competence ricognossude no dome sul plan culturâl, ma ancje sociâl, istituzionâl e juridic. Par chest, tra i ponts che si è impegnât a svilupâ, o cjatìn: presentâ une propueste di leç di modifiche dal statût di autonomie par rivâ ae couficialitât dal sart cul talian e cjapâ in man la gjestion de istruzion; infuartî lis struturis regjonâls pe politiche linguistiche e stabilî la rêt dai operadôrs linguistics e dai uficis teritoriâi pe lenghe; mantignî lis risorsis metudis a belanç pal sart sul stes nivel dai ultins agns; sburtâ l’ûs curicolâr de lenghe sarde inte scuele e poiâ la formazion dai insegnants; stiçâ l’ûs dal sart intai mieçs di comunicazion; slargjâ e miorâ l’ûs dal standard linguistic.

Font: RAS, 10/01/14

Gales: pas indaûr de lenghe, Consei de Europe preocupât

L’ultin rapuart dal Consei de Europe sul rispiet de Cjarte pes lenghis regjonâls e minoritariis intal Ream Unît nol plate la preocupazion pai risultâts dal censiment dal 2011 che a mostrin une riduzion des personis che a fevelin par galês propit intes areis là che la lenghe e jere plui doprade. Tra i ponts là che il rapuart al invide lis autoritâts a fâ di plui si à, prin di dut, la garanzie di servizis sanitariis e sociâi par galês. Une cuistion di fuarte atualitât ancje par vie di un câs capitât sul imprin di Zenâr cuant che il farmacist di une cjadene di supermarcjâts si à refudât di dâ une medisine par un frut malât par vie che la recipe dal miedi e veve lis indicazions pal ûs scritis par galês. Lis organizazions impegnadis pai dirits linguistics tant che la Cymdeithas yr Iaith Gymraeg e il Dyfodol i’r Iaith za di timp a domandin al guvier galês un impegn plui fuart su chest e su altris cjamps là che i dirits linguistics no son rispietâts ad in plen. Par recuperâ la pierdite di personis che a fevelin par galês intes areis là che la lenghe e jere plui fuarte si propon po ancje la modifiche des politichis abitativis e di chês lavorativis metudis in at fin cumò ta chestis regjons.

Font: BBC, 17/01/14; Cymdeithas, 12/01/14

Paîs Catalans: gnûf passaç pal referendum su la indipendence

Ai 15 di Zenâr il Parlament catalan al à votât cuntune maiorance di cuasi i doi tierçs (87 deputâts su 135) une propueste di leç di inviâ al congrès dai deputâts spagnûl par che i trasferissi lis competencis par celebrâ un referendum su la indipendence. Chê dal passaç di competencis par tignî un referendum e je une pussibilitât previodude de Costituzion spagnole, ma e je destinade a scuintrâsi cul no da assemblee spagnole là che PP, PSOE e UpyD a àn za fat savê di jessi cuintri a ogni ipotesi di referendum. Si trate de ultime pussibilitât legjislative ametude par celebrâ la consultazion, dopo la uniche strade pussibile e restarà chê de proclamazion unilaterâl di indipendence de bande de Catalogne. Intal Parlament catalan la propueste di leç e je stade votade di CiU, ERC, ICV-EUiA, ma ancje di trê deputâts socialiscj che a son lâts cuintri des indicazions di vôt dal lôr partît. Cuintri a àn invezit votât chei altris socialiscj e i deputâts dai doi partîts de diestre spagnoliste, o sei PP e Ciutadans. I indipendentiscj de CUP a àn sielzût la strade de astension, ma dome par vie che no vuelin che i si domandi a Madrid nissun permès par celebrâ il referendum.

Irlande: critichis su lis politichis linguistichis intal Nord

E je une vore dure la critiche indreçade dal Consei de Europe cuintri dal guvier nordirlandês intal so rapuart sul rispiet de Cjarte pes lenghis regjonâls e minoritariis. Cun di fat, l’esecutîf che al guvierne lis sîs conteis de Irlande dal Nord sot aministrazion britaniche, in plui di fâ une vore pôc pe promozion des lenghis minorizadis, nol à nancje proviodût a dâ lis informazions che i vignivin domandadis in proposit. A blocâ dut e je la componente unioniste dal guvier che e va ancjemò dilunc a viodi la lenghe irlandese come une cuistion che e interesse dome la comunitât nazionaliste e duncje se no di combati, almancul di pidimentâ. Il Consei de Europe al lamente il fat che, cundut de incressite de domande, il guvier locâl nol fâs avonde par aumentâ lis scuelis là che si dopre il gaelic e nancje pe formazion dai professôrs che a àn di doprâlu par insegnâ. Pidiments e ritarts a son segnalâts ancje tal ûs dal irlandês inte segnaletiche e intai materiâi informatîfs pal public. Plui in gjenerâl, al dîs il rapuart, ce che e mancje e je une politiche linguistiche complessive pal gaelic. Par chel che al rivuarde invezit la varietât scots fevelade inte Irlande dal Nord, la nassite di une agjenzie publiche pe lenghe e à miorât la situazion, ma al reste ancjemò tant di fâ par incressi la presince dal scots sei inte scuele che inte vite publiche.

Font: BBC, 16/01/14

Sardegne: sîs i candidâts in corse pes regjonâls

A son sîs i candidâts che a coraran ai 16 di Fevrâr pe presidence de Regjon Sardegne. Cuasi une trentine invezit lis formazions politichis che ju poin, cuntun fruçonament une vore fuart ancje framieç de aree autonomiste e nazionalitarie. In corse al è ancje il president regjonâl cumò in carghe, Ugo Cappellacci, che al met adun une part dal centri diestre, ven a dî Forza Italia, Fratelli d’Italia, UDC, UDS, Sardegna Zona Franca, Riformatori e ancje il rapresentant storic dal autonomisim sart, o sei il Partidu Sardu / Partito Sardo d’Azione. Un altri ex president regjonâl di centri diestre, Mauro Pili, al cor invezit par une coalizion che, in plui de sô liste, e met adun Fortza Paris, Soberania e Unidos. Il centri çampe al propon come so candidât Francesco Pigliaru che al gjolt de poie di partîts statâi tant che PD, SEL, IdV, Socialisti, Centro Democratico e UpC, moviments autonomiscj o locâi tant che Rossomori, Partito dei Sardi, Sinistra Sarda e La Base, e fintremai i indipendentiscj di iRS. Gigi Sanna si presente invezit come candidât dal Movimento Zona Franca. De aree indipendentiste a rivin doi candidâts, ven a dî Pierfranco Devias (dal Fronte Unidu Indipendentista) e Michela Murgia (poiade des listis ProgReS, Comunidades e Gentes). Une candidature, cheste ultime, che par diviers osservadôrs e podarès jessi la plui pericolose pes coalizions di centri diestre e di centri çampe che, almancul su la cjarte, a partissin di une situazion di vantaç. Fûr de corse eletorâl, par vie che no vevin racuelt avonde firmis o che no si presentavin intun numar suficient di circoscrizions, Michelangelo Serra (poiât di une part de aree politiche dongje dal M5S) e Cristina Puddu (candidade dal moviment indipendentist Meris).

Font: La Nuova Sardegna, 16/01/14

Cossovo: e torne a alçâsi la tension te aree serbe

Il grup di lavôr che al à di meti jù il statût de Associazion dai Comuns Serps dal Cossovo, previodude dai acuardis sotscrits di Belgrât e Pristina sot de mediazion de UE, al à comunicât di vê metût jù il test che cumò al varà di jessi fat bon des aministrazions comunâls cjapadis dentri intal gnûf sogjet aministratîf. Daûr dai acuardis cjapâts a Bruxelles, la Associazion, che e cjape dentri i comuns di Kosovska Mitrovica, Leposavić / Leposaviq, Zvečan / Zveçan e Zubin Potok, e varà podês esecutîfs in diviers cjamps tant che educazion, sanitât, svilup economic e planificazion urbane. Chel istès la situazion inte aree a maiorance serbe dal Cossovo si è tornade a inflamâ, prime cu la decision di Krstimir Pantić, elet sindic di Mitrovica intes elezions aministrativis dai 3 di Novembar, di no firmâ l’at de sô jentrade in carghe par vie che chest lu varès puartât a ricognossi la indipendence dal Cossovo e a lâ cuintri de Costituzion serbe. Inmò plui penç il secont episodi capitât pôc dopo, ven a dî il sassinament dal conseîr comunâl di Mitrovica Dimitrije Janičijević che autôrs e resons a restin ancjemò discognossûts, ma che al à fat cressi ancjemò di plui la tension framieç de comunitât serbe dal Cossovo.

Font: Balkan Insight, 13-17/01/14

Paîs Catalans: al cres l’ûs de lenghe su internet

Daûr dai dâts comunicâts de organizazion Wiccac (Webmàsters Independents en Català, de Cultura i d’Àmbits Cívics) l’aument anuâl dal ûs dal catalan su internet dilunc vie dal 2013 al è stât dal 1,14% rispiet al an prime. E va indenant duncje la tindince al aument progressîf dal ûs di cheste lenghe su la rêt. Si calcole che, intal Dicembar dal 2013, il 62,9% di chei che a àn doprât internet in Catalogne lu vedi fat par catalan.

Font: Generalitat de Catalunya, 13/01/14

Irlande: mobilitazions e tais pes organizazions pal gaelic

Tes prossimis setemanis si inviarà une campagne par sburtâ il guvier irlandês a svilupâ gnovis strategjiis pe incressite de lenghe gaeliche e par garantî pardabon a cui che le fevele la pussibilitât di esercitâ ad in plen i siei dirits linguistics. Lis fondis par cheste iniziative a son stadis metudis ai 11 di Zenâr a Dublin intant di un incuintri public inmaneât de organizazion Conradh na Gaeilge. La mobilitazion e je stade decidude dopo des dimissions presentadis dal comissari pe lenghe irlandese Seán Ó Cuirreáin denant dal faliment dal guvier intal garantî e infuartî i servizis publics par gaelic. La situazion e je dificile ancje pes organizazions che ator pe isule a son impegnadis intal promovi la lenghe. La agjenzie Foras na Gaeilge, che si ricjate cuntune riduzion significative di fonts, e à decidût di taiâ i finanziaments che e zirave aes diviersis organizazions ativis su la isule. In dì di vuê cuasi il 60% di chestis risorsis al va a cuvierzi i stipendis dai operadôrs e cheste percentuâl e riscje di cressi; cui tais che a varessin di jentrâ in vore cul mês di Lui, Foras na Gaeilge e vûl cambiâ cheste situazion pontant plui sul finanziament dai servizis ufierts ai citadins.

Font: Irish Times, 12/01/14; BBC, 17/01/14

Paîs Catalans: lis liniis di azion de ANC pal 2014

Ai 11 di Zenâr la Assemblea Nacional Catalana (ANC), organizazion nassude par sburtâ il procès di indipendence de Catalogne, e à presentâts lis sôs liniis di azion pal 2014. Cinc lis campagnis che si vûl svilupâ vie pal an. La prime e à non “Firme un vôt pe indipendence” e e previôt une racuelte massive di firmis a pro de indipendence catalane. La seconde, batiade “De disubidience ae sovranitât”, si fonde sul distac progressîf dal stât spagnûl cun azions tant che la diubidience fiscâl e suntune rispueste popolâr organizade cuintri di ogni at des autoritâts spagnolis percepît tant che un atac ai dirits dai catalans. La tierce campagne, clamade “Un popul sôl”, e ponte invezit a slargjâ la maiorance sociâl a pro de indipendence. La cuarte aree di azion, “Il paîs che o volìn”, e previôt di coinvolzi istituzions, organizazions e citadins par che a puartin lis lôr ideis su cemût che e varà di jessi la gnove Catalogne indipendente. L’ultin dai progjets al è stât batiât “De Catalogne al mont” e al previôt une campagne diplomatiche internazionâl par favorî il ricognossiment di un stât catalan indipendent. Cun di plui, tra i 11 e i 12 di Zenâr, si à za vude la prime des azions di racuelte di firmis pe indipendence cun 700 ponts di racuelte e 3 mil volontaris impegnâts ator pe Catalogne e cuntune rispueste popolâr judicade de ANC une vore buine.

Font: VilaWeb, 11/01/14; ANC, 13/01/14

Paîs Basc: passe 130 mil in place pai dirits dai presonîrs

Almancul 130 mil personis a àn manifestât sabide ai 11 di Zenâr a Bilbo / Bilbao par rivendicâ il rispiet dai dirits dai presonîrs bascs e il svilup di un procès di pâs che al permeti di dâ une soluzion politiche ae cuistion basche. Une mobilitazion storiche sei pal numar di cui che al partecipave, al pont che il viâl sielzût pe manifestazion nol à rivât a dâi acet a ducj, sei par vie che a clamâle dongje a jerin i rapresentants de maiorance politiche e sindacâl basche cemût che nol sucedeve di almancul cuindis agns incà. Cun di fat, la manifestazion e je stade clamade dongje sei dai partîts de çampe indipendentiste che di chei de aree nazionaliste moderade (ven a dî Sortu, Aralar, Eusko Alkartasuna, Alternatiba, EH Bildu, Geroa Bai e PNV) e de maiorance sindacâl basche rapresentade di ELA e LAB. La mobilitazion massive e unitarie e jere nassude par rispuindi aes azions puartadis indenant des autoritâts spagnolis tant che l’arest ai 8 di Zenâr di vot militants e avocats impegnâts in maniere direte o indirete intal rapresentâ il coletîf dai presonîrs bascs, e la proibizion de manifestazion clamade dongje de organizazion Tantaz Tanta in difese dai dirits dai presonîrs. Dôs azions, rivadis une daûr di chê altre, che a àn indignât fintremai la part plui moderade de societât e de politiche dal Paîs Basc.