Pontade 11 07 (26/06/2007)

Paîs Catalans: indipendence tune gjenerazion

Intune interviste jessude un pâr di setemanis indaûr sul cuotidian “La Vanguardia”, il politolic Roger Buch, che di agns al è daûr a studiâ la situazion politiche intai Paîs Catalans, al sigure che la indipendence de Catalogne e sarà pussibile intune gjenerazion. Daûr de sô analisi, i zovins catalans a cjalin simpri di plui in direzion de opzion indipendentiste e cheste tindince no cjape dentri dome chei che a votin par partîts politics che si declarin a pro de indipendence, come ERC, ma ancje par moviments come CiU o, in part, ancje pai socialiscj. La strade de indipendence e cjate resons no dome di nature identitarie, ma ancje e simpri di plui economiche. Par chest – al dîs Buch – intune gjenerazion la Catalogne e podarès sielzi la strade de indipendence.

Gales: tal 2008 cuotidian par galês

Cundut che no mancjin i pidiments, la lenghe galese e je doprade simpri di plui intai diviers aspiets de societât, ancje tai mieçs di comunicazion. La lenghe si le cjate par television, in radio, tai mieçs informatics e su diviersis rivistis, ma – fin a vuê – no si veve ancjemò rivâts a vê un cuotidian di plante fûr par galês. Il probleme, di fat, al jere chel dai coscj masse alts a pet de mancjance di investitôrs privâts, ma cumò al somee che chest pidiment al sedi stât superât. Par mieç di sotscrizions rivadis di cualchi miâr di citadins e cul jutori di fonts publics, si à metût dongje 300 mil sterlinis, ven a dî 445 mil euros che a coventaran par inviâ il prin cuotidian in lenghe galese. Il prin numar dal gjornâl, che al varà non “Y Byd”, ven a dî “Il Mont”, al jessarà ai 3 di Març dal 2008, ven a dî tal lunis daspò dal fin di setemane di sant David, il sant nazionâl galês. Il cuotidian al sarà disponibil sei intal formât su cjarte, sei ta chel telematic, e chei che a àn za sotscrit lis cuotis a podaran vê a disposizion dutis e dôs chestis formis. L’abonament mensîl al sarà di 24 euros par cui che al à voie di vê ducj e doi i formâts e di 13 euros e mieç par cui che al domandarà dome l’acès ae version informatiche.

Gales: gnûfs prodots Microsoft in curt par galês

Dentri di sîs mês, Windows Vista e Office 2007 a saran disponibii ancje par galês. Cun di fat, l’interès e l’ûs di imprescj informatics in lenghe galese al è daûr a cressi simpri di plui e, duncje, si à decidût di lâ indenant cu la colaborazion tra la Microsoft e il Welsh Language Board che si veve inviade inmò trê agns indaûr. Il galês, compagn de tecnologjie informatiche, – e à declarât la presidente dal Welsh Language Board – al va dilunc a cjapâ dentri simpri di plui ducj i aspiets de vite di ogni dì in Gales.

Ongjarie: preocupazion pe tutele des minorancis

La politiche di tutele pes minorancis nazionâls in Ongjarie e je daûr a lâ in piês. A dîlu al è stât, in diviersis intervistis, Jeno Kaltenbach, l’ex tutôr ongjarês pes minorancis. I ultins emendaments fats ae leç di tutele – al à dite Kaltenbach – a àn fat lâ in piês la situazion, cun di plui al somee aromai che i politics magjârs a sedin interessâts dome al risolvi i problemis de comunitât rom. No si trate di sensibilitât pe lôr situazion – al à zontât l’ex tutôr – ma dal fat che la consistence numeriche di cheste minorance le rint une vore interessante come bacin di vôts; il stes no si pues dî, invezit, par chês altris comunitâts minoritariis che a àn numars une vore plui piçui. A confermâ cheste tindince e sarès ancje la elezion dal gnûf tutôr des minorancis. Di fat, il Parlament ongjarês al à sielzût par cheste incarghe Erno Kallai, avocat e insegnant di nazionalitât rom. La plui part dai rapresentants des 13 minorancis nazionâls ricognossudis, invezit, e veve domandât che ta chel puest e fos nomenade Erszebet Szalay Sandor, preside de facoltât di leç de Universitât di Pecs.

Romanie: la turche Fintina Mare, al deventarà un paîs - museu

Il paîs di Fintina Mare, o Baspunar come che lu clamin i siei abitants al deventarà un grant museu al viert. La vile, che e conte uns 120 cjasis, si cjate a di une sessantine di chilometris di Constanta, tal Sud Est de Romanie, e al è un dai teritoris là che e vîf la minorance turche. La iniziative e nas di une colaborazion tra la aministrazion comunâl e la associazion dai imprenditôrs turcs in Romanie. Il paîs, che al svante une architeture antighe e carateristiche, al è ancje un dai sîts che si à domandât di meti dentri intal patrimoni mondiâl de UNESCO.

Pontade 10 07 (13/07/2007) - aprofondiment

Paîs Basc: fin de tregue di ETA

Ai 5 di Jugn, la organizazion armade basche ETA e à dât fûr un comunicât là che e comunicave la fin de tregue che e veve proclamât intal Març dal 2006. Une tregue che e varès vût di coventâ par imbastî un procès di risoluzion pacifiche dal conflit che di cuasi cincuante agns al met cuintri une part significative de societât basche e i stâts spagnûl e francês. Magari cussì no, chest procès di pâs nol à rivât a partî. Za intal Astât dal an passât ETA e veve manifestât il so marum par vie che dal guvier spagnûl no jerin rivâts ats concrets che a dimostrassin la sô intenzion di inviâ pardabon un procès di pâs. Dal moment che nancje chestis declarazions a vevin rivât a movi nuie, in Dicembar, ETA e veve colpît cuntun atentât l’aeropuart Barajas di Madrid. Une azion pensade come avertiment, ma che e veve puartât ae muart di doi citadins ecuadorians che no si vevin visâts dai avîs de polizie di bandonâ la zone. Dut câs, contrari di ce che e pensave ETA, nancje chê azion e veve rivât a cambiâ il compuartament dal guvier, ma dome a incressi lis misuris di repression.

Il comunicât di ETA

A cinc mês dal atentât di Barajas, ETA e à decidût di meti fin ae tregue che jê stesse e veve proclamât e lu à fat cun chest comunicât.

ETA, organizazion socialiste rivoluzionarie basche di liberazion nazionâl, e vûl che i citadins bascs a cognossin il messaç seguitîf.

E je la ore di sclarî lis robis. Euskal Herria e vûl superâ la division istituzionâl e lâ indenant te costruzion di un stât indipendent. Cun miârs di vôs a pro dal cambiament politic e sociâl, cun miârs di vôs a pro dal avignî di chest popul. Ancje ETA e cjape posizion pal procès di liberazion di chest popul. Il finâl di chest procès al sarà dal sigûr un stât indipendent che al varà non Euskal Herria, dut câs, par rivâ a di un tant, al coventarà un spazi unitari che al cjapi dentri la Navare, Alava, Bizkaia e Gipuzkoa, e un altri che al meti adun Lapurdi, la Alte Navare e Zuberoa. Ta cheste maniere, cui siet teritoris adun, o fasarìn sù l’avignî dal nestri popul.

Ven a dî che par fâ sù l’avignî dal nestri popul lis siet provinciis a àn di jessi unidis. Lis soluzions a miezis, no nus menin di nissune bande. L’avignî al sta intes nestris mans e lu otignarìn.

A son coladis lis mascaris. La ande di Zapatero si à palesade intal fassisim che al lasse cence dirits partîts e personis. Ma nol è bessôl. Ancje ai dirigjents dal Partît Nazionalist Basc, cu la ofese simpri sui lavris e mai avonde passûts di bêçs, ur à colade la mascare. Par disgracie, la libertât dai popui e je usade a vê par nemì il tradiment. Ogni volte che a vevin di cjapâ decisions saldis par fâ sù l’avignî a pro di Euskal Herria a àn contât balis. Cumò, par rispueste, i citadins no i àn dât cjarte blancje par lâ dilunc a incressi il patiment di chest popul sot de protezion dal spagnolisim. A àn dome rivât a clamâ dongje i responsabii de repression cuintri dai dirits nazionâi, ma no chei bascs che a vuelin vivi in democrazie e libertât.

I citadins a patissin la mancjance di democrazie. Impen di sparî, i atacs cuintri di Euskal Herria a cressin e a son plui dûrs. La justizie spagnole e à metût fûr di chestis ultimis elezions antidemocratichis miârs di personis e la çampe indipendentiste, la part plui ative di chest procès. Euskal Herria in dì di vuê e vîf intun stât di ecezion. Lis ultimis elezions che si àn vudis no àn nissune legjitimitât. Il Guvier spagnûl al à rispuindût ae fin continuade des azions armadis ufiert di ETA cun impresonaments, cu la torture e cun ogni sorte di persecuzion. No son lis condizions democratichis minimis par lâ indenant cuntun procès di negoziazion.

O vin denant lis clâfs par garantî il vuê e il doman di Euskal Herria: ven a dî autodeterminazion e teritorialitât e lis semencis che miârs e miârs di citadins a àn semenât i puartaran al nestri popul une racuelte bondante.

Par intant, o sotscrivìn la nestre decision di difindi cu lis armis il popul che al ven atacât cu lis armis.

O clamìn ducj i citadins a fâi cuintri a cheste democrazie false e fraide e a impegnâsi in maniere salde te costruzion di un stât libar clamât Euskal Herria. Ognidun intal so cjamp e daûr des sôs pussibilitâts. In maniere gjenerose e unide.

In fin, ETA e vûl visâ che e interomp il fermait il fûc continuatîf e che e à decidût di tornâ a començâ lis azions in difese di Euskal Herria su ducj i fronts a tacâ dal principi dai 6 di Jugn dal 2007.

La rispueste dal guvier spagnûl

Daspò de publicazion di chest comunicât sui gjornâi bascs, il prin ministri spagnûl, José Luis Rodríguez Zapatero, intune video conference al à indreçât ai citadins dal stât spagnûl chest discors:

ETA e à metût fin al fermait il fûc continuât che e veve proclamât intal Març dal 2006. Dut câs, intai fats, al è za di un pôc che lu veve rot cul atentât fat intal aeropuart di Barajas intal Dicembar stât là che a vevin pierdût la vite doi citadins ecuadorians. Vuê ETA e à cjapât la stesse decision che e veve bielzà cjapât in altris ocasions in passât e, vuê come in chê volte, ETA e torne a falâ. La rispueste a chest gnûf erôr e sarà chê che simpri a àn dât i guviers spagnûi, lis fuarcis democratichis e dute la societât. Une rispueste che si poie su la difese comune dai valôrs e des istituzions democratichis, su la metude in vore rigorose dal stât di dirit, su la eficience des fuarcis e dai cuarps di sigurece dal stât e su la cooperazion internazionâl.

O sin un paîs fuart, la societât spagnole e à za mostrât intune dade une vore lungje che il so dolôr nol flapìs la sô fuarce, che il patiment nol pidimente la sô determinazion. Cumò e tornarà a mostrâlu, cence cedi a nissune des menacis e des sfidis che si vûl butâi intor. La decision di ETA e va in maniere radicâl inte direzion contrarie ae strade che la societât basche e chê spagnole a vuelin, ven a dî la strade de pâs. Une strade che e à dome un finâl, la fin de lote armade, une strade che si pues cjapâ e puartâ indenant dome cu la rinuncie totâl ae violence.

O vuei indreçâmi a ducj i citadins bascs. O ai puartât indenant ducj i sfuarçs pussibii par rivâ ae pâs e a vierzi une suaze di convivence par ducj là che si puedin difindi democratichementri dutis lis opzions e superâ ducj i scuintris. O sai che la maiorance dai citadins bascs e cognòs la autenticitât dal sfuarç che il guvier al à puartât indenant e i ten a marcâ che la mê sperance plui grande si poie su la volontât profonde de maiorance de societât basche e de societât spagnole di vivi in pâs e in libertât.

L’avignî dai bascs al dipent e al dipendarà propit di lôr inte suaze de leç e de democrazie, nol dipendarà mai de violence teroriste. Vuê o vuei sigurâ che il guvier cu la fuarce de leç e dal stât di dirit al met e al metarà in vore ducj i imprescj par difindi la convivence, la libertât e la sigurece dai citadins.

I dîs grazie pal lôr impegn a chei grups politics che ta chest periodi a àn dât une poie cence condizions al guvier. Un grazie particolâr o vuei disi massime a ducj chei citadins che mi àn fat rivâ la lôr poie e la lôr fiducie. O ai la sperance che denant dal comunicât di ETA la poie dai grups politics e sedi unanime. Mi sfuarçarai par otignîle parcè che al è ce che e domande la maiorance dai spagnûi e al è ce che e i covente ae maiorance dal nestri popul.

La fuarce de democrazie e de peraule e vinçarà simpri sul deliri totalitari. O soi sigûr che cheste considerazion e cjaparà ancje chei che vuê a tornin a menaçânus ducj. Lâ dilunc cu la violence al causarà dome dolôr, un dolôr che al durarà par dut il timp che i coventarà ae leç, ae democrazie e ae libertât par vinci la violence, ma o soi convint che plui prest che tart la societât spagnole e concuistarà in maniere definitive la pâs. Mi impegnarai par che si rivi a di un tant il prime pussibil.

Un pocjis des declarazions che a son dentri di chest discors, dut câs, a lassin scaturît un osservatôr imparziâl. Cun di fat, cuant che Zapatero al dîs di vê “puartât indenant ducj i sfuarçs pussibii par rivâ ae pâs” e ven daurman iniment une declarazion fate cualchi mês indaûr – inte suaze di un bote e rispueste tra socialiscj e popolârs – là che l’esponent socialist, riferintsi ai contats cun ETA, si veve svantât di vê fat une vore di mancul di chel che a vevin fat i popolârs intant de tregue precedente. Par chel che al rivuarde l’impegn che Zapatero al varès metût par “vierzi une suaze di convivence par ducj là che si puedin difindi democratichementri dutis lis opzions” al è just di ricuardâ che la repression cuintri dai moviments e dai rapresentants de çampe indipendentiste basche e je fintremai aumentade sot dal so guvier.

La rispueste dal guvier de CAB e di chei altris sogjets politics

Lassìn di bande il Guvier di Madrid, par viodi cuale che e je stade la prime reazion dal guvier de Comunitât Autonome Basche che al è tes mans di une coalizion vuidade dal PNV, il Partît Nazionalist Basc. Il prin comunicât uficiâl al è stât let de puartevôs dal guvier, Miren Azkarate:

Vuê di buinore ETA e à comunicât che e romp la tregue e che si torne al passât. Un passât di violence, ricat, terôr e menace.

Si pues dome considerâ un scherç macabri che ETA e comunichi cumò che e suspint il fermait il fûc, cuant che, intal Dicembar stât, e a son za passâts cinc mês, e metè une bombe di gruesse potence a Madrid che e causà la muart di Diego Armando Estasio e di Carlos Alonso Palate.

Tal non di ce e in non di cui operie ETA?

In non dal popul basc dal sigûr no. Parcè che chest popul al à la sô storie, lis sôs lidrîs, la sô culture e i siei dirits. O vin frontât vueris e ditaturis come chê di Franco e nô, bascs e baschis, o vin savût difindi i nestris dirits democratichementri.

No lu fâs nancje tal non dal dirit di decidi che e à la societât basche. Il dirit di decidi come che o volìn che al sedi il nestri avignî, si lu difint in maniere democratiche tes istituzions e te societât.

Chest guvier lu à fat e o larìn indenant a difindi il dirit che o vin di decidi in maniere pacifiche e democratiche come che o volìn che al sedi il nestri avignî.

In fin, il comunicât di ETA al è la rispueste che i ven dade ae çampe indipendentiste che, daspò dal atentât di Madrid, i domandave di inviâ une tregue continuade e cence condizions.

Cussì ETA e dimostre trop che i interesse ce che e pense la societât basche. No dome no i impuarte di chel che e pense la maiorance dai citadins; cumò no i impuarte nancje chel che e pense e che e puarte indenant la çampe indipendentiste basche, che e reste une altre volte politichementri umiliade.

No son mai stâts cussì isolâts e la indignazion e la rabie che il lôr comunicât al jeve in ducj i citadins e lis citadinis al pues vê dome une soluzion: la fin totâl de violence e la disparizion definitive di ETA.

Dut câs, dongje de condane pe decision comunicade di ETA, sei i rapresentants dal PNV, sei chei di Eusko Alkartasuna, altri moviment de aree nazionaliste basche, a àn declarât che si à di lâ indenant cu la taule di negoziazion tra dutis lis fuarcis politichis, ancje cun Batasuna, la formazion di riferiment de çampe indipendentiste basche metude fûr leç a cjaval tra il 2002 e il 2003 cuntune leç votade a Madrid cui vôts dai popolârs e dai socialiscj.

Cui che, invezit, di simpri al à puartât indenant une campagne feroce cuintri de çampe indipendentiste basche al è il PP, formazion de diestre post franchiste, che su la bataie cuintri dal indipendentisim basc, armât o pacific che al sedi, e à fat sù buine part de sô campagne eletorâl. Cualchi zornade daspò de fin de tregue si à vût un incuintri tra il prin ministri spagnûl Zapatero e il leader de oposizion, il popolâr Mariano Rajoy, che, ae fin de riunion, al à fat cheste declarazion:

Ce che i domandi jo al guvier al è che al fasi dut ce che la leç i permet par jessi il plui eficaç pussibil inte lote cuintri di ETA. Cumò al è al guvier de Spagne che i tocje di intervignî e jo o speri che lu fasi e, se lu fâs, mi cjatarà daûr di lui come che za o ai vût dit in cetantis ocasions.

I bascs e lis tratativis tra ETA e il guvier spagnûl

Dut câs, di là di dutis chestis declarazions, al va dite a clâr che nol è stât nissun guvier, daspò de fin de ditature franchiste, ni di diestre, ni di çampe, che nol vedi vût contats cun ETA. Chest i bascs lu san une vore ben e, duncje, ce che ur interesse nol è cui che, tra i socialiscj o i popolârs, al è stât plui brâf a fâ fente di no tratâ cun ETA, ma cui che si è impegnât par cjatâ fûr une soluzion pacifiche al conflit, in primis tratant propit cu la organizazion armade basche, come che al dimostre un scandai comunicât ta chescj dîs de Comunitât Autonome Basche. Viodìn cemût che “El Mundo”, cuotidian che nol à ni simpatiis di çampe e che nol è nancje filobasc, al riferìs cheste notizie:

La maiorance dai bascs, o sei un 68%, e crôt che il guvier spagnûl al varès di inviâ contats gnûfs cun ETA, intant che une maiorance dal 68% si spietave che ETA e rompès la tregue e, duncje, no je stade cjapade di sorprese. Chest daûr di une inchieste dal Guvier de CAB. Su lis prospetivis pal avignî, la maiorance dai citadins e crôt che il guvier spagnûl al varès di imbastî contats gnûfs cun ETA. A pensâlu al è il 68% dai bascs. In ogni câs, dome il 14% nol è dacuardi che si vedin contats gnûfs jenfri il guvier spagnûl e ETA.

La reazion de çampe indipendentiste basche

Denant dal comunicât di ETA, cuale ise la posizion de çampe indipendentiste basche? Le cjatìn metude achì in pocjis peraulis dal puartevôs di Batasuna, Arnaldo Otegi, juste cualchi ore daspò che e jere stade comunicade la decision de organizazion armade basche.

ETA e je responsabile di vê rote la tregue, ma il guvier spagnûl e il PNV a son responsabii, come che o sin lâts dilunc a denunciâ tai ultins mês, dal colàs dal procès democratic.

A ce si riferissial Otegi? Al fat che la strade par saltâ fûr dal conflit e jere stade pensade su doi plans: un tra il guvier spagnûl e ETA par meti fin ae lote armade e par risolvi la cuestion dai centenârs di presonîrs politics bascs che a son tes presons spagnolis e dai militants che a son esiliâts o in clandestinitât; e chel altri cuntune taule che e clamàs dongje ducj i sogjets politics e che al permetès di cjatâ fûr une soluzion condividude par puartâ la societât basche a decidi dal so avignî. Par chel che al rivuarde il prin aspiet, daspò di cualchi contat il guvier spagnûl nol è lât plui indenant cui incuintris cun ETA. Par chel che al rivuarde il secont pont, invezit, daspò di un pôcs di incuintris sot vie tra socialiscj, PNV e Batasuna, si à bandonât la taule di confront prime di rivâ a meti sù alc di concret. Cun di plui, intant di chescj incuintris segrets, la repression cuintri de çampe indipendentiste basche e je fintremai cressude. Intun vêr procès di pâs, no si à mai viodût a colpî ta cheste maniere, une des parts fondamentâls e plui vivis intes negoziazions. Tant par capî miôr cheste situazion, pensìn a dôs domandis che a rivavin de aree nazionaliste basche, no dome chê radicâl, ven a dî: la pussibilitât pai presonîrs bascs di jessi svicinâts a cjase e di scontâ la lôr pene tes presons logadis tal Paîs Basc e la pussibilitât par Batasuna di tornâ a gjoldi di plene citadinance, cu la eliminazion de leç che le veve ilegalizade. Il guvier spagnûl nol à fat nuie par risolvi ni chê, ni chê altre cuestion. E je cheste la suaze che nus permet di capî miôr lis peraulis di Otegi e di vê avonde dubis denant des declarazions di Zapatero.

Come che si diseve, la repression cuintri de aree indipendentiste basche, no dome no si sbassade intant dal an e passe di tregue di ETA, ma, al contrari, e je cressude. Par esempli, tes ultimis elezions aministrativis che a àn interessât la Comunitât Autonome Basche e la Navare, no dome a son stadis proibidis dutis lis listis de çampe nazionalitarie basche judicadis eredis di Batasuna (cundut che par presentâsi a vessin vût lis firmis di disinis di miârs di citadins bascs), ma a son stadis anuladis ancje passe un centenâr di listis dal partît Eusko Abertzale Ekintza – Acción Nacionalista Vasca, ven a dî un partît politic legâl e che al condane la violence. Chest dome par vie che tra i candidâts in liste a jerin personis che a vevin vût leams intai agns stâts cun Batasuna o cun chê aree politiche. Distès, ANV e à otignût cuasi 200 mil vôts in dut il Paîs Basc spagnûl, a dimostrazion di trop che la opzion indipendentiste e sedi inlidrisade inte societât basche cundut di agns di repression, di ilegalizazion e di pidiments a esercitâ in maniere libare la ativitât politiche.

Justizie o svindic?

La politiche di repression e di ilegalizazion e à pôc a ce fâ cu la volontât dal guvier spagnûl, declarade dome a peraulis, di volê saltâ fûr dal conflit. Chest si lu capìs avonde ben ancje di doi ats a mieç tra il politic e il judiziari che si àn vûts tes zornadis subite daspò de fin de tregue proclamade di ETA. Doi ats che, par tancj di lôr, a àn pôc a ce viodi cu la libertât, cu la democrazie e cu la pâs riclamadis intal discors di Zapatero, ma che a san plui di svindic.

Il prin si riferìs ae decision di puartâ intune preson spagnole il presonîr politic Iñaki de Juana Chaos, che si cjatave intal ospedâl di Donostia là che al jere ricoverât par ricjapâsi des consecuencis di un lunc siopar de fam. De Juana al jere stât al centri di une vicende che e veve vût un grant significât simbolic par dute la societât basche. Di fat, daspò vê scontât vincj agns di preson par vê partecipât a azions di ETA, il ministri de justizie spagnûl López Aguilar al veve decidût che nol meretave di saltâ fûr di preson e duncje, doprant lis sôs peraulis, si veve di “creâ gnovis imputazions”. Cussì si lu veve acusât di “menacis di stamp terorist” su la fonde di doi articui scrits par denunciâ il sisteme penitenziari spagnûl e publicâts sul cuotidian basc “Gara”. Daspò di une lungje vicende judiziarie e di un siopar de fam inviât dal presonîr basc par denunciâ la sô situazion, si veve decidût di ricoverâlu tun ospedâl basc par recuperâlu, dal moment che al jere aromai in condizions disperadis, e po di dâi i arescj in cjase. Cumò cheste decision e je stade revocade e de Juana al è tornât in preson.

Chel altri episodi si riferìs al arest dal puartevôs di Batasuna, Arnaldo Otegi. La polizie lu à arestât vinars stât tant che al jere pront par tacâ une conference stampe par spiegâ la posizion dal so moviment daspò de fin de tregue di ETA. Cuintri di lui e pese une acuse di esaltazion dal terorisim e une condane inmò di confermâ a 15 mês di preson pal so intervent ae cerimonie di ricuart dal militant di ETA, José Migiel Beñaran. Beñaran, plui cognossût cul non di bataie di “Argala” al jere stât sassinât intal Paîs Basc francês, intun atentât organizât di grups paramilitârs formât di membris des fuarcis di polizie e di fassiscj spagnûi. “Argala” al veve vût un puest di prin plan inte lote cuintri dal regjim di Franco. Il stât spagnûl – cul impresonament di Otegi – al siere in galere une des personis che plui si à mot par rivâ a inviâ un procès di risoluzion pacifiche dal conflit. Daspò dal arest, lis peraulis di Otegi si lis à podudis scoltâ dome de vôs de sô avocate, Jone Goirizelaia, che, intune interviste dade ae emitente basche InfoSaspi e à contât cussì la reazion di Otegi al so impresonament e lis sôs declarazions sul ce fâ par saltâ fûr di cheste situazion:

O crôt che za al savès che e jere une des robis che a podevin capitâ, in ogni câs, di là di dut, al insist tal dî che la uniche strade che e je, la uniche strade che e esist, e je chê che e je stade fate indenant de çampe indipendentiste a partî de propueste di Anoeta, che al è il câs di restâ cuiets e di no fâ lis robis come che lis fâs il Partît socialist – cjalant pôc plui innà dal so nâs e cuntun spirt di svindic – ma cu la convinzion di ce che o volìn par Euskal Herria intal avignî e di metilu in vore cul lavôr di ogni dì, cul dialic, cul acuardi e di maniere che ae fin o podedin decidi in maniere libare il nestri futûr.

Pontade 09 07 (12/06/2007)

Paîs Catalans: contrascj su la tierce ore di spagnûl

Un decret dal Guvier spagnûl che al previôt un minim di trê oris di spagnûl par setemane intes scuelis primariis al è daûr a jevâ polemichis intai teritoris dal stât là che si dopre une lenghe proprie divierse. Il Guvier catalan al à decidût di impugnâ il decret denant dal Tribunâl costituzionâl dal moment che al judiche che al ledi a invadi competencis che i spietin al Guvier autonomic e no a chel centrâl. Cun di plui, come rispueste al intervent di Madrid, l’esecutîf catalan al à dât fûr un decret là che si previôt dome la pussibilitât di puartâ a trê lis oris setemanâls di insegnament di o par spagnûl. Une pussibilitât che però e à di jessi domandade di ogni istitût e motivade di plans specifics di insegnament. Duncje, se no si varà une domande specifiche o se cheste domande no sarà ben motivade, la ore in plui di spagnûl no si le fasarà.

Paîs Basc: finanziaments par sburtâ l’euskara intai puescj di vore

Il Guvier de Comunitât Autonome Basche al ufrìs aes aziendis logadis tal so teritori une analisi gratuite sul nivel dal ûs de lenghe basche intal lôr interni e i imprescj par promovi la lenghe proprie dal Paîs Basc. Il ministri vicjari pe politiche linguistiche, Patxi Bastarriaka, al à fat savê che il Guvier de CAB al à metût a disposizion par chest an 2 milions e 300 mil euros par promovi l’ûs de lenghe basche intes aziendis privadis, ven a dî il 26% in plui des risorsis metudis fûr l’an passât par chest stes fin. Finanziaments e jutoris a son previodûts ancje par chês aministrazions che a sburtin l’ûs dal euskara intai puescj di vore dal lôr teritori.

Romanie: rom discriminâts, denuncie di AI

Ancje la organizazion pai dirits umans Amnesty International e à denunciât intal so ultin rapuart su la Romanie la situazion di discriminazion vivude de comunitât rom che e vîf ta chest stât. Daûr dai censiments uficiâi, i Rom in Romanie a saressin passe mieç milion, ma daûr di stimis uficiosis il lôr numar al sarès sù par jù di doi milions, ven a dî che cuasi il 10% dai citadins rumens. Cundut achel, cheste minorance e va dilunc a jessi la plui discriminade e no dome dal pont di viste identitari, ma soredut par chel che al rivuarde la educazion, i servizis di assistence, il lavôr e la cjase. La denuncie di Amnesty International e va a zontâsi a chês za saltadis fûr de bande de Comission europeane cuintri dal razisim e de intolerance e dal Consei rumen cuintri de discriminazion.

Pontade 08 07 (29/05/2007)

ONU: 2008 proclamât an internazionâl des lenghis

Il 2008 al sarà l’an internazionâl des lenghis. La decision e je stade cjapade de Assemblee gjenerâl de Organizazion des Nazions Unidis. La iniziative e à chê di sburtâ la unitât traviers de diviersitât linguistiche. La Assemblee e à duncje indreçât ai Stâts e al Segretariât de ONU un invît a difindi e a promovi l’ûs di dutis lis lenghis feveladis intal mont, tune suaze di multilinguisim. Si trate dal sigûr di une finalitât meritorie che, magari cussì no, si cjate a fâ i conts cuntune realtât là che la plui part dai Stâts e puarte indenant politichis che a van te direzion contrarie dal plurilinguisim.

Galizie: Guvier impegnât pal galizian tai celulârs

Il Parlament de Galizie, cul vôt dai deputâts nazionaliscj e di chei socialiscj, al à impegnât la “Xunta”, o sei il Guvier galizian, a sotscrivi acuardis dome cun chês compagniis di telefonie mobile che a doprin ancje la lenghe galiziane intai lôr celulârs. In pratiche, al à spiegât il deputât nazionalist Bieito Lobeira, “se nol è il galizian, nol è nancje il contrat”. Par spiegâ la sô posizion contrarie, la diestre dal PP e à dite che par otignî cierts risultâts si à doprâ “la strade dal convinciment e no chê de imposizion”.

Galizie: campagne sindacâl par doprâ il galizian sul puest di vore

In Galizie, il sindacât CIG al à inviât une campagne par sburtâ l’ûs de lenghe galiziane intai rapuarts tra imprese e lavoradôrs e, plui in gjenerâl, dentri dal mont dal lavôr. Il sindacât al met dongje dal model di precarietât lavorative che al è daûr a slargjâsi, ancje un model di precarietât linguistiche, e al acuse i impresaris di imponi il spagnûl intes relazions cui lôr lavoradôrs e cui clients. La CIG e à cussì decidût di dâ fûr volantins, manifescj e altri materiâl par informâ i lavoradôrs sui lôr dirits linguistics e par sburtâ l’ûs dal galizian ancje sul puest di vore. Inte suaze de campagne, a vegnin dâts fûr ancje dai manualuts di formazion pai delegâts sindacâi.

Frisie: ultins dâts sul ûs de lenghe

Daûr de ultime ricercje puartade indenant de Provincie de Frisie, il 94% dai citadins frisons al capìs la lenghe proprie di chel teritori, il 74% le fevele, il 75% al è bon di leile e il 25% al è in stât di scrivile. Chescj numars a mostrin che la lenghe e je plui fuarte – al à comentât il ministri frison pe culture, Bertus Mulder – par esempli, rispiet al 1980, chei che a san scrivi par frison a son cressûts dal 15%. Dut câs, no dutis lis vôs de inchieste a son positivis: par esempli il frison e je la lenghe doprade in famee dome dal 48% des personis, ven a dî il 10% in mancul dal 1980. Il frison al va dilunc a tignî bot soredut in campagne, invezit al mostre dificoltâts tes citâts, massime chês plui grandis come la capitâl Ljouwert. Il 54% dai citadins de Frisie al considere il frison la sô prime lenghe, il 35% al ten invezit di prime lenghe l’olandês; par chel altri 10% la prime lenghe e je rapresentade dal cussì clamât “frison urban”, ven a dî un miscliç tra frison e olandês, o dal stellingwarfs, o sei il bas sasson che però al è daûr a pierdisi simpri di plui.

Irlande dal Nord: a risi la leç sul gaelic

In Irlande dal Nord la gnove leç sul gaelic e riscje di partî çuete o fintremai di no partî par nuie. Cun di fat, daspò che la propueste di leç pe promozion de lenghe irlandese, metude adun su la fonde di chês za in vore pal galês e pal gaelic scozês, e veve vût un judizi positîf dal guvier britanic e di chel de Republiche irlandese e che e jere stade poiade de grande maiorance des realtâts scoltadis intant des audizions tignudis in Març, cumò il Dipartiment pe culture, pes arts e pal timp libar di Belfast, al à decidût di fâ un altri zîr di consultazions che a rivaran insom ai 5 di Jugn. Cheste volte, i sogjets clamâts a dî la lôr a somein par trê cuarts contraris ae propueste di leç. Si riscje, duncje, che la legjislazion par difindi e promovi il gaelic irlandês e ledi sù pai stecs.

Isule di Man: il manx lenghe di insegnament ancje tes superiôrs

A van un tic miôr lis robis, invezit, pal manx, ven a dî la lenghe celtiche che e parten ae stesse famee dal gaelic irlandês e di chel scozês e che e je fevelade inte isule di Man. Di fat, il guvier de isule al à fat savê che l’insegnament dal manx al sarà disponibil ancje intes scuelis secondariis. Di fat, chest an a son daûr a rivâ insom dal lôr prin cicli di studis i fruts de Bunscoill Ghaelgagh – la uniche scuele primarie de isule là che l’insegnament al è puartât indenant par manx, metude sù intal 2001 – e, duncje, par lôr al jere il risi di no podê lâ indenant a studiâ inte lôr lenghe. Ta cheste maniere, come che al è stât provât di altris esperiencis ator pal mont, i fruts a riscjin di pierdi lis competencis linguistichis che a àn cjapadis sù. In graciis dal intervent dal guvier autonomic, cun Setembar i fruts che a tacaran il cicli di istruzion superiôr a varan a disposizion altris trê agns di scuele cul manx tant che lenghe di insegnament. Si trate di un esempli impuartant di trop che si pues fâ cuant che e je la volontât, se o pensìn che ai prins dal Nûfcent il manx al vignive aromai calcolât di lenghe muarte.

Scozie: l’indipendentist Salmond elet prin ministri

Alex Salmond al è stât elet tant che prin ministri scozês. Salmond al à vût la maiorance relative intal Parlament scozês, là che al à cjapât i 47 vôts dai deputâts dal so partît, il Scottish National Party, e i 2 vôts dai parlamentârs verts. Il candidât laburist, Jack McConnell, al à cjapât, invezit, lis 46 preferencis dai siei compagns di partît. Chei altris 33 deputâts elets intes filis dal partît Liberâl Democratic e ta chês dai Conservadôrs a àn sielt la strade de astension, par permeti la nassite di un Guvier di minorance che cumò al varà di concuistâsi, su ogni proviodiment, une maiorance divierse. Salmond al è il prin indipendentist che al à a cjâf di un guvier scozês.

Pontade 07 07 (15/05/2007)

Scozie: SNP prin partît tal Parlament, ma cence maiorance

Il Scottish National Party, cui siei 47 deputâts, al è deventât il prin partît intal Parlament scozês. Cundut achel, il partît nazionalist scozês – che al veve metût come prin pont dal so program la volontât di imbastî dentri dal 2010 un referendum pe indipendence de Scozie dal Ream Unît – nol à i numars par meti in pîts un guvier di maiorance. Di fat, par fâlu, i coventaressin almancul 65 parlamentârs. Par cheste reson, tes zornadis subite daspò dal vôt, la dirigjence dal SNP e à provât a stazâ la pussibilitât di meti sù une coalizion di guvier. Scartade daurman la pussibilitât di strenzi acuardis cui conservadôrs e cui laburiscj, si à provât a bati la strade dai Liberâi Democratics e dai Verts. I prins – che a àn vût elets 16 deputâts, ven a dî un in mancul de legjislature stade – a àn refudât cualsisei ipotesi di coalizion, almancul che il SNP nol rinuncii al so progjet di referendum pe indipendence: rinuncie che i nazionaliscj no son disponibii a fâ. Cui Verts, invezit, si à cjatât fûr un acuardi, no si tratarà di une vere coalizion di guvier, ma dome di une cooperazion esterne. In ogni câs, dal moment che i Verts a àn dome 2 deputâts intal Parlament di Holyrood, si è ancjemò lontans di une maiorance assolude. La strade plui probabile, a chest pont e je chê di un guvier di minorance vuidât dal leader dal SNP, Alex Salmond, che si cjatarà a vê di cjatâ fûr, su ogni proviodiment, une divierse maiorance. Il prin apontament impuartant, cumò, al è chel dai 16 di Mai pe elezion dal prin ministri, po al sarà timp fin ai 31 dal mês par cjatâ un acuardi. Se cul prin di Jugn nol sarà stât elet nissun prin ministri, si varà di tornâ al vôt ai prins di Avost.

Fasìn cumò un pas indaûr, par viodi plui in detai i risultâts des votazions dai 3 di Mai. Prin di dut si à di dî che lis elezions pal Parlament scozês a son stadis segnadis di grues problemis che a àn puartât a invalidâ sù par jù 140 mil schedis. A creâ problemis e je stade la introduzion di un gnûf sisteme par votâ e de confusion leade ae zonte des schedis pes aministrativis a chês pal Parlament. Cheste situazion, tra l’altri, e à puartât i laburiscj a contestâ la vitorie par a pene 48 vôts dal candidât nazionalist inte circoscrizion di Cunninghame North. Se il ricors al ves di puartâ a assegnâ il puest al candidât laburist, il Labour al tornarès a vê la maiorance relative tal Parlament scozês. Il SNP al à otignût 47 deputâts, ven a dî 20 in plui des elezions dal 2003, dimostrant di jessi il grant vincidôrs des elezions, ma i Laburiscj a àn 46 parlamentârs, juste un in mancul dai nazionaliscj e cuatri in mancul de legjislature stade. I Conservadôrs a àn 17 deputâts e i Liberâi Democratics 16, dutis e dôs chestis fuarcis a àn vût un parlamentâr in mancul rispiet al 2003. Tal front dai partîts a pro de indipendence scozese, i Verts a àn elet dome 2 deputâts, ven a stâi cinc in mancul des elezions stadis; invezit, il Scottish Socialist Party, penalizât des crevaduris internis che a àn puartât ae jessude dal leader storic dal moviment, Tommy Sheridan, si son cjatâts a pierdi ducj i 6 deputâts che a vevin.

Gales: Labour cence maiorance, indenant i nazionaliscj

Mancul ingredeade, invezit, la situazion che e je jessude des elezions pe Assemblee Nazionâl Galese, che si àn davueltis simpri ai 3 di Mai. Ancje in Gales i laburiscj a àn pierdût teren, cun 4 deputâts e cuasi il 7% di vôts in mancul rispiet ae legjislature stade. Cundut achel, cui lôr 26 elets, a restin il prin partît dal Gales ancje se a àn bisugne di almancul altris 5 deputâts par podê fâ stât su la maiorance assolude. Par chest la dirigjence laburiste e je cumò impegnade a stazâ lis disponibilitâts a meti sù une coalizion di guvier. Il partît che al à vût il risultât miôr ta chestis elezions al è il Plaid Cymru, ven a dî il partît nazionalist galês, che al à vuadagnât 3 deputâts e si cjate a jessi il secont partît in Gales cui siei 15 elets. Daûr dai nazionaliscj galês si placin i conservadôrs cun 12 deputâts, un in plui de legjislature stade. I liberâi democratics a conservin, invezit, i 6 deputâts che za a vevin. A completâ il cuadri al è po un elet indipendent. Escludude la pussibilitât di un acuardi di guvier cui conservadôrs, i laburiscj a son cumò daûr a viodi se si pues meti sù une coalizion cui Liberâi Democratics o, in alternative, cui nazionaliscj galês. I prins, che pûr di altris bandis a àn za formât des aleancis di guvier cui laburiscj, si cjatin a frontâ il marum di une part dai deputâts e de base che no je masse cjalde par cheste ipotesi. La dirigjence dal Plaid Cymru e dîs che la uniche strade par meti in pîts une coalizion e je chê di un acuardi di program clâr e condividût. E, si à di dî, che tra i doi partîts lis diferencis a son avonde marcadis. Par finî, al è di zontâ che pe prime volte inte Assemblee galese al jentre un deputât imigrât, si trate di Mohammad Asghar, al è di divignince pakistane e al è stât elet tes filis dal Plaid Cymru, a dimostrazion des capacitâts dal nazionalisim galês di jessi fuarce di integrazion e no di esclusion.

Irlande dal Nord: inviât il gnûf Guvier compartecipât

In Irlande dal Nord, si è insediât il gnûf Guvier compartecipât che al met adun i rapresentants dai partîts unioniscj e chei dal moviment republican e nazionalist irlandês. Daspò di cinc agns di guvier diret di Londre, ai 8 di Mai e à mot i siei prins pas la gnove aministrazion autonome. Pe storiche ocasion si son cjatâts intal cjistiel di Stormond, sede de assemblee nordirlandese, il prin ministri britanic Tony Blair e chel irlandês Bertie Ahern, ma ancje rapresentants politics rivâts di dut il mont. Daspò dal zurament, là che i ministris republicans a àn doprât ducj il gaelic, si àn vûts i discors uficiâi tignûts dal gnûf prin ministri nordirlandês, Ian Paisley, il leader storic dal Democratic Unionist Party, ven a dî la ale plui dure dal unionisim, e il so vice, Martin McGuinness, personaç di prin plan dal Sinn Féin e ex comandant dal IRA. “O crôt che la Irlande dal Nord e sedi rivade a di un timp di pâs, un timp là che a paronâ nol sarà plui l’odi” al à dite Paisley. “O savìn che no sarà une strade facile chê che o vin cjapât, plene di curvis e di volts come che e je, ma e je la strade che o vin sielzût e che e à la poie de grande maiorance de nestre int” al à zontât McGuinness. Dopo di lôr a son intervignûts Blair e Ahern. Par ducj al è clâr che no si trate di un compit sempliç e che no si puedin scancelâ dibot trente agns di conflit armât e cetancj di plui di discriminazion e opression, ma si trate in ogni câs di un pas indenant che si scugne cjalâ cun sperance.

Paîs Basc: centenârs di listis proibidis

La campagne eletorâl pes elezions comunâls e provinciâls intal Paîs Basc spagnûl e je condizionade a fuart de ilegalizazion e e incrès inmò di plui i dubis su lis garanziis democratichis intal stât spagnûl, za saltâts fûr de metude fûr leç di Batasuna, il partît di riferiment de çampe indipendentiste basche. Cun di fat il Tribunâl costituzionâl spagnûl al à decidût di anulâ dutis lis candidaturis e dutis lis 246 listis presentadis dal moviment “Abertzale Sozialistak”. La gnove formazion politiche, che si veve podude presentâ in graciis di une poie popolâr di passe 83 mil firmis, – une des plui altis mai vudis intal Paîs Basc par sostignî la partecipazion eletorâl di un partît – e je stade considerade des autoritâts spagnolis come un tentatîf di presentâ, sot di un non diviers, la ilegalizade Batasuna. Dut câs, se azions compagnis si lis veve za viodudis cuintri di dutis chês listis consideradis une riproposizion di Batasuna, cundut de tregue di ETA in vore e de propueste di soluzion pacifiche dal conflit fate indenant dal moviment de çampe indipendentiste basche, cui socialiscj di Zapatero al podê si à vût cûr di lâ inmò plui innà di chel che si veve viodût cu la diestre al podê. Cun di fat, a son stadis proibidis ancje 133 listis dal partît politic legâl “Acción Nacionalista Vasca”. Pe avocadure di stât che e à inviât il procediment e pal Tribunâl che lu à fat bon, ta chestis listis a saressin stâts dentri ancje dai candidâts che a vevin vût leams cun Batasuna. La reson che e veve puartât a meti fûr leç chest partît e jere leade al fat che nol veve mai condanât in maniere esplicite la ativitât dal moviment armât basc ETA, ma chest no si pues dal sigûr imputâlu a ANV che e à fintremai metût il refût de violence intal sô statût. Aromai baste che intune liste eletorâl e sedi dentri ancje dome une persone che in passât e à vût rapuarts cun Batasuna – ven a dî un partît politic, no dal sigûr une organizazion armade – par riscjâ di jessi proibide. No dome si trate di un principi che nol à nuie a ce spartî cu la democrazie, ma al vierç la strade a di un efiet moltiplicadôr, dal moment che ducj chei candidâts che – ancje se no àn mai vût a ce fâ cun Batasuna – a son dentri tune liste proibide, un doman, se si tornassin a candidâ, a podaressin puartâ a anulâ ancje la liste là che a son dentri. La stesse magjistrature, che par rivâ a di un tant e à zirât e voltât la legjislazion come che i leve miôr, e à ametût che si trate di un procès judiziari “inedit”. Une maniere elegante par dî che in nissun stât che si proclame democratic si veve mai viodût un alc dal gjenar. Cun di plui, par procurâsi il materiâl doprât par anulâ chestis listis, la polizie e à controlât no dome la storie politiche, ma ancje i contats di passe 11.700 candidâts. Ven a dî che plui di 11.700 citadins bascs a son stâts schedâts dome pes lôr ideis politichis.

Paîs Catalans: campagne pal dirit di referendum

Inte zornade di Sant Jordi, ven a dî Sant Zorç patron de Catalogne, e je scomençade une racuelte di firmis par domandâ il dirit dai Parlaments dai Paîs Catalans a inviâ dai referendums: podê che, in dì di vuê, al è tes mans des autoritâts centrâls. Daûr di cheste campagne a son dôs organizazions di racuelte, ven a dî la “Plataforma pel dret de decidir” e la “Plataforma Sobirania i Progrés”, che a lôr si son po zontadis cetantis altris organizazions catalanis. A son centenârs i ponts di racuelte des firmis metûts sù par sostignî cheste campagne.

Pontade 06 07 (17/04/2007)

Stât francês: i candidâts ae presidence e lis lenghis minoritariis

Cul svicinâsi des elezions presidenziâls intal stât francês un trop di ativiscj impegnâts inte difese e inte promozions des lenghis minoritariis e des varietâts linguistichis dal teritori a àn inviât une gnove iniziative che e à non “Pat des lenghis” e che dutis lis informazions in proposit si puedin cjatâ sul sît Internet pactedeslangues.com . Se l’obietîf finâl de campagne al è chel di rivâ a di une France che e ricognossi ad in plen la sô diviersitât linguistiche e là che si puedin doprâ in maniere paritarie, dongje dal francês, ancje lis lenghis regjonâls, intal sît si puedin bielzà viodi chês che a son lis opinions dai diviers candidâts su chest argoment. Par esempli, la candidade socialiste Ségolène Royal, il centrist François Bayrou e il vert Dominic Voynet a àn ducj declarât che a intindin poiâ la promozion des lenghis regjonâls e che si impegnin a lavorâ par che la France e ratifichi la Cjarte europeane pes lenghis regjonâls o minoritariis. Se si cjale a diestre, Nikolas Sarkozy, che tai sondaçs al svole adalt, al fevele di dâ une poie pal lôr insegnament, ma al dîs a clâr di jessi cuintri de ratifiche de Cjarte europeane pes lenghis. Plui a diestre, i candidâts Jean Marie le Pen e Philippe de Villiers, no àn nancje frontât l’argoment. I doi candidâts comuniscj Olivier Besancenot e Marie George Buffet a àn declarât di jessi a pro dal svilup des lenghis minoritariis in ducj i cantins de societât. Jose Bové, une vore cognossût pal so impegn cuintri de globalizazion, al à dite di jessi favorevul a modificâ la Costituzion francese par permeti la ratifiche de Cjarte europeane des lenghis e di jessi dacuardi cul jutori public pes scuelis che a puartin indenant l’insegnament a imersion di une lenghe minoritarie tant che lis Diwan, lis Calandretas e lis Ikastolak. Dut câs, tra i trê candidâts che a cjatin plui simpatie tra l’eletorât francês, ven a dî Nikolas Sarkozy, Ségolène Royal e François Bayrou, chel plui convint te poie des lenghis minoritariis al è propit chest ultin, che si à dite a pro de modifiche de Costituzion, de ratifiche de Cjarte europeane des lenghis e dal svilup di une politiche di valorizazion des lenghis regjonâls a tacâ de scuele e dai mieçs di comunicazion.

Bretagne: in place pes scuelis Diwan

A jerin plui di 5 mil lis personis che sabide ai 31 di Març si son dadis dongje in Bretagne, a Lorient, par protestâ pe mancjance di risorsis pes Diwan, lis scuelis bretonis a imersion. Lis personis che a àn manifestât, si domandin parcè che chestis scuelis no vegnin parificadis a chês publichis e finanziadis dal stât. Cun di fat, a spieghin, i gjenitôrs che a vuelin pai lôr fîs une istruzion in lenghe bretone, dongje di paiâ lis tassis pe scuele publiche, a àn po di paiâ ancje par mandâ i fruts tes Diwan, che a van indenant dome cui finanziaments privâts. Inmò tal 2001, il ministri pe educazion Jack Lang al jere intervignût par che lis scuelis bretonis a fossin finanziadis dal public, ma il proviodiment al è stât blocât dal Consei di Stât. E la situazion, invezit di lâ in miôr, e riscje di lâ simpri in piês.

Bretagne: prodots Microsoft par breton

L’Ofis ar Brezhoneg, ven a dî l’Ufici pe lenghe bretone, al à sotscrit un acuardi cu la Microsoft di maniere di meti a disposizion dai citadins ancje la version par breton dai prodots principâi de multinazionâl americane.

Paîs Catalans: volontaris pe lenghe tes Baleârs

La organizazion “Obra Cultural Balear” e à metût sù la Agjenzie dal Volontariât Linguistic, ven a dî un ent là che a puedin partecipâ ducj chei che a vuelin dâ une man a slargjâ l’ûs sociâl de lenghe catalane. Ta chestis zornadis la iniziative e je stade presentade ancje ae presidente dal Consei di Maiorca, Maria Antònia Munar. I prins grups di volontaris, cun di fat, a tacaran a lavorâ soredut tai cuartîrs de citât di Palma di Maiorca e tes zonis costieris li dongje. Un dai prins obietîfs de Agjenzie – al à spiegât il president de “Obra Cultural Balear”, Jaume Mateu – e je chê di tirâ dongje un miâr di volontaris che a puedin sensibilizâ al ûs dal catalan ancje setôrs gnûfs de societât.

Sahara Ocidentâl: ae ONU propueste dal Polisario

Il president de Republiche Arabe Saharawi Democratiche e segretari gjenerâl dal Front Polisario, che al rapresente lis popolazions saharawi, al à fat savê che e je stade metude adun une gnove propueste di risoluzion dal conflit che, daûr des risoluzions de Assemblee gjenerâl e dal Consei di sigurece de ONU, i permeti al popul saharawi di esercitâ il so dirit di autodeterminazion par mieç di un referendum libar e regolâr. Il test, che al presente ancje la disponibilitât a di une cooperazion cul Maroc, stât che al ocupe cu la fuarce il Sahara ocidentâl, al è stât consegnât cualchi zornade indaûr al segretari gjenerâl de ONU, Ban Ki Moon. In rispueste a cheste iniziative, il Maroc al à presentât ancje lui al segretari ONU une propueste che e previôt dome une forme lizere di autonomie pal Sahara Ocidentâl. La propueste, dut câs, e à za vût il parê contrari dal Front Polisario che al à dite che la soluzion de cuestion no pues passâ pe autonomie, ma dome pal dirit ae decision libare dal popul saharawi. O ricuardìn che, il regjim marochin, daspò di plui di 30 agns di ocupazion ilegâl di cheste tiere al va dilunc a perseguitâ no dome i militants saharawi che a vivin intai teritoris ocupâts, ma ancje il rest de popolazion native. Juste l’an passât si vevin vûts moments di repression une vore violente tes citâts saharawi plui impuartantis, cun agressions, arescj arbitraris, torturis e sparizion di diviers citadins saharawi.

Pontade 05 07 (03/04/2007)

Irlande dal Nord: gnûf guvier cui 5 di Mai

Cui 5 di Mai, in Irlande dal Nord, la aministrazion direte di Londre e lassarà il puest a di une aministrazion locâl condividude. La gnove e salte fûr dal incuintri storic che si è davuelt ai 26 di Març tra Ian Paisley, pari – paron dal Democratic Unionist Party, e Gerry Adams, president dal Sinn Féin. Storic par vie che si è tratât dal prin incuintri diret tra i doi, ma soredut parcè che si à cjatât l’acuardi par meti in pîts un guvier là che a son dentri sei i rapresentants de fazion plui estremiste dal panorame politic unionist nordirlandês, sei chei dal moviment republican irlandês impegnât intun procès di unificazion politiche de isule. Fin cumò, Paisley e i siei si vevin simpri refudâts di lavorâ adun cul Sinn Féin, tirant fûr ogni sorte di scuse e domandant simpri gnovis dimostrazions di buine volontât de bande dal moviment republican. Dut câs, denant dal percors clâr dal Sinn Féin par puartâ indenant il procès di pâs, ma soredut denant de prospetive che un altri “no” ae condivision de aministrazion locâl al varès puartât a di une incressite dal pês dal guvier di Dublin tes cuestions nordirlandesis, il Democratic Unionist Party al à vût di strenzi l’acuardi cui storics aversaris dal Sinn Féin. I detais par imbastî e puartâ indenant il guvier nordirlandês a varan cumò di jessi decidûts tune schirie di incuintris tra lis delegazions dai doi partîts vuidâts dal stes Paisley, che al varà la incarghe di prin ministri, e di Martin McGuinness, ex comandant dal IRA, che al sarà il vice prin ministri dal gnûf guvier. “La devoluzion no je un obietîf in se, ma achì si trate di cambiâ in miôr la vite de int” al à spiegât Paisley. “A son inmò cetantis sfidis e cetantis dificoltâts di frontâ – al à comentât Gerry Adams ae fin dal incuintri – ma che al sedi clâr che la fonde dal acuardi jenfri Sinn Féin e Democratic Unionist Party e diven dal impegn precîs e benvignût di Ian Paisley di poiâ e partecipâ ad in plen aes istituzions politichis [nordirlandesis] a tacâ dai 8 di Mai.” Intes ultimis elezions pe Assemblee nordirlandese, che si vevin davueltis cualchi setemane indaûr, i doi partîts, che za di timp a jerin i plui votâts framieç de comunitât unioniste di une bande e nazionaliste di chê altre, a vevin cressût inmò di plui la lôr fuarce in tiermins di vôts e di deputâts.

Ream Unît: tirade di orelis su la tutele des minorancis

Il Consei de Europe al à tirât lis orelis al esecutîf di Londre in mert ae metude in vore de Cjarte europeane pes lenghis regjonâls o minoritariis. Cun di fat, lis racomandazions fatis indenant dal Comitât dai ministris europeans a critichin la politiche dal guvier britanic in teme di minorancis. In particolâr – si lei tal rapuart che al rive di Bruxelles – al covente: svilupâ e incressi la politiche educative a pro dal gaelic scozês; dâi plui poie ai mieçs di comunicazion su cjarte par gaelic scozês e irlandês; inviâ une politiche linguistiche gjenerâl pal irlandês, ancje par rispuindi al cressi de domande di insegnament par gaelic; incressi l’ûs dal galês come lenghe veicolâr inte scuele, massime par dâi continuitât intal passaç tra istruzion primarie e secondarie; aumentâ la presince dal galês intal cjamp sanitari e intai servizis sociâi; e, in fin, dâi plui pês ae tutele dal scots fevelât in Scozie e in Ulster. Se e je vere che la competence in tancj di chescj setôrs e je dai guviers locâi, al dîs il Comitât dai ministris, e je ancje vere che il guvier di Londre no si à preocupât di intervignî par comedâ i problemis, come che invezit i domande la sô ratifiche de Cjarte europeane pes lenghis regjonâls o minoritariis.

Scozie: jessût il prin Plan Nazionâl pal Gaelic

In Scozie, al è stât publicât il prin Plan Nazionâl pal Gaelic, prontât dal Bòrd na Gàidhlig, o sei la agjenzie pe lenghe gaeliche, daspò di un lunc percors di consultazions. Il document al à vût diviers mudaments intant dal percors di consultazion, fin ae version finâl che e je cumò a disposizion di ducj. Il Plan al fisse i obietîfs di rivâi intai prossims cinc agns e i sistemis miôr par fâlu. Si trate, prin di dut, di meti in vore politichis seriis par incressi l’ûs e il status di cheste lenghe. Si à di sburtâ la int che lu sa za a doprâlu e chei che no lu san a imparâlu, chest cun azions che a cjapin dentri la scuele, i mieçs di comunicazion, istituzions publichis, e ancje realtâts privadis.

Scozie: tv gaeliche dentri dal an

Dentri dal an, in Scozie, al jentrarà in vore il gnûf canâl televisîf par gaelic. Il guvier scozês, di fat, al à garantît che al metarà 3 milions e 100 mil sterlinis al an par inviâ cheste television. Sul imprin, il canâl par gaelic al trasmetarà une ore e mieze in dì di programs gnûfs e, tra chescj, ancje un program di gnovis. Dilunc vie de zornade, dut câs, a saran mandadis in onde ancje replichis e programs di archivi, di maniere di vê un palinsest cuotidian un tic plui siôr. Ta cheste maniere – e à comentât la ministre scozese pe culture, Patricia Ferguson – o sperìn di dâi al gaelic un sburt sei dal pont di viste dal status, sei dal pont di viste dal ûs. Dut câs, pai prins agns, la television e sarà disponibile dome sul digjitâl satelitâr, che al è il sisteme plui doprât tes isulis ocidentâls e tes Highlands, là che si concentre la plui part de popolazion che e fevele inmò par gaelic. I ativiscj pe lenghe a lamentin il fat che il segnâl nol sarà disponibil ancje sul digjitâl a tiere, ven a dî chel plui doprât tal rest de Scozie, là che tancj di lôr no varan duncje la pussibilitât di viodilu.

Paîs Catalans: il guvier valenzian al vûl sierâ lis tv catalanis

La lenghe catalane dongje di jessi fevelade intal Principât di Catalogne, e je la lenghe proprie ancje de Catalogne Nord (intal stât francês), de citât dal Alguer (in Sardegne), de fasse orientâl dal Aragon, des isulis Baleârs e dal Paîs Valenzian. Ta cheste ultime comunitât, di plui di 20 agns, si pues viodi la television catalane in graciis di une schirie di ripetitôrs metûts sù de associazion “Acció Cultural del País Valencià” cu la poie economiche di miârs di citadins. Cumò, il guvier valenzian, che al è tes mans de diestre spagnoliste, al à menaçât di sierâ in maniere definitive la television catalane e dâi ae associazion une multe tra i 60 mil e il milion di euros par trasmissions ilegâls. La cuestion e je che, a trasmeti te stesse situazion de television catalane, a son almancul une dozene di emitentis, ma il guvier valenzian al à menaçât dome chês che a doprin il catalan. L’esecutîf valenzian al à ancje refudât la propueste di acuardi rivade dal guvier catalan par risolvi la situazion. A chest pont, la associazion “Acció Cultural del País Valencià”, adun cun altris associazions e ents che a lavorin a pro de lenghe, e à inviât une mobilitazion par fâi cuintri ae decision dal guvier valenzian acusât di censure, di agression ae lenghe catalane e al dirit a di une informazion plurâl. Cun di plui e à decidût di inviâ une azion legâl dal moment che e judiche che l’esecutîf valenzian nol vedi la autoritât par sierâ lis trasmissions de television catalane.

Pontade 04 07 (20/03/2007)

Irlande dal Nord: lis elezions a radicalizin lis posizions

Contrari di ce che a pensin tancj di lôr, il procès di pâs in Irlande dal Nord al è inmò lontan dal jessi rivât insom e, in dì di vuê, a son inmò tantis lis cuestions di discrosâ e i problemis che a restin ancjemò in pîts. E, ancje chi, contrari di ce che tancj a son puartâts a pensâ, i pidiments principâi no rivin de part nazionaliste e republicane de popolazion irlandese, si ben dai setôrs politics espression de part unioniste che, come che al è sucedût ta chescj agns, a son simpri pronts a cjatâ fûr gnovis provis di fâ superâ ai republicans, cence jessi disponibii a fâ nissun pas indaûr. Poiâts, ta chest mût di fâ, des autoritâts britanichis che, lontanis di davuelzi chê funzion super partes che a volaressin fâ crodi al mont, a mostrin a clâr di clopâ dut di une bande. La mancjance di disponibilitât dai partîts unioniscj ae condivision dal podê cui moviments che a rapresentin la popolazion nazionaliste e republicane irlandese, e à puartât ancjemò une volte al vôt par elei i deputâts pe Assemblee nordirlandese. Il cuadri che al è saltât fûr, dut câs, al mostre une radicalizazion inmò plui fuarte dal eletorât. In cinc partîts si son dividûts passe il 90% dai vôts. A cressi di plui al è stât il Democratic Unionist Party, o sei la ale plui dure dal unionisim vuidade dal pari – paron Ian Paisley, che cul so 30,1% dai vôts al à cumò 36 deputâts, ven a dî 6 in plui des ultimis elezions. Simpri sul front unionist, si à sbassât une vore il consens pal Ulster Unionist Party, che al à pierdût cuasi il 8% dai vôts e 9 deputâts, ma che al pues contâ ancjemò su 18 elets. A cressi une vore, invezit, al è stât il Sinn Féin, il partît di riferiment dai republicans irlandês, che al à cjapât plui dal 26% dai vôts e che al à vût 28 deputâts, 4 in plui de ultime volte. Il Social Democratic and Labour Party, che al rapresente l’eletorât nazionalist irlandês plui moderât, cul 15% dal consens al à vût 16 deputâts, ven a stâi 2 in mancul de ultime volte. Cuinte fuarce in cjamp e je l’Alliance Party, moviment che al varès di rapresentâ la aree moderade cence riferiments confessionâi, cul 5,2% dai vôts e 7 deputâts, un in plui des ultimis elezions. A completâ la Assemblee nordirlandese a son po altris trê deputâts: un vert, un indipendent e un rapresentant dal Progressive Unionist Party, ven a dî la espression politiche di une part dai grups armâts lealiscj, ma che e puarte indenant une politiche plui progressiste di chei altris moviments unioniscj e ancje plui disponibile tai confronts dal Sinn Féin. Cumò al è timp fin ai 26 di Març par rivâ a di un guvier che al meti dongje esponents unioniscj e republicans. Cence di chel si larà indenant cu la aministrazion direte di Londre.

Irlande dal Nord: gnovis consultazions pe leç sul gaelic

Il guvier britanic al à presentâts lis liniis de propueste di leç che al intint di presentâ su la tutele dal gaelic in Irlande dal Nord. Tra lis altris si previodin: la pussibilitât di doprâ l’irlandês tai procediments penâi; plans pal ûs de lenghe intai uficis publics; documents uficiâi ancje par gaelic; e un comissari pe lenghe irlandese. La leç e jere stade prometude za di timp dal guvier britanic, daspò di agns di pressions des associazions a pro dal gaelic e dai rapresentants de comunitât nazionaliste nordirlandese. Dome che cumò, il guvier al à fat savê che al vierzarà un altri zîr di consultazions di 12 setemanis, cundut che associazions, istituzions e moviments politics a fossin za stâts sintûts in proposit. Pes associazions che si batin pe tutele e la promozion de lenghe irlandese, chel dal guvier di Londre al è un compuartament scoret che al va cuintri des garanziis che a jerin stadis dadis e che a jerin previodudis ancje intai acuardis di pâs.

Cornualie: cornic inmò fûr de Convenzion Cuadri

Il rapuart su la metude in vore de Convenzion cuadri pe protezion des minorancis nazionâls che il guvier britanic al à inviât al Consei de Europe sul finî di Fevrâr nol fâs riferiment ae Cornualie. Ancjemò une volte, duncje, il Ream Unît al sielç di no calcolâ i cornics di comunitât nazionâl. Diviersis aministrazions locâls, associazions, organizazions no governativis e ancje parlamentârs a vevin domandât di slargjâ lis misuris di tutele previodudis de Convenzion ancje ae comunitât corniche, ma cence sucès. Tor de fin dal mês, dut câs, rapresentants dal Consei de Europe a saran a Londre par frontâ la cuestion sei cui delegâts dal guvier britanic, sei cui rapresentants cornics. Intai ultins agns e je cressude in Cornualie tant la domande di vê une Assemblee nazionâl, sul model di chê galese, che la domande di tutele pe lenghe proprie, une lenghe celtiche imparintade cul galês e cul breton.

Paîs Basc: si lavore su la riforme de scuele

Novitâts par chel che al rivuarde il sisteme scolastic inte Comunitât Autonome Basche. Fin cumò la plui part des scuelis e jere organizade su trê modei: A, dut par spagnûl fûr che lis oris pal insegnament de lenghe basche; B, che al jere, plui o mancul, a miezis tra spagnûl e basc; e D, dut par basc gjavadis lis oris pal insegnament dal spagnûl e di une lenghe foreste. Tai ultins agns i gjenitôrs a àn sielzût pai lôr fîs simpri di plui chest ultin model che cumò al è aromai il plui frecuentât. La plui part di chei altris students a frecuentin il model bilengâl e a son simpri di mancul chei che a seguissin il model par spagnûl. Dut câs ducj i partîts de CAB, gjavade la diestre spagnoliste dal PP, a àn decidût che al è rivât il moment di riformâ chest sisteme. Il gnûf implant scolastic che al à tacât il so iter intes istituzions baschis al previôt une presince plui fuarte dal basc e al fisse dai nivei minims di competence linguistiche di verificâ a ogni cicli scolastic. Dentri di cheste suaze, ogni scuele e podarà sielzi ce lenghis doprâ pes diviersis materiis. L’obietîf finâl al è chel di garantî che ducj i students a vedin un nivel di paronance de lenghe basche, dal spagnûl e di une lenghe foreste.

Ocitanie: a Besièrs la manifestazion “Anem Òc!”

Grande partecipazion sabide ai 17 di Març a Besièrs/Beziers, te regjon de Lenghedoc, là che si è davuelte la manifestazion “Anem Òc!” inmaneade di un coletîf di associazions formadis dal Institut d’Estudis Occitans, dal Felibrige, de Federazion dai insegnants di lenghe e culture ocitane, des scuelis Calandretas, de associazion Òc-Bi e dal Conselh de la Joventut d’Òc. Cun cheste iniziative si voleve domandâ al guvier francês il rispiet dai dirits de popolazion di lenghe ocitane cu la presince dal ocitan intes scuele statâl, inte aministrazion publiche e intai mieçs di comunicazion. La manifestazion, che e à vût la poie di 300 aministradôrs locâi, 200 associazions culturâls e 500 personalitâts dal mont culturâl, economic, sportîf e associatîf, e à puartât in place plui di 20 mil personis.

Republiche Ceche: in vore la Cjarte europeane pes lenghis

Cul prin di Març e je jentrade in vore inte Republiche Ceche la Cjarte europeane pes lenghis regjonâls o minoritariis. Cundut achel, la situazion no mude plui di tant pes comunitâts di minorance che a vivin tal paîs centrieuropean, là che la leç e previodeve bielzà misuris di tutele pal ûs des lenghis inte scuele, inte publiche aministrazion, inte justizie, tai mieçs di comunicazion e te segnaletiche. Une tutele che, dut câs, e jentre in vore dome là che la minorance e rapresente almancul il 10% de popolazion. Di chest pont di viste la situazion miôr e je chê dai polacs che a vivin te regjon a cjaval tra Moravie e Slesie. Un ciert nivel di tutele, dut câs, al interesse ancje slovacs, todescs e rom; plui dificile, invezit, la situazion pai ongjarês.

Pontade 03 07 (06/03/2007)

Irlande dal Nord: sucès pe marce pal gaelic

La ultime setemane di Fevrâr cualchi miâr di personis, pe plui part zovins, al à partecipât a di une manifestazion a Belfast, in Irlande dal Nord, a pro dal gaelic irlandês. La iniziative e veve chê di sburtâ il guvier britanic a meti in vore i impegns che al à cjapât par promovi la lenghe gaeliche tes Sîs Conteis de Irlande dal Nord. Al è stât un sucès, a disin i organizadôrs, ancje parcè che e je la prime volte che intal Nord de Irlande si davuelç une marce a pro dal irlandês. Baste pensâ che nol è passât masse timp di cuant che manifestazions là che al jere ancje dome un strisson par gaelic a vignivin atacadis dai estremiscj unioniscj.

Gales: siencis e matematiche, miôr par galês

La educazion bilengâl e i aspiets positîfs dal bilinguisim a son aromai un element avonde salt in Gales, ma a restin ancjemò dai prejudizis di eliminâ. Par esempli, a son ancjemò in tancj a pensâ che insegnâ ai fruts lis siencis e la matematiche par galês al sedi un disvantaç. Propit par chest l’Ufici pe lenghe galese al à tignût di voli la situazion tai ultins trê agns. Il dât che al è saltât fûr, e che al è stât comunicât pôc timp indaûr, al ribalte la situazion. Cun di fat i fruts che a studiin chestis materiis par galês a àn risultâts miôr di chei che lis studiin par inglês. Il dât al diven dal confront di esercitazions compagnis fatis intes scuelis, là che si à fat atenzion ancje a confrontâ scuelis che, cundut de lenghe di insegnament divierse, a vevin i stes nivei gjenerâi di cualitât.

Cecenie: segnaladis torturis sistematichis

Il responsabil pai dirits umans dal Consei de Europe, Thomas Hammarberg, al à acusât lis autoritâts cecenis filorussis di doprâ in maniere sistematiche la torture par otignî confessions falsis. Cun di plui – al à zontât il delegât european – intes presons a son provis di abûs grandonons dai dirits umans. Il gnûf president de Cecenie e ex prin ministri, Ramzan Kadirov, metût sù cu la poie di Vladimir Putin, al è acusât di cetantis organizazions pe difese dai dirits umans di jessi il responsabil diret di un grum di arescj ilegâi, di torturis e di violencis sui civîi e di jessi cjapât dentri tal sassinament de gjornaliste russe Anna Politovskaia. Al è zaromai di agns che la popolazion cecene e je stade vitime di un vêr gjenocidi de bande des trupis russis e des miliziis cecenis filorussis.

Ongjarie: gnûf canâl radio pes minorancis

La stazion radiofoniche dal servizi public ongjarês “Magyar Rádió” e à comunicât la vierzidure di un gnûf canâl, clamât MR4, che al mandarà in onde programs ducj dedicâts aes minorancis etnichis e nazionâls che a vivin tal paîs danubian. Il canâl al cuvierç dut il teritori statâl, ma i siei

Svezie: buinis gnovis pai finlandês di Stocolme

Simpri in teme di radiofonie, la emitente svedese “SR Sisuradio” che e trasmet in lenghe finlandese, e slargjarà la sô cuvierzidure a tacâ dai 2 di Avrîl. Di chê zornade, la radio si podarà scoltâle in dute la aree metropolitane di Stocolme, là che a vivin sù par jù cent mil finlandês.

Pontade 03 07 (06/03/2007) - aprofondiment

Paîs Basc: propueste di Batasuna par saltâ fûr dal conflit

Tra lis novitâts capitadis intal Paîs Basc ta chestis ultimis setemanis a ‘nt meretin segnaladis almancul dôs.

Di une bande o vin la propueste fate indenant de formazion politiche di riferiment de çampe indipendentiste basche, ven a dî Batasuna, partît metût fûr leç dal Parlament di Madrid cul vôt dai spagnoliscj dal PP e dal PSOE, ma che al rapresente almancul il 10% de popolazion basche. La propueste fate indenant si môf su la linie dal superament dal conflit in graciis di un acuardi politic che al puarti a di une gnove suaze politiche e istituzionâl par Euskal Herria. Tra lis novitâts metudis su la taule di cheste propueste e je chê di inviâ un procès democratic di sovranitât basche a partî des istituzions che za a esistin, in primis di chês dal Paîs Basc spagnûl, ven a dî lis trê provinciis de Comunitât Autonome Basche e la Comunitât navare. Un procès definît di “autonomie politiche” che al vierzi la strade a di une discussion gjenerâl là che a sedin dentri dutis lis opzions politichis, duncje ancje chê indipendentiste. Cheste propueste ise un savoltament des posizions puartadis indenant fin a vuê de çampe indipendentiste basche? Pal puartevôs di Batasuna, Arnaldo Otegi, no je cussì, come che al spieghe tune interviste fate de emitente basche “Info Zazpi Irratia”:

Dal gno pont di viste, la propueste che la ezkerra abertzale e à metût su la taule e à chê di cjatâ fûr posizions costrutivis e positivis par superâ chei doi grancj mûrs che dilunc de storie a àn saborât il conflit intal nestri paîs, ven a dî chel de division teritoriâl dal Paîs Basc e chel dal dirit dal popul basc di decidi. Cheste propueste e vûl creâ un cuadri gjenerâl che al permeti di rivâ a di un acuardi par inviâ un procès democratic, ven a dî imbastî un acuardi politic che al fissi un senari di pâs stabile e continuative intal paîs.

Ta chest propueste no je dentri la peraule autodeterminazion, ma la strade ise simpri chê? Otegi al rispuint cussì:

Cuant che si frontin argoments di cheste fate, al pâr simpri che a sedin peraulis tabù, che no si puedin doprâ tune taule di negoziazion. O vin vût a ce fâ cun politics che a podevin poiâ l’implant politic che o vevin tal cjâf nô, ma che a disevin che nol jere propit chel de autodeterminazion. Di là de semantiche, ce che mi interesse di sclarî al è che la peraule autodeterminazion e vûl dome dî che lis citadinis e i citadins bascs a àn il dirit di decidi in maniere libare e democratiche il lôr status istituzionâl. Dome su chel si pues imbastî un senari di condizions compagnis par ducj. Nô o sin indipendentiscj e o volìn un stât indipendent cun dentri i cinc teritoris storics dal Paîs Basc e duncje o domandìn un procès democratic che al puarti a di un cuadri politic là che il nestri progjet al puedi deventâ realtât e che a fâlu a sedin lis citadinis e i citadins cun mieçs pacifics e democratics. Par piturâ chest cuadri, nô o vin fevelât fin cumò di procès di autodeterminazion e o crodìn che nol vedi un altri non, ma se in cierts câs al è dome il non a dâ fastidi si pues ancje metilu di bande. Ce che o volìn dî in maniere clare e che o vin metût su la taule al è che no si pues superâ il conflit se no si permet che lis citadinis e i citadins bascs a decidedin in maniere democratiche dal lôr avignî cence nissun limit che nol sedi chel de volontât popolâr.

Cheste propueste, dut câs, e à – disìn cussì – gjavât l’alibi des peraulis a cualchidun. Al è il câs, par esempli, dal PNV che al à cirût di dineâ la sô impuartance.

Al è ta cheste clime che si à vût un altri acjadiment impuartant che al è capitât sabide ai 24 di Fevrâr. Ta chê zornade, di fat, e jere stade clamade dongje une manifestazion a Bilbao par rivendicâ il dirit ae autodeterminazion, ma soredut par difindi i dirits dai presonîrs politics: un teme che al è cjâr a cetancj bascs, ancje chei che no fasin part de çampe indipendentiste rapresentade di Batasuna. La manifestazion, come dutis chês che a viodin la adesion di rapresentants de ezkerra abertzale, e je stade proibide de magjistrature spagnole. Cundut achel miârs di personis a son rivadis a Bilbao par manifestâ in maniere pacifiche lis lôr ideis. Cuintri di lôr si è discjadenade in maniere brutâl la Ertzaintza, ven a dî la polizie autonomiche basche, che e à causât une sdrume di ferîts tra i manifestants e tra il public, dongje di puartâ a diviers arescj. Par fevelâ di chest episodi al è interessât lei un pâr di passaçs de interviste al dirigjent di Batasuna, Joseba Permach, che e je lade in onde simpri su la emitente “Info Zazpi Irratia”. Permach al è propit un dai arestâts e i è stât domandât cemût che si à rivâts al so arest e cuale che e jere la situazion:

Ducj chei che a jerin là, fossino lis personis che a partecipavin ae manifestazion o ancje i rapresentants dai mieçs di comunicazion e i gjornaliscj che a jerin vignûts, ducj lôr a àn podût viodi che il compuartament mostrât de polizie autonomiche dal PNV al jere une vore provocatori, che a cirivin incidents za dal principi. Al jere di agns che no viodevin un compuartament come chel mostrât de polizie e, massime, de Brigade Mobile, bielzà dal prin tacâ de manifestazion. Par fâ un esempli, miezore e ancje plui, prime dal inizi de manifestazion a jerin za reparts de Brigade Mobile tal sît sielzût par partî, za dal principi a jerin saltâts fûr dai blindâts par cjariâ cuintri dai familiârs dai presonîrs che a jerin daûr a dâsi dongje e a son lâts indenant cussì fin che o vin decidût, par evitâ incidents, di superâ il cordon de polizie cjapant une strade paralele là che, dut câs, a jerin altris reparts de Ertzaintza, ancje se no de Brigade Mobile, e chi si son indreçâts in maniere clare, e al è plen di testemonis che a puedin contâlu, dome cuintri di me: mi àn cjapât i documents e mi àn dite di dispierdi la manifestazion se no mi varessin arestât. Po a àn decidût di cjariâ in maniere brutâl e intant che a pestavin la int che e jere dongje, a son rivâts li di me e mi àn puartât vie.

La çampe indipendentiste e à acusât il PNV, che al è al podê te CAB, e che, duncje, al comande la Ertzaintza, di jessi responsabil par ce che al è sucedût. I rapresentants dal partît nazionalist basc, invezit, a àn dite che la colpe e jere des autoritâts spagnolis che a àn proibît la manifestazion e dal ategjament provocatori di Batasuna. Cheste la rispueste di Permach:

Noaltris no dineìn che la responsabilitât prime e principâl dal dinei continuât dai dirits sociâi e politics intal Paîs Basc e de politiche di ilegalizazion e ve dade ae Leç dai partîts e duncje a chês formazions politichis che le àn puartade indenant e che prime a jerin dentri intal Pat antiterorist che al è stât la fonde de politiche di ilegalizazion: ta chest sens, duncje, i responsabii a son il PP e il PSOE e, viodût che cumò al è al guvier, la responsabilitât principâl le à il PSOE e, cun lui, ancje i orghins de justizie spagnole che i stan daûr a cheste cuestion. Dut câs, la robe che e je dal dut sureâl, e che ducj chei che a jerin là a puedin testemoneâ, al è che ta chest paîs tai ultins agns e ancje tai ultins doi mês si à vût disinis, cuant che no centenârs, di manifestazions che a son stadis proibidis, ma in nissun câs il compuartament de Ertzaintza, ancje se dispès al jere disproporzionât, al è rivât al nivel, ae brutalitât, al macili che si à vût te manifestazion di sabide. Nô no vin nissun dubi che daûr di dut chest e je une decision politiche e che cheste decision no je stade cjapade a Madrid, si ben a Gasteiz o a Bilbao.

Pontade 02 07 (20/02/2007)

Paîs Basc: acuardi pal euskara tra CAB e Ufici de lenghe basche

Il guvier de Comunitât Autonome Basche e l’Ufici de lenghe basche dal Paîs Basc francês a àn sotscrit un acuardi di colaborazion pal svilup e pe promozion dal euskara, la lenghe basche. L’acuardi al previôt un investiment di un milion e 450 mil euros dilunc vie dal 2007, di chescj 450 mil metûts dal guvier de CAB. Tra lis iniziativis za in program si à il cuart rilevament sociolinguistic dal Paîs Basc. L’acuardi al varès di restâ in vore fin al 2010, ma al varà di jessi rignuvît an par an.

Gales: gnove leç linguistiche, petizion ae Assemblee Nazionâl

Une petizion cun passe 10 mil firmis e je stade presentade ai 6 di Fevrâr ae Assemblee Nazionâl Galese par domandâ une gnove leç di politiche linguistiche pal galês. A sburtâ la iniziative e je la Cymdeithas yr Iaith Gymraeg, la Societât pe lenghe galese, che za di timp e domande une gnove leç par incressi la presince dal galês inte societât. Ae presentazion a jerin i rapresentants di ducj i partîts de oposizion, ven a dî il Plaid Cymru, o sei il partît nazionalist galês, i Liberâi Democratics e i Conservadôrs. No si son fats viodi invezit i Laburiscj che in dì di vuê a son al guvier e che fin cumò no si son mostrâts masse disponibii a di une modifiche de legjislazion linguistiche in vore.

Gales: metût sù un centri pal bilinguisim

Il Consei pe ricercje sociâl e economiche, il Consei pe educazion superiôr dal Gales e il guvier galês a àn fat savê che a metaran cinc milions di sterlinis par meti in pîts un gnûf centri di ricercje pai studis sul bilinguisim. Il centri al sarà logât a Bangor, alì de Universitât dal Gales, e al varà di svilupâ studis sul bilinguisim, slargjâ la cognossince su chest argoment ancje a nivel internazionâl e formâ personâl specializât in chest setôr. Tra lis dissiplinis svilupadis ta cheste struture a saran la linguistiche, la psicologjie, la didatiche, ma ancje la neurosience.

Finlande: gnûf rapuart su la CCMN

Il Comitât dai ministris dal Consei de Europe al à dât fûr il so rapuart sul rispiet de Convenzion Cuadri pe protezion des Minorancis Nazionâls in Finlande. Intal document si ricognossin i sfuarçs fats de Finlande pe protezion des minorancis, massime chê svedese e chê sami, ma si marchin ancje i cantins là che al covente intervignî. Tra i ponts positîfs si à la gnove leç pe promozion dal svedês e de lenghe sami, la istituzion dal tutôr des minorancis e di uficis consultîfs regjonâi pai rom. Tra i ponts negatîfs, invezit, a son: i pidiments che lis personis russofonis si cjatin denant par acedi ai servizis; la scjarse presince di rus, romanès e, in cierts câs, ancje dal sami inte istruzion publiche; la dibisugne di incressi la presince des lenghis minoritariis intai mieçs di comunicazion. Un altri pont critic segnalât dal rapuart al è chel des causis in pîts sul ûs des tieris coletivis de comunitât sami.

Ongjarie: riforme dai organisims statâi pes minorancis

Cui 31 di Zenâr al è stât sierât l’Ufici pes minorancis etnichis e nazionâls che al jere in vore in Ongjarie, organisim autonom metût sù intal 1990 par viodi des problematichis leadis aes minorancis che a vivin inte republiche ongjarese. I compits di chest Ufici a son stâts cjapâts sù dal Dipartiment pes minorancis etnichis e nazionâls, che al dipent dal gabinet dal prin ministri. Dut câs cheste no je la uniche gnove che e interesse lis minorancis in Ongjarie. Cun di fat, di resint al è nassût il Consei pe integrazion dai rom, che al cjape il puest dal Comitât interministeriâl pai afârs rom e dal Consei dai rom. Il gnûf organisim al è formât di delegâts dal guvier ongjarês, dal president de Comunitât nazionâl autonome rom e di diviers rapresentants des comunitâts rom, e al è vuidât dal ministri pai afârs sociâi e pal lavôr, Péter Kiss.

Romanie: candidât ongjarês indipendent pal Parlament european

Tokes Laszlo, vescul de glesie cristiane riformade e membri di prin plan de comunitât ongjarese in Romanie, si presentarà tant che candidât indipendent pes elezions al Parlament european. A poiâ la sô candidature a son sîs organizazions civichis de comunitât ongjarese. La Union democratiche dai ongjarês de Romanie, organizazion di riferiment dai magjârs de Transilvanie, invezit, no à cjapât masse ben cheste decision e e à comentât che cheste candidature e sbasse lis pussibilitâts di viodi elet tal europarlament un rapresentant dai ongjarês de Romanie.

Pontade 01 07 (08/12/2006)

UE: il Comissari european pal plurilinguisim al spieghe la sô linie

Il gnûf Comissari european pal plurilinguisim, il rumen Leonard Orban, al à vût un incuintri, che al è pôc, cui membris dal Parlament di Strasburc: un incuintri che – come che e conte la agjenzie di stampe Eurolang – al è stât centrât soredut sul teme des lenghis minorizadis. Orban al à sigurât che al viodarà cun atenzion i risultâts dal Plan di azion pe promozion dal ûs des lenghis e de diviersitât linguistiche e i documents sul plurilinguisim prontâts des diviersis istituzions comunitariis, e che dentri de fin dal 2007 e sarà inmaneade une cunvigne ministeriâl par decidi cemût lâ indenant su chestis tematichis, di maniere di rivâ a di un gnûf Plan di azion pal 2008. Imparâ lenghis gnovis e difindi la diviersitât linguistiche – al à zontât – a son doi dai obietîfs dai programs di educazion continuative che a saran inviâts chest an che al ven e che, pe prime volte, a cjaparan dentri dutis lis lenghis feveladis te UE e ancje chês dai paîs extracomunitaris che si à i rapuarts comerciâi plui impuartants. Dut câs cuant che cualchi parlamentâr i à domandât alc di plui su la politiche par difindi lis lenghis minorizadis, Orban al à dite che la sô politiche e larà daûr di chê de Comission Europeane e che no si pues imponi chel stes nivel di tutele par ducj, dal moment che cheste materie e va lassade a ogni singul stât. Posizion che al à marcât ancje cuant che cualchidun i à fat notâ che cierts stâts a tibiin chestis lenghis. In ogni câs, al à dite che cul 2007 al intint di lavorâ par incressi i fonts a disposizions di organisims che si ocupin des lenghis minorizadis tant che l’EBLUL e la rêt Mercator.

Frisie: Omrop Fryslân sul satelit

Cun Novembar i programs televisîfs di Omrop Fryslân, la emitente radiotelevisive di riferiment pe lenghe frisone, si puedin viodi ancje sul satelit. Fint in chel lis sôs trasmissions televisivis si podeve viodilis dome inte provincie de Frisie, intai Paîs Bas. Chest salt al diven dal fat che cun Dicembar a saressin stâts fermâts i segnâi in analogjic di dutis lis televisions publichis neerlandesis. Il probleme al jere che tancj frisons a dipendevin propit di chest gjenar di segnâl par podê viodi Omrop Fryslân. Par fâ il passaç su satelit a coventavin un grum di bêçs che la television frisone no veve: dal moment che il bloc dal segnâl analogjic al jere stât cjapât dal guvier olandês, Omrop Fryslân e domandave che al fos chel a cuvierzi la spese. Il guvier dut c­âs al veve refudât di fâlu, almancul fin a pôc timp indaûr cuant che, cul cambi di guvier e je mudade ancje la politiche su cheste cuestion e la television frisone e à podût passâ sul satelit, rivant cussì ancje a chei frisons che a vivin fûr de Provincie de Frisie e, plui in gjenerâl, ator pe Europe.

Irlande dal Nord: pôre pe leç sul gaelic irlandês

E cres la preocupazion framieç dai citadins nordirlandês che a fevelin par gaelic pal destin de leç su la lenghe irlandese. Cun di fat, se la leç no sarà fate buine dentri dai 26 di Març si riscje che il proviodiment nol deventi realtât. Cheste date e je chê fissade dal Acuardi di Sant Andree par tornâ a meti in pîts il guvier nordirlandês che cumò, invezit, al è aministrât in maniere direte di Londre. Contrari di ce che cualchidun al podarès pensâ, di fat, ta chest câs la centralizazion dal podê al è un ben, dal moment che inte Assemblee nordirlandese si à un numar une vore alt di deputâts unioniscj che a son dal dut contraris a cualsisei ipotesi di tutele de lenghe irlandese. Par lôr, di fat, la lenghe proprie de Irlande e à di jessi bandide compagn di dut ce che al sa di irlandês, parcè che le metin sul stes plan dal IRA e dal moviment republican irlandês. Daûr dai acuardis di pâs, cence une poie significative de part unioniste une leç come cheste no pues jessi fate buine, duncje POBAL – o sei il coordenament des associazions a pro de lenghe gaeliche irlandese – e sburte par che il proviodiment al sedi fat bon dal Parlament di Londre, fintremai che al à ancjemò in man la gjestion direte des Sîs Conteis nordirlandesis. Par puartâ indenant la lôr bataie, chei di POBAL a àn domandât un incuintri cul prin ministri britanic Tony Blair e cul president irlandês Bertie Ahern, e a àn metût in rêt une petizion popolâr che si le cjate ae direzion www.petitiononline.com/acht .

Gales: campagne “la tô lenghe, un to dirit”

I galês a domandin di infuartî lis misuris pe tutele e pe promozion de lôr lenghe nazionâl. La campagne, inviade de Cymdeithas yr Iath Gymraeg, o sei la associazion pe lenghe galese, e ven puartade indenant cul slogan “Dy Iath, Dy Hawl”, ven a dî “la tô lenghe, un to dirit”. Cualchi zornade indaûr i rapresentants de associazion si son cjatâts cuntune delegazion dai partîts di oposizion de Assemblee nazionâl galese (Liberâi Democratics, Conservadôrs e Plaid Cymru, il partît nazionalist galês). I rapresentants politics a àn declarât di poiâ la propueste di leç pal galês fate indenant de Cymdeithas. Dut câs il sucès de mobilitazion al dipent soredut de rispueste de maiorance laburiste che e je cumò al guvier in Gales. A chest proposit, un incuintri tra i membris de associazion e il ministri pe culture, Alun Pugh, al varès di davuelzisi avonde in curt.